1. Le i bāni bākweshe pa kushimika kipwilo kya mu Fidipai?

KITATYI kyāfikile ba mutumibwa Polo, Shilasa, Luka, ne Temote mu Fidipai, kibundi kyādi kimuninwe na Loma, bātene’mo bantu bavule bāsangedile musapu wa Bulopwe. Bano batutu baná bapyasakane bākweshe pa kushimika kipwilo, kadi bana ba bwanga bonso bāshilula kupwidila pamo, mobimwekela i ku njibo ya Didya, mwine Kidishitu wa kizaji.​—Bil. 16:40.

2. Le i makambakano’ka ātene kino kipwilo?

² Ne kwija kwine mpika, kino kipwilo kipya kyātanwa na makambakano. Satana wātonwene balwana na bubine balwe mwingilo wa busapudi wādi wingila bano bene Kidishitu ba kikōkeji. Bākwata ba Polo ne Shilasa, bēbakupila nsonde, ne kwibakuta. Pobēbakutulwile mu buloko, bākapempula bana ba bwanga bapya ne kwibakankamika. Kupwa ba Polo, Shilasa, ne Temote bātamba mu kibundi, ino bimweka bu Luka wāshele monka. Lelo kipwilo kipya kyālongele’po namani? Na bukwashi bwa mushipiditu wa Yehova, bano bene Kidishitu bapya bāendelela kwingidila Yehova. (Fid. 2:12) Bine, Polo wādi na bubinga bwa kwitemba bano banababo mu lwitabijo!

3. Mungya Bene Fidipai 1:9-11, le i bintu’ka byālombele Polo mu milombelo?

³ Kintu kya myaka dikumi pa kupita’po, Polo wālembela kipwilo kya Fidipai mukanda. Potanga uno mukanda, ukamona bukidi bonka’mba Polo wādi usenswe banababo. Wālembele amba: “[Ngabilanga] bininge kwimona nenu banwe bonso na kisanso kya ku mutyima pamo na kyokya kidi na  Kidishitu Yesu.” (Fid. 1:8) Wēbalembēle amba ulombelanga pa mwanda wabo. Wālombele Yehova ebakwashe bavudije buswe, bajingulule bintu bya mvubu mikatampe, bekale ba kubulwa kakoba, baleke kukukaja bakwabo, kadi bendelele kupa bipya byoloke. Na bubine, uketabija’mba tubwanya kumwena dyalelo mu binenwa bya Polo byampikwa budimbidimbi. Nanshi tutangei byobya byobālembēle bene Fidipai kudi Polo. (Tanga Bene Fidipai 1:9-11.) Kupwa tusa kubandaula bintu byaātelele’mo ne kulangulukila pa muswelo otubwanya kwibingidija.

4. (a) Mungya 1 Yoano 4:9, 10, le Yehova wālombwele namani buswe bwaetusenswe? (b) Le tukasanswa Leza namani?

⁴ Yehova wālombwele buswe bukatampe bwaetusenswe na kutuma wandi Mwana pano pa ntanda afwe pa mwanda wa bubi bwetu. (Tanga 1 Yoano 4:9, 10.) Buswe bwa Leza bwampikwa kwisakila bwitutononanga tumusanswe. (Loma 5:8) Le tukasanswa Leza namani? Yesu wālondolwele kino kipangujo paāsapwidile Mufadiseo umo amba: “Sanswa Yehova Leza obe na mutyima obe onso, na muya obe onso, ne na ñeni yobe yonso.” (Mat. 22:36, 37) Ketusakengapo kusanswa Leza na mityima ibidi. Ino difuku ne difuku, tusakanga kutamija buswe botumusenswe. Polo wālombwele bene Fidipai amba buswe bwabo “buvule’nka kuvula.” Le i bika byotubwanya kulonga pa kuvudija buswe botusenswe Leza?

5. Le buswe bwetu bubwanya kuvudila’ko namani?

⁵ Pa kusanswa Leza tufwaninwe bidi kumuyuka. Bible unena’mba: “Yewa ense kasenswepo kayukile Leza, mwanda Leza i buswe.” (1 Yo. 4:8) Mutumibwa Polo wālombwele amba buswe botusenswe Leza bukavula shi tubaikala na “buyuki bwa binebine ne kusansanya kukatampe.” (Fid. 1:9) Potwashilwile kwifunda Bible, twatamije buswe botusenswe Leza mungya buyuki butyetye botwayukile ngikadila yandi ya kutendelwa. Ino batwe pa kwifundila’ko bivule padi Yehova, buswe botumusenswe nabo bwavudila’ko. Na bubine tumwene amba kwifunda Bible kitatyi ne kitatyi ne kulangulukila pa Kinenwa kya Leza i bintu bya mvubu mikatampe mu būmi bwetu!​—Fid. 2:16.

6. Mungya 1 Yoano 4:11, 20, 21, le i muswelo’ka otubwanya kuvudija buswe?

⁶ Buswe bukatampe bwitusenswe Leza buketutonona tusanswe banabetu. (Tanga 1 Yoano 4:11, 20, 21.) Tubwanya padi kulanga’mba ke bikomopo kusanswa batutu ne bakaka. Tutōtanga Yehova ne kulonga bukomo bwa kwiula ngikadila yandi miyampe. Tulondanga kimfwa kya Yesu, mwine wālombwele buswe bukatampe, wāpāna ne būmi bwandi pa mwanda wetu. Inoko, kyaba kimo tubwanya kukomenwa kukōkela musoñanya wa kwisanswa batwe bene na bene. Tulangulukilei bidi pa kimfwa kimo kya mu kipwilo kya Fidipai.

7. Le i ñeni’ka yotuboila ku kidyumu kyobādyumwine ba Evodia ne Shintake kudi Polo?

⁷ Ba Evodia ne Shintake bādi bakaka bapyasakane bāingile “pamo” na mutumibwa Polo. Ino padi bālekele kubulwa kumvwañana kwibasansanye. Mu mukanda waātumīne kipwilo kyādi kingidila’mo bano bakaka, Polo wātelele ba Evodia ne Shintake pa majina, wēbapa ne kidyumu kya patōkelela’mba “bekale na ñeni imo yonka.” (Fid. 4:2, 3) Kadi Polo wālombwele kipwilo kyonso amba: “Longai nyeke bintu byonso kwampikwa miuningo nansha lupata.” (Fid. 2:14) Na bubine, ano madingi mapotoloke a Polo keākweshepo’nka bano bakaka ba kikōkeji ino i ne kipwilo kyonso  kiningije kijimba kya buswe bobesenswe abo bene na bene.

8. Le i kikoleja’ka kikatampe kibwanya kulengeja tukomenwe kusanswa banabetu, ne i muswelo’ka otubwanya kwikinekenya?

⁸ Pamo bwa ba Evodia ne Shintake, netu kudi kikoleja kikatampe kibwanya kwitulengeja tukomenwe kusanswa bakwetu bininge—i kuta mutyima pa kubulwa kubwaninina. Batwe bonso tuloñanga bilubo difuku ne difuku. Ino shi tute mutyima ku kubulwa kubwaninina kwa bakwetu, buswe botwibasenswe bukatalala. Kimfwa, shi tutu wailwa’ko kwitukwasha kitatyi kyotukundula Njibo ya Bulopwe tubwanya kuloba. Shi twanze kubala bilubo byonso bya mwanetu byotuyukile, tukaloba bininge kadi buswe botumusenswe bukatyepa. Shi bino bintu bibakufikila, i biyampe kulangulukila pa buno bubine bwa amba: Yehova umwene kubulwa kubwaninina kwetu ne kwa mwanetu. Ino nansha byokudi kuno kubulwa kubwaninina, aye usenswe mwanetu, kadi witusenswe ne batwe. Pa kino, tufwaninwe kwiula buswe bwa Yehova ne kwikala nyeke na mumweno muyampe pa banabetu. Shi tulonge bukomo bwa kusanswa banabetu, tukaningija kijimba kya bumo.​—Fid. 2:1, 2.

9. Le i bika bibadilwa mu “bintu bya mvubu mikatampe” byātelele Polo mu mukanda waātumīne bene Fidipai?

⁹ Mushipiditu ujila wāpele Polo bukomo bwa kulombola bano bene Fidipai ne bene Kidishitu bonso amba “[jingululai] bintu bya mvubu mikatampe.” (Fid. 1:10) Mu bino bintu bya mvubu mikatampe mubadilwa ne kupandula dijina dya Yehova, kufikidila kwa mpango yandi, ndoe ne bumo bwa kipwilo. (Mat. 6:9, 10; Yoa. 13:35) Shi tute mutyima ku bino bintu bya mvubu mikatampe mu būmi bwetu, tukalombola’mba tusenswe Yehova.

10. Le i bika byotufwaninwe kulonga pa kwikala ba kubulwa kakoba?

¹⁰ Kadi Polo wānenene amba tufwaninwe kwikala “ba kubulwa kakoba.” Kino kekishintululapo amba tufwaninwe kwikala babwaninine. Ketubwanyapo kwikala ba kubulwa kakoba na mwikadile Yehova Leza. Ino Yehova uketumona bu ba kubulwa kakoba shi tulonga bukomo bwa kuvudija buswe bwetu ne kujingulula bintu bya mvubu mikatampe. Muswelo umo otubwanya kulombola buswe bwetu i kulonga bukomo bwa kuleka kukukaja bakwetu.

11. Mwanda waka tufwaninwe kuleka kukukaja bakwetu?

¹¹ Bulombodi bwa kuleka kukukaja bakwetu i kidyumu kya binebine. Le tubwanya kukukaja muntu namani? Tubwanya kumukukaja na butongi botutonga kwipwija mukose, bya kuvwala, enka ne kaji kotutonga kwingila. Padi byotulonga ke bibipo. Ino shi butongi bwetu bubasanshija mutyima wa mundamunda wa muntu, kupwa wakukala, kino i kibi. Yesu wānenene amba byadi bya kwikala biyampe betukutyile dibwe dilēma mwishingo, betwele mu dijiba shi tubakukaja mukōko wandi umo’tu!​—Mat. 18:6.

12. Le i ñeni’ka yotuboila ku kimfwa kya ba mulume ne mukaji bapania?

¹² Tala muswelo waingidije ba bulume ne mukaji bapania kidyumu kya Yesu. Badi mu kipwilo kimo na ba mulume ne mukaji babatyijibwe panopano, batambile mu kisaka mwadi tujilajila. Bano ba mulume ne mukaji bapya badi bakulupile amba bene Kidishitu kebafwaninwepo kwenda ku sinema​—nansha ke kutala mafilime mayampe kwine. Bafītyilwe pobaivwene amba ba mulume ne mukaji bapania bakatadile  filime. Kupwa, ba mulume ne mukaji bapania baleka’byo kwenda ku sinema kufika ne byabwenye bano ba mulume ne mukaji bapya kufundija mutyima wabo wa mundamunda ne kwikala na bujalale. (Bah. 5:14) Na kino kilongwa kyabo kya kubulwa kwisakila, ba mulume ne mukaji bapania balombwele amba basenswe bano banababo bapya mu binenwa ne mu bilongwa.​—Loma 14:19-21; 1 Yo. 3:18.

13. Le i muswelo’ka otubwanya kulengeja muntu alonge bubi?

¹³ Muswelo mukwabo otubwanya kukukaja muntu i kumulengeja alonge bubi. Le kino kibwanya kulongeka namani? Tulangulukilei bidi pa uno mwanda. Pa kupwa kwikonda bininge kadi mu kitatyi kilampe, mwifundi umo wa Bible wabwanya kwinyongolola mu bupika bwa mālwa. Wajingulula’mba ufwaninwe kwijiba’o lonso. Waendelela lubilo kupwa wabatyijibwa. Mwenda mafuku, mwine Kidishitu umo waite uno tutu ku fetyi kupwa wamupe mālwa kanena’mba: “Pano kodi mwine Kidishitu; udi na mushipiditu wa Yehova. Ngikadila imo bidi ya mushipiditu ujila i kwīfula. Shi wīfule, usa kutoma pa ntomeno.” Langa’po bidi mobyadi bya kwikadila shi uno tutu walondele ano madingi a bongojani!

14. Le kupwila kwa bwine Kidishitu kwitukwashanga namani twingidije bulombodi budi mu kisonekwa kya Bene Fidipai 1:10?

¹⁴ Kupwila kwetu kwa bwine Kidishitu kwitukwashanga twingidije bulombodi budi mu kisonekwa kya Bene Fidipai 1:10 mu miswelo mivule. Muswelo mubajinji, mpangiko miyampe ya bidibwa bya  ku mushipiditu ituvulujanga byobya bimona Yehova bu bintu bya mvubu mikatampe. Wa bubidi, twifundanga’ko muswelo wa kwingidija byobya byotwifunda amba twikale ba kubulwa kakoba. Ne wa busatu, twikankamikilanga “ku buswe ne ku mingilo milumbuluke.” (Bah. 10:24, 25) Kitatyi kitukankamika banabetu, buswe botusenswe Leza ne banabetu nabo bwenda buvula. Shi tusenswe Leza ne banabetu bya binebine, nabya tukalonga bukomo bwa kuleka kukukaja banabetu.

15. Le kuyulwa “bipa byoloke” kushintulula bika?

¹⁵ Polo wālombele na kininga amba bene Fidipai bayulwe “bipa byoloke.” (Fid. 1:11) Na bubine mu bino “bipa byoloke” mubadilwa buswe bobādi basenswe Yehova ne bantu bandi. Kadi mubadilwa ne kusapula kobādi basapwila bakwabo lwitabijo lwabo mudi Yesu ne lukulupilo lwabo lwa kutendelwa. Mu kisonekwa kya Bene Fidipai 2:15, mudi muneneno mukwabo wa amba, ‘munikai pamo bwa bimuni mu ino ntanda.’ Uno muneneno i mufike’po mwanda Yesu wāityile bana bandi ba bwanga bu “kitōkeji kya ino ntanda.” (Mat. 5:14-16) Kadi wāsoñenye balondi bandi ‘balonge bana ba bwanga,’ kupwa wānena’mba bakekala “batumoni . . . ne kulakula kwine kwa ntanda.” (Mat. 28:18-20; Bil. 1:8) Tupanga “bipa byoloke” kitatyi kyotwingila na kininga uno mwingilo wa mvubu mikatampe.

16. Le kisonekwa kya Bene Fidipai 1:12-14 kilombola namani amba tubwanya kumunika pamo bwa bimuni nansha shi tudi mu ngikadilo mikomo? (Tala kifwatulo pa kibalu.)

¹⁶ Nansha shi tudi mu ngikadilo’ka, tubwanya kumunika pamo bwa bimuni. Kyaba kimo, byobya byotubwanya kumona bu bijika pa kusapula myanda miyampe, bibwanya kwalamuka ke mikenga  ya kusapula. Kimfwa, mutumibwa Polo wādi mukutwe mu Loma kitatyi kyaālembēle bene Fidipai mukanda. Inoko miyololo yandi keyāmukankejepo aleke kusapwila balami ne bantu bādi bāya kumupempula. Polo wāsapwile na bupyasakane mu ino ngikadilo, kadi kino kyāpele banabetu kikulupiji ne bukankamane bwa “kwisamba mwanda wa Leza pampikwa moyo.”​—Tanga Bene Fidipai 1:12-14; 4:22.

17. Leta kimfwa kya mu ano etu mafuku kya mwa kupela bipa mu ngikadilo mikomo.

¹⁷ Batutu ne bakaka bavule badi na mukenga wa kulonda kimfwa kya Polo kya bukankamane. Nansha byobashikete mu matanda mokebabwanyapo kusapula bya patōkelela ne ku njibo ne njibo, ino basokolanga miswelo mikwabo ya kusapula myanda miyampe. (Mat. 10:16-20) Mu ntanda imo, mutadi wa kipindi umo waletele mulangwe wa amba “mwaba” ufwaninwe kusapula’mo musapudi ense i wa babutule, balondakani, balunda ba ku masomo, bobengila nabo, ne bantu baeyukile nabo. Mu myaka’tu ibidi, bipwilo byavula bininge mu kino kipindi. Padi tushikete mu ntanda motusapula patōkelela. Inoko ñeni yotubwanya kuboila ku kimfwa kya bano batutu ne bakaka ba manwa i ino: Tukimbei nyeke mikenga ya kusapula ne pa mfulo koku tukulupile amba Yehova uketupa bukomo botusakilwa pa kunekenya kijika kyo-kyonso.​—Fid. 2:13.

18. Le tufwaninwe kusumininwa kulonga bika?

¹⁸ Mu kino kitatyi kya kasekuseku, tusumininwei kwingidija madingi a ku bukomo bwa mushipiditu adi mu mukanda obātumīne bene Fidipai kudi Polo. Tujingululei bintu bya mvubu mikatampe, twikalei ba kubulwa kakoba, tulekei kukukaja bakwetu, kadi tupei bipa byoloke. Shi tulonge namino, tukavudija buswe ne kulēmekeja Yehova, Tata wetu wa buswe.