“Kitatyi kyadi kimpotomeja mwanetu, nadi mukwata mu midibu, namufina lukono. Nadi nsaka kumwipaya.”​—Paul.

“Ku njibo, nadi ndoba pa kamwanda’tu katyetye. Nadi ndala bipungwa bya mu njibo, bintu bya kukaya nabyo, ne kintu kyonso kyonadi nkwata ku makasa.”​—Marco.

Padi batwe ketubwanyapo kulonga namino. Inoko, batwe bonso tukomenwanga kwīfula kyaba kimo. Mwanda twi bapyane bubi kudi muntu mubajinji Adama. (Loma 5:12) Bantu bamo, pamo bwa Paul ne Marco, bakomenwanga kutalaja bukalabale bwabo. Bakwabo nabo bakomenwanga padi kulama milangwe yabo. Bekalanga nyeke na moyo nansha kukambakanibwa na milangwe mibi. Bangi nabo babwanya kumona’mba i bikomo kukomena busekese, kutoma mālwa, nansha ke kutoma bitomibwa bikolwañana.

Boba kebatelepo mutyima ku milangwe yabo, ku byakusakasaka byabo, ne ku bilongwa byabo babwanya kona būmi bwabo. Inoko tubwanya kwepuka kino kyaka. Namani? Na kwīfula. Pa kwīfula, twisambilei bidi pa bino bipangujo bisatu: (1) Le kwīfula i bika? (2) Mwanda waka kudi na kamweno? (3) Le i muswelo’ka otubwanya kwikala na ino ngikadila ibadilwa mu “kipa kya mushipiditu”? (Ngt. 5:22, 23) Kupwa tusa kwisambila pa byotubwanya kulonga shi tubakomenwa kwīfula kyaba kimo.

Muntu wīfula kaloñangapo bintu na kansontomokela. Ino ulekanga kunena ne kulonga bintu mu muswelo ufītyija Leza mutyima.

Yesu wētulombwele mushintulwila kwīfula. Bible unena’mba: “Pobadi bamutuka mutonko, kadipo waluja mutonko. Paadi ususuka, kadipo ukanina muntu, ino wadi witūla mu makasa a Yewa mwine utyibanga mambo moolokele.” (1 Pe. 2:23) Yesu wēfudile kitatyi kyāmufutulwile balwana pobāmukobekele ku mutyi wa masusu. (Mat. 27:39-44) Wālombwele dibajinji kwīfula kukatampe pākimbile bendeji babi ba bipwilo kumukwatyila ku binenwa. (Mat. 22:15-22) Bine, wētushidile kimfwa pāboile Bayuda bakalabele mabwe a kumwasa! Pa kyaba kya kwaluja kinongo, “Yesu wafyama ne kutamba watamba mu tempelo.”​—Yoa. 8:57-59.

Le tubwanya kwiula kimfwa kya Yesu? En-en, tubwanya kumwiula mu ludingo kampanda. Mutumibwa Petelo wālembele amba: “Kidishitu mwine wemususukīle, wemushila kimfwa mwanda wa mulonde senene mu mayo andi.” (1 Pe. 2:21) Nansha byotudi bampikwa kubwaninina, tubwanya kulonda senene kimfwa kya Yesu kya kwīfula. Mwanda waka bidi na mvubu kulonga namino?

Tufwaninwe kwīfula pa kwitabijibwa na Yehova. Nansha shi ketudi bengidile Yehova na kikōkeji mu kitatyi kilampe, tubwanya kujimija kipwano kyotupwene nandi shi ketutelepo mutyima ku byotunena ne byotulonga.

Tulangulukilei padi Mosesa, “wadi muntu mwityepeje kutabuka bantu bonso ba pano pa ntanda” mu kine kitatyi’kya. (Umb. 12:3) Pa kupwa kūminina na kitūkijetyima mitompwe ya bene Isalela mu myaka mivule, Mosesa wākomenwe kwīfula. Wālobele pobāmutompwedile monka pa mwanda wa kubulwa mema. Wānenene bantu na bulobo amba: “Pano ivwanai, banwe bantomboki! Le twimutambijije mema ku kino kidibwe?”​—Umb. 20:2-11.

Mosesa wākomenwe kwīfula. Kātumbijepo Yehova, mwine wāletele mema mu kingelengele. (Ñim. 106:32, 33) Mfulo mfulō, Yehova wāmupelela kutwela mu Ntanda ya Mulao. (Umb. 20:12) Padi Mosesa wēalakenye pa kubulwa kwīfula kufika ne difuku dyaāfwile.​—Kup. 3:23-27.

Le i ñeni’ka yotuboila’ko? Nansha shi ketudi beje mu bubine, ketufwaninwepo nansha dimo kwisamba bya kibengo ku boba betusanshija nansha boba basakilwa kulemununwa. (Ef. 4:32; Kol. 3:12) Shako, potwenda tutama, tubwanya kyaba kimo kubulwa kitūkijetyima. Ino tuvulukei Mosesa. Ketufwaninwepo kona mwingilo wetu wa kikōkeji pa mwanda wa kukomenwa kwīfula. Le i bika byotukalonga pa kwikala na ino ngikadila ya kamweno?

Lomba mushipiditu ujila. Mwanda waka? Mwanda kwīfula kubadilwa mu kipa kya mushipiditu wa Leza, kadi Yehova upānanga mushipiditu wandi ku boba bamulomba’o. (Luka 11:13) Kupityila ku mushipiditu wandi, Yehova ubwanya kwitupa bukomo botusakilwa. (Fid. 4:13) Kadi ubwanya kwitukwasha twikale ne na ngikadila mikwabo ibadilwa mu kipa kya mushipiditu, kimfwa buswe, bwine buketukwasha twīfule bininge.​—1 Ko. 13:5.

Tyina kintu kyo-kyonso kibwanya kukulengeja ukomenwe kwīfula. Kimfwa, dyumuka masite a Entelenete ne kwipwija mukose kulombola bilongwa bibi. (Ef. 5:3, 4) Na bubine, tufwaninwe kunyema kintu kyo-kyonso kibwanya kwitulengeja tulonge bibi. (Nki. 22:3; 1 Ko. 6:12) Kimfwa, muntu udi na mutyima  ulēmenene ku kulonga busekese, ufwaninwe kupela mabuku ne mafilime a bya bukena.

Padi tubwanya kumona’mba i bikomo kulonda ano madingi. Inoko, shi twikankile’ko, Yehova uketupa bukomo botusakilwa pa kwīfula. (2 Pe. 1:5-8) Uketukwasha twīfule mu milangwe, mu binenwa, ne mu bilongwa. Monka motwamwenanga, ba Paul ne Marco botwatelanga, abo bonso bataleje bukalabale bwabo. Twisambilei bidi ne pa tutu umo uvudile kuloba paendeja motoka, nansha kwifunina na bashofele bakwabo. Le wālongele bika pa uno mwanda? Unena’mba, “nadi nombela bininge difuku ne difuku. Nadi nefunda bishinte bīsambila pa kwīfula ne kukwatyila pa mutwe bisonekwa bya mu Bible bya kunkwasha. Nansha byonalongele uno muswelo mu bula bwa myaka, bikinkwashanga nshilule difuku na kitungo kya kwikala talala. Kadi pa kwenda ku mingilo, ntalukanga kumeso kwa kitatyi kutyina na kepangila ketwipotomeja na bakwetu.”

Kyaba kimo, tukakomenwa kwīfula. Shi tubakomenwa kwīfula, tubwanya kwivwana bumvu bwa kulomba Yehova. Inoko kino kilongekanga kitatyi kyotusaka kulombela. O mwanda lomba Yehova ponka na ponka. Muzenze akulekele, akukwashe, kadi sumininwa kuleka kujokela mu kilubo kimo kyonka. (Ñim. 51:9-11) Yehova kakabulwepo kwivwana milombelo yolomba kufwilwa lusa. (Ñim. 102:17) Mutumibwa Yoano wituvuluja’mba, mashi a Mwanā Leza “etutōkejanga ku bubi bonso.” (1 Yo. 1:7; 2:1; Ñim. 86:5) Vuluka’mba Yehova i musoñanye bengidi bandi belekele kyaba ne kyaba. Nanshi tubwanya kukulupila’mba netu uketulekela.​—Mat. 18:21, 22; Kol. 3:13.

Mosesa paābudilwe kwīfula mu kitatyi kampanda mu ntanda mutuputupu, Yehova wāfītyilwe. Inoko Yehova wāmulekēle. Kadi Kinenwa kya Leza kitela Mosesa bu kimfwa kilumbuluke kya muntu wa lwitabijo. (Kup. 34:10; Bah. 11:24-28) Yehova kālekelepo Mosesa atwele mu Ntanda ya Mulao, inoko ukamutweja mu Paladisa pano pa ntanda ne kumupa dyese dya kwikala’ko nyeke. Netu tubwanya kwikala na dino dyese shi tulonge bukomo bwa kwikala nyeke na ino ngikadila ya kamweno ya kwīfula.​—1 Ko. 9:25.