1-2. Le kisonekwa kya Musapudi 11:6, kikwatañene namani na kusapula myanda miyampe ya Bulopwe?

MU MATANDA amo, bantu basakanga kwifunda kitatyi kyobevwana myanda miyampe. I ayo’tu yobatengēle! Mu matanda makwabo namo, bantu kebasangelangapo bininge myanda ya Leza nansha ya mu Bible. Le bantu ba koshikete badi namani? Nansha bikale namani, Yehova usakanga twendelele kusapula kufika ne byanena’mba kubapu.

² Mwingilo wa kusapula ukafula pa kitatyi kitungilwe na Yehova, ebiya “mfulo keiya.” (Mat. 24:14, 36) Penepa, i muswelo’ka otubwanya kukōkela binenwa bya amba, “kokaleka kuboko kobe kukōkolokwe”? *—Tanga Musapudi 11:6.

3. Le i bika byotusa kwisambila’po mu kino kishinte?

³ Kishinte kibadikile kyesambīle pa bintu biná byotufwaninwe kulonga pa kwikala “babiluwe ba bantu” bayampe. (Mat. 4:19) Kino kishinte kisa kwisambila pa miswelo isatu yotubwanya kusapula na kusumininwa, nansha shi tubatanwa mu ngikadilo’ka. Tusa kuyuka mwanda waka i biyampe (1) kuta mutyima ku mwingilo, (2) kwikala na kitūkijetyima, ne (3) kwikala na lwitabijo lukomo.

4. Mwanda waka tufwaninwe kuta nyeke mutyima ku mwingilo witupele Yehova kwingila?

⁴ Yesu wālaile binkumenkume ne bintu byādi bya kulongeka mu mafuku a mfulo, kadi byādi bibwanya kulabika balondi bandi baleke kuvuija mwingilo wa busapudi. Wādyumwine bandi bana ba bwanga’mba “keshai’nka kukesha.”  (Mat. 24:42) Dyalelo nadyo, tutanwanga na bilabi na byālabikile bantu ba mu mafuku a Noa bakomenwa kuta mutyima ku bidyumu byādi bibadyumuna Noa. (Mat. 24:37-39; 2 Pe. 2:5) Nanshi tufwaninwe kuta nyeke mutyima ku mwingilo witupele Yehova kwingila.

5. Le kisonekwa kya Bilongwa 1:6-8, kilombola namani mutandabukile mwingilo wa busapudi?

⁵ Dyalelo, tufwaninwe kuta mutyima bininge ku mwingilo wa kusapula Bulopwe. Yesu wālaile amba uno mwingilo wādi wa kutandabuka ne kwendelela shi wafu. (Yoa. 14:12) Yesu pa kufwa, bandi bana ba bwanga bamo bājokēle ku buluwe. Aye’tu usanguka, Yesu wālongela bandi bana ba bwanga kingelengele, bākwata mwita muvule. Mu dino difuku, Yesu wālombwele patōka’mba mwingilo wa kwikala babiluwe ba bantu udi na mvubu kutabuka mwingilo o-onso. (Yoa. 21:15-17) Kumeso’tu kwa Yesu kukanda mūlu, wālombwele bandi bana ba bwanga’mba mwingilo waāshilwile wa kusapula bukamoni, ukengilwa ne panja pa Isalela. (Tanga Bilongwa 1:6-8.) Myaka mivule pa kupita’po, Yesu wāpa mutumibwa Yoano kimonwa, wāmulombola bintu byādi bya kulongeka “mu difuku dya Mfumwetu.” * Kadi Yoano wāmwene ne kino kintu kikwabo kilenga nzuba: Mwikeulu wādi na “myanda miyampe ya nyeke” ya kusapwila “mizo yonso ne bisaka ne ndimi ne bantu.” (Kus. 1:10; 14:6) Na bubine, dyalelo Yehova usakanga wingile uno mwingilo mukatampe wa kusapula kufika ne byoupwa.

6. Le i muswelo’ka otubwanya kuta nyeke mutyima ku mwingilo wa busapudi?

⁶ Tubwanya kuta nyeke mutyima ku mwingilo wa busapudi shi tulangulukila pa byobya bilonga Yehova mwanda wa kwitukwasha. Kimfwa, witupanga byakudya bivule bya ku mushipiditu, mabuku matampe ne a  pa Entelenete, mavideo ne mawi makwate, ne televijo ya jw idi pa Entelenete. Langa’po bidi: Pa site yetu, patanwa myanda mu ndimi 1 000 ne kupita! (Mat. 24:45-47) Mu ino ntanda mikalañane mu myanda ya politike, ya bipwilo ne lupeto, mudi bengidi ba Leza midiyo mwānda ne kupita badi mu bumo bwa bu bana na bana kujokoloka ntanda yonso. Kimfwa, Dya Butano, mafuku 19 Kweji 4, 2019, Batumoni ba ntanda yonso bebungīle pamo mwanda wa kubandaula kisonekwa kya difuku. Mu kine kyolwa’kya, kibumbo kya bantu 20 919 041 bebungile mwanda wa kuvuluka lufu lwa Yesu. Kitatyi kyotulangulukila pa dyese dyotudi nadyo dya kumona kino kinkumenkume ne kukwasha’ko, tusakanga kuta nyeke mutyima ku mwingilo wa Bulopwe.

7. Le kimfwa kya Yesu kitukwasha namani tute nyeke mutyima ku mwingilo?

⁷ Muswelo mukwabo otubwanya kuta nyeke mutyima ku mwingilo wa busapudi i kulonda kimfwa kya Yesu. Kālekelepo kintu nansha kimo kimulabike, aleke kusapula bukamoni bwa bubine. (Yoa. 18:37) Kāitabijepo pāsakile Satana kumupa “malopwe onso a ntanda ne ntumbo yao”; kadi kāitabijepo kitatyi kyāsakile bantu kumubikika bu mulopwe. (Mat. 4:8, 9; Yoa. 6:15) Kātādilwepo na mutyima wa kusaka kwikala na bupeta bwa ku ngitu; nansha kuzakala balwana. (Luka 9:58; Yoa. 8:59) Shi lwitabijo lwetu lubatompibwa, tubwanya kuta nyeke mutyima ku mwingilo shi tuvuluke madingi a mutumibwa Polo. Wāsoñenye bene Kidishitu balonde kimfwa kya Yesu kutyina ‘bakakōka ne kuleka’byo’!​—Bah. 12:3.

8. Le kitūkijetyima i bika, ne mwanda waka pano po pene pokidi na mvubu?

⁸ Kitūkijetyima i ngikadila ya kwilaija talala bintu bishinte. Ekale shi tukungile mfulo ya bintu bibi nansha kufikidila kwa bintu byotusaka, tufwaninwe kwikala na kitūkijetyima. Mupolofeto Habakuka wādi usaka bintu bya lūma byādi mu Yuda bipwe. (Hab. 1:2) Bana ba bwanga ba Yesu nabo bādi bakulupile amba Bulopwe “busa kumweka ponka na ponka,” bwibakūle ku kasusu ka Loma. (Luka 19:11) Netu twabilanga difuku dikatalula’ko Bulopwe bwa Leza bibi ne kwitutweja mu ntanda mipya ya boloke. (2 Pe. 3:13) Inoko, tufwaninwe kwikala na kitūkijetyima ne kwilaija kitatyi kitungilwe na Yehova. Pano twisambilei’ko bidi pa miswelo imoimo itufundija Yehova twikale na kitūkijetyima.

9. Leta bimfwa bilombola’mba Yehova udi na kitūkijetyima.

⁹ Yehova i mwitupe kimfwa kibwaninine kya kitūkijetyima. Wāpele Noa kitatyi kilampe kya kūbaka safina ne kwingila bu “musapudi wa boloke.” (2 Pe. 2:5; 1 Pe. 3:20) Yehova wātejeje Abalahama umwipangula bipangujo bivule pa butyibi bwandi bwa konakanya bekadi ba bibundi bibi bya Sodoma ne Ngomola. (Ngo. 18:20-33) Mu bula bwa myaka mivule, Yehova wādi utūkijije mutyima bya binebine muzo wa Isalela wampikwa kikōkeji. (Neh. 9:30, 31) Dyalelo twimwenanga kitūkijetyima kya Yehova, papa bantu bonso bakokela kwadi kitatyi kya ‘kufikila pa kwisāsa.’ (2 Pe. 3:9; Yoa. 6:44; 1 Tm. 2:3, 4) Kimfwa kya Yehova kitupa bubinga bwendele’mo bwa kwikadila na kitūkijetyima kitatyi kyotusapula ne kufundija. Kadi witufundijanga twikale na kitūkijetyima kupityila ku kyelekejo kidi mu Kinenwa kyandi.

10. Mungya Yakoba 5:7, 8, le kimfwa kya kidimye kitufundija bika?

¹⁰ Tanga Yakoba 5:7, 8. Kimfwa kya kidimye ukuna nkunwa kitufundija mwa kwikadila na kitūkijetyima. Shako, nkunwa imo  itamanga lubilolubilo. Inoko, nkunwa mivule, nakampata yoya ipa bipa, iloñanga kitatyi kilampe pa kukoma. Mu Isalela, nkunwa yādi ilonga kintu kya myeji isamba. Kidimye wādi ukuna nkunwa yandi pa kupwa kwa mvula mubajinji ku dikumbi, kupwa waangula miseke kupwa kwa mvula wa mfulo ku muketeko. (Mako 4:28) Twiulei na tunangu kitūkijetyima kya kidimye. Inoko, kebipēlangapo.

11. Le kitūkijetyima kiketukwasha namani mu mwingilo wetu?

¹¹ Bantu bampikwa kubwaninina basakanga kumona ponka na ponka bintu bilupuka ku bukomo bobalonga. Inoko, shi tusaka budimi bwetu bulupule bipa, tufwaninwe kwibuta mutyima kitatyi kyonso—kutyimpula, kukuna, kusekwila, ne kusangila mema. Mwingilo wa kulonga bana ba bwanga nao witulomba kulonga nyeke bukomo. Bitulombanga kitatyi pa kutalula mboloji ne mutyima wa kupela musapu mu mityima ya boba botufundija. Kitūkijetyima kiketukwasha tuleke kutyumukwa mutyima kitatyi kyotutanwa na makambakano. Shi tubatana bantu betabija musapu, tufwaninwe’nka kwikala na kitūkijetyima. Ketubwanyapo kuningila bantu botwifunda nabo Bible bekale na lwitabijo. Kyaba kimo, nansha ke bana ba bwanga ba Yesu bākomenwe kwivwanija byaādi ufundija. (Yoa. 14:9) Tuvulukei amba batwe tukunanga ne kusangila mema, ino utamijanga’byo i Leza.​—1 Ko. 3:6.

12. Le i muswelo’ka otubwanya kwikala na kitūkijetyima potusapwila bantu botubutulwa nabo bampikwa kwitabija?

¹² Tubwanya kukomenwa kwikala na kitūkijetyima kitatyi kyotusapwila bantu botubutulwa nabo bampikwa kwitabija. Inoko musoñanya udi mu Musapudi 3:1, 7 ubwanya kwitukwasha. Unena’mba: “[Kudi] . . . kitatyi kya kwikala talala ne kitatyi kya kwisamba.” Tubwanya kuleka mwiendelejo wetu muyampe usapule pampikwa kunena, koku tukimba mikenga ya kwisambila pa  bubine. (1 Pe. 3:1, 2) Kitatyi kyotusapula ne kufundija na bupyasakane, tutūkijijei bantu bonso mutyima—kubadila’mo ne bantu ba mu kisaka.

13-14. Le i bimfwa’ka bimobimo bya bantu ba kitūkijetyima byotubwanya kwiula?

¹³ Tubwanya kwifunda kwikala na kitūkijetyima ku bimfwa bya bantu ba kikōkeji batelelwe mu Bible ne ba mu ano etu mafuku. Habakuka wādi usaka bintu bibi bipwe, ino wānenene na kikulupiji amba: “Nkemananga nyeke ku kifuko kyami kya bu mulami.” (Hab. 2:1) Mutumibwa Polo nandi wādi usaka ‘kuvuya’ mwingilo wandi. Ino, wāendelele “kusapula ne pa mfulo bukamoni bwa myanda miyampe” na kitūkijetyima.​—Bil. 20:24.

¹⁴ Twisambilei pa kimfwa kya ba mulume ne mukaji batambwile mapolome ku masomo a Ngileade, bebatuma mu ntanda mwadi Batumoni batyetye kadi mwadi bantu bavule ke bene Kidishitupo. Bantu bavule kebadipo basaka kwifunda Bible. Ino banabetu bobafundile nabo ku Ngileade badi bengidila mu matanda makwabo, badi bebalombola’mba abo bendejanga bifundwa bya Bible bivule. Nansha mu mwaba wabo byomwadi kwendelela kutyetye, bano ba mulume ne mukaji badi bavuija na kitūkijetyima mwingilo wabo. Pa kupwa kusapula myaka mwānda mu uno mwaba wadi umweka bu kemudipo kwendelela, baivwene nsangaji pa kumona muntu umo obadi befunda nandi Bible wabatyijibwa. Le bino bimfwa bya pa kala ne bya mu ano etu mafuku, bitufundija bika? Bano bantu ba kikōkeji kebaikelepo na mulēle nansha kuleka makasa abo akōkolokwe, kadi Yehova webapadile mpalo pa mwanda wa kitūkijetyima kyabo. Nanshi twiulei “boba bakapyana milao kupityila ku lwitabijo ne kitūkijetyima.”​—Bah. 6:10-12.

15. Le i muswelo’ka umo witukomejanga lwitabijo lwetu amba tusumininwe kusapula?

¹⁵ Tudi na lwitabijo mu musapu otusapula, o mwanda tusakanga kusapwila bantu bavule. Tukulupile mu milao idi mu Kinenwa kya Leza. (Ñim. 119:42; Isa. 40:8) Tumonanga bupolofeto bwa mu Bible bufikidila mu ano etu mafuku. Twimwenanga muswelo ulumbuluka būmi bwa bantu kitatyi kyobashilula kwingidija madingi a mu Bible. Bino bintu bitulengejanga tukulupile bininge amba, myanda miyampe ya Bulopwe i musapu ufwaninwe kwivwana muntu ense.

16. Kukwatañana na Ñimbo ya Mitōto 46:1-3, le kwikala na lwitabijo mudi Yehova ne mudi Yesu kwitukwashanga namani tusumininwe kusapula?

¹⁶ Kadi tudi na lwitabijo mudi Yehova, Mwine witupele musapu otusapula, ne mudi Yesu, mwine wabikikile bu Mulopwe wa Bulopwe. (Yoa. 14:1) Nansha shi tubatanwa na bintu’ka, Yehova ukekala kinyemeno kyetu ne bukomo bwetu nyeke. (Tanga Ñimbo ya Mitōto 46:1-3.) Ne kadi, tukulupile amba Yesu wendejanga mwingilo wa busapudi aye momwa mūlu, wingidija bukomo ne lupusa lumupele Yehova.​—Mat. 28:18-20.

17. Leta kimfwa kilombola’mba tufwaninwe’nka kusapula.

¹⁷ Lwitabijo lwitukwashanga tukulupile amba Yehova uketwesela pa bukomo botulonga, pakwabo mu muswelo oketulangapo. (Mus. 11:6) Kimfwa, bantu tununu ne tununu bayānga ku mabuku otutūlanga pa tumatempa. Le ano manwa a mwa kusapwila endekanga? En-en! Mwingilo Wetu wa Bulopwe wa kweji 11, 2 014 wesambīle pa nkasampe wa ku inivelesite wadi usaka kulemba myanda ya Batumoni ba Yehova. Byakadipo ubwanya kwenda ku Njibo ya Bulopwe, watene batūle mabuku etu pa  meza ku masomo, ebiya watana’mo myanda ya kulemba. Mwenda mafuku, waikala Kamoni mubatyijibwe, pano wingilanga bu pania wa lonso. Ino myanda mimweke itutonona twendelele kusapula, mwanda ilombola’mba kukidi bantu basaka kwivwana musapu wa Bulopwe.

18. Mwanda waka tukulupile amba mwingilo wa kusapula Bulopwe ukapwa’nka musakila Yehova?

¹⁸ Tubwanya kukulupila’mba mwingilo wa kusapula Bulopwe usa kupwa pa kitatyi kifwaninwe. Twisambilei bidi pa bintu byālongekele mu mafuku a Noa. Yehova wālombwele amba ulamanga kitatyi. Yehova wātungile kitatyi kya kushilula Dilobe ako kukidi kintu kya myaka 120. Myaka mivule pa kupita’po, Yehova wāpa Noa mwingilo wa kūbaka safina. Padi myaka 40 nansha 50 kumeso kwa Dilobe kushilula, Noa wāendelele kwingila bininge. Nansha bantu byokebāmutejejepo, ino aye wādi’nka usapula musapu wa kidyumu kufika ne byānenene Yehova amba kitatyi kibabwana kya kutweja banyema mu safina. Kupwa “Yehova wāshita kibelo” pa kitatyi kifwaninwe.​—Ngo. 6:3; 7:1, 2, 16.

19. Le i bika byotubwanya kutengela shi ketulekelepo kuboko kwetu kukōkolokwe?

¹⁹ Yehova usa kufudija mwingilo wa kusapula Bulopwe panopano ponka, usa konakanya ngikadilo ya bintu ya Satana ne kwitutweja mu ntanda mipya myoloke. Shi ke pano, twiulei Noa, Habakuka, ne bantu bakwabo kebalekelepo kuboko kwabo kukōkolokwe. Tutei nyeke mutyima ku mwingilo, twikalei na kitūkijetyima ne lwitabijo lukomo mudi Yehova ne mu milao yandi.