1. I muswelo’ka otubwanya kuyuka muntu ukulupilwa?

 MUNTU ukulupilwa uloñanga bukomo bwa kufikidija byalaya, kadi wisambanga bubine. (Ñim. 15:4) Bantu bakwabo bayukile amba babwanya kumukulupila. Netu tusakanga batutu ne bakaka betukulupile. Ino le i bika byotubwanya kulonga pa kusaka’mba betukulupile?

2. Le i muswelo’ka otubwanya kwilombola bu bakulupilwa?

² Ketubwanyapo kuningila bakwetu betukulupile. Inoko batwe bo ba kwilombola bu bakulupilwa. Banenanga’mba, kukulupilwa kudi pamo bwa lupeto. Bilombanga kulonga bukomo pa kukulupilwa; inoko i bipēla bantu kujimija kikulupiji motudi. Yehova i mulengeje tumukulupile. Kakalongapo nansha dimo kintu kibwanya kwitulengeja tutunye kumukulupila, mwanda “bintu byonso byalonga i bikulupilwa.” (Ñim. 33:4) Kadi usakanga netu tumwiule. (Ef. 5:1) Tubandaulei’ko bimfwa bimo bya bengidi ba Yehova bāiwile Tata wabo wa mūlu, ne kwilombola bu bantu bakulupilwa. Kadi tusa kwisambila’mo ne pa ngikadila itano iketukwasha twikale bantu bakulupilwa.

3-4. Le mupolofeto Danyele wēlombwele namani bu muntu ukulupilwa, ne kino kitulengeja twiipangule bipangujo’ka?

³ Mupolofeto Danyele wāshile kimfwa kiyampe kya muntu ukulupilwa. Nansha byobāmuselele bu musungi kudi bene Babiloni, wāyukene bukidi bonka bu muntu ukulupilwa. Wāyukene bininge namino paāshintulwile bilotwa bya Nebukaneza mulopwe wa Babiloni, na bukwashi bwa Yehova. Difuku  dimo, Danyele wādi unenwe kusapwila mulopwe amba Yehova kamusangedilepo. Uno musapu kewādipo wa kusangaja mulopwe. Byāmulombele bukankamane, mwanda Nebukaneza wādi muntu wa bukalabale! (Dan. 2:12; 4:20-22, 25) Kadi myaka mivule pa kupita’po, Danyele wēlombwele monka bu muntu ukulupilwa, paāshintulwile bya bine musapu mukutakane wāmwekele ku lubumbu lwa njibo mikatakata mu Babiloni. (Dan. 5:5, 25-29) Mwenda mafuku, Dadiusa mwine Mede ne bantu bandi ba bulēme, nabo bājingulwile amba Danyele wādi “na mushipiditu utulumukwa.” Bāmwene amba Danyele “wadi muntu ukulupilwa, kadi mwadi kemwatenwepo kalengwa nansha kabubi.” (Dan. 6:3, 4) Bine, enka ne balopwe kebādipo batōta Yehova, bāmwene amba uno mutōtyi wa Yehova i muntu ukulupilwa!

⁴ Potulangulukila pa kimfwa kya Danyele, i biyampe twiipangule amba: ‘Le bantu ke Batumonipo bandyukile bu muntu wa muswelo’ka? Le bandyukile bu muntu uvuijanga biselwa byandi kadi ukulupilwa?’ Mwanda waka i kya mvubu kwiipangula bino bipangujo? I mwanda shi twi bantu bakulupilwa, tupejanga Yehova mitendelo.

5. Mwanda waka Hanania wāyukene bu muntu ukulupilwa?

⁵ Mu 455 Y.K., Mbikavu Nehemia paāpwile kūbakulula mumbu ya Yelusalema, wākimbile’ko bana-balume bakulupilwa ba kutala biyampe kibundi. Mu bantu baātongele, mwādi ne Hanania, mukatampe wa Nsakwa Mikomo. Bible utela Hanania bu “muntu ukulupilwa bininge kadi [wādi] wakaminwe Leza wa bine kupita bantu bakwabo bavule.” (Neh. 7:2)  Buswe bwaādi usenswe Yehova ne kutyina kumufityija mutyima, byālengeje Hanania avuije na kusumininwa mwingilo o-onso wādi umupebwa. Kwikala na ino ngikadila kuketukwasha netu twikale bakulupilwa mu mwingilo wa Leza.

6. Le Tekikusa wēlombwele namani bu muntu ukulupilwa kudi mulunda nandi mutumibwa Polo?

⁶ Twisambilei’ko pa kimfwa kya Tekikusa, muntu ukulupilwa wāingile pamo na mutumibwa Polo. Kitatyi kyādi Polo mu njibo ya kifungo, wādi wisumbidile Tekikusa, mwine waātelele ne bu “mwingidi wa kikōkeji.” (Ef. 6:21, 22) Polo wādi umukulupile, ke enkapo’tu mwanda wa kukatūdila banababo mikanda mu Efisesa ne mu Kolose, ino i ne mwanda wa kwibakankamika ne kwibasenga. Kimfwa kya Tekikusa, kituvuluja bana-balume ba kikōkeji kadi bakulupilwa, bavuijanga bisakibwa byetu bya ku mushipiditu dyalelo.​—Kol. 4:7-9.

7. I ñeni’ka ya kwikala muntu ukulupilwa yobwanya kuboila ku bakulumpe ne bengidi ba mingilo ba mu kyenu kipwilo?

⁷ Dyalelo, tufwijanga’ko bininge pa bakulumpe betu ne bengidi ba mingilo bakulupilwa. Pamo bwa Danyele, Hanania, ne Tekikusa, nabo bavuijanga biselwa byabo na kusumininwa. Kimfwa, potutanwa ku kupwila kwa mu bukata bwa yenga, tukulupilanga’mba bipindi byonso bya ku mpangiko, byapelwe banabetu ba kupityija’byo. Bine, bakulumpe bafwijanga’ko bininge kitatyi kiteakanya batutu ne bakaka bipindi bya ku kupwila byobapelwe, ne kupityija’byo! Kadi ketwikakangapo kwita botwifundanga nabo Bible bāye batanwe ku kupwila kwa ku mfulo kwa yenga, na kutyina’mba padi kekukekalapo tutu wa kunena mwisambo wa bantu bonso. Ne kadi tukulupilanga’mba, kukekala mabuku otusakilwa a kwenda nao mu busapudi. Bine, bano batutu ba kikōkeji betukwatakanyanga senene, o mwanda tufwijanga’ko Yehova pa mwanda wabo! Ino le i muswelo’ka otubwanya kwilombola bu bakulupilwa?

8. I muswelo’ka otubwanya kwikala na bujalale potukimba kuyuka mwikadile bakwetu? (Nkindi 11:13)

⁸ Tusenswe batutu ne bakaka, kadi tusakanga kuyuka mobekadile. Inoko tufwaninwe kwikala na bujalale ne kulēmeka myanda ibatala. Bamo mu kipwilo kya bwine Kidishitu mu myaka katwa kabajinji, bādi “ba lubabo, beela ne mu myanda ya bene, besamba bintu byokebafwaninwepo kwisamba.” (1 Tm. 5:13) Na bubine ketusakengapo kwikala pamo bwa abo. Ino tutompe kufwatakanya, muntu wetusapwila myanda imutala, wetulombe tuleke kusapwila’mo bantu bakwabo. Kimfwa, kaka kampanda wetusapwila misongo yabela nansha ditompo dikwabo dyaekonda nadyo, ino wetulombe tulame myanda’ya. Tufwaninwe kulēmeka byaetulomba. * (Tanga Nkindi 11:13.) Twisambilei’ko pa myanda imoimo motufwaninwe kulama myanda mifyame.

9. Le bantu ba mu kisaka babwanya kwilombola namani bu bakulupilwa?

⁹ Mu kisaka. Muntu ne muntu mu kisaka udi na kiselwa kya kulama myanda itala kisaka. Kimfwa, mwana-mukaji mwine Kidishitu ubwanya kwikala na kibidiji kampanda, kimona wandi mulume bu kisepeja. Lelo mulume ukasapwila’mo bantu bakwabo ne kumufwija bumvu? Nansha dimo! Usenswe wandi mukaji, kadi kakasakepo nansha dimo kulonga kintu kampanda kya kumusanshija. (Ef. 5:33)  Bankasampe bakyanza kusongola, basakanga kulongelwa bintu na bulēme kampanda. Bambutwile bakalonga biyampe kuvuluka kino. Kebakasakepo kufwija babo bana bumvu, nansha kusapwila bantu bakwabo bilubo bya babo bana. (Kol. 3:21) Bana nabo basakilwa kudyumuka, mwanda wa kuleka kusapwila bantu bakwabo myanda ibwanya kufwija bumvu bantu ba mu kisaka. (Kup. 5:16) Shi umo ne umo mu kisaka ulonga bukomo bwa kulama myanda itala kisaka, kisaka kyabo kikekala mu bumo.

10. Le mulunda wa bine i wa namani? (Nkindi 17:17)

¹⁰ Na balunda. Kitatyi kampanda, tusakanga kusapwila balunda netu ba pa mutyima myanda itutala. Ino kyaba kimo tubwanya kukomenwa kwibasapwila’yo. Bibwanya kwitukomena kusapwila muntu motwiivwanina, kadi bibwanya kwitusansa bininge shi mwenda mafuku twaivwana’mba, mulunda netu wakasapwidile bantu bakwabo byotwamusapwidile. Ino tufwijanga’ko bininge muntu ubwanya kulama myanda mifyame! Yao ye “mulunda wa bine.”​—Tanga Nkindi 17:17.

11. (a) Le bakulumpe ne babo bakaji balombolanga namani amba i bantu bakulupilwa? (b) I ñeni’ka yotubwanya kuboila ku mukulumpe wavuija myanda mifyame mu kipwilo, kupwa waketana na kyandi kisaka? (Tala kifwatulo.)

¹¹ Mu kipwilo. Bakulumpe balama myanda mifyame, i ‘kifuko kya kufyama’mo kivula, kifuko kya kufyama’mo’ banababo. (Isa. 32:2) Tuyukile amba tubwanya kusapwila bano bana-balume kanda ne kanda, koku tukulupile’mba kebakasapwila’mopo bantu bakwabo. Ketwibaningilangapo betusapwile myanda mifyame. Kadi tufwija’ko bakaji ba bakulumpe, mwanda kebakimbengapo kulengeja babo balume bebasapwile myanda mifyame ya bantu bakwabo. Bine, bisangajanga’po kashā shi mukaja mukulumpe kesambepo myanda ya batutu ne bakaka. Mukaja mukulumpe umo unena’mba: “Mfwijanga’ko wami mulume mwanda ulamanga myanda mifyame ya boba bakapempula mu bupempudi  bwa bukumbi, nansha boba basakilwa bukwashi ku mushipiditu. Kansapwilangapo nansha majina abo mene. Nsangelanga bininge kuleka kuvutakanibwa ñeni na myanda yonkidipo na kyombwanya kulonga’po. Kino i kinkwashe ngikale biyampe na batutu ne bakaka bonso mu kipwilo. Kadi kino i kinengeje nkulupile’mba, shi nasapwila wami mulume myanda intala nansha makambakano onekonda nao, kakasapwila’mopo bantu bakwabo.” Bine batwe bonso tusakanga kuyukana bu bantu bakulupilwa. Ino le i ngikadila’ka ibwanya kwitukwasha twikale bakulupilwa? Twisambilei’ko pa ngikadila itano.

12. Mwanda waka tubwanya kunena’mba buswe i ngikadila ya mvubu mpata itukwasha twikale bakulupilwa? Leta kimfwa.

¹² Buswe i ngikadila ya mvubu mpata itukwasha twikale bakulupilwa. Yesu wānenene amba mbila ibidi mikatampe i ya kusanswa Yehova, ne kusanswa mukwetu. (Mat. 22:37-39) Buswe botusenswe Yehova bwitutononanga twiule kimfwa kyandi kibwaninine kya muntu ukulupilwa. Kimfwa, buswe botusenswe batutu ne bakaka bwitutononanga tulame myanda yabo ibatala. Ketufwaninwepo nansha dimo kwisamba myanda ibatala, ibwanya kwibafwija bumvu nansha kwibasanshija.​—Yoa. 15:12.

13. Le kwityepeja kwitukwashanga namani twikale bakulupilwa?

¹³ Kwityepeja kuketukwasha twikale bakulupilwa. Mwine Kidishitu mwityepeje kakimbengapo kutulumuja bakwabo, na kwikala mubajinji kunena myanda. (Fid. 2:3) Kasakengapo kwimwekeja bu wa mvubu mpata, na kulombola’mba uyukile myanda yakanenwepo kusapwila bantu bakwabo. Kadi kwityepeja kuketukankaja kusambakanya mumweno wetu pa myanda keinenenwepo mu Bible, nansha mu mabuku etu esambila pa Bible.

14. Le kusansanya kubwanya kwitukwasha namani twikale bakulupilwa?

¹⁴ Kusansanya kukakwasha mwine Kidishitu ayuke “kitatyi kya kwikala talala ne kitatyi kya kwisamba.” (Mus. 3:7) Mu bibidiji bimo banenanga’mba, “Kwisamba i ndalama, inoko kūba talala i olo.” Ko kunena’mba, kudi bitatyi bimo bikalanga biyampe kūba talala, pa kyaba kya kwisamba. O mwanda Nkindi 11:12 witudingila’mba: “Muntu wa kusansanya kwa binebine wikalanga talala.” Twisambilei’ko pa kimfwa kimo. Mukulumpe umo wa bwino, bamwitanga divule kukavuija myanda mu bipwilo bikwabo. Mukulumpe mukwabo wīsambila padi uno mukulumpe amba, “Uloñanga nyeke bukomo bwa kuleka kwisamba myanda mifyame ya bipwilo bikwabo.” Kusansanya kwa uno mukulumpe, kubalengeja batutu bakwabo baingila nabo mu kitango kya bakulumpe bamulēmeke. Bakulupile amba uno mukulumpe kakasapwilapo bantu bakwabo yabo myanda mifyame.

15. Leta kimfwa kilombola’mba kwikala muntu wa kubulwa budimbidimbi kubwanya kukwasha bakwetu betukulupile.

¹⁵ Kubulwa budimbidimbi i kintu kikwabo kibwanya kwitukwasha twikale bakulupilwa. Tukulupilanga muntu wampikwa budimbidimbi mwanda tuyukile amba ukesamba nyeke bubine. (Ef. 4:25; Bah. 13:18) Kimfwa, langa’po bidi ukimba kulumbulula bwino bobe bwa kufundija. Ebiya ubanena’mba usa kunena’ko muntu umo ateje mwisambo obe, ne kukupa’ko madingi mayampe pa muswelo obwanya kwilumbulula. Le i ani okakulupila’mba ukakupa madingi a bine? Lelo i yewa ukakusapwila bintu byosaka kwivwana, nansha i yewa ukakusapwila bubine na kanye? Kilondololwa kidi patōka. Bible unena’mba: “Madingi a patōkelela  atabukile buya buswe bufyame. Bilonda bikutapile mulunda i bikōkele.” (Nki. 27:5, 6) Nansha shi binenwa byampikwa budimbidimbi bya mulunda kebikusangejepo dibajinji, inoko byo abyo bikakukwasha mwenda mafuku.

16. Le Nkindi 10:19 ilombola namani kamweno kadi mu kwikala na kwīfula?

¹⁶ Kwīfula i kwa kamweno pa kusaka’mba bantu bakwabo betukulupile. Ino ngikadila itukwashanga tūbe talala kitatyi kyotukimba kusokola myanda mifyame yobetusapwidile. (Tanga Nkindi 10:19.) Inoko kwīfula kwetu kubwanya kutūlwa pa ditompo kitatyi kyotwingidija marezo a mīsambo. Shi ketutadijepo, tubwanya kusokola myanda mifyame ku bantu bavule. Kadi shi ketudi batume misapu na bingidilwa bya busendwe, ketubwanyapo kuyuka muswelo ukengidija’yo bantu bakwabo, ne makambakano oibwanya kulupula. Kadi kwīfula kuketukwasha tūbe talala kitatyi kikimba balwana twibasapwile myanda ikatūla batutu ne bakaka mu kyaka. Kino kibwanya kulongeka kitatyi kyobetwipangula kudi bampulushi, mu ntanda mukankajibwe mwingilo wetu nansha moutūdilwe mikalo. Tubwanya kwingidija musoñanya wa kulama “kyakanwa [kyetu] na lukano” mu ino myanda, ne mu myanda mikwabo. (Ñim. 39:1) Ekale i na ba mu kyetu kisaka, na balunda netu, na batutu ne bakaka, nansha na muntu ye-yense, tufwaninwe kwikala bakulupilwa. Kadi pa kwikala bantu bakulupilwa, tunenwe kwīfula.

17. I muswelo’ka otubwanya kulengeja twikulupile mu kyetu kipwilo?

¹⁷ Bine, tufwijanga’ko Yehova pa kwitukokela mu kisaka kya bantu ba buswe kadi bakulupilwa! Kadi batwe bonso tudi na kiselwa kya kulonga bintu bilengeja batutu ne bakaka betukulupile. Umo ne umo motudi palonga bukomo bwa kwikala na buswe, kwityepeja, kusansanya, kubulwa budimbidimbi, ne kwīfula, ulengejanga twikulupile mu kyetu kipwilo. Tufwaninwe kwendelela kulonga bukomo bwa kwilombola bu bantu bakulupilwa. Nanshi twiulei Yehova, Leza wetu, ne kwilombola nyeke bu bantu bakulupilwa.