Tala mulondolwela Bible ku bino bipangujo.

Bilongwa 24:15 witusapwila’mba, kukekalanga “lusangukilo lwa boloke ne bakondame bene kumo.” Boloke i boba bakōkele Leza kumeso kwa abo kufwa, o mwanda majina abo i malembwe mu mukanda wa būmi. (Mal. 3:16) Bakondame i boba bafwile pa kubulwa kwikala na mukenga mufwaninwe wa kuyuka Yehova, o mwanda majina abo kealembelwepo mu mukanda wa būmi.

Yoano 5:28, 29 wisambila enka pa bino bisumpi bibidi bitelelwe mu Bilongwa 24:15. Yesu unena’mo amba “boba badi balonga biyampe” bakasangulwa “ku lusangukilo lwa būmi, boba badi balongalonga bibi nabo ku lusangukilo lwa butyibi.” Boloke badi balonga biyampe kumeso kwa abo kufwa. Bakasangulwa ku lusangukilo lwa būmi, mwanda majina abo ashele malembe mu mukanda wa būmi. Inoko, bakondame badi balongalonga bibi kumeso kwa abo kufwa. Bakasangulwa ku lusangukilo lwa butyibi. Majina abo kealembelwepo mu mukanda wa būmi, kadi bakatalwa nansha kubandaulwa mu bula bwa kitatyi kampanda. Mu bula bwa kitatyi kyobakatalwa, bakekala na mukenga wa kwifunda myanda ya Yehova, ne kulembwa majina abo mu mukanda wa būmi.

Kusokwelwa 20:12, 13 ushintulula’mba boba bonso bakasangulwa, bakasakilwa kukōkela “byobya bilembelwe mu mivungo,” ko kunena’mba, bijila bipya biketupa Leza mu ntanda mipya. Boba kebakakōkelapo bakonakanibwa.​—Isa. 65:20.

Danyele 12:2 i mulaye amba bamo mu boba balēle mu lufu, bakalanguka “ku būmi bwa nyeke, bakwabo ku mutonko ne ku kafutululo ka nyeke.” Uno vese wisambila pa butyibi bwa mfulo bukatyibilwa boba bakasangulwa​—“būmi bwa nyeke” nansha “kafutululo ka nyeke.” Ko kunena’mba ku mfulo kwa myaka 1 000, bamo bakapebwa būmi bwa nyeke, bakwabo nabo bakonakanibwa lonso.​—Kus. 20:15; 21:3, 4.

Tulete kimfwa. Ngikadilo ya bantu ba mu bino bisumpi bibidi, ibwanya kudingakanibwa na ya bantu bakimba kukashikata mu ntanda-bene. Boloke badi pamo bwa boba bapebwa viza ya kaji nansha ya bu mwinē kibundi, ilombola’mba bebayukile kadi badi’ko na bwanapabo kampanda. Inoko bakondame, badi pamo bwa beni bapebwa viza ya mu kitatyi kampanda, nansha ya bu muntu wiile kunanga. Bano beni bafwaninwe kwiendeja biyampe kumeso kwa kupebwa lupusa lwa kwendelela kushikata mu ntanda-bene. Ne bakondame bakasangulwa nabo mo monka, bakasakilwa kukōkela bijila bya Leza ne kwilombola bu boloke pa kushala mu Paladisa. Kadi nansha shi beni bapelwe viza ya muswelo’ka dibajinji pobatwelele mu ntanda-bene, bamo babwanya kufula ku kupebwa lupusa lwa bu mwinē kibundi, ino bakwabo nabo bajokejibwa mwabo. Buno butyibi bwa mfulo bukalondakana na ngikadila ne mwiendelejo wabo mu ntanda-bene. Ne butyibi bwa mfulo bukatyibilwa boba bakasangulwa, nabo bukalondakana na kikōkeji kyabo ne na muswelo obakeendeja mu ntanda mipya.

Yehova i Leza wa lusa, inoko kadi i Leza wa boloke. (Kup. 32:4; Ñim. 33:5) Ukalombola buswe bwandi ku boloke ne bakondame bakasangulwa. Inoko ukasaka bano bantu bonso balonde misoñanya yandi ya peulu ya kiyampe ne kibi. I enka boba bamusanswa ne kulonda misoñanya yandi mu bwabo būmi, bo bakapebwa mukenga wa kwikala na būmi bwa nyeke mu ntanda mipya.