BANTU bavule bayukile senene nsekununi ya Yesu ya kuyeyekwa ku mutyi pa bukata bwa bankuma-bibi babidi ne kwipaibwa. (Mat. 27:35-38) Inoko bantu bamo bakulupile amba, Bible kanenangapo bubine panena’mba umbidi wa Yesu wāteakanibwe ne kutūlwa mu kibundu.​—Mako 15:42-46.

Bantu bamo bapela binena Maevanjile batatananga amba, kebādipo babwanya kwitabija muntu obepaile ajīkwe senene mu kibundu. Balañanga’mba bankuma-bibi bādi bepaibwa, bādi balongelwa bintu mu muswelo mukwabo. Muneni umo wa ku bisanji Ariel Sabar, walembele mu julunale umo witwa bu Smithsonian, washintulula kine kilengeja bantu bamo balange namino, amba: “Kupopwa ku musalaba i mfuto yobādi bapa banonga-bibi ba mu kibundi, kadi bashayuka bamo banena’mba i kubulwa tunangu kulanga’mba bene Loma bādi babwanya kupa bankuma-bibi bulēme bwa kujīkwa senene.” Bene Loma bādi basaka kufwija bumvu bankuma-bibi bobepaile, pa kino bādi baleka imbidi yabo ku mityi bu bidibwa bya banyema ba ntanda. Kupwa bishala’ko’bya baela’byo mu kibundu kya imbidi mifwe mivule.

Inoko bwifundi bwa bintu bya kishiyekulu bwāsokwele bintu bishile na bino, nakampata bipindi bimo bya ku umbidi byādi bishala’ko bya Bayuda bamo bādi bepaibwa. Mu 1968, basokwele mikupa ya muntu wāipailwe mu myaka katwa kabajinji. Beisokwele mu kibundu kya kisaka kya Bayuda, kubwipi na Yelusalema. Ino mikupa yadi mu kasanduku. Mu ino mikupa mwadi ne mukupa wa ku kapondo. Uno mukupa wadi mupopwe ku lubao na musumadi wa masantimetele 11 ne kipindi. Sabar unena’mba: “Kapondo ka muntu witwa bu Yehochanan kabingija’mba, nsekununi ya mu Maevanjile ya kujīkwa kwa Yesu mu kibundu, ibwanya kwikala ya bine.” Na bubine, “kapondo ka Yehochanan i kimfwa kya muntu obāpopele ku musalaba mu kitatyi kya Yesu, mwine wāitabijibwe na bene Loma ajīkwe mujīkilwanga Bayuda.”

Kubwanya kwikala mimweno mishile pa bintu bisokola uno mukupa wa ku kapondo, pa mwāpopelwe Yesu ku mutyi. Ino bubine bwa patōka i buno amba, bankuma-bibi bamo bādi bepaibwa bādi bajīkwa, kebādipo belwa mu kibundu kya imbidi mifwe mivule. Bine, byobya binena Bible pa umbidi wa Yesu amba wātūdilwe senene mu kibundu, i bya bine. Bukamoni bubingija byobya binena Bible.

Kadi kya mvubu kutabuka, Yehova wālaile amba Yesu ukajīkwa mu kibundu kya mpeta. Kekudipo muntu nansha umo ubwanya kulengeja kinenwa kya Leza kileke kufikidila.​—Isa. 53:9; 55:11.