Lisa * wanenene amba, “Kanye ka batutu ne bakaka bene Kidishitu kyo kintu kyantengele bininge.” Wadi wisambila pa bintu byamukokēle dibajinji ku bubine. Ne Anne nandi monka na monka, wanenene amba, “Kanye kyo kintu kyankokele bininge kutabuka byobadi bamfundija.” Pano bano bakaka babibi kebasangelanga kutanga Bible ne kulangulukila’po, inoko kanye ko kebatengele bininge.

Le i muswelo’ka otubwanya kulombola kanye kabwanya kutenga mityima ya boba betujokolokele? Twisambilei’ko pa miswelo ibidi: na ludimi lwetu ne na bilongwa byetu. Kupwa tusa kwisambila ne pa bantu botufwaninwe kulombola kanye.

Mukaji nkanka utelelwe mu Nkindi shapita 31 udi na “kijila kya kanye” pa ludimi lwandi. (Nki. 31:26) Kino “kijila” kimwekelanga ku diwi dyanena nadyo ne ku bishima byanena. Ne bambutwile bafwaninwe kwikala na kino “kijila” pa ludimi lwabo. Bambutwile bavule bayukile senene amba, binenwa bisansa bibwanya kwikala na lupusa lubi pa babo bana. Shi bambutwile besamba na kitumbuzaji nansha na diwi dya mashikamashika, babo bana bakakolelwa kwivwana byobebanena kulonga. Nanshi shi bambutwile basaka babo bana bebevwane ne kulonda byobanena, bafwaninwe kulonga bukomo bwa kwisamba na kanye.

Ekale wi mbutwile nansha kudipo mbutwile, le i muswelo’ka obwanya kwisamba na kanye? Tutana kilondololwa mu kipindi kibajinji kya Nkindi 31:26 kinena’mba: “Wasamanga kyakanwa kyandi na tunangu.” Ko kunena’mba kutonga binenwa byetu na tunangu ne kwibinena na diwi diyampe. Nanshi i biyampe twiipangule amba, ‘Le byonsaka kunena bisa kukolomona bukalabale’ni, nansha bisa kuleta ndoe?’ (Nki. 15:1) Bine, i kya tunangu kulanguluka kumeso kwa kwisamba.

Lukindi lukwabo lunena’mba: “Binenwa byampikwa kulanga bidi pamo bwa kusaba kwa kipete.” (Nki. 12:18) Shi tulangulukila pa mukekadila binenwa byetu ne diwi dyotunena nadyo na lupusa pa bakwetu, nabya tukabwanya kutadija na byotwisamba. Bine, kulonda “kijila kya kanye” kuketukwasha tuleke kunena binenwa bibibibi ne kuleka kunena mu muswelo mubi. (Ef. 4:31, 32) Tukapingakanya milangwe ne binenwa bibi na binenwa bya kanye ne diwi diyampe. Yehova i mwitushile kimfwa kiyampe mu uno mwanda, kitatyi kyaēsambile na mwingidi wandi Ediya wādi ukwetwe moyo. Mwikeulu wēsambile pa kyaba kya Yehova, wēsambile na “diwi dityetye kadi ditūke.” (1 Ba. 19:12) Inoko pa kwikala muntu wa kanye kebilombepo enkapo’tu kwisamba na kanye. Bilomba ne kulonga bintu na kanye. Muswelo’ka?

Twiulanga Yehova na kwisamba na kanye ne kulonga bintu na kanye. (Ef. 4:32; 5:1, 2) Lisa, otwatelanga kala, ushintulula kanye kalombwele Batumoni amba: “Kisaka kyetu byokyadi kinenwe kuviluka bukidibukidi, bisaka bibidi bya ba mulume ne mukaji mu kipwilo, byalombele konje ku kaji mwanda wa kwiya kwitukwasha’ko komeka bintu. Mu kine kitatyi’kya, nadi nkyashilwile nansha kwifunda  Bible kwine!” Bino bilongwa bya kanye byalengeje Lisa asake kwifunda bubine.

Anne, otwatelanga ku ngalwilo, nandi watengelwe na kanye kobamulombwele kudi Batumoni. Unena’mba: “Pa mwanda wa ngikadila itādile mu ino ntanda, nadi kentatana bantu bonso. Byadi kebinkomena kukulupila bantu.” Ubweja’ko amba: “Ponetene na Batumoni, natatene kukanina kwabo. Neipangwile amba, ‘Mwanda waka bantele mutyima nenki?’ Inoko kanye ka binebine kadi na kaka wadi umfundija Bible, kanengeje mukulupile.” Le byafudile kwepi? “Mwenda mafuku, nashilula kulangulukila pa byonadi nefunda.”

Tubamone amba ba Lisa ne Anne batengelwe bininge na bilongwa bya kanye bya banabetu mu kipwilo, kino kyo kyebalengeje basake kwifunda bubine. Kanye kebalombwele banabetu mu kipwilo, kebakweshe bashitule mityima yabo.

Bantu bamo besambanga na kanye ne na mimungomungo pa mwanda wa kobatamīne. Bano bantu badi na ngikadila ya bulēme pa mwanda wa bitamina byabo ne kibutwila  kyabo, i ba kufwijibwa’ko. Inoko shi tudi na kanye pa mwanda’tu wa kitamina kyetu nansha kibutwila, kino kekilombolapo amba tudi na kanye ka Leza.​—Dingakanya na Bilongwa 28:2.

Kanye ka bine ka Leza kabadilwa mu kipa kya mushipiditu ujila wa Leza. (Ngt. 5:22, 23) Nanshi pa kwikala na kano kanye tufwaninwe kuleka mushipiditu ujila wituludike. Shi tulonge namino, tukeula ba Yehova ne Yesu. Kadi batwe bene Kidishitu tutanga bakwetu mutyima bininge. Mu uno muswelo, tutononwanga na buswe botusenswe Yehova Leza ne bakwetu. Ebiya kanye ketu kaikala bu ngikadila mikomo itamba ku mutyima kadi itabijibwe na Leza.

Tubwanya kupēlelwa kulombola kanye ku bantu betulombwele kanye, nansha boba botuyukile. (2 Sa. 2:6) Muswelo umo bidi i na kwibafwija’ko. (Kol. 3:15) Ino le bikekala namani shi tumona’mba muntu kampanda kafwaninwepo kulongelwa bintu na kanye?

Tala uno mwanda: Yehova i mwitushile kimfwa kikatampe mu kulombola kanye ka ku buntu bitupu, kadi Kinenwa kyandi kitufundija bufundiji bwa mvubu pa mwanda utala kulombola ino ngikadila. Binenwa “kanye ka ku buntu bitupu” bitanwa misunsa mivule mu Bisonekwa bya Kingidiki bya Bwine Kidishitu. Le Leza witulombolanga namani kanye?

Langulukila pa bantu midiyo ne midiyo bobalombola kanye kudi Yehova na kwibapa bintu byobasakilwa pa kwikala bōmi. (Mat. 5:45) Kadi enka ne kumeso kwa bantu kuyuka Yehova, aye webalombwele kanye. (Ef. 2:4, 5, 8) Kimfwa, wāpēne wandi Mwana wa bunka pa mwanda wa bantu bonso. Mutumibwa Polo wālembele amba Yehova wāletele kinkūlwa “mwendele bupeta bwa kanye kandi ka ku buntu bitupu.” (Ef. 1:7) Ne kadi, nansha byotulonga bubi ne kutyumuna Yehova mutyima, aye wendelelanga na kwituludika ne kwitufundija. Bufundiji bwandi ne binenwa byandi bidi pamo bwa “mvula mutyemutye.” (Kup. 32:2) Ketubwanyapo kumufuta pa bilongwa byonso bya kanye byaetulongēle. Kadi bubine i amba, enka ne būmi bwetu bwa kumeso bwine, tukebumona pa kanye ka Yehova.​—Dingakanya na 1 Petelo 1:13.

Na bubine, kanye ka Yehova ketukokelanga kwadi ne kwitukankamika. O mwanda pa kyaba kya kutonga bantu botufwaninwe kulombola kanye, tufwaninwe kulonga bukomo bwa kwiula Yehova, na kwikala na kanye mu būmi bwetu bwa difuku ne difuku. (1 Ts. 5:15) Shi tulombola kanye kitatyi kyonso, tukekala pamo bwa mudilo mu difuku dya mashika. Tukasenga ba mu kyetu kisaka, banabetu mu lwitabijo, botwingila nabo, bakwetu ba ku masomo, ne balondakani.

Langulukila pa bantu ba mu kyenu kisaka nansha ba mu kipwilo, bakamwena mu binenwa ne bilongwa byobe bya kanye. Mu kipwilo kyenu mubwanya kwikala mwanetu usakilwa nakampata bukwashi bwa kulongolola njibo nansha pa lubanza, ne kwingila mingilo ya difuku ne difuku pamo bwa kukapota bintu ku nsoko. Ne kadi, shi ubatana muntu mu busapudi usakilwa bukwashi, le ubulwepo kumukwasha?

Bine twiulei Yehova, na kulonda nyeke “kijila kya kanye” mu binenwa ne bilongwa byetu.