YEHOVA wāpele mutumibwa Polo mushipiditu alembe myanda itala ngikadila kitema mine iletwanga na bukomo bwa mushipiditu ujila. (Ngalatea 5:22, 23) Ino ngikadila itwanga mu kikonge bu “bipa bya mushipiditu.” * (Tala kunshi kwa dyani.) Kadi bino bipa bya mushipiditu bibadilwanga mu “bumuntu bupya” bwine bufwaninwe kuvwala bene Kidishitu. (Kolose 3:10) Monka mwikadilanga mutyi, ukapa bipa enka shi usangilwanga mema senene, ne muntu nandi ukekala na ino ngikadila milumbuluke enka shi uludikwanga na mushipiditu ujila mu būmi bwandi.​—Ñimbo ya Mitōto 1:1-3.

Ngikadila mibajinji itelelwe na Polo i buswe. Le ino ngikadila i milēme namani? Polo wānenene amba shi aleke kwikala na buswe, nabya waikala “wa bitupu.” (1 Kodinda 13:2) Ino le buswe i bika, ne i muswelo’ka otubwanya kwibutamija ne kwibulombola difuku ne difuku?

Nansha shi i bikomo kushintulula ne pa mfulo mwikadile buswe, aye’ko Bible ulombola bintu bibwanya kulanga ne kulonga muntu udi na buswe. Kimfwa, muntu udi na buswe udi ne na “kitūkijetyima ne kanye” kadi usangalanga “pamo na bubine.” Shi muntu udi na buswe, ‘utyumwinanga byonso mu manwi, witabijanga byonso, ukulupilanga byonso, kadi ūmininanga byonso.’ Usanswanga bantu bakwabo kisanso kikatampe, wibata mutyima, kadi i mulunda muyampe. Inoko shi muntu kadipo na buswe, wikalanga na mukao, mitatulo, ulonga byampikwa kwendela’mo, wa kwisakila, ne wampikwa lulekelo. Pa kyaba kya kwikala na ngikadila mibi pamo bwa ino, tufwaninwe kulombola buswe bwa binebine ku bantu bakwabo, ne buno buswe “kebukimbangapo tumweno twa abo bwine.”​—1 Kodinda 13:4-8.

“Leza i buswe.” (1 Yoano 4:8) Buswe bwandi i bumweke mu mingilo yandi yonso ne mu bilongwa byandi. Kilongwa kyandi kya buswe bukatampe ku muzo wa muntu i kya kutuma Yesu āye pano pa ntanda, asusulwe ne kwitufwila. Mutumibwa Yoano wānenene amba: “Pano e pasokokēle buswe bwa Leza kotudi, mwanda Leza watumine wandi Mwana wa bunka mu ino ntanda amba tumwene būmi ponka padi aye. Buswe bwine budi namino, ke kunenapo amba batwe twamusenswe Leza, ino amba aye wetusenswe watuma ne wandi Mwana bu kitapwa kya kupwanija pa mwanda wa bubi bwetu.” (1 Yoano 4:9, 10) Kupityila ku buswe bwandi, tulekelwanga bubi bwetu kadi tudi na lukulupilo lwa būmi bwa nyeke.

Yesu wālombwele amba usenswe muzo wa muntu na kupāna būmi bwandi bu kitapwa mwanda wa kulonga kiswa-mutyima kya Leza. Mutumibwa Polo witusapwila’mba: “Pa ‘kiswa-mutyima’ kyatelwa’ki tubapandulwa ponka pa kyamulambu kya umbidi wa Yesu Kidishitu dimo kupwididile.” (Bahebelu 10:9, 10) I kutupu muntu nansha umo ubwanya kulombola buswe bukatampe na buno. Yesu wānenene amba: “I kutupu wa buswe bukatampe kutabuka buno’bu, amba muntu apāne muya wandi pa mwanda wa balunda nandi.” (Yoano 15:13) Lelo bantu bampikwa kubwaninina babwanya kwiula buswe  bwalombwele ba Yehova ne Yesu? Bine! Tutalei muswelo otubwanya kwibeula.

Polo witukankamika’mba: “Iulai Leza, pamo bwa bana baswedibwe, kadi nangilai nyeke mu buswe, monka mwemusanshilwe ne Kidishitu, wepāna pa mwanda wenu.” (Efisesa 5:1, 2) Lelo kunangila “nyeke mu buswe” kushintulula bika? I kulombola buswe kitatyi kyo-kyonso. Ketufwaninwepo’tu kunena bitupu amba tusenswe bakwabo. Tulombolanga’mba twibasenswe kupityila ku bilongwa byetu. Yoano wālembele amba: “Twanwe twana tutyetye, ketwakisanswai na binenwa ne ludimi bitupu, ino twisanswei na bilongwa ne bubine.” (1 Yoano 3:18) Kimfwa, tusapulanga “myanda miyampe ya Bulopwe” mwanda tusenswe Yehova ne bantu bakwabo. (Mateo 24:14; Luka 10:27) Kadi tunangilanga “nyeke mu buswe” shi tudi na kitūkijetyima, kanye, ne lulekelo. Tulondanga madingi a mu Bible a amba: “Monka mwemulekēle Yehova na mutyima umo, nenu mufwaninwe kulongela monka.”​—Kolose 3:13.

Inoko shi tudingila bantu bakwabo nansha kwibalemununa, kino kekishintululapo amba ketudipo na buswe. Kimfwa, pa kubija babo bana, bambutwile bamo baloñanga kintu kyo-kyonso kilomba bana. Inoko mbutwile usenswe wandi mwana bya binebine, wikalanga usumininwa ponso pobilomba kulonga nabya. Mu muswelo umo onka, shako Leza i buswe, inoko ‘ulemununanga boba basenswe.’ (Bahebelu 12:6) Nanshi kulemununa muntu mu muswelo mwendele’mo ponso pasakilwa kulemununwa i kilomboji kya buswe. (Nkindi 3:11, 12) Inoko kokilwa, batwe bonso twi bantu ba bubi, kadi kyaba kivule tukomenwanga kulombola buswe. O mwanda nanshi batwe bonso tubwanya kwilumbulula mu muswelo otulombola buswe. Le i mu miswelo’ka motubwanya kulonga kino? Lekai tubandaulei’ko miswelo isatu.

Mubajinji, lomba Leza akupe mushipiditu wandi ujila, mwine uletanga buswe. Yesu wānenene amba Yehova upānanga “mushipiditu ujila ku boba bamulomba.” (Luka 11:13) Nanshi tubwanya kukulupila’mba shi tulombe mushipiditu ujila ne kwiuleka witukwashe, nabya tukatamija bininge buswe. (Ngalatea 5:16) Kimfwa, shi wi mukulumpe, ubwanya kulomba mushipiditu ujila ukukwashe wikale na buswe podingila bakwabo madingi emanine pa Bible. Shi wi mbutwile, ubwanya kulomba mushipiditu ujila wa Leza ukukwashe ulemunune bobe bana na buswe, pampikwa bukalabale.

Wa bubidi, langulukila na mushike pa muswelo wālombwele Yesu buswe nansha ke pādi pamususula bakwabo. (1 Petele 2:21, 23) Shi muntu wakulubila nansha shi ubalongelwa bukondame, wiipangule amba, ‘Shi wadi amba i Yesu, le wadi wa kulonga’po namani?’ Kaka umo witwa bu Leigh wamwene amba kwiipangula kino kipangujo kwamukweshe anze kulanguluka kumeso kwa kulonga kintu. Unena’mba: “Difuku dimo, mwingidi nami umo mwana-mukaji waunenene bibibibi mu musapu waatumine bakwetu botwingilanga nabo. Kino kyaunsense bininge. Ino ami pa kupwa kwiipangula’mba, ‘Le i muswelo’ka ombwanya kwiula Yesu pa kupwija uno mwanda?’ Ami pa kupwa kulangulukila pa mwadi mwa kulongela’po Yesu, naleka’tu bitupu mwanda’wa, napela kwiubaija. Mwenda mafuku, nayuka’mba mwingidi nami’wa wadi ubela bininge kadi wadi mutyumukwe mutyima. Ku mfulo najingulula’mba padi kadipo utele mutyima na bubine ku byaalembele. Kulangulukila pa muswelo wādi ulombola Yesu buswe nansha ke pobādi bamukolomona kwaunkweshe nami nombole buswe bwa uno muswelo ku mwingidi nami.” Shi twiula Yesu, nabya tukasanswa nyeke bantu bakwabo.

Wa busatu, kwifunda kulombola buswe bwa kwipāna. Buno bo buswe buyukanyanga balondi ba Yesu ba bine. (Yoano 13:34, 35) Yesu aye mwine wālombwele buswe bwa uno muswelo, kadi i mwitushile kimfwa kiyampe. Muswelo’ka? Na kutamba mūlu, “wekōlele aye mwine” pa mwanda wetu, kufika’nka “ne ku lufu.” (Fidipai 2:5-8) Shi twiule buswe bwa Yesu bwa kwipāna, nabya tukalanga ne kwiivwana pamo bwa aye, ne kadi tukatūla tumweno twa bakwabo pa kifuko kibajinji.

Twimwenanga byabuyabuya bivule shi tulombola buswe. Tala bidi bimfwa bibidi:

• BUBANA NA BANA BWA NTANDA YONSO: Byotwisenswe batwe bene na bene, o mwanda tuyukile amba batutu ne bakaka ba mu kipwilo kyo-kyonso kyotubwanya kwenda’mo kujokoloka ntanda yonso, baketutambula na kyanga. I dyese’po kashā kuyuka’mba wi muswedibwe na “kisaka kituntulu kya banabenu mu ino ntanda”! (1 Petelo 5:9) Tutana buswe bwa uno muswelo enka mu bantu ba Leza kete.

• NDOE: ‘Kwitūkijija mutyima na buswe batwe bene na bene’ ko kwitwikadije mu ‘kijimba kya ndoe kitulungila pamo.’ (Efisesa 4:2, 3) Twimwenanga ino ndoe ku kupwila, ne ku bitango bityebitye ne bikatampe. Mwene witabije amba ino ndoe yotudi nayo keidipo mamwekamweka mu ino ntanda ya dyalelo mikalañane? (Ñimbo ya Mitōto 119:165; Isaya 54:13) Shi tulondalonda ndoe na bantu bakwabo, nabya tulombolanga’mba twibaswele bya binebine, ne kino kisangajanga Tata wetu wa mūlu.​—Ñimbo ya Mitōto 133:1-3; Mateo 5:9.

Polo wālembele amba: “Buswe abo butamijanga.” (1 Kodinda 8:1) Le ko kunena namani? Mu 1 Kodinda 13, witwa na bantu bamo bu “Lwimbo lwa Buswe,” Polo wāshintulwile’mo muswelo witutamijanga buswe. Buswe bukimbanga bidi tumweno twa bantu bakwabo. Buswe butanga mutyima ku bisakibwa bya bantu bakwabo. (1 Kodinda 10:24; 13:5) Kadi buswe byobudi na butūkanye, kitūkijetyima, ne kanye, kadi buta mutyima ku bisakibwa bya bakwabo, o mwanda butamijanga bisaka mu buswe ne kukutyila bipwilo mu bumo.​—Kolose 3:14.

Kudi miswelo mivule ya kulomboja’mo buswe ku bantu bakwabo, inoko buswe botuswele Leza bo bwa mvubu kutabuka kadi bo buswe bwitutamijanga mpata. Mwanda waka? Mwanda buswe botumuswele bwitukutyilanga mu bumo! Bantu ba bitamina, nkoba, ne ndimi yonso batōtelanga Yehova pamo, kadi bamwingidilanga na “mutyima umo.” (Zefenia 3:9) Shi ke pano, tusumininwei kulombola difuku ne difuku ino ngikadila ibadilwa mu bipa bya mushipiditu ujila wa Leza.