1. Lelo i bika bisaka Yehova dyalelo?

 DYALELO Leza usaka’mba myanda miyampe ya Bulopwe isapulwe ntanda yonso. (Mako 13:10; 1 Tm. 2:3, 4) Uno i mwingilo wa Yehova, o mwanda i mupe’o wandi Mwana muswedibwe euludike. Kadi Yesu byadi mutadi wa mwingilo wa busapudi, tubwanya kukulupila amba uno mwingilo ukavuijibwa ne pa mfulo enka musakila Yehova kumeso kwa mfulo kufika.​—Mat. 24:14.

2. I bika byotusa kumona mu kino kishinte?

² Mu kino kishinte, tusa kumona’mo Yesu mwaingidijija “umpika mukōkele ne mudyumuke” mwanda wa kuleta byakudya bya ku mushipiditu, ne kulongolola balondi bandi amba bengile mwingilo mukatampe wa busapudi mu mānga. (Mat. 24:45) Kadi tusa kumona’mo ne bibwanya kulonga umo ne umo motudi mwanda wa kukwatakanya Yesu ne umpika mukōkele.

3. Le Yesu wāpelwe lupusa’ka?

³ Yesu uludikanga mwingilo wa busapudi. Le i bika bitukulupija namino? Kitatyi kityetye kumeso kwa Yesu kukanda mūlu, wētene na balondi bandi bamo ba kikōkeji ku lūlu lwa Ngadilea. Wēbasapwila’mba: “Lupusa lonso napebwa’lo mūlu ne pano panshi pene.” Kupwa wabweja’ko amba: “Nanshi, endai mukalonge bana ba bwanga mu bantu ba ku mizo yonso.” (Mat. 28:18, 19) Nanshi mu bintu byāpelwe Yesu, mubadilwa ne lupusa lwa kuludika mwingilo wa busapudi.

4. Mwanda waka tubwanya kukulupila’mba Yesu uludikanga mwingilo wa busapudi?

 ⁴ Yesu wānenene’mba mwingilo wa kusapula ne kulonga bana ba bwanga ukengilwa mu “mizo yonso,” ne amba ukekala pamo na balondi bandi “mafuku onso kufika ne ku mvuyo ya ngikadilo ya bintu.” (Mat. 28:20) Bino binenwa bilombola patōkelela’mba, Yesu ukendelela kuludika mwingilo wa busapudi kufika ne dyalelo.

5. Le tukwashanga’ko namani ku kufikidila kwa Ñimbo ya Mitōto 110:3?

⁵ Yesu kāzumbijepo mutyima amba ba kwingila uno mwingilo bakatyepa ku mvuyo ya ino ngikadilo ya bintu. Wādi uyukile amba binenwa bya bupolofeto bya kaimba wa mitōto bikafikidila, bya amba: “Bantu bobe bakepānanga na mutyima tō mu difuku dya kibumbo kyobe kya basola.” (Ñim. 110:3) Shi nobe usapulanga myanda miyampe, nabya ukwatakanyanga Yesu ne umpika mukōkele, kadi ukwashanga’ko ku kufikidila kwa buno bupolofeto. Shako uno mwingilo wendelelanga kumeso, ino kudi bikoleja.

6. Le i kikoleja’ka kimo bidi kikonda na basapudi ba Bulopwe dyalelo?

⁶ Kikoleja kimo bidi kikonda na basapudi ba Bulopwe i kulwibwa. Batupondo, bendeji ba bipwilo, ne ba politike, banenenanga mwingilo wetu myanda mivule ya bubela. Shi babutule betu, bantu botwiyukile nabo, ne botwingila nabo abaongolwa na luno lunsafwakanwa, babwanya kwituningila tuleke kwingidila Yehova ne kuleka kusapula. Mu matanda amo, balwana netu bazakajanga banabetu, bebakwata, enka ne kwibela mu buloko. Ino myanda keitutulumujangapo. Yesu wālaile amba: “Mukashikibwa na mizo yonso pa mwanda wa dijina dyami.” (Mat. 24:9) Mushikwa obetushikilwe i bukamoni bulombola’mba Yehova witwitabije. (Mat. 5:11, 12) Dyabola ye uletanga kuno kulwibwa. Inoko, kadipo na bukomo kupita Yesu! Na bukwashi bwa Yesu, myanda miyampe isapwilwanga bantu ba mu mizo yonso. Tala buno bukamoni.

7. Le i bukamoni’ka bomona bulombola’mba Kusokwelwa 14:6, 7 ufikidilanga?

⁷ Batwe basapudi ba Bulopwe, twikondanga ne na kikoleja kikwabo kya kusapwila bantu bavule kebesambepo ludimi lotwisamba. Yesu wālaile mu kimonwa kyaāpele mutumibwa Yoano amba, mu ano etu mafuku myanda miyampe ikanekenya kino kikoleja. (Tanga Kusokwelwa 14:6, 7.) Namani? Tupanga bantu bavule mukenga wa kwitaba ku musapu wa Bulopwe. Dyalelo, bantu ba ntanda yonso babwanya kutanga myanda īsambila pa Bible pa site ya jw.org, mwanda itanwa’po mu ndimi 1 000 ne musubu! Kitango Kyendeji kyaitabije twalamune dibuku Ikala Mūmi Nyeke!​—kingidilwa kyetu kibajinji kya kulonga nakyo bana ba bwanga, mu ndimi 700 ne musubu! Kadi byakudya bya ku mushipiditu biletwanga kupityila ku mavideo a ba bitwi ne mu mabuku a bilembwa bya bampofu. Bine, tumonanga kufikidila kwa bupolofeto bwa mu Bible. Bantu ba mu “ndimi yonso ya mizo” befundanga kwisamba “ludimi lutōka tō” lwa bubine bwa mu Bible. (Zek. 8:23; Zef. 3:9) Bino byonso bifikidilanga munshi mwa buludiki bwa Yesu Kidishitu.

8. Lelo i bika bilupukile ku mwingilo wetu wa busapudi?

⁸ Dyalelo, bantu 8 000 000 ne musubu ba mu matanda 240 badi mu bulongolodi bwa Yehova, kadi mwaka ne mwaka kubatyijibwanga bantu tununu dikumi! Inoko kya mvubu kutabuka bibalwa, bano bana ba bwanga bapya batamijanga ngikadila ya bwine  Kidishitu, ke “bumuntu bupya” kadi. (Kol. 3:8-10) Bavule i baleke lūma, mboloji, ne kusanswa muzo. Bupolofeto budi mu Isaya 2:4 bufikidilanga; ‘kebakīfundengapo monka divita.’ Byotuloñanga bukomo bwa kuvwala bumuntu bupya, tukwashanga bantu bafwene ku bulongolodi bwa Leza, kadi tulombolanga’mba tulondanga mutadi wetu Yesu Kidishitu. (Yoa. 13:35; 1 Pe. 2:12) Le bino byonso bibwanikanga namani? I mwanda Yesu witupanga bukwashi botusakilwa.

9. Le kukwatañana na Mateo 24:45-47, i bika byālailwe byadi bya kulongeka mu kitatyi kya ku mfulo?

⁹ Tanga Mateo 24:45-47. Yesu wālaile amba mu kitatyi kya ku mfulo, ukatūla’ko “umpika mukōkele ne mudyumuke” mwanda wa kuleta byakudya bya ku mushipiditu. Nanshi twadi ba kutengela kumona uno umpika wingila bininge dyalelo. Ne ye mobikadile. Mutadi wetu Yesu wingidijanga kakisumpi katyetye ka bana-balume bashingwe māni mwanda wa kupa bantu ba Leza ne boba basangela musapu, ‘byakudya bya ku mushipiditu pa kitatyi kifwaninwe.’ Bano bana-balume kebemonengapo bu bamfumu ba lwitabijo lwa bakwabo. (2 Ko. 1:24) Inoko, betabijanga’mba Yesu Kidishitu ye “mutangidiji kadi mukatampe” wa bantu bandi.​—Isa. 55:4.

10. Lelo i dibuku’ka pa ano alombwelwe pa kifwatulo dyakunekenye unangile mu kashinda katwala ku būmi bwa nyeke?

¹⁰ Tamba mu 1919, umpika mukōkele uteakanyanga mabuku palapala, mene apele boba basangela mukenga wabo mubajinji wa kwifunda bubine bwa mu Kinenwa kya Leza. Mu 1921, umpika walupwile dibuku La Harpe de Dieu mwanda wa kukwasha bapya befunde bubine bwa mu Bible bwa kyalwilo. Kitatyi pa kupita’po, kwalupwilwe mabuku makwabo. Lelo i dibuku’ka dyakukweshe uyuke Shobe  wa mūlu ne kumusanswa? Le i “ Que Dieu soit reconnu pour vraie !,” Bubinebine butwala ku bumi bwa nyeke ne nyeke, Ukokeja kwikala ne bumi bwanyeke mu paladisa pano pantanda, Buyuki Butwala ku Būmi bwa Nyeke, Lelo I Bika Bine Bifundija Bible?, Lelo I Bika Bitufundija Bible?, nansha i dibuku Ikala Mūmi Nyeke! dyotwatambwile panopano? Ano mabuku onso alupwilwe mwanda wa kuvuija bisakibwa bya mu kitatyi kyoalupwilwe’mo.

11. Mwanda waka i kya mvubu batwe bonso tutambule byakudya bya ku mushipiditu?

¹¹ Ke enkapo bapya kete basakilwa kudya byakudya bikomo bya ku mushipiditu. Batwe bonso tusakilwa’byo. Mutumibwa Polo wālembele amba: “Byakudya bikomo i bya bantu batame.” Polo wābwejeje’ko amba kulonda byotwifunda mu Bible, kuketukwasha tuyuke “mwa kushiañenya ne kiyampe ne kibi.” (Bah. 5:14) Mu bino bitatyi bya makambakano monekele mwikadila wa bantu, i bikomo bininge kulonda misoñanya ya Yehova. Inoko Yesu uloñanga bukomo amba, tutambule byakudya bya ku mushipiditu byotusakilwa mwanda wa kukomeja lwitabijo lwetu. Bino byakudya bilupulwanga mu Bible, Kinenwa kya Leza kya ku bukomo bwa mushipiditu. Umpika mukōkele uteakanyanga bino byakudya ne kwibyabanya na buludiki bwa Yesu.

12. Pamo bwa Yesu, le twi balēmeke namani dijina dya Leza?

¹² Pamo bwa Yesu, twi bape dijina dya Leza bulēme bodifwaninwe. (Yoa. 17:6, 26) Kimfwa mu 1931, twaselele dijina dya mu Bisonekwa dya bu Batumoni ba Yehova, dine dilombola motukwatyile dijina dya Tata wetu wa mūlu na bulēme. (Isa. 43:10-12) Tamba mu Kweji 10 wa mwine mwaka’wa, dijina dya Leza ditanwanga pa kibalu kya dino dipepala. Ne kadi, Bible Bisonekwa Bijila​—Bwalamuni bwa Ntanda Mipya i mujokeje dijina dya Leza pa bifuko podyadi mu Kinenwa kyandi. Bine,  kuno i kwishila kukatampe na bipwilo bya kine Kidishitu, bitalwile dijina dya Yehova mu malamuni abo mavule a Bible.

13. Le i bika bikukulupija’mba Yesu wingidijanga “umpika mukōkele ne mudyumuke” dyalelo? (Yoano 6:68)

¹³ Kupityila kudi “umpika mukōkele ne mudyumuke,” Yesu i mutūle’ko bulongolodi bwa kutendelwa pano pa ntanda mwanda wa kukwatakanya butōtyi butōka. Lelo wiivwananga namani pangala pa buno bulongolodi? Ye uno wiivwananga mwēivwanine mutumibwa Petelo wānenene Yesu amba: “Le twenda kudi ani? Abe udi na binenwa bya būmi bwa nyeke.” (Yoa. 6:68) Le umo ne umo motudi wadi wa kwikala namani shi ketwadipo mu bulongolodi bwa Yehova? Kidishitu witudishanga biyampe ku mushipiditu kupityila ku buno bulongolodi. Kadi witufundijanga ne mwa kwingidila senene mwingilo wetu wa busapudi. Ne kadi witukwashanga tuvwale “bumuntu bupya,” amba tusangaje Yehova.—Ef. 4:24.

14. Le mu kitatyi kya misongo ya Corona, wamwenine namani mu kwikala mu bulongolodi bwa Yehova?

¹⁴ Yesu witupanga bulombodi bwa tunangu mu bitatyi bya bimpengele. Twemwenine byabuyabuya bya buno bulombodi kitatyi kyaponene misongo ya Corona. Bantu bavule pokebadipo bayukile bya kulonga, Yesu wetupele bulombodi bwa patōka mwanda wa kwitukinga. Twakankamikilwe kuvwala maske potudi mu bantu bavule, ne kwikala kulampe na bantu bakwabo. Bavulwije bakulumpe besambe kyaba kyonso na bonso mu kipwilo, ne kuyuka byobasakilwa ku ngitu ne ku mushipiditu. (Isa. 32:1, 2) Kadi twatambwile bulombodi bukwabo ne kukankamikwa  kupityila ku mapya atamba ku Kitango Kyendeji.

15. Le i bulombodi’ka bobetupele bwa mwa kupwidila ne kusapula mu kitatyi kya kipupo, ne i bika bilupukile’ko?

¹⁵ Mu kitatyi kya kipupo, betupele ne bulombodi bwa patōka bwa mwa kupwidila ne kusapula. Bukidi bonka, twashilwile kutanwa ku kupwila, ku bitango bikatampe ne bityetye, kupityila ku bingidilwa bya busendwe. Kadi twashilwile kusapula kupityila ku mikanda ne matelefone. Bine, Yehova wetwesele pa bukomo botwalongele. Misambo mivule yaletele malapolo alombola’mba kudi kuvudila’ko kwa basapudi. Bavule bemwenine myanda ikankamika mu kino kitatyi’ki.​—Tala kapango “ Yehova Weselanga Busapudi Bwetu.”

16. Le i bika byotubwanya kukulupila?

¹⁶ Bamo ye bano balangile amba bulongolodi bubapityija’byo pa mwanda utala kino kipupo. Inoko kitatyi pa kupita’po, byamwekele patōka’mba bulombodi bobetupele bwadi bwendele’mo. (Mat. 11:19) Kadi kitatyi kyotulangulukila pa muswelo wendeja Yesu bantu bandi na buswe, tukulupilanga’mba nansha shi tubatanwa na bika kumeso’ku, Yehova ne wandi Mwana muswedibwe bakekala netu.​—Tanga Bahebelu 13:5, 6.

17. Le wiivwananga namani pa kwikala na Yesu bu mutadi wetu?

¹⁷ Bine, i dyese’po kashā kwingila munshi mwa buludiki bwa Yesu. Tudi mu bulongolodi bunekenye bijika byonso bya bibidiji, mizo, ne ndimi. Tudishibwanga biyampe ku mushipiditu ne kukumbanibwa senene mwa kwingidila mwingilo wetu wa busapudi. Kadi batwe bonso twi bafundijibwe mwa kuvwadila bumuntu bupya, ne kwisanswa batwe bene na bene. Bine, tudi na bubinga bwa kwianinya padi Yesu mutadi wetu!