MU Bible i muyule binenwa bikunka mutyima bya bantu “pamo’nka bwa batwe.” (Yak. 5:17) Kimfwa, tubwanya kupēlelwa kwivwanija binenwa bya Polo byampikwa budimbidimbi bidi mu Bene Loma 7:21-24, bya amba: “Popa ponsaka kulonga kyoloke, kibi kidi ponka pamo nami. . . . Yō, ami kimonya-malwa!” Bino binenwa byampikwa budimbidimbi bitupa kikulupiji kitatyi kyotulwa na kubulwa kubwaninina kwetu.

Polo wānenene binenwa bikwabo byampikwa budimbidimbi. Mu Bene Ngalatea 2:20, wālombwele kikulupiji kyandi amba Yesu ‘wamusenswe ne kwipāna pa mwanda wa aye!’ Lelo netu ye ‘motwiivwanina’? Padi ke ponsopo.

Shi tulwanga na milangwe ya kwityepelwa pa mwanda wa bubi botwalongele pa kala, kyaba kimo tubwanya kukomenwa kwitabija’mba Yehova witusenswe ne amba witulekelanga, kadi tubwanya kukomenwa kumona kitapwa kya kinkūlwa bu kyabuntu kipelwe muntu ne muntu. Le bine Yesu usakanga tumone kinkūlwa bu kyabuntu kipelwe muntu ne muntu? Shi i amo, le i bika bibwanya kwitukwasha twikimone uno muswelo? Tulondololei bidi bino bipangujo bibidi.

Bine, Yesu usakanga tumone kitapwa kyandi bu kyabuntu kipelwe muntu ne muntu. Mwanda waka tubanena namino? Tulangulukilei bidi pa mwanda ulembelwe mu Luka 23:39-43. Muntu umo wapopwa ku mutyi kubwipi na Yesu. Waitabija’mba i mulonge bibi. Walongele bubi bukatampe o mwanda i mufwaninwe ino mfuto. Pa kuzumbija mutyima pa byalongele, uno muntu wazenze Yesu amba: “Umvuluka’ko posa kutwela mu Bulopwe bobe.”

Le Yesu walonga’po namani? Langa’po bidi mwalwila na misanshi pa kwalamuna mutwe amutale. Nansha byadi na misanshi mikatampe, wamungamunga ne kukulupija uno muntu amba: “I bine nakusapwila dyalelo dino’di amba, ukekalanga nami mu Paladisa.” Yesu wadi’tu ubwanya kuvuluja muntu’wa amba “Mwanā muntu [waile], . . . kupāna būmi bwandi ke kinkūlwa kya kukūla bavule bene.” (Mat. 20:28) Ino le ubamone mwalombwela Yesu na kanye amba kitapwa kyandi i kilambwilwe muntu ne muntu? Wanena bya bulunda pawaingidija bishima “ukekalanga” ne “nami.” Kadi wesambila pa muntu umo pawalombola muntu’wa amba ukekalanga na būmi mu paladisa pano pa ntanda.

Na bubine, Yesu wādi usaka uno muntu etabije kitapwa kyandi kyawādi kapāna bu kyabuntu kya muntu ne muntu. Shi Yesu wāmwene uno nkuma-bibi uno muswelo, mwine kādipo na mukenga wa kwingidila Leza, bine ye mwamwena ne mwine Kidishitu mubatyijibwe wingidila Leza. Penepa i bika bibwanya kwitukwasha tukulupile amba muntu ne muntu ukamwena mu kitapwa kya Kidishitu nansha shi twalongele bubi pa kala?

Mwingilo wa Polo wāshintyile mumweno waādi umona kitapwa kya Yesu. Namani? Wānenene amba: “Mfwijanga’ko Kidishitu Yesu Mfumwetu, waumpele bukomo, mwanda waumwene amba ne mukōkele pa kumpa mwingilo, nansha byonadi pa kala muntu utuka Leza ne upangapanga bantu bandi ne wa kibengo.” (1 Tm. 1:12-14) Mwingilo wa Polo wāmukulupije amba Yesu wāmufwidile lusa, umusenswe, kadi umukulupile. Kadi Yesu i mupe umo ne umo mu bukata mwetu mwingilo. (Mat. 28:19, 20) Le uno mwingilo ubulwe kwitukwasha ne batwe?

Albert, wajokēle panopano kudi Yehova pa kupwa kupangwa mu bula bwa kintu kya myaka 34 unena’mba: “Bubi bwami budi nyeke ku meso ami. Ino kitatyi kyondi mu busapudi, neivwananga na mwēivwanine mutumibwa Polo, i bampe mwingilo kudi Yesu. Kino kinkwashanga ngikale na mumweno muyampe pondi, pa būmi bwami, ne pa būmi bwami bwa mu mafuku a kumeso.”​—Ñim. 51:3.

Allan, wadi nkuma-bibi kadi usenswe bya lūma kumeso kwa kwifunda bubine, unena’mba: “Nakivulukanga bibi byonso byonadi nonga bantu. Kyaba kimo bintyumunanga mutyima. Inoko mfwijanga’ko Yehova pa kundeka ami kipya-mambo, nsapwile bakwetu myanda miyampe. Pomona bantu betabija myanda miyampe, mvulukanga’mba Yehova i muyampe kadi udi na buswe. Mona’mba uñingidijanga mwanda wa kukwasha bakwetu balonga bibi.”

Mwingilo upelwe muntu ne muntu witukwashanga tulonge ne kulangulukila pa bintu biyampe. Wituvulujanga’mba Yesu i mwitufwile lusa, witusenswe, kadi witukulupile.

Enka ne bikonakanibwa ino ngikadilo mibi ya Satana, mityima yetu ibwanya kwitutopeka nyeke pa mwanda wa bibi byotwalongele pa kala. Le i bika biketukwasha tulwe na ino milangwe?

Jean wadi ulwa nyeke na milangwe ya kwitopeka pa būmi bwa mapala abidi bwaadi nabo pa bunkasampe unena’mba, “Nsangalanga pa kuyuka’mba ‘Leza i mukatampe kupita mityima yetu.’” (1 Yo. 3:19, 20) Netu tubwanya kusengibwa pa kuyuka’mba ba Yehova ne Yesu bayukile senene amba twi bantu ba bubi kupita ne motwiyukile batwe bene. Tuvulukei amba baletele kinkūlwa na buswe, ke pa mwandapo wa bantu babwaninine, ino i pa mwanda banonga-bibi besāsa.—1 Tm. 1:15.

Tukalama mu mityima yetu buno bubine bwa kamweno shi tulangulukila bininge pa muswelo wādi wikele Yesu na bantu bampikwa kubwaninina ne shi tulonga bukomo bwa kuvuija mwingilo waetupele. Shi tulonge namino, tubwanya kunena pamo bwa Polo amba: Yesu “waunsenswe ne kwipāna pa mwanda wami.”