1-2. Le i binenwa’ka bya Yehova bidi mu Isaya 65:16, 17 bitukankamika tuleke kukōka?

KITANGO kya ntanda kya mu 2017 kyadi na mutwe wa mwanda usangaja unena’mba “KETWAKIKŌKAI!” Betulombwele ku kino kitango muswelo otubwanya kūminina makambakano etu. Pano ke papite myaka iná, ino batwe bano tukyuminina makambakano mu būmi bwa mu ino ngikadilo ya bintu ya dyalelo.

² Le i makambakano’ka owikonda nao pano? Le wi mufwilwe muntu wa mu kisaka nansha mulunda? Le ubelanga misongo mikatampe? Le udi na makambakano a bununu? Kimpengele kya kipangila, bya lūma, nansha kupangwapangwa? Nansha i bintu bilupuka ku misongo, kimfwa ya kipupo kya COVID-19? Bine, tutengēle difuku dikapita bino bintu—dyotukelwa’byo lonso kadi dyokebikalongekapo monka!​—Tanga Isaya 65:16, 17.

3. Le i bika byotufwaninwe kulonga pano, ne mwanda waka?

³ Būmi mu ino ntanda i bukomo, kadi tubwanya kutanwa’nka ne na makambakano mavule makomo mu mafuku a kumeso. (Mat. 24:21) Na bubine, tufwaninwe kwifunda muswelo wa kūminina bininge. Mwanda waka? Mwanda Yesu wānenene amba: “Na kūminina kwenu, mukalamanga būmi bwenu.” (Luka 21:19) Tukabwanya kūminina shi tulangulukila pa muswelo wabwenye bakwetu kūminina makambakano pamo bwa etu.

4. Mwanda waka tubwanya kumona Yehova bu kimfwa kiyampe kya kūminina?

⁴ Le kimfwa kiyampe kya kūminina i kimfwa kya ani? I kimfwa kya Yehova Leza. Padi ano malondololo abakutulumuja.  Inoko shi ulangulukile’po, kukatulumukapo. Ino ntanda yendejibwanga na Dyabola, kadi i miyule makambakano. Yehova udi na bukomo bwa kwiapwa mu kitatyi kyo-kyonso, inoko wilaije difuku kampanda dya kwiapwa. (Loma 9:22) Pano’ko bidi, Leza wetu ukyendelela kūminina kufika’nka ne bibwana kitatyi kyatungile. Pano twisambilei pa bintu kitema byuminina Yehova.

5. Le dijina dya Leza dyāfutulwilwe namani, ne nobe wiivwananga’po namani?

⁵ Kufutululwa kwa dijina dyandi. Yehova usenswe dijina dyandi, kadi usakanga muntu ense edilēmeke. (Isa. 42:8) Inoko pano ke padi kintu kya myaka tununu tusamba, dijina dyandi diyampe difutululwanga. (Ñim. 74:10, 18, 23) Kuno kufutululwa kwāshilwile mu budimi bwa Edena pobātopekele Leza kudi Dyabola (ko kunena’mba “Vubavuba”) amba i musuminwe ba Adama ne Eva kintu kyobādi basakilwa pa kwikala na nsangaji. (Ngo. 3:1-5) Tamba pene’pa, Yehova utopekwanga bya bubela amba i musuminwe bantu kintu kine kyobasakilwa. Yesu wādi ulangalanga pa kufutululwa kwādi kufutululwa dijina dya Shandi. O mwanda wāfundije bandi bana ba bwanga kulombela’mba: “Tata wetu udi mūlu, dijina dyobe dipandulwe.”​—Mat. 6:9.

6. Mwanda waka Yehova wālekele papite kitatyi kilampe kumeso kwa kupwija mwanda wa bubikadi bwandi?

⁶ Kulwibwa kwa bubikadi bwandi. Yehova ye udi na lupusa lonso lwa kuludika mūlu ne pano pa ntanda, kadi muludikilo wandi i mulumbuluke. (Kus. 4:11) Inoko Dyabola wālongele bukomo bwa kongola bamwikeulu ne bantu balange amba Leza kadipo na luno lupusa. Mwanda utala lupusa lwa Yehova lwa kuludika, kewādipo ukokeja kupwa mu difuku dimo. Leza wālekele na tunangu papite kitatyi kilampe, mwanda wa bantu bamone amba kebabwanyapo kwiludika biyampe abo bene pampikwa Umpangi. (Yel. 10:23) Pa mwanda wa kitūkijetyima kya Leza, uno mwanda ukapwa dimo kupwididile. Bantu bakayuka’mba muludikilo wa Yehova i muyampe, ne amba Bulopwe bwandi bo bubwanya kuleta ndoe ne mutyima-ntenke pano pa ntanda.

7. Le i bāni bātombokēle Yehova, ne ukebalonga bika?

⁷ Butomboki bwa bandi bana bamo. Yehova wāpangile bandi bana bamwikeulu ne bantu babwaninine, kadi bampikwa kakoba. Inoko mwikeulu umo, wandi mwana ntomboki, Satana (ko kunena’mba “Kinkwa”) wāongola ba Adama ne Eva, bantu babwaninine batombokele Yehova. Bamwikeulu ne bantu bakwabo nabo bēlunga mu buno butomboki. (Yude 6) Mwenda mafuku, enka ne bantu ba ku muzo wa Isalela, bantu bātongelwe na Leza, bāmupela kebatōta baleza ba bubela. (Isa. 63:8, 10) Byāsense Yehova bininge. Inoko wāuminine, kadi ukendelela kūminina kufika ne bikabwana kitatyi kya konakanya bantomboki bonso. Kino kikaletela bantu bandi ba kikōkeji nsangaji, bene bōminina nandi pamo bubi bwa mu ino ngikadilo ya bintu!

8-9. Le i bubela’ka bobabepelanga Yehova, ne netu tuloñanga’po namani?

⁸ Bubela bwa Dyabola. Satana wātopekele Yoba mwingidi moloke wa Yehova ne batōtyi ba Yehova bonso ba kikōkeji, amba bengidilanga Leza mwanda wa kamweno kabo. (Yoba 1:8-11; 2:3-5) Dyabola utopekanga bantu enka ne dyalelo. (Kus. 12:10) Tubwanya kulonga’po kintu mwanda wa kulombola’mba mu bubela bwa Satana i mutupu bubine, na kūminina makambakano etutana ne kukōkela nyeke Yehova pa mwanda wa buswe botumusenswe. Pamo bwa Yoba, netu tukeselwa shi tūminine.​—Yak. 5:11.

 ⁹ Satana wingidijanga bendeji ba bipwilo bya bubela banene amba Yehova i ntapañani ne amba i aye ususula bantu. Bamo nanenanga’nka ne kunena’mba pafwanga bana, i Leza wibaselanga mwanda usakilwa bamwikeulu bavule mūlu. Bine, uno i mutonko! Ino batwe tumuyukile biyampe. Shi tubabela misongo mikomo nansha shi tubafwilwa muntu otusenswe, ketutopekangapo Leza wetu. Ino tukulupile amba difuku dimo Leza ukōlola bintu. Tubwanya kusapwila muntu yense witwivwana mwine mwikadile Yehova Leza wa buswe. Kino kikalengeja Leza alondolole yewa umukolomona.​—Nki. 27:11.

10. Le kisonekwa kya Ñimbo ya Mitōto 22:23, 24 kinena bika padi Yehova?

¹⁰ Masusu asusuka bengidi bandi basenswe. Yehova i Leza wa lusa. Aye kasenswepo kwitwivwana tudila mwanda wa masusu otūminina—kimfwa, kupangwapangwa, misongo, nansha kubulwa kubwaninina kwetu. (Tanga Ñimbo ya Mitōto 22:23, 24.) Yehova wivwanije masusu otususuka; usakanga kupwa’o, kadi ukeapwa. (Dingakanya na Divilu 3:7, 8; Isaya 63:9.) Kukekala difuku dyakapampula “impolo yonso mu meso [etu], ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.”​—Kus. 21:4.

11. Le Yehova wiivwananga namani pa bengidi bandi ba kikōkeji bafwile?

¹¹ Bushiyena bwa balunda nandi bafwile. Le Yehova wiivwananga namani pa bana-balume ne bana-bakaji ba kikōkeji bafwile? Wabilanga bininge kwimona nabo monka! (Yoba 14:15) Langa’po bidi mwabidila Yehova kwimona na mulunda nandi Abalahama! (Yak. 2:23) Nansha Mosesa, mwine wāesambile nandi “mpala na mpala”! (Div. 33:11) Kadi langa’po bidi mwaabidila kwivwana Davida ne batuimba bakwabo bemba ñimbo milumbuluke  ya kumutendela! (Ñim. 104:33) Nansha bano balunda na Leza byobalēle mu tulo twa lufu, Yehova kebedilwepo. (Isa. 49:15) Uvulukanga myanda yonso ibatala. Bible unena’mba, “mungya mumweno wandi bonso i bōmi.” (Luka 20:38, kunshi kwa dyani) Ukebasangulanga difuku dimo, kadi ukevwana monka milombelo yabo yampikwa budimbidimbi ne kwitabija butōtyi bwabo. Shi wi mufwilwe muntu osenswe, ino milangwe ibwanya kukusenga ne kukukankamika.

12. Le i bika bisansanga Yehova bininge mu ano mafuku mabi a mfulo?

¹² Kususula kobasusula bantu kudi bantu babi. Pāshilwile butomboki mu Edena, Yehova wāyukile amba bintu bikonekela’ko kumeso kwa kulumbuluka’byo. Yehova ushikilwe bibi, bukondame, ne bya lūma bidi mu ntanda ya dyalelo. Wivwaninanga nyeke lusa boba basusulwa—kimfwa boba bakōkekōke ne kebadipo na wa kwibakinga, bana banshiye ne bakishala. (Zek. 7:9, 10) Yehova bimusansanga bininge pamona bengidi bandi ba kikōkeji basusulwa ne kukutwa. Tukulupilei amba witusenswe batwe bonso bōminina nandi pamo.

13. Lelo Leza umonanga bilongwa’ka bibi mu bantu, ne ukalonga’po namani?

¹³ Koneka kwa bantu. Satana usenswe kona bantu, bene bāpangilwe mu kyelekejo kya Leza. Leza paāmwene amba “bubi bwa muntu bubapite bukatampe” mu mafuku a Noa, “Yehova wēalakanya ne kine kyaālongēle bantu pa ntanda, kadi mutyima wandi wāmusansa.” (Ngo. 6:5, 6, kunshi kwa dyani, 11) Le bintu i bilumbuluke tamba pene’pa? Aa! Bine, Dyabola usangalanga pamona bantu balonga busekese bwa miswelo yonso, kubadila’mo ne busekese bulonga bana-balume na bana-bakaji ne bulonga bantu ba ngitu imo. (Ef. 4:18, 19) Satana usangalanga bininge kitatyi kyalengeja batōtyi ba bine balonge bubi bukatampe. Kitatyi kikafika kitūkijetyima kya Yehova ku mfulo, ukalombola’mba ushikilwe bininge bilongwa byonso bya disubi.

14. Le bantu baloñanga ntanda ne banyema bika?

¹⁴ Konakanya bupangi bwandi. Muntu ‘ubikalanga muntu mwanda wa kumusanshija’ kadi katalengapo biyampe ntanda ne banyema byāmupele Yehova kutala. (Mus. 8:9; Ngo. 1:28) Bashayuka bamo badyumunanga’mba bintu bilonga bantu bibwanya kukubija misaka * mudiyo umo ne kupita ya bipangwa byūmi mu myaka mityetye īya’ko. O mwanda banena’mba bupangi bubinzanga! Na bya dyese, Yehova ulaile “konakanya boba bonakanya ntanda,” ne kwalamuna ntanda yonso ke paladisa.​—Kus. 11:18; Isa. 35:1.

15-16. Le i bika bifwaninwe kwitulengeja tūminine pamo na Yehova? Leta kimfwa.

¹⁵ Langulukila’po bidi pa bintu byonso bisansa byuminine Tata wetu wa mūlu mu bula bwa myaka tununu ne tununu. (Tala kapango kanena’mba “ Bintu Byuminine Yehova.”) Yehova ubwanya kufudija ino ngikadilo mibi ya bintu mu kitatyi kyo-kyonso. Inoko kitūkijetyima kyandi i kitukwashe bininge! Tulangulukilei bidi pa kino kimfwa. Langa’po bidi shi abalombola ba mulume ne mukaji amba wabo mwana ukabutulwa na misongo mikatampe, ne amba mwana kakekalapo na būmi buyampe kadi kakejepo kufwa. Nansha byobasa kwikala na makambakano pa kumulela, ino bakasangala pa kubutula uno mwana. Buswe bobasenswe wabo mwana bukebalengeja bōminine makambakano o-onso mwanda wa mwana ekale na būmi buyampe.

 ¹⁶ Muswelo umo onka, bana bonso batambile kudi Adama ne Eva babutulwanga bampikwa kubwaninina. Ino Yehova wibasenswe kadi wibatele mutyima. (1 Yo. 4:19) Kadi Yehova i mwishile na bambutwile botwatela mu kimfwa kyetu, mwanda aye ubwanya kupwa masusu a bandi bana. I mutunge difuku dyasa kutalula’ko misongo yonso isusula bantu bandi. (Mat. 24:36) Bine, buswe bwandi bufwaninwe kwitulengeja tūminine nandi pamo!

17. Le muswelo obatelele Yesu mu Bahebelu 12:2, 3 witukankamika namani twendelele kūminina?

¹⁷ Yehova i kimfwa kibwaninine kya kūminina. Yesu wābwenye kwiula kūminina kwa Shandi. Yesu paādi pano pa ntanda, wāuminine binenwa bityani, bumvu, ne mutyi wa masusu pa mwanda wetu. (Tanga Bahebelu 12:2, 3.) Na bubine, kimfwa kya Yehova kya kūminina kyāpele Yesu bukomo bwa kūminina. Kibwanya kwitupa bukomo ne batwe.

18. Le 2 Petelo 3:9 witukwasha namani twivwanije bintu bilongeka pa mwanda wa kitūkijetyima kya Yehova?

¹⁸ Tanga 2 Petelo 3:9. Yehova uyukile kitatyi kiyampe kya kufudija ino ntanda mibi. Kitūkijetyima kyandi i kikwashe ku kukongakanibwa kwa kibumbo kikatampe kya midiyo ne midyo ya bantu, bene bamutōta ne kumutendela. Abo bonso i basangale pa kūminina kwauminine Yehova kitatyi kilampe mwanda wa babutulwe, befunde kumusanswa, ne kwipāna kwadi. Shi kudi bantu midiyo ne midiyo bōminina kufika ne ku mfulo i pa mwanda wa kitūkijetyima kya Yehova!

19. Le tufwaninwe kusumininwa kulonga bika, ne i mpalo’ka yotukapalwa?

¹⁹ Tuboilanga ñeni kudi Yehova ya mwa kūminina na nsangaji. Nansha byokudi makambakano ne masusu aletele Satana, Yehova aye i “Leza wa nsangaji” nyeke. (1 Tm. 1:11) Netu tubwanya kwikala nyeke na nsangaji koku tutengēle Yehova apandule dijina dyandi, abingije bubikadi bwandi, atalule’ko bibi byonso, ne kupwa makambakano otwikonda nao dyalelo. Nanshi tusumininwei kūminina kadi tukankamanei pa kuyuka’mba Tata wetu wa mūlu nandi ūmininanga. Shi tulonge namino, bino binenwa bikafikidila padi batwe bonso, bya amba: “Wa nsangaji i yewa ūminina nyeke matompo, mwanda aye shi waitabijibwa ukatambulanga kilukwa kya būmi, kyalaile Yehova boba bamusenswe nyeke.”​—Yak. 1:12.