1. Mwanda waka kitatyi kimo bengidi ba Yehova babwanya kwimona bu badi bunka?

BAVULE mu bukata mwetu bemonanga bu badi bunka kyaba kimo. Ku bamo ino milangwe keijengapo yapwa. Ku bakwabo nako ino milangwe ījanga kitatyi kilampe. Tubwanya kwimona bu tudi bunka nansha shi tudi na bantu. Bamo bakomenwanga kusokola balunda mu kipwilo kipya. Bakwabo nabo badi mu kisaka mobapwene bininge, bemonanga bu badi bunka shi abaenda kulampe na kyabo kisaka. Bakwabo nabo bafwidilwe baswe babo bebalañanga bininge. Bene Kidishitu bamo, nakampata boba bayukile bubine panopano, bemonanga bu badi bunka kitatyi kyobebapela nansha kyobebapangapanga kudi bantu ba mu kyabo kisaka ne balunda bampikwa kwitabija.

2. Le i bipangujo’ka byotusa kulondolola?

² Yehova uyukile kadi wivwanije kanda ne kanda ketutala. Kitatyi kyotwimona bu tudi bunka, aye uyukile ne kadi usakanga kwitukwasha tutalule ino milangwe. Le Yehova witukwashanga namani? I bika byotubwanya kulonga batwe bene pa kutalula ino milangwe? Le i muswelo’ka otubwanya kukwasha bakwetu mu kipwilo bemona bu badi bunka? Pano tulondololei bino bipangujo.

3. Le Yehova wālombwele namani amba utele Ediya mutyima?

³ Yehova usakilanga batōtyi bandi bonso bekale biyampe. Udi pabwipi na muntu ne muntu kadi umonanga kitatyi kyotulēmenenwa na milangwe ya kutyumukwa mutyima.  (Ñim. 145:18, 19) Pano tutalei Yehova mwaātedile mupolofeto Ediya mutyima. Uno mwana-mulume wa kikōkeji wāikele’ko mu bitatyi bikomo bya mu mānga ya Isalela. Batōtyi ba Yehova bādi bapangwapangwa bininge, kadi balwana na Leza bādi bakimba kwipaya Ediya. (1 Ba. 19:1, 2) Kintu kikwabo kyādi kibwanya kukambakanya Ediya i kulanga’mba wāshele’ko mupolofeto bunka bwandi wingidila Yehova. (1 Ba. 19:10) Bukidi bonka Leza wālonga’po kintu mwanda wa kukwasha Ediya. Yehova wātuma mwikeulu mwanda wa kukulupija mupolofeto wandi amba kadipo bunka—kukidi bene Isalela bakwabo bavule bakaminwe Leza!—1 Ba. 19:5, 18.

4. Le Mako 10:29, 30, ulombola namani amba Yehova utele mutyima bengidi bandi bokebakwatakenyepo kudi bakwabo?

⁴ Yehova uyukile amba potutonga kumwingidila, bantu bamo motudi besuminwanga bintu bivule. Kimfwa, kuleka kukwatakanibwa na bantu ba mu kisaka ne balunda nabo bampikwa kwitabija. Mutumibwa Petelo wāipangwile Yesu, padi i na diwi dya bulanda’mba: “Tala! Batwe tubashiye bintu byonso ketukulonda; penepo, i bika bine byotukatambula?” (Mat. 19:27) Yesu wākulupije bandi bana ba bwanga’mba bakamwena’mo kisaka kikatampe kya ku mushipiditu. (Tanga Mako 10:29, 30.) Kadi Yehova, Mutwe wa kyetu kisaka kya ku mushipiditu i mulaye amba ukakwatakanya boba basaka kumwingidila. (Ñim. 9:10) Tala bintu bimo byobwanya kulonga pa kusaka’mba Yehova akukwashe kitatyi kyodi na milangwe ya kwimona bu udi bunka.

5. Le i bika byokamwena mu kulangulukila pa muswelo ukukwashanga Yehova?

⁵ Langulukila pa muswelo ukukwashanga Yehova. (Ñim. 55:22) Kino kikakukwasha wikale na mumweno muyampe pa ngikadilo yodi’mo. Kaka umo nkungakaji witwa bu Carol, * udi mu kisaka kekidipo mu bubine unena’mba: “Kuvuluka ne kulangulukila pa muswelo wankwatakenye Yehova kwankweshe nemone  bu nkidipo bunka. Kadi kino kinkulupijanga’mba Yehova ukankwatakanya ne mu mafuku āya kumeso.

6. Le 1 Petelo 5:9, 10, ukankamika namani boba balwa na milangwe ya kwimona bu badi bunka?

⁶ Langulukila pa muswelo ukwashanga Yehova banabetu mu lwitabijo bemona bu badi bunka. (Tanga 1 Petelo 5:9, 10.) Hiroshi, tutu umo wadi Kamoni bunka mu kyabo kisaka mu myaka mivule unena’mba: “I bipēla kumona’mba muntu ense udi mu kipwilo udi na makambakano. Kuyuka’mba batwe bonso tuloñanga bukomo pa kwingidila Yehova, kubwanya kukankamika boba badi bunka mu bubine.”

7. Le milombelo ikukwashanga namani?

⁷ Ikala nyeke na bibidiji biyampe bya ku mushipiditu. Kadi ufwaninwe ne kulombola Yehova mowiivwanina. (1 Pe. 5:7) Massiel unena’mba, “kintu kikatampe kyankweshe ntalule milangwe ya kwimona bu ngidi bunka, i kulombela Yehova na kininga.” Uno kaka nkasampe wadi wimona bu udi bunka kitatyi kyaakwete butyibi bwa kwingidila Yehova, mwanda kisaka kyabo kekyadipo mu bubine. Kadi ubweja’ko amba: “Bine i Tata wami, kadi nadi mulomba difuku ne difuku, mulombola moneivwanina misunsa mivule pa difuku.”

8. Le kutanga Kinenwa kya Leza ne kulangulukila’po kukukwashanga namani?

⁸ Tanga Kinenwa kya Leza kitatyi ne kitatyi, kadi langulukila pa mānga ilombola’mba Yehova ukusenswe. Bianca, kaka umo obadi banena binenwa bityumuna mutyima kudi ba mu kyabo kisaka unena’mba: “Kutanga ne kulangulukila pa mānga ya mu Bible ne pa nsekununi ya bengidi ba Yehova batenwe na makambakano na ami kwankweshe bininge.” Bene Kidishitu bamo bakwatyilanga bisonekwa bisenga bininge, kimfwa Ñimbo ya Mitōto 27:10 ne Isaya 41:10. Bakwabo nabo bamonanga’mba kuteja mawi makwate a myanda ya kukefunda kwibakwashanga batyepeje’ko milangwe ya kwimona bu badi bunka, kitatyi kyobateakanya kupwila nansha kutanga Bible.

9. Le kutanwa ku kupwila kukukwashanga namani?

⁹ Wielele’ko kutanwa ku kupwila kitatyi ne kitatyi. Ino mpangiko ikakukankamika kadi ukeyuka na batutu ne bakaka. (Bah. 10:24, 25) Massiel otwatelanga kala unena’mba: “Nansha byonadi na bumvu bininge, nasumininwe kutanwa ku kupwila konso ne kulondolola’ko. Kino kyankweshe mpwane na batutu ne bakaka mu kipwilo.”

10. Mwanda waka i biyampe kupwana na bene Kidishitu ba kikōkeji?

¹⁰ Pwana na bene Kidishitu ba kikōkeji. Kimba balunda mu kipwilo bobwanya kuboila’ko ñeni, nansha shi badi na myaka ne  bibidiji bishile na byobe. Bible wituvuluja’mba, tunangu ‘tudi ku batame.’ (Yoba 12:12) Batame nabo babwanya kuboila ñeni ku bankasampe ba kikōkeji. Davida wādi mwanuke bininge kwa Yonafane, ino kino kekyebālengejepo baleke kupwana. (1 Sa. 18:1) Davida ne Yonafane bēkweshe abo bonso mwanda wa kwingidila Yehova nansha byobādi mu makambakano makatampe. (1 Sa. 23:16-18) Irina, kaka Kamoni umo kete mu kyabo kisaka unena’mba, “bine, batutu ne bakaka bekalanga ke bambutwile ne babutule betu ba ku mushipiditu. Yehova ubwanya kwibengidija bavuije bisakibwa byetu.”

11. Le i bika byofwaninwe kulonga pa kupwana bininge na bantu?

¹¹ Kebipēlangapo kusokola balunda bapya, nakampata shi wi muntu wa bumvu. Ratna, kaka wa bumvu wefundile bubine nansha byobadi bamulwa unena’mba, “najingulwile amba nadi nsakilwa kukwashibwa ne kukwatakanibwa na batutu ne bakaka mu kipwilo.” Tubwanya kukomenwa kulombola muntu mukwabo motwiivwanina, inoko kumulombola motwiivwanina kuketukwasha tupwane bininge. Balunda nobe basakanga kukukankamika ne kukukwasha, inoko ufwaninwe kwibalombola mwa kulongela namino.

12. Le busapudi bubwanya kukukwasha namani usokole balunda bayampe?

¹² Muswelo umo bidi muyampe wa kupwana na banabetu bene Kidishitu i kusapula nabo. Carol otwatelanga kala unena’mba: “Nasokwele balunda bavule bayampe na kusapula na batutu ne bakaka ne na kwingila nabo mingilo mikwabo ya Leza. Yehova wankweshe mu myaka mivule kupityila ku bano balunda.” Kupwana na bene Kidishitu ba kikōkeji i kuyampe bininge. Yehova wingidijanga bano balunda mwanda wa kukukwasha unekenye milangwe ivutakanya ñeni, kimfwa ya kwimona bu udi bunka.​—Nki. 17:17.

13. Le batwe bonso tudi na kiselwa’ka mu kipwilo?

¹³ Batwe bonso mu kipwilo tudi na kiselwa kya kutuntwila ku buswe ne ndoe, mwanda wa ense mu kipwilo aleke kwimona bu udi bunka. (Yoa. 13:35) Byotulonga ne byotunena bibwanya kukankamika bakwetu bininge! Kaka umo wanenene amba: “Kitatyi kyonefundile bubine, kipwilo kyaikele ke kyami kisaka. Shi batutu ne bakaka kebankweshepo, nkyadipo wa kwikala Kamoni wa Yehova.” Le i bika byobwanya kulonga pa kukwasha boba badi bunka mu bubine, bemone bu babadilwa mu kipwilo?

14. Le i bika byobwanya kulonga pa kupwana na bapya?

¹⁴ Tukimbei muswelo wa kupwana na bapya. Tushilulei na kulubula na nsangaji bapya bāya mu kipwilo. (Loma 15:7) Inoko, tufwaninwe kulonga bivule kupita’ko’tu kwibemuna bya bulunda. Tusakanga kupwana nabo bininge mwenda mafuku. O mwanda lombola kanye ku bapya ne kwibata mutyima bya binebine. Longa bukomo bwa kwivwanija makambakano abo pampikwa kwikuja mu myanda ibatala. Bamo babwanya kukomenwa kukulombola milangwe yabo, o mwanda kokibaningila banene. Ino wibepangule na bunwa bakulombole mobeivwanina, kadi teja na kitūkijetyima malondololo abo. Kimfwa, ubwanya kwibepangula muswelo obayukile bubine.

15. Le bene Kidishitu batame ku mushipiditu babwanya kukwasha bakwabo mu kipwilo namani?

¹⁵ Bonso mu kipwilo bakatama ku mushipiditu shi bene Kidishitu batame ku mushipiditu, nakampata bakulumpe, bebata mutyima. Melissa, watamijebwe mu bubine na inandi unena’mba: “Nakomenwa ne bishima  bya kunena pa kufwija’ko batutu belombwele bu batata ba ku mushipiditu mu myaka mivule. Ponso ponadi na byakunena nadi na muntu wa kulombola’byo.” Mauricio, tutu nkasampe wemwene bu mwelwe kitatyi kyatambile wadi umufundija Bible mu bubine, unena’mba: “Kunta kwadi kuntele bakulumpe mutyima kwankakamikile bininge. Badi besamba nami kitatyi ne kitatyi. Twadi tusapula nabo, tukaya nabo makayo a mu kifundwa kyabo kya Bible, enka ne kwipwija nabo mukose.” Ba Melissa ne Mauricio baendelele kwingila mwingilo wa kitatyi kyonso.

16-17. Le ubwanya kukwasha bakwenu mu miswelo’ka mipotoloke?

¹⁶ Twibakwashei mu miswelo mipotoloke. (Ngt. 6:10) Leo, wingilanga bu mishonele kulampe na kyabo kisaka unena’mba, “divule dine bintu byonso byosakilwa i kakilongwa’tu katyetye ka kanye pa kitatyi kifwaninwe. Mvuluka kitatyi kimo kyonalongele akishida na motoka. Mfulo mfulō nafika ku njibo, ñeni mimvutakane. Ba mulume ne mukaji bamo baungita tukadye nabo twakudya. Nkivulukilepo byotwadile, inoko mvulukanga muswelo obantejeje na kanye. Ku mfulo, neivwana biyampe!”

¹⁷ Batwe bonso tusangelanga binkumenkume bya ku mushipiditu, kimfwa bitango bikatampe ne bityetye, mwanda tushikatyilanga pamo na bakwetu twisambila pa mpangiko. Inoko, Carol otwatelanga kala unena’mba, “nadi nemona bu ngidi bunka ku bitango.” Mwanda waka? Unena’mba: “Nansha shi ngidi mu bukata mwa batutu ne bakaka tutwa na tutwa nansha tununu na tununu, divule dine bekalanga bashikete pamo na byabo bisaka. Ponebamonanga, nemonanga bu ngidi bunka.” Bakwabo nabo bakomenwanga kutanwa musunsa mubajinji ku bitango pa kupwa kufwilwa mwinē pabo. Le uyukile’ko muntu nansha umo wikonda na makambakano pamo bwa ano? Le ubulwepo kumwita āye ashikate pamo na kyenu kisaka ku kinkumenkume kilonda’ko?

18. Le i muswelo’ka otubwanya kwingidija 2 Bene Kodinda 6:11-13, kitatyi kyotulombola kizaji?

¹⁸ Twitūdilei’ko kitatyi kya kushikata nabo pamo. Tulongei bukomo bwa kushikata na batutu ne bakaka, nakampata boba bemona  padi bu badi bunka. Bantu ba uno muswelo, tusakanga ‘kwibashitwila bikatampe mityima yetu.’ (Tanga 2 Bene Kodinda 6:11-13.) Melissa otwatelanga kala uvuluka’mba, “twadi tusangala bininge padi petwita balunda tukanange nabo pamo ne byabo bisaka.” Lelo mu kipwilo kyenu mudi muntu obwanya kulombola kizaji?

19. Le i bitatyi’ka bimo biyampe byotubwanya kushikatyila pamo na banabetu bene Kidishitu?

¹⁹ Kudi bitatyi bibwanya kusangala bininge banabetu bene Kidishitu shi tushikata nabo pamo. Bamo babwanya kukomenwa kushikatyila pamo na babutule babo bampikwa kwitabija mu kitatyi kya mafetyi. Bakwabo nabo babwanya kwivwana bulanda bininge pobafika mu mafuku afwile baswe babo. Kitatyi kyotunena batutu ne bakaka batenwe na ano makambakano amba tushikatyile nabo pamo, twibalombolanga’mba, ‘twibatele mutyima bya binebine.’​—Fid. 2:20.

20. Le binenwa bya Yesu bidi mu Mateo 12:48-50, bibwanya kwitukwasha namani kitatyi kyotwimona bu tudi bunka?

²⁰ Kudi bubinga buvule bubwanya kulengeja mwine Kidishitu emone bu udi bunka mu bitatyi bimobimo. Inoko, ketufwaninwepo kwilwa nansha dimo amba Yehova uyukile biyampe ino milangwe yotudi nayo. Witupanga byotusakilwa, divule dine kupityila ku banabetu bene Kidishitu. (Tanga Mateo 12:48-50.) Netu tulombolanga’mba tufwijanga’ko Yehova pa ino mpangiko ya buswe, na kwielela’ko kukwatakanya kisaka kyetu kya ku mushipiditu. Nansha shi kitatyi kimo tubeivwana namani, ketudipo bunka mwanda Yehova udi netu nyeke!