Na bubine Yehova usakanga bantu besonga bekale na nsangaji kadi bapwane bininge kipwano kilādila nyeke. (Mat. 19:4-6) Shi usaka kusonga nansha kusongwa, le i muswelo’ka obwanya kusokola muntu muyampe wa kwisonga nandi? Yehova byadi Umpangi wetu, uyukile bine byotufwaninwe kulonga pa kwikala na nsangaji mu busongi. Nanshi, shi ulonde misoñanya yaetupele, ukekala na nsangaji mu busongi bobe. Twisambilei’ko bidi pa ino misoñanya imoimo.

Dibajinji, tufwaninwe kuyuka bidi kino amba: “Mutyima i ñongojani kutabuka kintu kyo-kyonso kadi i mubimubi.” (Yel. 17:9) Shi bantu babidi bakimba kwisonga abashilula kwinangila, kebejengapo kwisanswa bininge, kadi kino kikebalengeja bakomenwe kukwata butyibi bwa tunangu. Shi bantu bakwata butyibi bwa kwisonga pa mwanda’tu wa mobeivwanina, divule dine bafulanga kubi. (Nki. 28:26) O mwanda ke biyampepo bantu babidi kubadikila kwilombola buswe bininge nansha kwilaya kwisonga kumeso kwa kwiyuka biyampe.

Kisonekwa kya Nkindi 22:3 kinena’mba: “Mukosoke umonanga kibi wefya, ino bampikwa bwino bendelelanga’tu ne kwangula bipa bibi.” Le i kyaka’ka kidi mu kukimba wa kwisonga nandi pa masite a Entelenete? I kya bulanda, mwanda bantu bamo betene na bantu bokebayukilepo pa Entelenete, bashilula kwinangila, kupwa byafula bibi. Kadi banzazangi batūlanga pa Entelenete myanda ya bubela ibatala mwanda wa kudimba bantu nansha kwibeba lupeto. Pakwabo bano banzazangi betelanga bu Batumoni ba Yehova.

Langulukila pa kino kyaka kikwabo. Masite amo engidijanga mampangiko a mu olodinatele obalanga’mba akakwasha bantu bayuke shi i bafwaninwe kwisonga. Inoko i kutupu bubinga bulombola’mba ano manwa endekanga. Le kikekala kya tunangu kukulupila mpangiko ipungilwe na bantu pa kukwata butyibi bukatampe butala busongi? Le mampangiko a mu olodinatele abwanya kukulupilwa pamo bwa misoñanya ya mu Bible?​—Nki. 1:7; 3:5-7.

Musoñanya udi mu Nkindi 14:15 unena’mba: “Muntu mwendalale witabijanga binenwa byonso, ino mukosoke ulangulukilanga pa matabula onso.” Kumeso kwa kwitabija muntu wa kwisonga nandi, ufwaninwe bidi kumuyuka biyampe. Inoko kubwanyapo kumuyuka biyampe na kwisamba’tu nandi pa Entelenete. Nansha shi mwitumina mafoto ne misapu mivule kadi mwisamba kitatyi kilampe,  le bine ubwanya kumuyuka? Bantu bamo badi balanga’mba abasokola muntu muyampe wa kwisonga nandi, inoko batyumukilwe mutyima pobemwene nandi mpala na mpala.

Mulembi wa mitōto wānenene amba: “Nkipwenepo na bantu ba bongojani, kadi nyemanga boba bafya mobekadile.” (Ñim. 26:4) Bantu bavule balañanga’mba ke bibipo kubepa mu myanda yobatūla pa Entelenete mwanda wa kwimwekeja bu bantu bayampe. Babwanya kufya ngikadila yabo mibi, ne kuleka kwiimwekeja kitatyi kyobatuma misapu pa Entelenete. Bamo nabo babwanya kwitela bu Batumoni ba Yehova, ino le bine i bene Kidishitu babatyijibwe? Le i batame ku mushipiditu? Le bine bapwene na Yehova? Le i balēmekibwe mu kipwilo? Nansha Le baletanga kimfwa kibi, kadi i ‘balunda babi’? (1 Ko. 15:33; 2 Tm. 2:20, 21) Le badi na bwanapabo bwa mu Bisonekwa bwa kusonga nansha kusongwa? Ufwaninwe kuyuka bino bintu, ino i bikomo kwibiyuka shi kwipangwilepo Batumoni bakwabo bebayukile biyampe. (Nki. 15:22) Kadi na bubine, mwingidi wa kikōkeji wa Yehova kabwanyapo nansha kulanga ya ‘kwikutyila mu lupungu lubi’ na muntu wampikwa kwitabija.​—2 Ko. 6:14; 1 Ko. 7:39.

Nansha byokudi bino byaka bidi mu kukimba wa kwisonga nandi pa masite a Entelenete, ino kudi miswelo miyampe ya kukimba muntu wa kwisonga nandi, omukekala nandi mu busongi buyampe. Le i kwepi kobwanya kusokola muntu muyampe wa kwisonga nandi? Shi mudi na mukenga wa kwibungila pamo, Batumoni ba Yehova babwanya kuyuka biyampe muntu wa kwisonga nandi ku kupwila, ku bitango bikatampe ne bityetye, ne ku kubungakana kukwabo.

Shi kebibwanikapo kwibungila pamo uno muswelo, kimfwa mu kino kitatyi kya kipupo kya COVID-19, twingidijanga bingidilwa bya busendwe mwanda wa kutanwa ku kupwila, kwine kotudi na mikenga ya kwiyuka na Batumoni bankungulume ne bankungakaji. Ubwanya kumona muswelo obapityija bipindi ku kupwila, ne obalombola lwitabijo lwabo kupityila ku malondololo abo. (1 Tm. 6:11, 12) Kadi ubwanya kwisamba nabo pa kupwa kupwila mu bisumpi byabanibwe ku zoom. Pomwisamba mu bisumpi na Batumoni bakwabo, ubwanya kumona muswelo wisamba muntu ukusangeje’wa na bantu bakwabo, kadi kino kikakukwasha uyuke ngikadila yandi minemine. (1 Pe. 3:4) Mwenda mafuku, shi mubeyuka senene, ukabwanya kuyuka shi mudi na bitungo bimo, shi mulondanga misoñanya imo, ne shi mwi bafwaninwe kwisonga.

Shi nkungulume nansha nkungakaji ukimba wa kwisonga nandi mu muswelo ukwatañene na misoñanya ya mu Bible, ukemwena bubine bwa lukindi lunena’mba: “Yewa usokola mukaji [nansha mulume] muyampe wasokola kintu kiyampe, kadi witabijibwanga na Yehova.”​—Nki. 18:22.