1. Mwanda waka Yehova i mwidingakanye na inabana wamisha?

“LELO mwana-mukaji ubwanya kwilwa mwana waamusha?” Kino i kipangujo kyobāipangwile mupolofeo Isaya kudi Yehova. Leza wāsapwidile bantu bandi amba: “Nansha shi bano bana-bakaji abailwa, ami nkikakwilwapo nansha dimo.” (Isa. 49:15) Aye kavudilepo kwidingakanya na inabana. Inoko pano wēdingakenye nandi. Yehova wātelele kipwano kidi pa bukata bwa inabana na wandi mwana mwanda wa kulombola’mba ulamete bengidi bandi bya binebine. Bainabana bavule babwanya kwiivwana na mweivwanine kaka Jasmin wanenene amba, “kitatyi kyoamisha obe mwana, mupwananga nandi kipwano kya nyeke.”

2. Le Yehova wiivwananga namani shi wandi mwana wamupaluka?

² Yehova uyukanga kitatyi kileka’byo wandi mwana kupwila ne kusapula. Langa’po bidi mobimusanshilanga pa kumona bengidi bandi tununu ne tununu kebakingilangapo * mwaka ne mwaka.

3. Le Yehova usakanga bika?

³ Bano batutu ne bakaka bavule kebakingilanga bajokelanga ku kipwilo, kwine kobebatundailanga na nsangaji! Yehova usakanga bajoke, ne batwe bene. (1 Pe. 2:25) Le tukebakwasha namani? Kumeso kwa kulondolola kino kipangujo, i biyampe tuyuke bine bilengejanga bantu bamo baleke kupwila ne kusapula.

4. Le kaji kabwanya kufikija bantu bamo ku bika?

⁴ Bamo batyinibwanga na twaji. Hung, * tutu umo ushikatanga Kunshi ne Kutunduka kwa Azia unena’mba, “Nadi mwielele bininge mu kami kaji. Nadi nena bya bulembakane amba shi ngikale na bintu bivule bya ku ngitu, nabya nsa kwingidila Yehova biyampe. Keñingila mansá mavule. Ebiya nashilula kubulwa kupwila kuvule, mfulo mfulō naleka’byo kupwila. Bimweka’mba ntanda idi na kitungo kya kupalula bityebitye bantu kudi Leza.”

5. Le kaka umo walongele namani pamutene makambakano malondakane?

⁵ Batutu ne bakaka bamo i balēmenenwe na makambakano. Anne wa mu Beletanye udi na bana batano. Unena’mba, “wami mwana umo wabutwilwe na bulema bukatampe. Kupwa wami mwana mwana-mukaji mukwabo wapangwa, mwana mukwabo mwana-mulume nandi wajinwa ñeni. Natyumukilwe mutyima bininge, naleka’byo kupwila ne kusapula. Mwenda mafuku, naleka’byo kwingila.” Bine, tubaivwanina Anne ne kisaka kyandi bulanda, enka ne bantu bakwabo bekonda na makambakano pamo bwa ano!

6. Le kubulwa kwingidija kisonekwa kya Bene Kolose 3:13, kwalengeje namani muntu umo apaluke bantu ba Yehova?

⁶ Tanga Bene Kolose 3:13. Bengidi bamo ba Yehova bebasanshijanga kudi banababo mu lwitabijo. Mutumibwa Polo wādi uyukile amba, kyaba kimo tubwanya kwikala na bubinga bwa kwikadila “na mwanda” na tutu nansha kaka. Babwanya padi kwitulongela bintu na bukondame. Shi ketutele’kopo mutyima tubwanya kulama kīji. Bulobo bubwanya kulengeja muntu apaluke bantu ba Yehova. Tulangulukilei bidi pa myanda yatene tutu Pablo, wa mu Amerika wa Kunshi. Bamusambile bya bubela amba i mulonge bubi, ebiya wajimija madyese andi mu kipwilo. Le walongele’po namani? Pablo unena’mba, “Nafītyilwe bininge, kupwa napaluka mu kipwilo.”

7. Le i bika bibwanya kufikila muntu ukambakanibwa na mutyima wa mundamunda?

⁷ Muntu wajilwile kijila kya Leza pa kala, ubwanya kukambakanibwa na mutyima wa mundamunda, kaemone amba Leza kabwanyapo kumusanswa. Nansha shi wesāshile ne kufwilwa lusa, ubwanya kwimona’mba kakifwaninwepo kwikala muntu wa Leza. Tutu Francisco nandi weivwene uno muswelo. Unena’mba, “natopekelwe pa mwanda wa busekese. Nansha byonaendelele kupwila kyaba ne kyaba, natyumukilwe mutyima nkenemone amba nkifwaninwepo kwikala mu bantu ba Yehova. Mutyima wami wa mundamunda wadi unkambakanya, kadi nadi nkulupile amba Yehova kandekēlepo. Mwenda mafuku, naleka’byo kupwila.” Le umonanga namani batutu ne bakaka bekonda na makambakano na otwesambila’po’a? Le wibevwaninanga lusa? Nakampata, le Yehova wibamwene namani?

8. Le Yehova wilwanga boba bamwingidile? Shintulula.

⁸ Yehova kelwangapo boba bamwingidile ino bapaluka bantu bandi mu kitatyi kampanda; kadi kelwangapo mingilo yobamwingidile. (Bah. 6:10) Mupolofeto Isaya wālembele kyelekejo kiyampe kilombola mukwatakenyanga Yehova bantu bandi. Isaya wālembele amba: “Ukatala luombe lwandi pamo bwa mukumbi. Ukabungila pamo twana twa mikōko na kuboko kwandi, kadi uketusela mu kyadi kyandi.”  (Isa. 40:11) Le Mukumbi mukatampe wiivwananga namani shi mukōko wandi ubapaluka mu luombe? Yesu wālombwele mwiivwaninanga Yehova pawāipangwile bandi bana ba bwanga’mba: “Le mulanga namani? Shi muntu udi na mikōko 100 ino kubajimina umo, abulwepo kushiya yoya 99 mu ngulu kaenda kukakimba owa umo wajimina? Kadi shi weutana, nemulombola na bubine amba, ukeusangela mpata kupita’ko yoya 99 yampikwa kujimina.”​—Mat. 18:12, 13.

9. Le bakumbi bayampe ba mu bitatyi byāsonekelwe Bible bādi batala namani mikōko yabo? (Tala kifwatulo pa kibalu.)

⁹ Mwanda waka i byendele’mo kudingakanya Yehova na mukumbi? Mwanda mukumbi muyampe wa mu bitatyi byāsonekelwe Bible wādi uta bininge mikōko yandi mutyima. Kimfwa, Davida wālwile na ntambo ne uluse mwanda wa kukinga luombe lwandi. (1 Sa. 17:34, 35) Mukumbi muyampe wādi ujingulula shi mukōko umo ubajimina. (Yoa. 10:3, 14) Uno mukumbi wādi ushiya mikōko 99 mu kipombo kiyampe nansha kushila’yo bakumbi bakwabo, wāenda kukakimba owa wajimina. Yesu wāingidije kino kyelekejo mwanda wa kwitufundija bubine bwa mvubu bwa amba: “Tata udi mūlu nandi kasangelangapo nansha umo wa mu bano batyetyetyetye oneke.”​—Mat. 18:14.

10. Mungya Ezekyele 34:11-16, le Yehova wālaile kulongela mikōko yandi mijimine bika?

¹⁰ Yehova witusenswe batwe bonso, kubadila’mo ne “batyetyetyetye” bapalukile mu luombe lwandi. Leza wālaile kupityila kudi mupolofeto Ezekyele amba, ukakimba mikōko yandi mijimine ne kwiikwasha ipwane nandi monka. Kadi wālombwele bya kulonga pa kwibapandija, bintu bine byādi bilonga mukumbi mwine Isalela shi mukōko ubajimina. (Tanga Ezekyele 34:11-16.) Dibajinji, mukumbi wādi ukimba mukōko, bine byādi bimulomba kitatyi kivule ne kulonga bukomo. Shi weusokola, wādi wiujokeja mu luombe. Ino shi mukōko i mutapwe bilonda nansha shi udi na nzala,  mukumbi wādi ukwatakanya uno nyema muzoze na buswe, wāmukuta bilonda, wāmusela ne kumudisha. Bakulumpe byobadi bakumbi ba “luombe lwa Leza,” bafwaninwe kulonga uno muswelo mwanda wa kukwasha muntu ye-yense upaluka mu kipwilo. (1 Pe. 5:2, 3) Bakulumpe bebakimbanga, bebakwasha bajokele mu luombe, ne kwibalombola buswe na kwibakwatakanya ku mushipiditu. *

11. Le mukumbi muyampe wādi uyukile bika?

¹¹ Mukumbi muyampe wādi uyukile amba mikōko ibwanya kujimina. Ino shi mukōko ubasasuka mu luombe, mukumbi kādipo wiususula. Twisambilei pa kimfwa kiletele Yehova Leza paākweshe bengidi bandi bamo bāsasukile kwadi mu kitatyi kampanda.

12. Le Yehova wālongēle Yona bika?

¹² Mupolofeto Yona wānyemene mwingilo wandi. Nansha nankyo, Yehova kālekelepo Yona bukidibukidi. Pamo bwa mukumbi muyampe, Yehova wāmupandije, wāmukwasha ekale monka na bukomo bwasakilwa pa kuvuija mwingilo wandi. (Yona 2:7; 3:1, 2) Kupwa, Leza wāingidija mulundu wa mungu mwanda wa kukwasha Yona evwanije amba būmi bwa muntu yense budi na mvubu. (Yona 4:10, 11) Le i ñeni’ka yotuboila’ko? Bakulumpe kebafwaninwepo kuleka bukidibukidi boba kebakingilangapo. Ino bakalonga bukomo bwa kwivwanija kine kyalengeja mukōko upaluke mu luombe. Kadi shi mukōko ubajokela kudi Yehova, bakulumpe bakendelela kwiuta mutyima na buswe.

13. Le i ñeni’ka yotubwanya kuboila ku byālongele Yehova mu mwanda wa mulembi wa Ñimbo ya Mitōto 73?

¹³ Mulembi wa Ñimbo ya Mitōto 73 wātyumukilwe mutyima pa kumona bantu babi bamona biyampe. Wātatana kamweno kadi mu kulonga kiswa-mutyima kya Leza. (Ñim. 73:12, 13, 16) Le Yehova wālongele’po namani? Kāmutopekelepo. Ino, Leza wālembeje binenwa bya uno mwana-mulume mu Bible. Mwenda mafuku, uno  mulembi wa mitōto wājingulula’mba kupwana na Yehova kudi na mvubu kutabuka kintu kyo-kyonso, kulumbululanga būmi bwa muntu. (Ñim. 73:23, 24, 26, 28) Le i ñeni’ka yotuboila’ko? Bakulumpe kebafwaninwepo kutyibila mambo bukidibukidi boba bashilula kutatana kamweno kadi mu kwingidila Yehova. Pa kyaba kya kwibatopeka, bakulumpe bafwaninwe kulonga bukomo bwa kwivwanija kine kyobanenena ne kulonga kintu mu muswelo kampanda. Nabya bakulumpe bakabwanya kwibakankamika na Bisonekwa.

14. Mwanda waka Ediya wādi usakilwa bukwashi, ne Yehova wāmukweshe namani?

¹⁴ Mupolofeto Ediya wānyemene Yezebele Mukaja Mulopwe. (1 Ba. 19:1-3) Wālangile amba kekwādipo mupolofeto mukwabo wādi wingidila Yehova, ne kulanga’mba mwingilo wandi kewādipo na mvubu. Ediya wātyumukilwe mutyima bininge kasake afwe. (1 Ba. 19:4, 10) Pa kyaba kya kutopeka Ediya, Yehova wāmukulupije amba kadipo bunka bwandi, wādi ubwanya kukulupila mu bukomo bwa Leza, ne amba kwādi kukidi mingilo mivule ya aye kwingila. Yehova wātejeje na buswe milangwe ya Ediya, kupwa wamupa mingilo mikwabo. (1 Ba. 19:11-16, 18) Le i ñeni’ka yotuboila’ko? Batwe bonso, nakampata bakulumpe, tufwaninwe kulongela mikōko ya Yehova bintu na buswe. Shi muntu i mulobe nansha shi ulanga’mba Yehova kabwanyapo kumufwila lusa, bakulumpe bakamuteja paebalombola mwawiivwanina. Kupwa bakalonga bukomo bwa kukulupija mukōko mujimine amba Yehova umumwene na mvubu.

15. Mungya Yoano 6:39, le Yesu wādi umwene mikōko ya Shandi namani?

¹⁵ Le Yehova usakanga tumone mikōko yandi mijimine namani? Yesu wētushidile kimfwa kya kulondela’po. Wādi uyukile amba mikōko yonso ya Yehova i milēme ku meso a Leza, o mwanda Yesu wālongele bukomo bwa kukwasha “mikōko mijimine ya njibo ya Isalela” ijokele kudi Yehova. (Mat. 15:24; Luka 19:9, 10) Yesu byaādi mukumbi muyampe, wālongele bukomo bwa kuleka kujimija mukōko nansha umo wa Yehova.​—Tanga Yoano 6:39.

16-17. Le bakulumpe bafwaninwe kulangulukila namani pa kukwasha boba bapalukile? (Tala kapango kanena’mba “ Le Mukōko Mujimine Ubwanya Kwiivwana Namani?”)

¹⁶ Mutumibwa Polo wāsoñenye bakulumpe ba kipwilo kya mu Efisesa beule kimfwa kya Yesu. Wēbanenene amba, mufwaninwe kukwasha “boba bakōkekōke, ne kuvuluka binenwa bya Mfumwetu Yesu, wanenene aye mwine amba: ‘Nsangaji ya kupāna itabukile ya kupebwa.’” (Bil. 20:17, 35) Na bubine, dyalelo bakulumpe badi na mwingilo mukatampe mu uno mwanda. Salvador, mukulumpe wa mu Eshipanye unena’mba, “kulangulukila pa muswelo ukwatakanyanga Yehova mikōko yandi mijimine, kunengejanga nonge bukomo bwa kwiikwasha. Byondi mukumbi mu kipwilo, nkulupile amba Yehova unsakilanga nkwatakanye mikōko yandi.”

¹⁷ Bonso bapalukile batelelwe mu kino kishinte, bakwashibwe mwanda wa bajokele kudi Yehova. Ne pano pene, bantu bavule bapalukile basakanga kujokela kwadi. Kishinte kilonda’ko kikesambila pa bintu bivule byotubwanya kulonga pa kwibakwasha bajokele kudi Yehova.