Pa kusangaja Yehova, tufwaninwe kwikala na lwitabijo. Inoko, Bible unena’mba “lwitabijo ke kintupo kidi na bantu bonso.” (2 Ts. 3:2) Mutumibwa Polo paānene kino, wādi wisambila pa “bantu ba nshikani kadi babi” bādi bamupangapanga. Inoko bintu byaānenene pa lwitabijo bitala ne bantu bakwabo. Bantu bamo kebasakengapo kwitabija’mba kudi Leza mwine wāpangile bintu byonso. (Loma 1:20) Bakwabo babwanya kunena’mba bakulupile mu kintu nansha muntu mukwabo wa bukomo kutabuka. Inoko luno ke lwitabijopo lwa bine lotusakilwa pa kusangaja Yehova.

Tunenwe kukulupila’mba Yehova udi’ko kadi “upalanga mpalo” boba ba lwitabijo lukomo. (Bah. 11:6) Lwitabijo lubadilwa mu kipa kya mushipiditu wandi ujila. Nanshi pa kwikala na mushipiditu ujila, tufwaninwe kulomba Yehova etupe’o. (Luka 11:​9, 10, 13) Kintu kikwabo kiketukwasha tutambule uno mushipiditu i kutanga Kinenwa kya Leza kya ku bukomo bwa mushipiditu. Kupwa, kulangulukila pa byotutanga ne kulonga bukomo bwa kwingidija byotwifunda’mo. Shi tulonge namino, mushipiditu wa Yehova ukekala na lupusa mu bwetu būmi ne kwitukwasha twikale na lwitabijo lumusangaja.