1. Le i bika byobakufundije padi Umpangi?

SHI WATAMĪNE mu kisaka kya Batumoni ba Yehova, padi wafundile myanda ya Yehova tamba ku bwanuke. Bakufundije amba i Umpangi, udi na ngikadila miyampe, kadi i mukwatyile’ko bantu mpango ya buswe.​—Ngo. 1:1; Bil. 17:24-27.

2. Le bantu bavule bamonanga namani boba bakulupile mudi Umpangi?

² Inoko bantu bavule kebakulupilepo amba Leza udi’ko ne amba i Umpangi. Bakulupile amba būmi bwēikadile’ko, bwāshilwile ku kakintu katyetye kebwenda buvunguluka. Bamo mu bano bantu i bafunde bininge. Banenanga’mba sianse itulujanga Bible amba i wa bubela, ne amba boba bakulupile mudi Umpangi i bantu bampikwa kufunda, bampikwa ñeni, kadi ba bitabija-vidingi.

3. Mwanda waka kuningija lwitabijo lwetu i kwa kamweno?

³ Le uno mumweno wa bantu bamo bafunde bininge, ukalengeja bantu baleke kwitabija’mba Yehova i Umpangi wetu wa buswe? Kino kilondakana bininge na kine kitulengeje tukulupile amba Yehova i Umpangi. Le i mwanda betusapwidile kukulupila mudi Umpangi’ni, nansha i pa mwanda twetūdile’ko kitatyi kya kubandaula bukamoni batwe bene? (1 Ko. 3:12-15) Nansha shi twaikele Batumoni ba Yehova pano ke padi myaka inga, batwe bonso tufwaninwe kuningija lwitabijo lwetu. Shi tulonge namino, nabya ketukongolwapo na “tunangu twa ino ntanda ne na bongojani bwa bituputupu” bufundija bantu bapatanya Kinenwa kya Leza. (Kol. 2:8; Bah. 11:6) Pa kwitukwasha, kino kishinte kisa kwisambila (1) pa kine kekikulupidilepo bantu bavule mudi Umpangi, (2) pa muswelo obwanya kuningija  lwitabijo lobe mudi Yehova, Umpangi obe, ne (3) pa muswelo okendelela kukomeja lwitabijo lobe.

4. Mungya Bahebelu 11:1 ne kunshi kwa dyani, le lwitabijo lwa bine lwimaninanga pa bika?

⁴ Bantu bavule balañanga’mba kwikala na lwitabijo, i kwitabija kintu pampikwa ne bukamoni bwine. Ino mungya Bible, luno ke lwitabijopo lwa bine. (Tanga Bahebelu 11:1 ne kunshi kwa dyani.) Yuka’mba pa kwitabija mu bintu byampikwa kumweka kimfwa, Yehova, Yesu, ne Bulopwe bwa mūlu, bilomba kwikala na bubinga bukulupilwa. (Bah. 11:3) Kamoni umo shayuka wa bioshimi unena’kyo uno muswelo amba: “Ketwitabijangapo bupofu na kusūla bukamoni buleta sianse.”

5. Mwanda waka bantu bavule bakulupile amba būmi bwēikadile’ko?

⁵ Tubwanya kwiipangula’mba, ‘shi kudi bubinga bukulupilwa bulombola’mba Umpangi udi’ko, mwanda waka bantu bavule kebakulupilepo amba būmi bwāpangilwe na Leza?’ I mwanda’tu bamo kebabandawile bubinga abo bene. Robert, Kamoni wa Yehova dyalelo unena’mba: “Byokebadipo batela myanda ya bupangi ku masomo, nadi nanga’mba i ya bubela. I enka ponabwenye myaka 20 ne musubu, ponesambile na Batumoni ba Yehova naivwana binenwa bya mu Bible biluji kadi bikulupilwa bilombola’mba Leza ye wāpangile bintu byonso.” *—Tala kapango kanena’mba, “ Musapu wa Kamweno ku Bambutwile.”

6. Mwanda waka bantu bamo bapelanga kukulupila mudi Umpangi?

 ⁶ Bantu bamo kebakulupilepo mudi Umpangi, mwanda banenanga’mba bakulupilanga enka mu bintu byobabwanya kumona. Inoko na bubine, betabijanga bintu byampikwa kumweka, kimfwa bukomo bukokela bintu panshi, mwanda bakulupile amba budi’ko. Ne lwitabijo lusonekelwe mu Bible nalo lwimanine pa bubinga bwa bintu bikwabo “bya bine byampikwa kumweka.” (Bah. 11:1) Pa kwifunda buno bubinga batwe bene, bilombanga kitatyi ne bukomo. Inoko bantu bavule kebasakengapo kulonga bukomo bwa kwifunda’bo. Muntu kefundilepo buno bubinga aye mwine, ubwanya kufula ku kunena’mba Leza i kutupu’ye.

7. Lelo i bantu bafunde bonso bapatanyanga’mba Leza kāpangilepo diulu ne ntanda? Shintulula.

⁷ Befundi bamo ba sianse pa kupwa kwifunda buno bubinga, baitabije amba Leza wāpangile  diulu ne ntanda. * Pamo bwa Robert otwatelanga kala, bantu bamo babwanya kunena’mba Umpangi i kutupu’ye mwanda’tu kebebafundijepo myanda ya bupangi ku iniveleshite. Nansha nankyo, befundi ba sianse bavule bayukile Yehova ne kumusanswa. Pamo’nka na mwalongele bano befundi ba sianse, netu tufwaninwe kuningija lwitabijo lwetu mudi Leza, pampikwa kubanga masomo otufundile. I kutupu muntu ubwanya kulonga’byo pa kyetu kyaba.

8-9. (a) Le i kipangujo’ka kyotusa kulondolola pano? (b) Le i bika byokamwena mu kwifunda myanda ya bupangi?

⁸ Le i muswelo’ka obwanya kukomeja lwitabijo lobe mudi Umpangi? Twisambilei pa miswelo iná.

⁹ Kwifunda bupangi. Ubwanya kuningija lwitabijo lobe mudi Umpangi na kubandila banyema, mityi, ne ñenyenye. (Ñim. 19:1; Isa. 40:26) Shi wifunde bininge bino bintu, uketabija’mba Yehova i Umpangi. Divule dine mu mabuku etu mudi bishinte bishintulula myanda palapala itala bupangi. Shi ubatana’mo myanda ikukomena kwivwana, kokeitabuka. Longa bukomo bwa kwifunda’yo. Kadi kokilwa kutala monka mavideo mayampe esambila pa bupangi adi pa site yetu ya jw.org, alupwilwe ku bitango bya ntanda bya myaka ipityile’i.

10. Leta kimfwa kimo kya mu bupangi kilombola’mba Umpangi udi’ko. (Bene Loma 1:20)

¹⁰ Kitatyi kyowifunda myanda ya bupangi, tá mutyima bininge ku bintu byobukufundija padi Umpangi wetu. (Tanga Bene Loma 1:20.) Kimfwa, ubwanya kuyuka’mba dyuba diletanga kyanga kyotusakilwa mu būmi, ino kadi diletanga ne mikejima mibi. Batwe bantu tusakilwa kukingwa ku ino mikejima. Ne bine twi bakingwe’ko! Namani? Ntanda kīkalo kyetu, idi kala na bya kwitukinga, luvula lwayo lwidinde lwitwa bu ozone lukokanga ino mikejima mibi. Shi mikejima mibi itamba ku dyuba keyenda ivudila’ko, luno luvula lwitwa bu ozone nalo lwendanga luvudila’ko. Le kino kekikukulupijapo amba kufwaninwe kwikala muntu wālongele bino bintu, ne amba ufwaninwe kwikala Umpangi wa buswe ne tunangu?

11. Le i kwepi kokokeja kutana myanda ya mu bupangi ikomeja lwitabijo? (Tala kapango kanena’mba, “ Myanda Imoimo Ikakomeja Lwitabijo Lobe.”)

¹¹ Ubwanya kutana myanda mivule ya bupangi ikomeja lwitabijo na kutala dibuku Index des publications des Témoins de Jéhovah ne na kulonga bukimbi pa jw.org. Ubwanya kushilula na bishinte ne mavideo a mu bishinte binena’mba, “Le Kudi Wikilongele?” Ano mavideo ne bishinte i bīpi kadi bilombola myanda itulumukwa itala banyema ne bipangwa bikwabo. Mudi ne bimfwa bya befundi ba sianse balonga bukomo bwa kwiula byobya byobamona mu bupangi.

12. Kitatyi kyotwifunda Bible, le i bintu’ka bimo byotufwaninwe kuta’ko mutyima?

¹² Kwifunda Bible. Shayuka mu bioshimi otwatelanga kala, kadipo ukulupile mudi Umpangi. Ino mwenda mafuku, wakulupila mudi Umpangi. Unena’mba: “Lwitabijo lwami kelwadipo lwimanine’nka pa byonafundile mu sianse, ino i ne pa byonefundile mu Bible.”  Padi uyukile kala biyampe byobya bifundija Bible. Ino nansha nankyo, pa kukomeja lwitabijo lobe mudi Umpangi, ufwaninwe kwendelela kwifunda Kinenwa kya Leza. (Yos. 1:8; Ñim. 119:97) Kimfwa, langulukila pa bintu bya bine binena Bible byalongekele mu bula bwa mānga. Tá mutyima ku bupolofeto budi’mo ne kukwatañana kwa myanda idi’mo. Kulonga namino kubwanya kuningija lwitabijo lobe lwa amba kudi Umpangi wa buswe kadi wa tunangu wētupangile, ne amba wālembeje Bible ku bukomo bwa mushipiditu. *—2 Tm. 3:14; 2 Pe. 1:21.

13. Le i kimfwa’ka kilombola tunangu tudi mu Kinenwa kya Leza?

¹³ Kitatyi kyowifunda Kinenwa kya Leza, tá mutyima ku bintu byobwanya kumwena mu madingi adi’mo. Kimfwa, Bible udyumuna tamba kala amba kusanswa lupeto i kubi ne amba kuletanga “misanshi mivule mine.” (1 Tm. 6:9, 10; Nki. 28:20; Mat. 6:24) Le kino kidyumu kikidi na kamweno ne dyalelo? Dibuku dimo dīsambila pa mwiendelejo wa bantu ba dyalelo dinena’mba: “Divule dine, bantu basenswe bintu bya ku ngitu kebekalangapo na nsangaji kadi bavudile kunyoñama pa mutyima. Enka ne bantu babila’tu kwikala na lupeto luvule, bavutakanibwanga ñeni kadi bavudile kubelabela.” Nanshi kidyumu kya mu Bible kitudyumuna kuleka kusanswa lupeto i kya kamweno! Le ubavuluka’ko misoñanya mikwabo ya mu Bible yakukweshe? Shi tusangela bininge madingi a mu Bible, tukakulupila bininge tunangu twitupa Umpangi wetu wa buswe. (Yak. 1:5) Nabya, tukekala na nsangaji mivule mu būmi.​—Isa. 48:17, 18.

14. Le kwifunda Bible kwitufundija bika padi Yehova?

¹⁴ Wifunde na kitungo kya kuyuka Yehova senene. (Yoa. 17:3) Kitatyi kyowifunda Bisonekwa, ukayuka ngikadila ya Yehova ikwatañene na ngikadila yandi imwekela mu bupangi. Ino i ngikadila ya muntu udi’ko bine, ke ya muntupo wa kufwatakanya. (Div. 34:6, 7; Ñim. 145:8, 9) Poenda uyuka Yehova senene, lwitabijo lobe mwadi nalo lukaningila’ko, ukamusanswa bininge, kadi ukapwana nandi bininge.

15. Le kusapwila bakwenu byokulupile kukakukwasha namani?

¹⁵ Sapwila bakwenu byokulupile padi Leza. Shi ulonge namino, lwitabijo lobe lukaningila’ko. Ino le ukalonga namani shi muntu osapwila wakwipangula bintu byokuyukilepo pa kwikala’ko kwa Leza? Kakimbe malondololo aleta Bisonekwa mu mabuku etu, kupwa wiye umulondolole. (1 Pe. 3:15) Kadi ubwanya ne kunena Kamoni wa bwino akukwashe. Nansha shi muntu osapwila waitabija malondololo a mu Bible nansha kwiapela, ino abe ukamwena mu bukimbi bobe. Lwitabijo lobe lukaningila’ko. Kadi kukakulupilapo bantu bamweka bu batunangu kadi bafunde bininge banena’mba Umpangi i kutupu’ye.

16. Le i bika bibwanya kulongeka shi ketwendelelepo kukomeja lwitabijo lwetu ne kwilulama?

¹⁶ Nansha shi ketudi bengidile Yehova kitatyi kilampe namani, tufwaninwe kwendelela kuningija lwitabijo lwetu mwadi ne kwilulama. Mwanda waka? Mwanda shi ketutadijepo, lwitabijo lwetu lubwanya kuzoza. Vuluka’mba lwitabijo, i kwitabija bubinga bwa bintu bya bine byampikwa kumweka. Bintu byoketubwanyapo kumona bitupēlelanga kwibīlwa. O mwanda Polo wānenene amba kubulwa lwitabijo i “bubi bwitutyinya bukidi bonka.” (Bah. 12:1) Le penepa, tukaleka kupya mu dino dikinga namani?​—2 Ts. 1:3.

17. Le i bika biketukwasha tulame lwitabijo?

 ¹⁷ Dibajinji, zenza Yehova kitatyi kyonso akupe mushipiditu wandi ujila. Mwanda waka? Mwanda lwitabijo lubadilwa mu kipa kya mushipiditu. (Ngt. 5:22, 23) Ketubwanyapo kuningija lwitabijo lwetu mudi Umpangi wetu ne kwilulama pampikwa bukwashi bwa mushipiditu wandi ujila. Shi tulombe nyeke Yehova mushipiditu wandi, uketupa’o. (Luka 11:13) Tubwanya’nka ne kumulomba’mba: “Witubweje’ko lwitabijo.”​—Luka 17:5.

18. Mungya Ñimbo ya Mitōto 1:2, 3, le i dyese’ka dyotudi nadyo?

¹⁸ Kadi wifunde nyeke pa kasuku Kinenwa kya Leza. (Tanga Ñimbo ya Mitōto 1:2, 3.) Kitatyi kyālembelwe uno mutōto, i bene Isalela batyetye kete bādi na Bijila bya Leza bilembe. Bino Bijila byādi na mulopwe ne babitobo, kadi mu myaka isamba-ibidi yonso bādi bakwata’ko mpangiko amba “bana-balume, bana-bakaji, bana” ne beni ba kibundi mu Isalela batangilwe Bijila bya Leza. (Kup. 31:10-12) Mu mafuku a Yesu namo, mivungo ya Bisonekwa yādi na bantu batyetye kete ne mu mashinankonka. Ino dyalelo, bantu bavule badi na Bible mutuntulu nansha kipindi. Bine, dino i dyese’po kashā! Le tukalombola namani amba tufwijanga’ko pa dino dyese?

19. Le i bika byotufwaninwe kulonga amba lwitabijo lwetu lwikale lukomo nyeke?

¹⁹ Tukalombola’mba tufwijanga’ko pa dyese dya kwikala na Kinenwa kya Leza, shi twikitanga kitatyi ne kitatyi. Tufwaninwe kwitūdila’ko mpangiko ya kutanga ne kwifunda Bible, ke enkapo potumona kitatyi. Shi twikale nyeke na kibidiji kya kwifunda kitatyi ne kitatyi, lwitabijo lwetu lukekala lukomo nyeke.

20. Le tufwaninwe kusumininwa kulonga bika?

²⁰ Batwe twi beshile na bantu “ba tunangu ne bafunde” ba ino ntanda, mwanda lwitabijo lwetu lwimanine pa Kinenwa kya Leza. (Mat. 11:25, 26) Pa mwanda wa kwifunda kotwifundanga dino dibuku dikola, tuyukile mwanda waka ngikadilo ya ino ntanda yendanga ibipila’ko ne bintu bisa kulonga’po Yehova. Nanshi tusumininwei kukomeja lwitabijo lwetu ne kukwasha bantu bavule bekale na lwitabijo mudi Umpangi. (1 Tm. 2:3, 4) Kadi twendelelei na kutengela kitatyi kikanena bipangwa byonso byūmi bya pano panshi binenwa bidi mu Kusokwelwa 4:11 bya amba: “A Yehova Leza wetu, abe wi mufwaninwe kupebwa ntumbo . . . mwanda wapangile bintu byonso.”