1. Le bantu bamo babwanya kwiivwana namani shi muntu obasenswe wapangwa?

LELO kudi muntu osenswe wapangilwe mu kipwilo? Bine, bisansa’po kashā! Kaka umo witwa bu Hilda unena’mba, “pafwile mwinē pami pa kupwa kulonga nandi myaka 41 mu busongi, namwene amba nafikilwa na kintu kibi ke kyamfikile kashā. * Ino wami mwana mwana-mulume paapangilwe mu kipwilo, washiya wandi mukaji ne bandi bana, kyaikele bu kintu kibi bininge kondi.”

2-3. Mungya Ñimbo ya Mitōto 78:40, 41, le Yehova wiivwananga namani shi mwingidi wandi waleka’byo kumwingidila?

² Langa’po bidi mobyāsanshile Yehova pāmupelele bamwikeulu bamo ba mu kyandi kisaka! (Yude 6) Kadi fwatakanya’po mobyāmusanshile pa kumona bantu basenswe, bene Isalela, bamutombokela kitatyi ne kitatyi. (Tanga Ñimbo ya Mitōto 78:40, 41.) Kulupila’mba Tata wetu wa mūlu nandi bimusansanga shi muntu osenswe waleka’byo kumwingidila. Aye wivwanije bulanda bodi nabo. Ukakupa na lusa bukankamane ne bukwashi bosakilwa.

³ Mu kino kishinte, tusa kwisambila pa bintu byotubwanya kulonga pa kusaka’mba Yehova etukwashe shi muntu otusenswe waleka’byo kumwingidila. Kadi tusa kwisambila pa muswelo otubwanya kukwasha bakwetu mu kipwilo batenwe na ano makambakano. Inoko twisambilei dibajinji pa milangwe mibi yoketufwaninwepo kwikala nayo.

4. Le bambutwile bavule beivwananga namani shi wabo mwana mwana-mulume nansha mwana-mukaji waleka’byo kwingidila Yehova?

⁴ Shi mwana mwana-mulume nansha mwana-mukaji waleka’byo  kwingidila Yehova, divule dine bambutwile beipangulanga shi kudi bintu bikwabo byobadi bakokeja kulonga pa kukwasha wabo mwana endelele kwingidila Yehova. Tutu umo witwa bu Luke wanenene papangilwe wandi mwana amba: “Nadi netopeka ami mwine. Nadi ndotakanya pa uno mwanda. Kyaba kimo nadi ndila ne kwivwana mutyima kusansa.” Elizabeth, kaka umo watenwe na mwanda wa uno muswelo nandi wadi ulanga kyaba kyonso amba: “Le i kibi’ka kyonalongele ami inandi? Nadi nanga’mba nakomenwe kukoma bubine mudi wami mwana.”

5. Le i ani ufwaninwe kutopekwa shi muntu waleka’byo kwingidila Yehova?

⁵ Tufwaninwe kuvuluka’mba Yehova i mwitupe batwe bonso kyabuntu kya bwanapabo bwa kwitongela. Ko kunena’mba tubwanya kutonga kumukōkela nansha kuleka kumukōkela. Bankasampe bamo kebadipo na mukenga wa kutonga kwingidila Yehova, ino babwenye kukwata butyibi bwa kumwingidila. Bakwabo nabo ba bambutwile badi balonga bukomo bwa kwibatamija mungya misoñanya ya mu Bisonekwa, bapelele bubine pobatamine. Tuyukei amba, batwe bonso tunenwe kukwata butyibi shi tukengidila Yehova. (Yos. 24:15) Nanshi bambutwile badi na bulanda bwa mwana walekele’byo kwingidila Yehova, kebafwaninwepo kulanga’mba i kilubo kyabo!

6. Lelo nkasampe ubwanya kwiivwana namani shi mbutwile waleka’byo kwingidila Leza?

⁶ Kyaba kimo, mbutwile ubwanya kuleka bubine enka ne kushiya kisaka kyandi. (Ñim. 27:10) Kino kibwanya kuvutakanya bana ñeni, bene badi bamwene mbutwile wabo bu kimfwa kyabo. Esther wa shandi wapangilwe unena’mba: “Nadi ndila kitatyi kyonso mwanda namwene amba kadipo wenda upaluka ku bubine. Ino wakwete ku kusaka butyibi bwa kuleka’byo kwingidila Yehova pamo netu. Nsenswe tata, o mwanda paapangilwe, nadi nangalanga pa būmi bwandi. Nadi na moyo kitatyi kyonso.”

7. Le Yehova umonanga namani nkasampe wa mbutwile mupangwe?

⁷ A bankasampe, shi mbutwile wenu umo wapangwa, mutyima witusansanga pa mwanda wenu! Kulupilai amba Yehova uyukile biyampe mobimusanshila. Wimusenswe kadi usangedile kikōkeji kyenu; kadi batwe ne batutu ne bakaka, netu twimusangedile. Kadi vulukai amba, kemufwaninwepo kutopekwa pa butyibi bwa mbutwile wenu. Monka motwanenenanga kala, Yehova i mupe muntu yense bwanapabo bwa kwitongela. Kadi muntu yense mwipāne kadi mubatyijibwe “ukeselelanga kiselwa kya mingilo kyandi.”​—Ngt. 6:5, kunshi kwa dyani.

8. Le i bika bibwanya kulonga bantu ba mu kisaka ba kikōkeji pobakungile muntu obasenswe ajokele kudi Yehova? (Tala ne kapango kanena’mba “ Jokela Kudi Yehova.”)

⁸ Shi muntu osenswe waleka’byo kwingidila Yehova, i byendele’mo ukulupile amba difuku dimo ukajokelanga kwadi. Le i bika byobwanya kulonga pano? Longa bukomo bwa kukomeja lwitabijo lobe. Shi ulonge namino, ukapa bantu bakwabo ba mu kisaka kimfwa kiyampe, padi enka ne mupangwe mwine. Kadi ukekala na bukomo bosakilwa pa kūminina misanshi yodi nayo. Pano twisambilei pa bintu bimobimo bya kamweno byobwanya kulonga.

9. Le Yehova ubwanya kukukomeja mu miswelo’ka? (Tala ne kapango kanena’mba “ Bisonekwa Bikankamika Shi Muntu Osenswe Waleka’byo Kwingidila Yehova.”)

⁹ Longa nyeke bukomo bwa kukomeja lwitabijo lobe. I biyampe wendelele kwikomeja abe mwine ne kukomeja bantu bakwabo mu kisaka. Le ubwanya kulonga kino namani? Leka Yehova akukomeje na kwikala nyeke na kibidiji kya kutanga Kinenwa kya Leza, kulangulukila’po ne kutanwa ku kupwila kwa bwine Kidishitu. Joanna, wa shandi ne mwanabo mwana-mukaji batambile mu bubine, unena’mba: “Mutyima wantūkile ponatangile myanda ya bantu ba mu Bible, kimfwa ya Abikele, Eseta, Yoba, Yosefa, ne ya Yesu. Bimfwa byabo byaunkankamikile ne kunkwasha ngikale na milangwe miyampe, mine yataleje misanshi yami. Nakankamikilwe ne na ñimbo yetu ya ntentekelo.”

10. Le kisonekwa kya Ñimbo ya Mitōto 32:6-8, kitukwasha namani tūminine bintu bivutakanya ñeni?

¹⁰ Lombola Yehova makambakano obe. Shi ñeni ibakuvutakana, kokaleka kumulomba. Zenza Leza wetu wa buswe akukwashe umone bintu mwaebimwena, akupe “bujinguludi ne kukufundija dishinda dyofwaninwe kunanga’mo.” (Tanga Ñimbo ya Mitōto 32:6-8.) Shako kulombola Yehova mwine mowiivwanina kubwanya padi kukusansa. Ino Yehova uyukile biyampe musanshila mutyima obe. Ukusenswe bininge kadi ukusoñanya umulombole bidi ku mutyima obe.​—Div. 34:6; Ñim. 62:7, 8.

11. Mungya Bahebelu 12:11, mwanda waka tufwaninwe kukulupila bulemununi bwa Yehova bwa buswe? (Tala ne kapango kanena’mba “ Kupangwa I Kilomboji kya Buswe Bwituswele Yehova.”)

¹¹ Kwatakanya butyibi bwa bakulumpe. Kupanga muntu kubadilwa mu mpangiko ya Yehova. Bantu bonso bakamwena mu kumulemununa na buswe, enka ne nonga-bibi mwine. (Tanga Bahebelu 12:11.) Bantu bamo mu kipwilo  babwanya padi kunena’mba butyibi bwakwete bakulumpe bwa kumulemununa ke buyampepo, ino vuluka’mba divule dine bano bantu kebasakengapo kunena myanda mityani ya muntu walongele kibi. Ketuyukilepo myanda yonso. Nanshi i biyampe kukulupila’mba, bakulumpe badi mu kisambo kya butyibi balongele bukomo bwa kulonda misoñanya ya mu Bisonekwa ne kutyiba mambo “mwanda wa Yehova.”​—2 Bi. 19:6.

12. Le bantu bamo bemwenine bika pa mwanda wa kukwatakanya mpangiko ya Yehova ya kulemununa muntu?

¹² Shi ukwatakanye butyibi bwa bakulumpe bwa kupanga muntu osenswe, ubwanya bine kumukwasha ajokele kudi Yehova. Elizabeth otwatelanga kala unena’mba, “kuleka kwisamba na wetu mwana mukulu kwadi kukomo bininge. Inoko paajokēle kudi Yehova, waitabije amba wadi ufwaninwe’nka kupangwa. Mwenda mafuku wanena’mba i muboile’ko ñeni mivule. Aye mwine unena’mba, namwene amba kulemununwa na Yehova kudi na kamweno.” Mark, wandi mulume ubweja’ko amba: “Mwenda mafuku, wetu mwana mwana-mulume wanombwele amba wadi usaka kujoka mwanda twalongele’nka byotwadi tufwaninwe kulonga. Ne musangale pa kwitukwasha kwetukweshe Yehova twikale na kikōkeji.”

13. Le i bika bibwanya kukukwasha ūminine bintu bisansa?

¹³ Sapwila’mo balunda bevwanija mowiivwanina. Pwana na bene Kidishitu batame ku mushipiditu bakokeja kukukwasha wikale nyeke na mumweno muyampe. (Nki. 12:25; 17:17) Joanna, otwatelanga kala unena’mba: “Mu mutyima nadi nemona bu ngidi bunka. Ino kusapwila’mo balunda bakulupilwa kwaunkweshe bininge.” Penepa le ukalonga namani shi bimweka’mba bantu bamo mu kipwilo bakunenanga bintu bikusansa bininge?

14. Mwanda waka tufwaninwe kwendelela “kwitūkijija mityima [batwe] bene na bene ne kwilekela na mutyima umo”?

¹⁴ Tūkijija batutu ne bakaka mutyima. Kunena na bubine, ke bantu bonsopo bakanena nyeke bintu biyampe. (Yak. 3:2) Batwe bonso twi bampikwa kubwaninina, o mwanda kokitulumuka shi muntu ukimba bya kunena, nansha kunena pampikwa kusaka bintu bikusanshija. Vuluka madingi a mutumibwa Polo a amba: “Endelelai kwitūkijija mityima banwe bene na bene ne kwilekela na mutyima umo nansha shi kudi udi na mwanda na mukwabo.” (Kol. 3:13) Kaka umo wa mubutule wapangilwe unena’mba: “Yehova wankweshe ndekele banabetu badi balonga bukomo bwa kunkankamika ino baunsanshija.” Le i bika bibwanya kulonga kipwilo mwanda wa kukwasha bantu bashele na kikōkeji mu kisaka?

15. Le i bika bibwanya kukwasha bantu ba mu kisaka badi na muntu obasenswe wapangilwe panopano?

¹⁵ Lubula na kyanga bantu bashele mu kisaka na kikōkeji. Kaka umo witwa bu Miriam witabija’mba, wadi uzumbija mutyima pa kwenda ku  kupwila kitatyi kyapangilwe mwanabo mwana-mulume. Unena’mba, “nadi ntyina pa byadi bya kunena bantu. Inoko kwadi balunda bayampe badi nabo na bulanda pa byalongekele, kadi kebadipo banenena mwanetu mupangwe bibi. Pa mwanda wa abo, nkyadipo nemona bu ngidi bunka mu bulanda bwami.” Kaka mukwabo uvuluka’mba: “Pobapangile wetu mwana mwana-mulume, balunda baswe baile kwitusenga. Bamo bādi betusapwila’mba abakomenwa ne kya kunena. Bakwabo badi badila nami nansha kuntumina tumikanda. Bine, byobalongele byankweshe bininge!”

16. Le kipwilo kikendelela kukwasha namani boba badi na babutule bapangwe?

¹⁶ Endelela kukwasha bantu ba mu kisaka bashele na kikōkeji. Pano po pene pobasakilwa buswe bobe ne kwibakankamika. (Bah. 10:24, 25) Kyaba kimo bantu ba mu bisaka bidi’mo bapangwe bamonanga bantu bamo mu kipwilo kebakibanenejapo, wiya’mba nabo i bapangwe. Ketufwaninwepo kwibalengeja bemone uno muswelo! Nakampata bankasampe ba bambutwile balekele bubine, bafwaninwe kufwijibwa’ko ne kukankamikwa. Maria, wa mulume wapangilwe ne kushiya kisaka, unena’mba: “Balunda nami bamo baile ku yetu njibo, batēka byakudya ne kunkwasha na kifundwa kya kisaka. Betūdile pa kyami kyaba kupwa badila nami. Badi banenena shi bantu banena myanda ya bubela pa mwanda wami. Bine, baunkankamikile bininge!” Loma 12:13, 15

17. Le bakulumpe babwanya kulonga bika pa kusenga bantu bashele mu kisaka na kikōkeji?

¹⁷ A bakulumpe, ingidijai mikenga yonso yomumona mwanda wa kukomeja bantu bashele mu kisaka na kikōkeji. Mudi na mwingilo wa pa bula wa kusenga banabenu mu lwitabijo badi na bantu balekele’byo kwingidila Yehova. (1 Ts. 5:14) Mwibakankamikei kumeso kwa kupwila ne pa kupwa kupwila. Mwibapempulei ku mobo ne kwibalombelela’ko. Sapulai nabo, nansha kwibeta kyaba kimo bāye batanwe mu butōtyi bwenu bwa kisaka. Bakulumpe batame ku mushipiditu bafwaninwe kwivwanina lusa mikōko ya Yehova idi la bulanda, kwiisanswa ne kwiita mutyima.​—1 Ts. 2:7, 8.

18. Mungya 2 Petelo 3:9, lelo Leza usaka banonga-bibi balonge bika?

¹⁸ Yehova “kasakilepo muntu nansha umo oneke, ino usaka bonso bafikile pa kwisāsa.”(Tanga 2 Petelo 3:9.) Nansha muntu byabwanya kulonga bubi bukatampe, inoko būmi bwandi i bulēme ku meso a Leza. Langulukila pa kintu kya bulēme kyāfutyile Yehova pa mwanda wa babipya-mambo—kitapwa kya kinkūlwa kya wandi Mwana wasenswe. Yehova uloñanga bukomo na buswe bwa kukwasha bano bantu bajokele kwadi. Ukulupile amba bakajokela kwadi, monka motubwanya kwikimwena mu kyelekejo kya Yesu kya mwana mujimine. (Luka 15:11-32) Bantu bavule batambile mu bubine, bajokēle kudi Tata wa buswe udi mūlu mwenda mafuku. Kadi kipwilo kyebatambwile na nsangaji. Elizabeth, otwatelanga kala wasangele bininge pobajokeje wandi mwana. Unena’mba, “ne musangale bininge pa kukankamika kwadi kwitukankamika bantu bavule tuleke kuzoza.”

19. Le i kika kinenenwa’mba tubwanya kukulupila nyeke mudi Yehova?

¹⁹ Tubwanya kukulupila nyeke mudi Yehova. Witupanga nyeke madingi a kwitukwasha. I Tata wa lusa ne buntu usenswe bininge bonso bamusenswe ne kumutōta. Kulupila’mba Yehova kakakwelapo mu bitatyi bya makambakano. (Bah. 13:5, 6) Mark otwatelanga kala unena’mba, “Yehova ketwelelepo nansha dimo. Kadipo kulampe netu kitatyi kyotwikonda na makambakano.” Yehova ukendelela kukupa “bukomo butabukile bwikalanga na bantu.” (2 Ko. 4:7) Bine, ubwanya kwikala nyeke na kikōkeji ne lukulupilo nansha shi muntu osenswe waleka’byo kwingidila Yehova.