Bipangujo bya Batangi
Mwanda waka bantu bamo banenanga’mba Ñimbo ya Mitōto 12:7 ifunkila pa “binenwa bya Yehova” (bisambīlwe’po mu vese 6), inoko Bwalamuni bwa Ntanda Mipya bulombola bu bino binenwa bifunkila pa “bamweshibwa malwa” (besambīlwe’po mu vese 5)?
Myanda īsambilwa’po ilombola’mba uno vese ufunkilanga pa bantu.
Tutanga mu Ñimbo ya Mitōto 12:1-4 amba “bantu bakōkele abapu mu bantu.” Pano tubandaulei Ñimbo ya Mitōto 12:5-7, mavese mene esambīlwe’po mu kipangujo.
“‘Pa mwanda wa bamweshibwa malwa basusulwa,
Pa mwanda wa kubinza kwa mulanda,
Nkemananga kulonga’po kintu,’ i Yehova unena.
‘Nkebapandija ku boba bebafutulula.’
Binenwa bya Yehova i bitōka tō;
Bidi pamo bwa ndalama mikundulwe mu nkelwa ya biloba, mitōkejibwe misunsa isamba-ibidi.
A Yehova, abe ukebalamanga;
Ukebakiñanga abo bonso ku luno lukongo nyeke.”
Vese 5 ulombola’mba byobya byanena Yehova bitala “bamweshibwa malwa.” Ukebapandija.
Vese 6 ubweja’ko amba “binenwa bya Yehova i bitōka tō,” “pamo bwa ndalama mikundulwe.” Bene Kidishitu bonso bepāne betabije na mutyima umo bino binenwa.—Ñim. 18:30; 119:140.
Pano tubandaulei vese ulonda’ko, Ñimbo ya Mitōto 12:7: “A Yehova, abe ukebalamanga; ukebakiñanga abo bonso ku luno lukongo nyeke.” Le kishima “abo” kifunkila pa bika?
Vese 7 byaiya pa kupwa kwa binenwa bya amba “binenwa bya Yehova,” bamo babwanya kufula ku mulangwe wa amba kishima “abo” kifunkila pa binenwa bya Leza. Na bubine, tuyukile amba Leza walamine Bible nansha balwana byobalongele bukomo buvule bwa kumukankaja ne kumujimankanya.—Isa. 40:8; 1 Pe. 1:25.
Inoko, Yehova ulamanga ne bantu batelelwe mu vese 5. Yehova wākweshe ne kupandija kadi ukendelela kukwasha ne kupandija “bamweshibwa malwa” ne “basusulwa.”—Yoba 36:15; Ñim. 6:4; 31:1, 2; 54:7; 145:20.
Le penepo, kishima “abo” kidi mu vese 7 kifunkila pa bika?
Myanda idi mu luno lwimbo lwa mitōto ilombola’mba kishima “abo” kifunkila pa bantu.
Ñimbo ya Mitōto 12:1 īsambila pa “bantu ba kikōkeji” babepēlwe bubela na bantu babi. Kupwa tutana binenwa bilombola’mba Yehova ukalwa na boba bengidija ludimi lwabo mu muswelo mubi. Luno lwimbo lwa mitōto lwitukulupija’mba tubwanya kukulupila’mba Leza ukalonga’po kintu mwanda wa kukwasha bantu bandi, ke-pantu binenwa byandi i bitōka tō.
O mwanda vese 7 unena’mba Yehova ukebalama ne kwibakinga, ko kunena’mba, boba bamweshibwa malwa na babi.
Kishima “abo” kilombola milangwe mine idi mu makopi akulupilwa a Bisonekwa bya Kihebelu. Bwalamuni bwa Kingidiki bwa Septante i bwingidije kishima “batwe” misunsa ibidi mu vese 7, bine bifunkila monka pa bantu ba kikōkeji bamweshibwa malwa ne kususulwa. Ku mfulo, vese 7 unena’mba “abo bonso” bantu ba kikōkeji bakakingwa “ku luno lukongo,” ko kunena’mba ku bantu bakankamika bilongwa bibi. (Ñim. 12:7, 8) Mu bwalamuni bwa Bisonekwa bya Kihebelu mu ludimi lwa Kialamia, tutanga kipindi kibajinji kya vese 7 amba: “A MFUMWETU, ukakinga boba boloke, ukebalama ku luno lukongo lubi nyeke.” Kino kibweja’ko bubinga bwa amba Ñimbo ya Mitōto 12:7 keifunkilangapo pa binenwa bya Leza.
Nanshi uno vese upa “bantu ba kikōkeji” lukulupilo lwa amba Leza ukalonga’po kintu mwanda wa kwibakwatakanya.
