1. Le Yehova wiivwananga namani shi mukōko wandi ubajoka?

ENKA motwēsambidile mu kishinte kibadikile, Yehova i mwidingakanye na mukumbi muyampe utele mikōko yandi mutyima bya binebine. Kadi ukimbanga muntu ense upalukile. Yehova wāsapwidile bene Isalela bāpalukile kwadi amba: “Jokelai kondi, nami nkajokela komudi.” Tuyukile amba ukiivwananga uno muswelo mwanda aye unena’mba: “Nkyalamukangapo.” (Mal. 3:6, 7) Yesu wānenene amba, Yehova ne bamwikeulu basangalanga shi mwingidi wandi mupaluke wajokela kwadi.​—Luka 15:10, 32.

2. Le i bika byotusa kwisambila’po mu kino kishinte?

² Twisambilei’ko bidi pa byelekejo bisatu byāletele Yesu bya mwa kukwashisha boba bapalukile kudi Yehova. Tusa kwisambila ne pa ngikadila yotufwaninwe kwikala nayo pa kukwasha mikōko mijimine ijokele kwadi. Kadi tusa kumona kine kinenenwa’mba kulonga bukomo bwa kukwasha boba bakōkekōke kudi na mvubu.

3-4. Mwanda waka mwana-mukaji utelelwe mu Luka 15:8-10, wākimbile biyampe ndakuma yandi mijimine?

³ Tufwaninwe kulonga bukomo bwa kusokola boba basaka kujokela kudi Yehova. Mu lukindi lulembelwe mu Evanjile ya Luka, Yesu ulombola’mo mwana-mukaji ukimba kintu kya bulēme kyājimine​—kityele kya ndakuma. Kino kyelekejo kitukwasha tukimbe boba kebakingilanga.​—Tanga Luka 15:8-10.

⁴ Yesu ulombola mwēivwanine mwana-mukaji paāsokwele kityele kilēme kya ndakuma kyādi kijimine. Mobimwekela, mu mafuku a Yesu, bainabana bamo Bayuda bādi bapa mwana mwana-mukaji bityele dikumi bya ndakuma mu difuku dyandi dya butundaile. Padi kino kityele kyādi kya mu bino bityele.  Mwana-mukaji wālangile amba kino kityele i kiponene pa nshi. Ebiya waakija kinanu kaekikimbe, ino kwikisokola mpika. Padi kinanu kya māni kekyādipo kimunika biyampe mwa kusokwela kakityele ka ndalama. Ku mfulo wākomba biyampe mu njibo monso. Wāsokola’mo ndakuma yandi milēme mu luvumbi, yeñenya na kitōkeji kya kinanu kyandi. Bine wāsangele! Wāita balunda nandi ne balondakani, wēbasapwila uno mwanda muyampe.

5. Mwanda waka bibwanya kwikala bikomo kusokola boba bapalukile ku kipwilo?

⁵ Monka motwekimwena mu kyelekejo kya Yesu, bilombanga kulonga bukomo pa kusokola kintu kijimine. Netu, tufwaninwe kulonga bukomo bwa kukimba boba bapalukile ku kipwilo. Padi ke papite myaka mivule na pobetupalukile. Bibwanika padi ke bavilukile ku kifuko kikwabo kekwibayukilepo banabetu badi’ko. Inoko mu kino kitatyi, banabetu bamo kebakingilanga babilanga kujokela kudi Yehova. Basakanga kwingidila Yehova pamo na kisaka kyandi kya batōtyi ba bine, ino basaka twibakwashe.

6. Le bantu bonso mu kipwilo babwanya kukwasha’ko namani pa kukimba boba kebakingilanga?

⁶ Lelo i ani wa kukimba boba kebakingilanga? Batwe bonso​—bakulumpe, bapania, bantu ba mu kisaka, ne basapudi mu kipwilo​—tubwanya kukwasha’ko pa kwibasokola. Lelo udi na mulunda nansha mubutule kakingilanga? Lelo wetene na muntu kakingilanga mu busapudi bwa ku njibo ne njibo nansha mu busapudi bwa mu bantu bavule? Shintulwila uno muntu amba shi usaka kupempulwa, nabya ukasangela kupa bakulumpe ba kyenu kipwilo adelese yandi.

7. Le i ñeni’ka yowaboila ku bintu byanenene mukulumpe umo witwa bu Thomas?

⁷ Le i bintu’ka bibwanya kulonga bakulumpe pa kusokola boba basaka kujokela kudi Yehova? Tutalei byanenene mukulumpe umo witwa bu Thomas, * ushikatanga mu Eshipanye. Ke mukwashe Batumoni 40 ne kupita bajokele mu kipwilo. Thomas unena’mba: “Dibajinji, ngipangulanga batutu ne bakaka shi bayukile kushikete banabetu kebakingilanga. Nansha kwipangula basapudi shi bayukile’ko muntu kakipwilangapo. Bantu bavule mu kipwilo basangelanga kunombola’bo mwanda bayukile amba nabo batalwa na mwingilo wa kwibakimba. Kadi, kitatyi kyompempulanga batutu ne bakaka kebakingilanga, nebepangulanga mwikadile babo bana ne babutule babo bakwabo. Bantu bamo kebakingilanga bādi na kibidiji kya kwiya na babo bana ku kupwila, ne kadi bano bana bādi padi basapudi mu kitatyi kampanda. Nabo tubwanya kwibakwasha bajokele kudi Yehova.”

8. Le mu kyelekejo kya mwana mujimine kidi mu Luka 15:17-24, le shabana wālongēle wandi mwana wēsāshile bika?

⁸ Le tufwaninwe kwikala na ngikadila’ka pa kukwasha boba basaka kujokela kudi Yehova? Tutalei ñeni imoimo yotubwanya kuboila ku kyelekejo kya Yesu kya mwana moneke wānyemene ku njibo. (Tanga Luka 15:17-24.) Yesu ulombola mweālwijije mwana, wākwata butyibi bwa kujokela ku njibo. Shandi wākatundaile wandi mwana lubilo, wāmupamba bīpa, wākulupija mwana’mba umusenswe. Mwana wādi ukambakanibwa na mutyima wa mundamunda ne kwimona bu kafwaninwepo kutelwa bu mwana. Mwana pa kumulombola mwawiivwanina, shandi wāmwivwanina lusa. Kupwa shandi walonga bintu bikulupija mwana amba wamutambula ku njibo, ke bu muntu wa kajipo, ino bu muntu musanshibwe mu kisaka. Pa kulombola’mba i musanshibwe, shandi  wāteakanya masobo, wāpa ne wandi mwana wēsāshile bisandi bilumbuluke.

9. Le i ngikadila’ka yotufwaninwe kwikala nayo pa kukwasha boba kebakingilanga bajokele kudi Yehova? (Tala kapango kanena’mba, “ Mwa Kukwashisha Boba Basaka Kujoka.”)

⁹ Yehova udi pamo bwa shabana wa mu kino kyelekejo. Usenswe batutu ne bakaka kebakingilanga, kadi usakanga kwibakwasha bajokele kwadi. Shi twiule Yehova, nabya tukabwanya kwibakwasha bajoke. Ino bitulomba kwikala na kitūkijetyima, kwitūla pa kyabo kyaba ne kwibasanswa. Mwanda waka tufwaninwe kulombola ino ngikadila, ne tukeilombola namani?

10. Le kitūkijetyima kidi na kamweno’ka pa kukwasha muntu ajokele kudi Yehova?

¹⁰ Tufwaninwe kwikala na kitūkijetyima, mwanda bilombanga kitatyi pa kukwasha muntu ajokele kudi Yehova. Bantu bavule badi kebakingilangapo banenene amba, bashilwile kwingila enka pa kupwa kupempulwa misunsa mivule na bakulumpe ne bantu bakwabo mu kipwilo. Nancy, kaka umo wa Kunshi ne Kutunduka kwa Azia, walembele amba: “Mulunda nami wa pa mutyima mu kipwilo ye waunkweshe bininge. Wadi munsanswe pamo bwa kaka wandi wa ku mashi. Waumvulwije bitatyi biyampe byotwadi tushikatyila pamo pa kala. Wadi unteja na kitūkijetyima ponadi mulombola moneivwanina, kadi kadipo wikaka kundingila. Welombwele bu mulunda wa bine, unkwasha kyaba kyonso.”

11. Mwanda waka tufwaninwe kwikala na lusa pa kukwasha muntu mulobe?

¹¹ Lusa ludi pamo bwa māni a kundapa nao, lukokeja kukwasha muntu eivwane biyampe. Banabetu bamo kebakingilanga i balobele mu myaka mivule muntu webasanshije mu kipwilo. Buno bulobo i bwibalengeje  baleke kujokela kudi Yehova. Padi bamo bamwene amba bebalongēle bintu na bukondame. Basakilwa padi muntu wa kwibateja ne wivwanija mwine mobeivwanina. (Yak. 1:19) María walekele’byo kwingila mu kitatyi kampanda unena’mba, “Nadi nsaka muntu wa kunteja, wa kunsenga, ne wa kunkwasha na madingi.”

12. Leta kimfwa kilombola’mba buswe bwa Yehova bukwashanga boba kebakingilanga bajokele mu bantu bandi.

¹² Bible unena’mba buswe bobasenswe bantu kudi Yehova budi pamo bwa monji. Le buswe bwa Leza budi pamo bwa monji mu buluji’ka? Tulangulukilei pa kino kimfwa: Langa’po bidi shi ubaponena pa dijiba dikatampe, ebiya muntu kampanda wakwela jilé ya kulela nayo. Bine, ukasangela buno bukwashi mwanda jilé ikakukwasha ulele senene. Inoko ke enkapo ino jilé ikakupandija. Mwanda mema adi na mashika, ne kadi ukapanda enka shi ubafika ku bwato bwa kukwabula. Ukasakilwa muntu wa kukwela monji ne kukukokela ku bwato. Yehova wānenene pa mwanda wa bene Isalela bāpalukile kwadi amba: “Nadi nebakoka . . . na myonji ya buswe.” (Hos. 11:4) Dyalelo nadyo Leza ukokanga uno muswelo boba baleka’byo kumwingidila kadi balēmenenwe na makambakano ne kuzumbija mutyima. Usakanga bayuke amba wibasenswe, kadi usakanga bajokele kwadi. Kadi Yehova ubwanya kukwingidija wibalombole buno buswe.

13. Tela mwanda mumweke ulombola’mba buswe bwa bubana na bana budi na mvubu.

¹³ I biyampe kukulupija boba kebakingilanga’mba Yehova wibasenswe, ne amba netu twibasenswe. Pablo otwatelele mu kishinte kibadikile, walekele’byo kwingila mu  myaka 30 ne kupita. Unena’mba: “Difuku dimo lubanga ponadi tamba ku njibo, twetene na kaka umo mununu wa kanye, wesamba nami na buswe. Nadila’nka bwa mwana mutyetye. Namulombola’mba, bidi pamo bwa Yehova wakutuma kwisamba nami. Kino kyo kitatyi kyonakwete butyibi bwa kujokela kudi Yehova.”

14. Kukwatañana na kyelekejo kidi mu Luka 15:4, 5, le mukumbi wālongele bika paāsokwele mukōko mujimine?

¹⁴ Tufwaninwe kukwasha kyaba ne kyaba banabetu kebakingilanga. Pamo bwa mwana mujimine wa mu kyelekejo kya Yesu, babwanya kwikala na kyaso ku mutyima. Kadi padi i bakōke ku mushipiditu pa mwanda wa bintu byobemwenine mu ntanda ya Satana. Tufwaninwe kwibakwasha baningije monka lwitabijo lwabo mudi Yehova. Mu kyelekejo kya mukōko mujimine, Yesu i mulombole’mo amba mukumbi wāselele mukōko pa mapuji ne kwiujokeja mu luombe. Mukumbi wājimije kitatyi ne bukomo pa kusokola mukōko mujimine. Inoko wādi uyukile amba ufwaninwe kwiujokeja mu kipombo mwanda keudipo na bukomo bwa kwijokela ao mwine.​—Tanga Luka 15:4, 5.

15. Le i muswelo’ka otubwanya kukwasha boba bakōkekōke basaka kujokela kudi Yehova? (Tala kapango kanena’mba, “ Kingidilwa kya Mvubu Mpata.”)

¹⁵ Tufwaninwe padi kwitūdila’ko kitatyi ne kulonga bukomo bwa kukwasha banabetu bamo kebakingilanga banekenye bukōkekōke bwabo. Ino na bukwashi bwa mushipiditu wa Yehova, Kinenwa kyandi, ne mabuku obetupa ku kipwilo, tubwanya kwibakwasha baningije monka kipwano kyabo na Yehova. (Loma 15:1) Le Tukebakwasha namani? Mukulumpe umo wa bwino unena’mba, “Banabetu bavule kebakingilanga basakilwa  kwifunda nabo Bible kitatyi kyobakwata butyibi bwa kujokela kudi Yehova.” * Shi abakunena kwifunda na muntu kakingilanga, ubulwepo kwitabija dino dyese? Kadi uno mukulumpe unena’mba, “Musapudi wifunda na muntu kakingilanga ufwaninwe kwikala mulunda muyampe, muntu obabwanya kukulupila kudi yewa kakingilanga.”

16. Le tubayuka namani amba bamwikeulu babwanya kwitukwasha?

¹⁶ Myanda mimweke mivule ilombola’mba bamwikeulu bengilanga netu pamo mwanda wa kwitukwasha tusokole boba kebakingilanga basaka kujokela kudi Yehova. (Kus. 14:6) Kimfwa, Silvio, wa ku Ekwatere, wadi ulombela na kininga mwanda wa ajokele ku kipwilo. Aye ukilombela, ñengele ya ku kibelo yavuma. Bakulumpe babidi bafika ku yandi njibo. Mu buno bupempudi, bakulumpe basangedile kumupa bukwashi bwasakilwa.

17. Le i mpalo’ka yotupalwanga potukwasha boba bakōkekōke ku mushipiditu?

¹⁷ Tukekala na nsangaji mikatampe potukwasha boba bakōkekōke ku mushipiditu bajokele kudi Yehova. Salvador pania umo utele mutyima bininge boba kebakingilanga unena’mba: “Kyaba kimo, ndilanga impolo ya nsangaji. Binsangajanga bininge pa kuyuka’mba Yehova wanyongolola mukōko wandi mulēme mu ntanda ya Satana ne amba ngidi na dyese dya kwingila nandi pamo mu uno mwingilo.”​—Bil. 20:35.

18. Shi kukingilangapo, le i bika byobwanya kukulupila?

¹⁸ Shi wasāsukile mu bantu ba Yehova, ubwanya kukulupila’mba Yehova ukikusenswe. Aye usakanga ujokele kwadi. Kudi byofwaninwe kulonga pa kujokela kwadi. Inoko pamo bwa shabana wa mu kyelekejo kya Yesu, Yehova utengēle ujokele kwadi, kadi ukakutundaila na nsangaji.