1-3. Le i bubinga’ka bumobumo bubwanya kulengeja bashinte bengidi ba kitatyi kyonso mingilo?

ROBERT NE MARY JO bavuluka’mba, “batwe pa kupwa kulonga myaka 21 mu mwingilo wetu wa bumishonele, bambutwile betu bonso baná balemana. Twasangedile kwenda kukebalela. Inoko byetusense bininge pa kushiya kifuko kyotwadi tusenswe mpata.”

² Ba William ne Terrie banena’mba, “potwayukile amba bukomo bwetu bwa ngitu kebwitulengejapo tujokele mu mwingilo wetu, twadidile. Bitungo byetu bya kukengidila Yehova mu ntanda ya bweni byafwa.”

³ Aleksey unena’mba, “twadi tuyukile amba bantu betupangapanga basakanga kufunga bilo ya musambo konadi ñingidila. Inoko pobafungile’yo twatamba ku Betele, byaunsense.”

4. Le i bipangujo’ka byotusa kwisambila’po mu kino kishinte?

⁴ Kutentekela pa bano, kudi bantu tununu ne tununu ba mu kisaka kya Betele ne bakwabo bobashintyile mingilo. * Bano batutu ne bakaka ba kikōkeji babwanya kumona bu bikomo kuleka mwingilo obadi basenswe. Le i bika bikebakwasha bebidile kuno kushinta? Le ubwanya kwibakwasha namani? Malondololo a bino bipangujo abwanya kwitukwasha batwe bonso tūminine kitatyi kyotutanwa na kushinta.

5. Le kushintwa mingilo kubwanya kwituletela bika?

⁵ Ekale twingidilanga mu mwaba nansha ku Betele, tubwanya kusanswa bininge bantu ne kifuko kyotwingidila’ko. Shi mwingilo wetu ubaimana pa bubinga kampanda, mutyima witusansanga. Tulañanga batutu ne bakaka botwashile, tuzumbija mutyima pa mwanda wabo, nakampata shi mwingilo ubaimana pa mwanda wa kupangwapangwa. (Mat. 10:23; 2 Ko. 11:28, 29) Ne kadi, shi tubapebwa mwingilo mupya nansha kujokela kwetu, divule dine bilombanga kwibidila bibidiji bipya. Ba Robert ne Mary Jo banena’mba, “twadi ketudi belwe bibidiji bya kwetu enka ne kusapula mu ludimi lwetu lwa kibutwila kwine. Twadi ketwimone bu beni.” Bantu bamo bobashintanga mingilo babwanya kutanwa mu kitulumukila na makambakano a lupeto. Babwanya kubulwa kikulupiji, mutyima-ntenke, ne kutyumukwa mutyima. Le i bika bibwanya kwibakwasha?

6. Le i muswelo’ka otubwanya kufwena nyeke kudi Yehova?

⁶ Fwena nyeke kudi Yehova. (Yak. 4:8) Le tubwanya kumufwena namani? I na kumukulupila bu “Mwine wivwananga milombelo.” (Ñim. 65:2) Ñimbo ya Mitōto 62:8 inena’mba, “Pungulwilai mityima yenu ku meso andi.” Yehova ubwanya kulonga “bivulevule kupita ne byonso byotulomba ne byotulanga.” (Ef. 3:20) Aye ketupengapo’tu’nka byotumulomba mu milombelo. Ubwanya kwitulongela bintu bya mu kitulumukila, kupita ne byotwadi tulanga, mwanda wa kupwa makambakano etu.

7. (a) Le i bika biketukwasha tufwene nyeke kudi Yehova? (b) Mungya Bahebelu 6:10-12, le bikekala namani shi twendelele kwingidila Yehova na kikōkeji?

⁷ Pa kufwena nyeke kudi Yehova, tanga Bisonekwa difuku ne difuku ne kulangulukila’po. Mishonele umo wa pa kala unena’mba: “Longa nyeke butōtyi bwa kisaka ne kuteakanya kupwila na mowadi ulongela mu mwingilo wa kala.” Kadi sapula bininge myanda miyampe mu kipwilo kipya. Yehova uvulukanga boba bamwingidila nyeke na kikōkeji, nansha shi kebakibwanyapo  kulonga byobadi balonga pa kala.—Tanga Bahebelu 6:10-12.

8. Lelo binenwa bidi mu 1 Yoano 2:15-17 bibwanya kukukwasha namani wikale nyeke na būmi bwa kwisuminwa?

⁸ Ikala na būmi bwa kwisuminwa. Kokaleka kuzumbija mutyima kwa ino ntanda ya Satana ‘kutyinye’ mingilo yobe ya ku mushipiditu. (Mat. 13:22) Pela bikuningila ntanda, balunda bamweka bu bakusakila biyampe, nansha babutule amba ukimbe lupeto luvule mu ino ngikadilo ya Satana. (Tanga 1 Yoano 2:15-17.) Kulupila mudi Yehova, mwine ulaile kuvuija “pa kitatyi kifwaninwe” byonso byotusakilwa ku mushipiditu, mu ñeni, ne ku ngitu.​—Bah. 4:16; 13:5, 6.

9. Mungya Nkindi 22:3, 7, mwanda waka i biyampe kuleka kwapula mapu ampikwa kwendela’mo, ne i bika bibwanya kwitukwasha tukwate butyibi buyampe?

⁹ Leka mapu ampikwa kwendela’mo. (Tanga Nkindi 22:3, 7.) Kuviluka kubwanya kulomba lupeto luvule, kadi i bipēla kutwela mu mapu. Pa kutyepeja mapu, dyumuka kwapula mwanda wa kupota bintu byokusakilwapo. Shi twi bavutakanibwe ñeni, kimfwa kitatyi kyotulela muntu otusenswe ubela, tubwanya kukomenwa kuyuka bungi bwa lupeto lwa kwapula. Mu myanda ya uno muswelo, vuluka’mba “milombelo ne kuzenza” bibwanya kukukwasha ukwate butyibi bwa tunangu. Pa kulondolola ku milombelo yobe, Yehova ubwanya kukupa ndoe ‘ikalama mutyima obe ne mifwatakanyo yobe,’ mwanda wa kukukwasha ukwate butyibi buyampe.​—Fid. 4:6, 7; 1 Pe. 5:7.

10. Le i muswelo’ka otubwanya kupwana na balunda bakwabo?

¹⁰ Pwana nyeke na balunda bayampe. Sapwila balunda nobe bayampe milangwe yobe ne myanda yowemwenine, nakampata boba badi mu ngikadilo imo na yobe. Kulonga namino kubwanya kukukwasha mu ñeni. (Mus. 4:9, 10) Kokilwa balunda bowadi nabo mu mwingilo obe wa kala. Kadi pano podi mu mwingilo mupya, ufwaninwe kupwana’mo na balunda bakwabo. Vuluka’mba pa kwikala na mulunda, ufwaninwe bidi kwikala bya bulunda. Le ukapwana na balunda bakwabo namani? Wibasapwile bintu biyampe byakulongēle Yehova, kadi wibakwashe bamone amba usangedile mwingilo wa Yehova. Nansha bantu bamo mu kipwilo byokebabwanyapo kwivwanija kine kyosanshilwe mwingilo wa kitatyi kyonso, ino bakwabo babwanya kukokwa na kimfwa kyobe, baikala ke balunda bayampe. Inoko kokikokela milangwe bipitepite pa bintu byowalongele, kadi kokīsambila bininge pa bibi byakutene.

11. Le i muswelo’ka omukekala nyeke na nsangaji mu busongi?

¹¹ Shi mwingilo obe waimene pa mwanda wa misongo ya mwinē pobe kokimutopeka.  Pakwabo kadi, shi i abe wabelele, kokitopeka na kulanga’mba ubatyumuna mwinē pobe mutyima. Vuluka’mba mwi “ngitu imo,” kadi mwalaile Yehova amba mukekwatakanya mu bibi ne mu biyampe mwine. (Mat. 19:5, 6) Shi mwingilo wenu waimene pa mwanda wa dīmi dya mu kitulumukila, kulupijai wenu mwana’mba aye udi na mvubu komudi kupita mwingilo waimene. Kulupijai wenu mwana’mba mumumwene bu “mpalo” itambile kudi Leza. (Ñim. 127:3-5) Kadi mulombolei bintu biyampe byomwemwenine mu mwingilo wenu. Kulonga namino kukakankamika wenu mwana akengidile Yehova na nsangaji na momwamwingidile.

12. (a) Le i muswelo’ka otubwanya kukwasha boba badi mu mwingilo wa kitatyi kyonso bendelele kwingila? (b) Le tukebakwasha namani bebidile mwingilo wabo mupya?

¹² Na bya dyese, bipwilo ne bantu bavule baloñanga bukomo mwanda wa kukwasha boba badi mu mwingilo wa kitatyi kyonso bendelele kwingila. Baloñanga namino na kwibakankamika bendeleje mwingilo wabo, kwibakwasha na lupeto nansha na bintu bikwabo, ne kwibakwasha na kukwatakanya bantu ba mu bisaka byabo bashele. (Ngt. 6:2) Shi abatume mu kyenu kipwilo bantu bobashintyile mingilo, kokalanga’mba bebashintyile mwanda wa kukomenwa mwingilo nansha’mba kudi kibi kyobalongele. * Ino wibakwashe bebidile. Wibatundaile na nsangaji ne kwibafwija’ko pa mwingilo obaingile, nansha shi misongo keikibalengejapo balonge bivule dyalelo. Wiyuke nabo. Boila ñeni ku buyuki bwabo, bufundiji, ne bwino bwabo.

13. Le ubwanya kukwasha namani boba bobashintyile mingilo?

 ¹³ Dibajinji, ubwanya kukwasha boba bobashintyile mingilo basokole njibo, byendwa nabyo, kaji, ne bisakibwa bikwabo bya kamweno. Kadi basakilwa kuyuka myanda ya bukile-bukya, kimfwa mwa kupotela bitanshi ne mukanda wa kwikinga ku byaka. Nakampata kebasakilwapo’tu’nka kwibakwatyilwa lusa, ino i ne kwivwanija ngikadilo yobadi’mo. Padi bekondanga na misongo yabo nansha ya babutule babo. Padi badi na bulanda bwa kufwilwa muntu obasenswe. * Kadi padi kitatyi kyobadi pa bunka bevwananga bulanda pa mwanda wa balunda nabo bobashile mu mwingilo wabo wa kala. Bilombanga kitatyi pa kukomena ino milangwe mine ibavutakanya ñeni.

14. Le basapudi ba mu kipwilo kimo bakweshe namani kaka umo ebidile mu mwingilo wandi mupya?

¹⁴ Kadi bukwashi bobe ne kimfwa kyobe bibwanya kwibakwasha bebidile. Kaka umo waingile mu ntanda ya bweni myaka mivule unena’mba, “konadi ñingidila dibajinji, nadi ñendeja bifundwa bya Bible difuku ne difuku. Ino kuno koñingidila, byadi bikomo nansha kumona mukenga wa kutangila muntu kisonekwa nansha kumutadija video mu busapudi. Inoko basapudi bontene badi bangitanga nkebatūle mu kujokela’mo ne ku bifundwa byabo. Pa kumona bano batutu ne bakaka bapyasakane kadi bakankamane bendeja bifundwa bya Bible byendelela, naikele na mumweno muyampe. Nefundile mwa kushilwila mīsambo mu uno mwaba mupya. Bino byonso byaunkweshe ngikale monka na nsangaji.”

15. Le ubwanya namani kwingila biyampe mwingilo obe mupya?

¹⁵ Ubwanya kwingila biyampe mwingilo obe mupya. Kokalanga’mba abakushinta mwanda wa kubulwa kwingila biyampe nansha’mba kukidipo pano na mvubu. Langulukila pa miswelo mivule ikukweshe  Yehova mu būmi bobe kadi endelela na kusapula. Iula bene Kidishitu ba kikōkeji ba mu myaka katwa kabajinji. Konso kobādi, “badi benda basapula myanda miyampe ya owa mwanda mu ntanda’ya.” (Bil. 8:1, 4) Bukomo bolonga bwa kwendelela kusapula bubwanya kupa bipa biyampe. Kimfwa, bapania bamo bapangilwe mu ntanda imo, baenda mu ntanda mikwabo ya pabwipi mwadi musakilwa basapudi bavule besamba lwabo ludimi. Mu myeji’tu mityetye, bashimika’mo bisumpi byendelela lubilolubilo.

16. Le i muswelo’ka obwanya kutana nsangaji mu mwingilo mupya?

¹⁶ “Nsangaji ya Yehova i bukomo” bobe. (Neh. 8:10, kunshi kwa dyani) Dibajinji tufwaninwe kutana nsangaji mudi Yehova, ke mu mwingilo wetupo, nansha shi twiusenswe namani. Nanshi, nanga nyeke pamo na Yehova, mulombe tunangu, buludiki, ne bukwashi. Vuluka’mba wasenswe mwingilo obe wa kala mwanda wadi utele mutyima ku kukwasha bantu bakwabo. Pano tá mutyima ku mwingilo oingila dyalelo ne kumona muswelo ukukwasha Yehova wiusanswe.​—Mus. 7:10.

17. Le i bika byotufwaninwe kuvuluka pa kifuko kyotwingidila’ko dyalelo?

¹⁷ Tufwaninwe kuvuluka’mba mwingilo otwingidila Yehova i wa nyeke, ino kifuko kyotwingidila’ko dyalelo, tudi’ko mu kitatyi kityetye. Mu ntanda mipya, batwe bonso baketushinta mingilo. Aleksey, otwatelanga ku ngalwilo, ukulupile amba kuno kushinta kudi’ko dyalelo i kumuteakanye ku kushinta kwa mu mafuku a kumeso. Aleksey unena’mba, “nadi ndyukile kala’mba Yehova udi’ko ne ntanda mipya mine, ino nadi mona pamo bwa ami udi kulampe na Yehova ne ntanda mipya. Pano mwene Yehova ku meso ami, ntanda mipya nayo keidi mu bisuku.” (Bil. 2:25) Nansha shi twingidilanga kwepi, tunangei nyeke pamo na Yehova. Kaketulekapo nansha dimo, ino uketukwasha twikale na nsangaji potulonga byonso byotubwanya mu mwingilo wandi konso kotudi.​—Isa. 41:13.