1. Le i dyese’ka dyotudi nadyo?

BINE tudi na dyese dya kwikala mu kipwilo kya Yehova! Tudi mu paladisa ya ku mushipiditu muyudile bantu ba ndoe ne nsangaji. Le i kifuko’ka kyodi nakyo mu kipwilo?

2. Le mutumibwa Polo wāingidije kyelekejo’ka mu mikanda yandi mivule ya ku bukomo bwa mushipiditu?

² Mu uno mwanda, tubwanya kuboila ñeni mivule ku kyelekejo kyāingidije mutumibwa Polo mu mikanda yandi mivule ya ku bukomo bwa mushipiditu. Mu mukanda ne mukanda, Polo wādingakenye’mo kipwilo na umbidi wa muntu. Kadi wādingakenye bantu ba mu kipwilo na bipindi bya ku umbidi.​—Loma 12:4-8; 1 Ko. 12:12-27; Ef. 4:16.

3. Le i bintu’ka bisatu byotusa kwisambila’po mu kino kishinte?

³ Mu kino kishinte, tusa kwisambila’mo pa bintu bisatu bya mvubu bitufundija kyelekejo kya Polo. Kibajinji, tusa kuyuka’mba batwe bonso tudi na kifuko * mu kipwilo kya Yehova. Kya bubidi, tusa kwisambila pa byotubwanya kulonga shi tumona’mba ketudipo na kifuko mu kipwilo. Ne kya busatu, tusa kwisambila pa kine kyotunenena’mba tufwaninwe kuvudilwa bya kulonga mu kipwilo kya Leza.

4. Le kisonekwa kya Bene Loma 12:4, 5, kitufundija bika?

⁴ Kintu kibajinji kitufundija kyelekejo kya Polo i kino amba, batwe bonso tudi na kifuko kya mvubu mu kisaka kya Yehova. Polo ushilula kyelekejo kyandi amba: “Monka motwikadile na bya ku ngitu bingi ku umbidi umo, ino abyo bya ku ngitu kebidipo byonso na mwingilo umo, ne batwe netu, nansha byotudi bangi, twi umbidi umo onka umbumo na Kidishitu, ino batwe bonso muntu ne muntu twi bya ku ngitu bīlungile abyo bine kimo na kikwabo.” (Loma 12:4, 5) Le Polo wādi usaka kunena bika? Batwe bonso tudi na mingilo mishileshile mu kipwilo, inoko batwe bonso tudi na mvubu.

5. Le Yehova i mupe kipwilo ‘byabuntu’ka’?

⁵ Kitatyi kyolangulukila pa boba badi na kifuko mu kipwilo, bantu babwanya kukwiya bukidibukidi mu ñeni i boba batangidile. (1 Ts. 5:12; Bah. 13:17) I amo, mwanda kupityila kudi Kidishitu, Yehova wāpele kipwilo kyandi “bantu bu byabuntu.” (Ef. 4:8) Mu bano “bantu bu byabuntu” mubadilwa batutu ba mu Kitango Kyendeji, bakwashi ba Kitango Kyendeji, batutu bengila mu Makomite a Misambo, batadi ba bipindi, badimu ba ku masomo a bulongolodi, bakulumpe pa kipwilo, ne bengidi ba mingilo. Bano batutu bonso i batongwe na mushipiditu ujila mwanda wa kulela mikōko milēme ya Yehova ne kwingidila kipwilo.​—1 Pe. 5:2, 3.

6. Mungya 1 Bene Tesalonika 2:6-8, le batutu batongelwe na mushipiditu ujila bekankilanga’ko kulonga bika?

⁶ Batutu batoñwanga na mushipiditu ujila mwanda wa kwingila mingilo mishileshile. Monka mwikadile umbidi na bipindi bishileshile, kimfwa maboko ne binyantyilo, bingila pamo mwanda wa kamweno ka umbidi onso, batutu batongelwe na mushipiditu ujila nabo bengilanga bininge mwanda wa kamweno ka kipwilo kyonso. Kebakimbangapo ntumbo ya abo bene. Ino baloñanga bukomo bwa kukankamika ne kukomeja batutu ne bakaka. (Tanga 1 Bene Tesalonika 2:6-8.) Bine, tufwijanga’ko Yehova pa bano bana-balume bampikwa kwisakila ba bwino!

7. Le bengidi bavule ba kitatyi kyonso i beselwe madyese’ka?

⁷ Bamo mu kipwilo babwanya kutongwa kwingila bu bamishonele, bapania ba pa bula, nansha bu bapania ba lonso. Inoko, batutu ne bakaka ba ntanda yonso bengilanga ne pa mfulo mwingilo wa kusapula ne kulonga bana ba bwanga. Byobengila namino, bakwashanga bantu bavule bekale ke bana ba bwanga ba Kidishitu Yesu. Nansha bano basapudi ba kitatyi kyonso byobadi na bintu bityetye bya ku ngitu, Yehova i mwibesele bininge mu būmi. (Mako 10:29, 30) Tusenswe bano batutu ne bakaka, kadi tufwijanga’ko pa kwikala nabo mu kipwilo!

8. Mwanda waka musapudi yense wa myanda miyampe udi na mvubu ku meso a Yehova?

⁸ Le i enka batutu batongelwe ne boba bengila mwingilo wa kitatyi kyonso badi na kifuko mu kipwilo? Aa! Musapudi yense wa myanda miyampe udi na mvubu ku meso a Leza ne ku kipwilo. (Loma 10:15; 1 Ko. 3:6-9) Ino, kintu kya mvubu bininge mu kipwilo i kulonga bana ba bwanga ba Mfumwetu Yesu Kidishitu. (Mat. 28:19, 20; 1 Tm. 2:4) Bonso belungile ku kipwilo, basapudi babatyijibwe ne bampikwa kubatyijibwa, batangidijanga uno mwingilo kumeso.​—Mat. 24:14.

9. Mwanda waka tusenswe bakaka bene Kidishitu?

⁹ Yehova i mupe bakaka mwingilo wa mvubu mu kipwilo. Umwene na mvubu bakaka basongwe, bainabana, ba kishala, ne bakaka bankungakaji bamwingidila na kikōkeji. Bisonekwa  bitelanga divule bana-bakaji bāsangeje Leza. I batendelwe bu bimfwa biyampe mu tunangu, lwitabijo, bupyasakane, bukankamane, buntu ne pa mingilo milumbuluke. (Luka 8:2, 3; Bil. 16:14, 15; Loma 16:3, 6; Fid. 4:3; Bah. 11:11, 31, 35) Tufwijanga’ko bininge Yehova pa kwikala na bano bana-bakaji bene Kidishitu mu bipwilo, bene badi na ngikadila milumbuluke bwa ino!

10. Mwanda waka tumwene banunu na mvubu?

¹⁰ Kadi tudi na dyese dya kwikala na banunu bavule. Mu bipwilo bimo mudi batutu ne bakaka banunu ke bengidile Yehova na kikōkeji mu būmi bwabo bonso. Banunu bakwabo bayukile bubine panopano. Inoko, banunu babwanya kwikonda na misongo pa mwanda wa bununu. Ano makambakano abwanya kwibalengeja bakomenwe kwingila bininge mu kipwilo ne mu mwingilo wa busapudi. Inoko, bano banunu betu baswe beelelanga’ko kusapula, ne kadi bengidijanga bukomo bwabo bonso mwanda wa kukankamika ne kufundija bakwabo! Kadi tumwenanga mu bwino bwabo. Bine, Yehova wibamwene na bulēme, kadi netu twibamwene na bulēme.​—Nki. 16:31.

11-12. Le i muswelo’ka owakankamikilwe na bankasampe ba mu kyenu kipwilo?

¹¹ Tulangulukilei bidi pa bankasampe nabo. Bekondanga na bikoleja bivule pobenda batama mu ino ntanda itādilwe na Satana Dyabola ne milangwe yandi mibi. (1 Yo. 5:19) Inoko, batwe bonso tukankamikwanga potumona bankasampe balondolola ku kupwila, basapula, ne kubingija nkulupilo yabo na bukankamane. Bine, banwe bankasampe mudi na kifuko kya mvubu mu kipwilo kya Yehova!—Ñim. 8:2.

¹² Inoko, batutu ne bakaka bamo bakomenwanga kwitabija’mba badi na mvubu mu kipwilo. Le i bika biketukwasha twitabije amba batwe bonso tudi na kifuko mu kipwilo? Pano tutalei.

13-14. Mwanda waka bantu bamo babwanya kwimona’mba kebadipo na mvubu mu kipwilo?

¹³ Tutalei kintu kya bubidi kyotwifunda ku kyelekejo kya Polo. Wēsambīle pa mwanda  utananga bavule ne dyalelo; bakomenwanga kwitabija’mba badi na mvubu mu kipwilo. Polo wālembele amba: “Shi kinyantyilo kinene amba, ‘Byonkidipo kikasala, nkidipo kipindi kya ku umbidi,’ ke kunenapo amba kekikidipo ku umbidi. Kadi shi kutwi kunene amba, ‘Byonkidipo diso, nkidipo kipindi kya ku umbidi,’ ke kunenapo amba kekukidipo ku umbidi.” (1 Ko. 12:15, 16) Le Polo wādi usaka kunena bika?

¹⁴ Shi widingakanya na bakwenu mu kipwilo, ubwanya kwimona bu kudipo na mvubu. Bantu bamo mu kipwilo badi na kyabuntu kya bu bafundiji, bantu ba ndudi, nansha bu bakumbi bayampe. Padi umonanga’mba abe kudipo na bino byabuntu na mwikadile nabyo bakwenu. Shi wimonanga namino, nabya udi na kwityepeja ne butūkanye. (Fid. 2:3) Inoko ufwaninwe kutadija. Shi widingakanya kyaba kyonso na boba badi na bwino buvule, ukatyumukwa mutyima. Enka na mwālombwedile’kyo Polo, ubwanya kulanga’mba kudipo na kifuko mu kipwilo. Le i bika bibwanya kukukwasha unekenye milangwe ya uno muswelo?

15. Mungya 1 Bene Kodinda 12:4-11, le i bika byotufwaninwe kuyuka pa byabuntu byonso byotudi nabyo?

¹⁵ Langulukila bidi pa uno mwanda: Yehova wāpele bene Kidishitu bamo ba mu myaka katwa kabajinji byabuntu bya mu kingelengele bya mushipiditu ujila, inoko bano bene Kidishitu bonso kebātambwilepo byabuntu bya muswelo umo. (Tanga 1 Bene Kodinda 12:4-11.) Yehova wēbapele byabuntu ne bwino bwishileshile, ino mwine Kidishitu yense wādi na mvubu. Dyalelo, ketudipo na byabuntu bya mu kingelengele bya mushipiditu ujila. Inoko ye mobikadile ne pano. Batwe bonso ketubwanyapo kwikala na bwino bwa muswelo umo, inoko batwe bonso twi balēme kudi Yehova.

16. Le i madingi’ka a mutumibwa Polo otufwaninwe kwingidija?

¹⁶ Pa kyaba kya kwidingakanya na bakwetu bene Kidishitu, tufwaninwe kwingidija madingi a mutumibwa Polo a ku bukomo bwa mushipiditu a amba: “Muntu ne muntu abandaule bilongwa byandi, nabya ukekala na buluji bwa kusangela pa mwanda wandi aye mwine,  ke na kwidingakanyapo na muntu mukwabo, aa.”​—Ngt. 6:4.

17. Le i muswelo’ka otukamwena mu madingi a Polo?

¹⁷ Shi tulonde madingi a Polo a ku bukomo bwa mushipiditu ne kubandaula bilongwa byetu, tubwanya kumona’mba tudi na byabuntu ne bwino bwishile na bwa bakwetu. Kimfwa, padi mukulumpe kadipo na kyabuntu kya kufundija ku lukala, ino ubwanya padi kwingila biyampe mwingilo wa kulonga bana ba bwanga. Nansha padi kadipo na ndudi na mwikadile bakulumpe bakwabo mu kipwilo, ino padi uyukene bu mukumbi wa buswe ufwenwa na basapudi na bwanapabo mwanda wa kumulomba madingi a mu Bisonekwa. Nansha padi i mutumbile buntu. (Bah. 13:2, 16) Shi tubayuka biyampe byabuntu byetu, nabya tukekala na bubinga bwa kwimona biyampe pa byobya byotubwanya kulongela kipwilo. Ne kadi padi ketukakwatyilwapo mukao banabetu badi na byabuntu byoketudipo nabyo.

18. Le i muswelo’ka otubwanya kulumbulula bwino bwetu?

¹⁸ Nansha shi tudi na mwingilo’ka mu kipwilo, batwe bonso tufwaninwe kukimba kulumbulula mwingilo wetu ne bwino bwetu. Pa kusaka twilumbulule, Yehova i mutūle’ko mpangiko ya bufundiji bulumbuluke kupityila ku bulongolodi bwandi. Kimfwa, ku kupwila kwetu kwa mu bukata bwa yenga, betufundijanga’ko mwa kusapwila biyampe. Le umwenanga ne pa mfulo mu buno bufundiji?

19. Le ubwanya kulonga bika pa kukafunda ku Masomo a Basapudi ba Bulopwe?

¹⁹ Mpangiko mikwabo milumbuluke i Masomo a Basapudi ba Bulopwe. Ku ano masomo kufundanga batutu ne bakaka bengila mu mwingilo wa kitatyi kyonso badi na myaka 23 kutūla ku 65. Padi umona’mba abe kubwanyapo kufunda’o. Ino pa kyaba kya kulemba bubinga bokubwaninyapo kufunda’o, ino lemba bubinga bosakila kukafunda’o. Kupwa witūdile’ko mpangiko ikakukwasha ubwanye bisakibwa. Kupityila ku bukwashi bwa Yehova ne ku bukomo bolonga, ukabwanya kulonga byobya byomona bu bikomo.

20. Le kisonekwa kya Bene Loma 12:6-8 kitufundija bika?

²⁰ Kintu kya busatu kyotubwanya kwifunda ku kyelekejo kya Polo, kidi mu Bene Loma 12:6-8. (Tanga.) Pano Polo walombola monka amba bantu ba mu kipwilo badi na byabuntu bishileshile. Inoko walombola’mba tufwaninwe kwingidija kyabuntu kyo-kyonso kyotudi nakyo mwanda wa kutamija ne kuningija kipwilo.

21-22. Le i ñeni’ka yotubwanya kuboila kudi ba tutu Robert ne Felice?

²¹ Twisambilei bidi pa kimfwa kya tutu witwa bu Robert. Pa kupwa kwingila mu ntanda ya bweni, bamutumine kukengidila ku Betele ya mu yabo ntanda. Nansha byobamukulupije amba kebamushintyilepo mingilo pa mwanda wa kibi kyalongele, wanenene amba: “Mu bula bwa myeji mivule naendelele kwimona bule—nemona bu ne mukomenwe mwingilo. Kwadi kitatyi kyonadi nsaka ne kuleka mwingilo wa ku Betele.” Le waikele monka na nsangaji namani? Mukulumpe mukwabo wamuvulwije amba, Yehova i mwitufundije mingilo yonso ya mvubu mwanda wa betwingidije bininge mu mingilo yotwingila pano. Robert wajingulula’mba kafwaninwepo kuta mutyima ku bintu bya pa kala, ino ufwaninwe kuta’o ku byabwanya kulonga pano.

²² Tutu Felice Episcopo nandi watenwe na uno mwanda. Aye ne wandi mukaji batambwile mapolome ku Ngileade mu 1956, kadi waingile  bu mutadi wa kipindi mu Bolivi. Mu 1964 babutula mwana. Felice unena’mba: “Byetukoleje pa kuleka mwingilo otwadi tusenswe. Natyumukilwe mutyima pa uno mwanda mu kintu kya mwaka mutuntulu. Inoko na bukwashi bwa Yehova, nashinta mumweno wami, kupwa nata mutyima ku kiselwa kyami kya bu mbutwile.” Le nobe wiivwananga na mweivwanine Robert ne Felice? Le wi mutyumukwe mutyima mwanda kukingilangapo mingilo yowadi wingila pa kala? Shi i amo, ukekala na nsangaji shi uleke kuta mutyima ku bya pa kala, ino ute’o ku bintu byobwanya kulonga pano mwanda wa kwingidila Yehova ne banabenu. Vudilwa bya kulonga ne kwingidija byabuntu ne bwino bobe mwanda wa kukwasha bakwenu, kadi ukekala na nsangaji potamija kipwilo.

23. Le tufwaninwe kwitūdila’ko kitatyi kya kulonga bika, ne i bika byotukesambila’po mu kishinte kilonda’ko?

²³ Batwe bonso twi balēme ku meso a Yehova. Aye usakanga twikale mu kisaka kyandi. Shi twitūdile’ko kitatyi kya kulangulukila pa byotubwanya kulonga mwanda wa kukankamika batutu ne bakaka, ne kulonga bukomo bwa kuvuija uno mwingilo, ketukemonepo amba ketudipo na mvubu mu kipwilo! Le muswelo otumona bakwetu mu kipwilo nao le? Le tukalombola namani amba twibasenswe? Mu kishinte kilonda’ko, tukesambila pa uno mwanda wa mvubu.