Tata wadi mukulumpe mu Kipwilo kya Bumo kya mu Kanada, o mwanda yenga ne yanga wadi witutuma ami ne nkasami mwana-mukaji ku masomo a Dya Yenga, kupwa mu 11:00 twaenda nandi mu mwingilo wa kipwilo. Ebiya kyolwa twaenda na Mama ku Njibo ya Bulopwe. Byadi bitupēlela kumona kwishila pa bukata bwa ino mitōtelo ibidi.

Mama wasapwidile balunda nandi ba tamba kala, ba Bob ne Marion Hutcheson nkulupilo yandi mipya, nabo baikala Batumoni ba Yehova. Mu 1958 ba tutu Hutcheson ne wa kwandi baunsela pamo ne babo bana bana-balume basatu, twaenda nabo ku Kitango kya Matanda kya mafuku mwānda kyalongēlwe mu New York City, kyadi na mutwe wa mwanda unena’mba Kiswa-Mutyima kya Leza. Pomvuluka’byo, monanga’mba byebalombele bukomo bukatampe pa kunsela twende nabo, inoko kino kitango i kintu kyonkikelwapo nansha dimo mu bwami būmi.

Ponadi na myaka dikumi ne musubu, twadi tushikata ku ferme kwine konadi nsangela kumuna banyema. Nadi nsaka bininge kufunda masomo a kundapa ne kumuna banyema. Mama wasapwila’mo mukulumpe umo mu kipwilo. Nandi wamvuluja’mba tudi mu “mafuku a mfulo,” kadi wanombola kufunda iniveleshite mu bula bwa myaka mivule mokukekadila  na lupusa pa kipwano kyami na Yehova. (2 Tm. 3:1) Pa kino, nakwete butyibi bwa kuleka kufunda iniveleshite.

Inoko nadi’nka neipangula byonsa kulonga shi napu masomo a sekondele. Nansha byonadi ntambila mu busapudi yenga ne yenga, nkyadipo nsangela busapudi kadi nkyadipo nanga’mba mbwanya kwingila bupania. Mu kine kitatyi’kya, tata mwine kadipo Kamoni pamo ne tata nkasa, badi bankankamika kengile kitatyi kyonso mu kompani mikatampe mu Toronto. Tata nkasa byaadi’ko na kitenta, o mwanda naitabije kano kaji.

Byonadi ñingila kyaba kyonso mansá a tentekelo mu Toronto ne kupwana na bantu bampikwa kwitabija, byanengeje ntunye kutanwa ku kupwila ne kusapula kyaba ne kyaba. Dibajinji nadi nshikata na nkambo mwana-mulume kibutula tata mwine kadipo Kamoni, inoko paafwile nadi kensakilwa kifuko kikwabo kwa kushikata.

Tutu Hutcheson ne wa kwandi, bene baendele nami ku kitango mu 1958, badi pamo’nka bwa bambutwile kondi. Baungita nkashikate nabo kadi bankweshe ningije kipwano kyami na Yehova. Mu 1960, twabatyijibwa pamo na wabo mwana John. John washilula kwingila bupania, bine byankankamikile nami ñanze kusapula bininge. Batutu pobamwene kwendelela kwami kwa ku mushipiditu, bantonga bu mwingidi wa Masomo a Mwingilo wa Kiteokratike. a

Mu 1966, twesonga na Randi Berge, pania mupyasakane wadi usaka kukengidila kokwa kusakilwa bukwashi. Mutadi wetu wa kipindi wetutele mutyima bininge, wetukankamika tukakwashe kipwilo kya mu Orillia, mu Ontario. Netu twavilukila’mo.

Kepaijijepo’tu na potwafikile mu Orillia, nami naikala pania wa lonso pamo bwa Randi. Bupyasakane bwandi bwadi kala kebunkwashe bininge! Ponashilwile bupania, nemwenine nsangaji idi mu kwingidija Bible ne kumona bantu bevwanija bubine. Bine twasangedile bininge kukwasha ba mulume ne mukaji bamo ba mu Orillia bashinte būmi bwabo ne kwikala bengidi ba Yehova.

Potwakanangile mu Toronto, twetene’mo na Tutu Arnold MacNamara, umo wa mu batutu badi batangidile mwingilo ku Betele. Waipangula shi tusakanga kwingila bu bapania ba pa bula. Kiponka na ponka nalondolola’mba: “En-en! Ko-konso kutalula’mo’tu mu Québec!” Naonenwe na mumweno mubi wadi na bantu ba mu kipindi kya mu Kanada mwisambwa Angele pa polovenshi ya Québec, mwine mwadi bantu besamba Falanse. Mu kine kitatyi’kya, bantu ba mu Québec badi batombokela ba lupusa ne kusaka’mba ino polovenshi iketwe ku ntanda ya Kanada.

Tutu Arnold walondolola’mba, “Mu kino kitatyi i enka mu Québec kete mutumwa bapania ba pa bula na musambo.” Naitabija kiponka na ponka kwenda’mo. Nadi ndyukile kala’mba Randi usakanga kukengidila’ko. Najingulwile mwenda mafuku amba, buno i butyibi buyampe botwakwete!

Pa kupwa kufunda Falanse mu mayenga atano, ami ne Randi pamo ne ba mulume ne mukaji bakwabo twaenda mu Rimouski, ku kintu kya makilometele 540 dya kungala ne kutunduka kwa Montréal. Inoko twakidi na bivule bya kufunda, bine byamwekele patōka ponadi ntanga misapu kampanda ku kupwila. Pa kyaba kya kunena’mba ku kitango kīya’ko tusa kwikala’ko na “beni batamba mu Otrishe,” ami nanena’mba, tusa kwikala’ko na “beni badikolongo.”

Mu Rimouski, kutentekela pa batwe badi’mo, kwaidīle bakaka baná bapyasakane ne ba tutu Huberdeau ne wa kwandi, pamo ne babo bana babidi bana-bakaji. Ba Tutu Huberdeau ne wa kwandi baluwile njibo mikatampe ya byumba bisamba-bibidi mwine mwadi mushikata bapania bonso ne kukwasha’ko ku kufuta lupeto lwa kuluwa. Twadi twiita bu Njibo Itōka, mwanda kumeso kwadi mpentyi itōka ne na bikomo bitōka. Divule twadi tushikata’ko bantu 12 kutūla ku 14. Ami ne Randi byotwadi bapania ba pa bula, twadi tukasapula lubanga ne kyolwa. Kino kyadi kitukwasha mwanda twadi nyeke na ba kusapula nabo—nansha ke mu kitatyi kya mashika bininge kyolwa.

Twapwene bininge na bano bapania ba kikōkeji baikala pamo bwa kyetu kisaka. Kyaba kimo twadi tushikatyila pamo tōta kadilo ne kwikala na difuku dya kutēkela batwe bonso pamo. Tutu umo byaadi uyukile komba minjiki, divule mu Dya Mposo bufuku twadi twimba ne kuja.

Mwaba wa mu Rimouski walupwile bipa! Myaka itano pa kupita’po, twaikele na nsangaji ya kumona bantu bavule botwadi twifunda nabo Bible bendelela kufika ne ku kubatyijibwa. Kipwilo kyabaile’ko kyaikala na basapudi 35.

Mu Québec, twatambwile’mo bufundiji bulumbuluke bwa mwa kusapwila. Twemwenine muswelo wetukweshe Yehova mu mwanda utala kuvuija bisakibwa byetu bya ku ngitu. Kadi, twefundile kusanswa bantu besamba Falanse, ludimi lwabo, ne bibidiji byabo—bine byetulengeje tusanswe bibidiji bikwabo.—2 Ko. 6:13.

Mu kitulumukila, musambo wetutuma mu kibundi kya Tracadie, ku kyabu kya kutunduka kya New Brunswick. Kino kyaikele bu kikoleja mwanda twadi tukitamba mu kushinya kontala ya kuluwa njibo kadi nadi na kontala ya kufundija ku masomo mu kitatyi kityetye. Bantu bamo botwadi twifunda nabo Bible badi kebaijije mu kwikala basapudi kadi twadi ketwapwile Njibo ya Bulopwe yotwadi tūbaka.

Twalombēle bininge ku mfulo kwa yenga’wa pa mwanda utala kuviluka, twakapempula ne kibundi kya Tracadie, kine kyadi kishile bininge na  kibundi kya Rimouski. Inoko twanenene amba Yehova byaetusakila twende’ko, tusa kwenda’ko. Twatūdile Yehova pa ditompo ne kwimwena muswelo waadi witutalwila bijika. (Mal. 3:10) Monka mobyadi bikadile nyeke, kipwano kikomo kya Randi na Yehova, mushipiditu wandi wa kwipāna, ne kamuzaulo kandi, byetulengeje tupēlelwe kuviluka.

Mu kipwilo motwatuminwe mwadi’tu mukulumpe umo, Tutu Robert Ross. Aye pamo ne wandi mukaji Linda baingidile kuno bu bapania, kupwa bakwata butyibi bwa kushala’ko pobabutwile wabo mwana umbajinji. Nansha byobadi na mwana mutyetye wa kulela, betukankamikile bininge ami ne Randi kupityila ku kizaji kyabo ne bupyasakane bwabo mu busapudi.

Pa kupwa kwingila bu bapania mu bula bwa myaka ibidi mu Tracadie, twatambwile monka kintu kyoketwadipo tulangila—lwito lwa kukengila mu mwingilo wa kwendakana. Twaingile mu bipindi mwisambwa Angele mu bula bwa myaka, kupwa betutuma mu kipindi mwisambwa Falanse mu Québec. Mutadi wetu wa distrike mu Québec, Tutu Léonce Crépeault, wadi umfwija’ko pa mīsambo yami. Kupwa kitatyi kikwabo wadi nyeke ungipangula’mba, “I muswelo’ka oibwanya kwikadila’ko ya kamweno?” b Kunta mutyima namino kwankweshe nonge bukomo bwa kulengeja bufundiji bwami bwikale bupotoloke kadi bupēla kwivwana.

Mwingilo onkikelwapo nansha dimo i owa onapēlwe mu 1978 mu Montréal ku Kitango kya Matanda kinena’mba, “Lwitabijo lwa Bushindañani.” Naingile ku Mwingilo wa Byakudya. Twadi tutengele bantu 80 000, kadi twadi tunenwe kwibadisha mu muswelo mwishile na motwadi tulongela mafuku kunyuma. Bintu byonso byadi bipya: bingidilwa, byakudya bya kutēka, ne muswelo wa kwibitēka. Twadi na mafrigo makatampe 20, inoko kyaba kimo keadipo engila biyampe. Kumeso kwa difuku dibajinji kushilula, ketwadipo tubwanya nansha kutwela mu kiwanza kya futu mwanda wa kuteakanya bintu kufika ne mu minwi ya bukya ke kitango, mwanda wa mpangiko ya makayo a futu yadi’ko kala. Kadi twadi tunenwe kushilula bufuku kuteakanya byakudya bya lubanga! Twakōkele, inoko naboile ñeni mivule ku bengidi-nami ba kwilanga badi bengila bininge, na ngikadila miyampe, ne na kamuzaulo. Twi bapwane nabo bininge kufika ne dyalelo. Yadi nsangaji mikatampe kumona kino kitango  kya kasekuseku kilongelwa mu Québec, mu polovenshi mwadi mupangwapangwa bininge bantu ba Leza mu myaka ya 1 940 ne 1 950!

Nefundīle bivule ku batadi bakwabo botwadi twitana nabo ku bitango bikatampe mu Montréal. Mwaka umo nenki, Tutu David Splane, wingila pano mu Kitango Kyendeji, wadi mwimaniji wa kitango. Mwenda mafuku, nami pobaunenene kwimanina kitango, Tutu David waingile nami biyampe.

Mu 2011, pa kupwa kulonga myaka 36 mu mwingilo wa kwendakana, baunenene kengile bu mufundiji ku Masomo a Bakulumpe pa Kipwilo. Ami ne Randi twalēle pa bitanda 75 mu bula bwa myaka ibidi, inoko twamwenine’mo bininge. Ku mfulo kwa yenga ne yenga, bakulumpe badi bāya bafwija’ko, mwanda bemwenine Kitango Kyendeji mokyadi kitedile mutyima ku būmi bwa ku mushipiditu bwa bakulumpe.

Mwenda mafuku, nafundije ku Masomo a Basapudi ba Bulopwe. Divule baeleve badi bakōka ne kuzumbija mutyima mwanda badi na bivule bya kulonga: kushikata mu kalasa mu bula bwa mansá asamba-abidi ku difuku, kulonga madevwala mu bula bwa mansá asatu kyolwa kyonso, ne kwingila mingilo iná nansha itano yenga ne yenga. Ami ne mwadimu mukwabo twebashintulwidile amba babwenye kulonga bino byonso na bukwashi bwa Yehova. Mvulukanga nyeke mwadi mutulumukila baeleve pa kumona’mba na kukulupila mudi Yehova, babwenye kulonga bivule kutabuka pa byobadi balangila.

Mama byaatele bantu bakwabo mutyima, wakweshe bantu baadi wifunda nabo Bible bendelele, enka ne kukwasha tata ashinte mumweno waadi nao pa bubine. Mafuku asatu pa kupita’po na pafwile mama, tata wetutulumwije na kwiya kutanwa ku mwisambo wa bantu bonso ku Njibo ya Bulopwe, kadi waendelele kutanwa’ko mu bula bwa myaka 26 yalondele’po. Nansha Tata byakabatyijibwepo, bakulumpe badi banombola’mba wadi umbajinji kufika ku kupwila yenga ne yanga.

Mama wetushidile batwe bandi bana bonso kimfwa kiyampe. Bankasami bonso basatu pamo ne babo balume bengidilanga Yehova na kikōkeji. Babidi bengilanga ku bilo ya musambo—umo mu Portigale, mukwabo nandi mu Haiti.

Pano ami ne Randi twingilanga bu bapania ba pa bula mu Hamilton, mu Ontario. Potwadi mu mwingilo wa kwendakana, twadi tusangela kukatūla banabetu ku kujokela’mo ne ku bifundwa byabo. Inoko pano tudi na nsangaji ya kumona bantu botwifunda nabo Bible bendelela ku mushipiditu. Kadi potwendelela kupwana na batutu ne bakaka ba mu kipwilo kyotudi’mo pano, tukankamikwanga bininge potumona muswelo wibakwatakanya Yehova mu bitatyi biyampe ne mu bibi mwine.

Potuvuluka ino myaka yonso’i, tufwijanga’ko bininge batutu ne bakaka betutele mutyima. Netu twalongele bukomo bwa kuta bakwetu “mutyima bininge,” ne kwibakankamika bengidile Yehova mungya mobabwaninya. (2 Ko. 7:6, 7) Kimfwa mu kisaka kimo, mukaji, mwana mwana-mulume, ne mwana mwana-mukaji, bonso badi mu mwingilo wa kitatyi kyonso. Naipangula mulume shi nandi ubwanya kwingila bupania. Walondolola’mba wadi ukwatakanya bano bapania basatu. Ebiya namwipangula’mba, “Le ubwanya kwibakwatakanya kutabuka mwibakwatakenya Yehova?” Namukankamika emwene nsangaji yobadi bemwena. Myeji isamba pa kupita’po, nandi waikala pania.

Ami ne Randi tukendelela kusapwila “lukongo lwiya’ko” myanda ya ‘bilongwa bya kutendelwa’ bya Yehova, kadi tukulupile’mba nabo bakasangela kwingidila Yehova pamo’nka bwa batwe.—Ñim. 71:17, 18.