MU MYAKA mivule, bene Isalela bādi na kibidiji kya kuleta lupeto lwa kukwatakanya nalo butōtyi bwa bine. Ino mu mafuku a Yesu Bayuda bādi ke balombwe kufuta misonko mivule, kyāikala ke kiselwa kobadi.

Pa kukwatakanya butōtyi bwādi butōtwa ku kipema kya Leza, Bayuda bonso batame bādi bafwaninwe kuleta kipindi kya shekele (ndakuma 2). Mu myaka katwa kabajinji, uno musonko wādi ukwasha ku kusokola bitapwa ne ku kukwatakanya tempelo yāubakilwe na Heloda. Bayuda bamo bāipangwile Petelo mulangila Yesu pa kufuta musonko, Kidishitu nandi kānenenepo amba i bibi kufuta’o. Wālombwele Petelo kwa kusokola kityele kya kufuta musonko.​—Mat. 17:24-27.

Mu kine kitatyi’kya, bantu ba Leza bādi banenwe ne kuleta kya kujikija dikumi, ko kunena’mba kipindi kimo kya pa bipindi dikumi kya mu bya mwangulo byabo nansha bya mu misokwe yabo. (Levi 27:30-32; Umb. 18:26-28) Bendeji ba bipwilo bādi baningila bantu balete kya kujikija dikumi kya munamuna yonso enka ne “mante ne anete ne kumine.” Yesu kānenenepo amba i bibi kuleta kya kujikija dikumi, ino wāsokwele patōka buzazangi bwa basonekeji ne Bafadiseo.​—Mat. 23:23.

Mu kine kitatyi’kya, Bayuda bādi banenwe kufuta bene Loma misonko mivule mwanda bo bādi bebaludika. Boba bādi bapebwa ntanda bādi banenwe kufuta musonko wa lupeto nansha wa bidimanwa. Bafwatakanyanga amba bantu bādi bafuta uno musonko na kuleta bipindi 20 kutūla ku 25 pa katwa. Kwādi ne musonko wa kufuta Muyuda ense. I uno musonko obāipangwile Yesu kudi Bafadiseo. Yesu wālombwele mu kīpi mumweno muyampe otufwaninwe kwikala nao amba: “Futai bintu bya Kesala kudi Kesala, ino bintu bya Leza nabyo kudi Leza.”​—Mat. 22:15-22.

Kwādi kadi ne lupeto lwādi lutungilwe na ntanda lwa kuleta pa kutambija nansha kutweja bya busunga. Uno musonko wādi ufutwa ku byabu, pa bilalo, ku mansanka, ku bibelo bya bibundi ne ku mansoko.

Ino misonko yonso yāikele ke kiselwa kilēmena bantu mu buludiki bwa Loma. Tasite mulembi wa mānga mwine Loma unena’mba, Yesu paādi ukidi pano pa ntanda mu umbikalo wa Mbikavu Tyibilusa, “ntanda ya Shidea ne Yudea yālēmenenwe bininge na misonko, yālomba bebatyepejeje’ko.”

Kadi muswelo wādi usonkejibwa ino misonko wālēmejeje’ko kiselwa bininge. Lupusa lwa kusonkeja musonko lwādi lupotejibwa ku bantu bangi. Bano bantu bādi baleta lupeto luvule bādi babweja’mo kabo, kupwa beivwana na bantu bangi bakukasonkeja, bano bantu nabo babweja’mo nabo kabo. Mobimwekela, Zakiasa wādi na bano basonkeji mu lupusa lwandi. (Luka 19:1, 2) O mwanda mwine bantu bādi bashikilwe misonko, kadi kebādipo balēmekele bantu bādi bāya kufutyija’yo.