Ano mavese i matele ngikadila kitema ya bwine Kidishitu: “Kipa kya mushipiditu i buswe, nsangaji, ndoe, kitūkijetyima, kanye, buyampe, lwitabijo, kutalala, kwīfula.” Inoko, ketufwaninwepo kumona’mba ino ngikadila yo ngikadila milumbuluke kete yotubwanya kwikala nayo kupityila ku mushipiditu wa Leza.

Mutumibwa Polo wālembele mu mavese abadikile amba: “Mingilo ya ngitu . . . i busekese, disubi, kwiendeja pampikwa bumvu, butōtyi bwa bilezaleza, majende, nshikani, ñuma, mukao, bulobo bupitepite, kwilalulula, nkalañani, tubitango, kwabilaabila, bunkolwankolwa, mafetyi mabimabi, ne bintu bidi namino.” (Ngt. 5:19-21) Nanshi Polo wādi ubwanya kutela bintu bikwabo bibadilwa mu “mingilo ya ngitu,” kimfwa na byobya bitelelwe mu Bene Kolose 3:5. Ne kadi, pa kupwa kutela ngikadila miyampe kitema, wānenene amba: “Bintu bidi namino kebidipo na kijila.” Nanshi Polo kātelelepo ngikadila yonso milumbuluke yotubwanya kwikala nayo na bukwashi bwa mushipiditu ujila.

Tubwanya kwivwanija kino shi tudingakanye bino binenwa na byobya byobālembēle kipwilo kya mu Efisesa kudi Polo amba: “Kipa kya kitōkeji i miswelo yonso ya buyampe ne boloke ne bubine.” (Ef. 5:8, 9) Bine, “buyampe,” pamo ne boloke ne bubine, bubadilwa mu “kipa kya kitōkeji,” ino kadi bubadilwa ne mu “kipa kya mushipiditu.”

Mu muswelo umo onka, Polo wāsoñenye Temote alondelonde “boloke, bwine Leza, lwitabijo, buswe, kūminina, ne kutalala”​—ngikadila isamba milumbuluke. (1 Tm. 6:11) I enka ngikadila isatu (lwitabijo, buswe, ne kutalala) ibadilwa mu “kipa kya mushipiditu.” Inoko Temote wādi usakilwa ne kukwashibwa na mushipiditu pa kwikala na ngikadila mikwabo itelelwe, kimfwa: boloke, bwine Leza, ne kūminina.​—Dingakanya na Bene Kolose 3:12; 2 Petelo 1:5-7.

Nanshi, Bene Ngalatea 5:22, 23 katelelepo ngikadila yonso ya bwine Kidishitu. Mushipiditu wa Leza ubwanya kwitukwasha twikale na ngikadila kitema itelelwe bu “kipa kya mushipiditu.” Inoko kudi ngikadila mivule yotufwaninwe kutamija potwenda tutama ku mushipiditu ne “kuvwala bumuntu bupya bwapangilwe mwendele kiswa-mutyima kya Leza mu boloke ne lulamato lwa binebine.”​—Ef. 4:24.