1-2. Le tumwenanga namani mu kwitupanga kwitupangile Yehova na bukomo bwa kutana nsangaji mivule mu kupāna kutabuka’ko mu kupebwa?

 YEHOVA paāpangile bantu, wēbapangile na bukomo bwa kutana nsangaji mivule mu kupāna kutabuka’ko mu kupebwa. (Bil. 20:35) Le ko kunena’mba ketwikalangapo na nsangaji yo-yonso mu kupebwa? Aa. Batwe bonso tusangalanga shi tubatambula kyabuntu. Inoko twikalanga na nsangaji mikatampe kitatyi kyotupāna. Kadi na bubine shi Yehova wētupangile uno muswelo, i pa mwanda wa kamweno ketu. Mwanda waka?

² Yehova wētupangile uno muswelo mwanda wa tubwanye kuvudijija’ko nsangaji yetu. Tubwanya kuvudija nsangaji yetu na kukimba’ko mikenga mikwabo ya kupāna. Mwene uno i muswelo wa kutendelwa witupangile Yehova?—Ñim. 139:14.

3. Mwanda waka Yehova utelwa bu “Leza wa nsangaji”?

³ Bisonekwa bitulombola’mba kupāna kuletanga nsangaji, kino kitukwasha twivwanije mwanda waka Yehova utelwa bu “Leza wa nsangaji.” (1 Tm. 1:11) Aye ye mubajinji kupāna bintu ku bantu bakwabo, kadi kekudipo upānanga bivule pamo bwa aye. Monka mwānenene’byo mutumibwa Polo, i pa mwanda wa aye “potwikele na būmi, tujina ne kwikala’ko.” (Bil. 17:28) Na bubine, “kyabuntu kyonso kiyampe ne kya kupānwa kyonso kibwaninine” kitambanga kudi Yehova.—Yak. 1:17.

4. Le i bika biketukwasha twikale na nsangaji mivule?

⁴ Ye uno batwe bonso tusakanga kwimwena nsangaji itamba mu kupāna. Tubwanya kwimwena’yo na kwiula buntu bwa Yehova. (Ef. 5:1) Potubandaula kimfwa kya Yehova kya buntu, tutalei byotubwanya kulonga shi tubamone amba bakwetu kebetufwijije’kopo pa byotwibalongēle. Bino bivulujo bisa kwitukwasha tulame nsangaji itamba mu kupāna ne kwiivudija.

IULA BUNTU BWA YEHOVA

5. Le i bintu’ka bya ku ngitu bitupanga Yehova?

⁵ Le i miswelo’ka imoimo ilombolanga’mo Yehova buntu?  Tubandaulei’ko bimfwa bityetye. Yehova witupanga byotusakilwa ku ngitu. Padi ketwikalangapo nyeke na būmi bwa katūtu, inoko Yehova witukwashanga twikale na byobya byotusakilwa. Kimfwa witukwashanga twikale na byakudya, bisandi, ne mwa kwikala. (Ñim. 4:8; Mat. 6:​31-33; 1 Tm. 6:​6-8) Le Yehova witupanga byotusakilwa ku ngitu mwanda’po’tu umonanga bu i bintu byafwaninwe kulonga? Aa! Penepo, mwanda waka witupanga’byo?

6. Le i bika byotwifunda mu Mateo 6:​25, 26?

⁶ Yehova uvuijanga bisakibwa byetu bya ku ngitu mwanda witusenswe. Tubandaulei’ko binenwa bya Yesu bidi mu Mateo 6:​25, 26. (Tanga.) Yesu wāingidije bimfwa bya mu bupangi. Wānenene pangala pa toni amba: “Ketukusangapo nkunwa nansha kwangula ne kubīka mu bibīko kwine mpika.” Inoko tala byaābwejeje’ko, amba: “Shenu wa mūlu witudishanga.” Kupwa Yesu wābweja’ko amba: “Mwene banwe mudi na mvubu kwitupita?” Le i bika byaādi usaka kwitufundija? Bufundiji i bwa amba, Yehova umonanga batōtyi bandi bu ba mvubu bininge kutabuka toni nansha banyema. Shi Yehova uvuijanga bisakibwa bya toni nansha banyema, tubwanya kukulupila’mba ukavuija ne bisakibwa byetu! Pamo’nka na mulongelanga tata wa buswe, Yehova nandi uvuijanga bisakibwa bya kyandi kisaka na buswe.—Ñim. 145:16; Mat. 6:32.

7. Le i muswelo’ka umo bidi otubwanya kwiula buntu bwa Yehova? (Tala ne kifwatulo.)

⁷ Pamo bwa Yehova, netu tubwanya kupa bakwetu byobasakilwa mwanda twibasenswe. Kimfwa, le uyukile’ko tutu nansha kaka usakilwa bidibwa nansha bivwalwa? Yehova ubwanya kukwingidija mwanda wa kumukwasha. Kadi bantu ba Yehova bakwashanga bakwabo bukidibukidi kitatyi kilongeka bimpengele bya kipangila. Kimfwa, mu kitatyi kya kipupo kya Corona, batutu ne bakaka bapēne byakudya, bivwalwa, ne bintu bikwabo ku boba badi basakilwa bukwashi. Kadi bavule batūdile byabuntu mwanda wa kukwatakanya mwingilo wa ntanda yonso. Kino kyakweshe banabetu ba ntanda yonso badi basakilwa bukwashi pa mwanda wa kimpengele. Balondele binenwa bidi mu Bahebelu 13:16 bya amba: “Kemwakilwai kulonga biyampe ne kwiabila na bakwabo byomudi nabyo, mwanda bitapwa bidi namino bisangajanga Leza.”

8. Le tumwenanga namani mu bukomo bwa Yehova? (Bene Fidipai 2:13)

⁸ Yehova upānanga bukomo. Yehova upānanga na nsangaji bukomo bwandi bwampikwa  mpwilo ku batōtyi bandi ba kikōkeji. (Tanga Bene Fidipai 2:13.) Le kodi mulombe Yehova akupe bukomo bwa kukomena ditompo nansha kūminina makambakano kampanda? Padi kadi kodi mulombe Yehova akupe bukomo bwa kwendelela kulonga bintu byonenwe kulonga difuku ne difuku. Yehova paalondolwele milombelo yobe, ye uno waitabije binenwa byālembele mutumibwa Polo bya amba: “Mu byonsololo ngidi na bukomo kupityila kudi yewa unkomeja.”—Fid. 4:13.

9. Le i muswelo’ka otubwanya kwiula Yehova na kwingidija bukomo bwetu na buntu? (Tala ne kifwatulo.)

⁹ Nansha byotudi ba kubulwa kubwaninina, tubwanya kwiula Yehova na kwingidija bukomo bwetu na buntu. Ketubwanyapo kupa bakwetu bukomo na mupāninanga’bo Yehova. Inoko tubwanya kwibwingidija mwanda wa kwibakwasha. Kimfwa, tubwanya kukwasha batutu ne bakaka babela nansha banunu, na kwibengidila mingilo ya ku njibo nansha kwibendela ku nsoko. Shi tudi na bukomo, tubwanya kukwasha’ko ku kukundula ne kulama Njibo ya Bulopwe. Shi twingidije bukomo bwetu mu uno muswelo, tubwanya kukwasha batutu ne bakaka.

10. Le i muswelo’ka otubwanya kukomeja bakwetu kupityila ku byotunena?

¹⁰ Kadi vuluka’mba binenwa bidi na bukomo. Le kudi muntu owavuluka ubwanya kukankamikwa shi ubamufwija’ko? Lelo kudi muntu oyukile usakilwa kusengibwa? Shi i amo, longa bukomo bwa kusapwila yao muntu amba umutele mutyima. Ubwanya kumunangila, kumwita ku telefone, kumutumina mukanda, nansha musapu. Kokazumbija mutyima bininge pa bya kunena. Binenwa’tu bityetye bitamba ku mutyima padi byo bisakilwa tutu nansha kaka pa kushadila’ko wa kikōkeji, nansha kwikala na mumweno muyampe pa ngikadilo yadi’mo.—Nki. 12:25; Ef. 4:29.

11. Le Yehova wingidijanga namani tunangu twandi?

¹¹ Yehova upānanga tunangu. Mwanā bwanga Yakoba wālembele amba: “Shi momudi’mo mudi umo ubudilwe tunangu, nankyo alombe’to nyeke kudi Leza, mwanda aye upanga bonso na mutyima tō pampikwa kuboya tuto.” (Yak. 1:5; kunshi kwa dyani.) Monka mulombwela’kyo bino binenwa, Yehova kelaminangapo aye mwine tunangu twandi. Upanga’to bantu bakwabo na buntu. Kadi Yakoba wānenene amba kitatyi kipāna Yehova tunangu, upānanga’to “pampikwa kutopeka,” nansha “pampikwa kuboya tuto.” Ketulengejangapo nansha dimo twiivwane bibi kitatyi kyotumulomba etuludike. Ino aye witukankamikanga tukimbe buludiki bwandi.—Nki. 2:​1-6.

12. Le i mikenga’ka yotudi nayo ya kupāna tunangu?

 ¹² Le batwe netu? Le tubwanya kwiula Yehova na kupāna tunangu twetu? (Ñim. 32:8) Batwe bantu ba Yehova tudi na mikenga mivule ya kupāna byotwifundile. Kimfwa, tufundijanga divule bapya mu busapudi. Bakulumpe bakwashanga na kitūkijetyima bengidi ba mingilo ne batutu babatyijibwe bayuke mwa kwingidila mingilo yabo mu kipwilo. Kadi boba badi na bwino mu lūbako ne mu kulama mobo, bakwashanga mu kufundija boba ba kubulwa bwino bayuke mwa kwingidila ku mobo a kiteokratike.

13. Le tubwanya kwiula namani muswelo upānanga Yehova tunangu na buntu kitatyi kyotufundija bakwetu?

¹³ Boba bapāna tunangu i biyampe beule muswelo upānanga’to Yehova. Vuluka’mba Yehova upānanga tunangu na buntu. Netu kupānanga na mutyima tō buyuki bwetu ne bwino ku boba botufundija. Ketulamanga’kopo buyuki bumo na kutyina’mba yewa otufundija ubwanya kwitupingakena. Ketwikalangapo na mumweno wa amba: ‘Ami kebamfundijepo! Nandi efunde aye mwine.’ Mwikadila wa uno muswelo keudipo na kifuko mu bantu ba Yehova. Ketupengapo na nsangaji boba botufundija enka buyuki bwetu kete, “ino i ne batwe bene.”(1 Ts. 2:8) Tukulupilanga’mba, “nabo bakabwanya senene kufundija bakwabo.” (2 Tm. 2:​1, 2) Shi batwe bonso tupāna na buntu tunangu twetu, batwe pamo ne bakwetu tukekala na tunangu ne na nsangaji.

SHI KEBETUFWIJIJE’KOPO

14. Le bavule baloñanga namani kitatyi kyotwibalombola buntu?

¹⁴ Shi tudi na buntu nakampata ku batutu ne bakaka, divule dine betufwijanga’ko. Babwanya kwitulembela mukanda wa kwitufwija’ko nansha kwitufwija mu muswelo mukwabo. (Kol. 3:15) Kufwijibwa’ko uno muswelo kwitubwejejanga’ko nsangaji.

15. Le i bika byotufwaninwe kuvuluka kitatyi kekitufwija’kopo bamo?

¹⁵ Inoko kyaba kimo, bantu bamo kebetufwijanga’kopo pa byotwibalongela. Tubwanya kupāna kitatyi kyetu, bukomo nansha bintu byetu, ino ketwiipangula shi otwalongele’byo’wa wibimwene na mvubu. Shi kino kibalongeka, le i bika byotubwanya kulonga mwanda wa kuleka kujimija nsangaji ne kwikala na bululu ku mutyima? Tuvulukei binenwa bidi mu Bilongwa 20:​35, kisonekwa kīmanine’po mutwe wa mwanda wa kino kishinte. Nsangaji yetu ya kupāna keilondakanangapo na muswelo witufwija’ko bantu. Tubwanya kukwata butyibi bwa kwendelela kupāna na nsangaji nansha shi bantu bakwabo kebetufwijije’kopo. Muswelo’ka? Tubandaulei’ko miswelo kampanda.

16. Le i bika byotufwaninwe kuta’ko mutyima kitatyi kyotupāna?

¹⁶ Tá mutyima ku kwiula Yehova. Aye upanga bantu bintu biyampe ekale bamufwije’ko nansha kebamufwijije’kopo. (Mat. 5:​43-48) Yehova i mulaye amba shi netu tupāne “pampikwa kukulupila kwalujibwa kintu, . . . mpalo [yetu] ikekala mikatampe.” (Luka 6:35) Mu kishima “kintu” mubwanya kubadilwa ne kufwijibwa’ko. Ekale betufwije’ko nansha kebetufwijije’kopo, Yehova uketulubwila nyeke bintu biyampe byotulonga mwanda wa kukwasha bakwetu ne pa mwanda wa kwikala bantu ‘bapāna na nsangaji.’—Nki. 19:17; 2 Ko. 9:7.

17. Le i muswelo’ka otubwanya kwikala nyeke na mumweno muyampe? (Luka 14:​12-14)

¹⁷ Kintu kikwabo kyotubwanya kulonga mwanda wa kwiula Yehova kitatyi kyotupāna, i kulonda byānenene Yesu mu Luka 14:​12-14. (Tanga.) Ke bibipo kulombola kizaji nansha buntu mu miswelo mikwabo ku boba babwanya kwitulongela netu uno muswelo. Ino  le i bika byotufwaninwe kulonga shi tubajingulula’mba divule tupanga bakwetu bintu na kukulupila’mba nabo babwanya kwitupa? Shi bidi uno muswelo, i biyampe kulonga bukomo bwa kulonda byānenene Yesu. Tubwanya kulombola kizaji ku yewa otuyukile amba kadipo na muswelo wa kwitulombola’kyo. Mu uno muswelo, tukekala na nsangaji mwanda tubaiula Yehova. Kadi uno mumweno uketukwasha tulame nsangaji yetu kitatyi kyokebetufwija’kopo.

18. Le i bika biketukwasha tuleke kulangila bakwetu bibi?

¹⁸ Kokitatana kukanina kwa mutyima kwa bakwenu. (1 Ko. 13:7) Shi bakwetu kebetufwijije’kopo tubwanya kwiipangula’mba: ‘Le bine kebadipo na mutyima wa kufwija’ko, nansha abailwa kwitufwija’ko?’ Padi kudi bubinga bukwabo bwalengeja baleke kwitufwija’ko na motwadi tulangila. Bamo babwanya kwikala na mutyima wa kufwija’ko inoko bakomenwa kulombola kufwija’ko kwabo. Babwanya kwivwana bumvu bwa kukwashibwa, nakampata shi mafuku kunyuma abo bo badi bakwasha bakwabo. Inoko shi tusenswe batutu ne bakaka bya binebine, ketukebalangilapo bibi kadi tukendelela kupāna na nsangaji.—Ef. 4:2.

19-20. Mwanda waka kitūkijetyima i kya kamweno kitatyi kyotukwasha bakwetu? (Tala ne kifwatulo.)

¹⁹ Ikala na kitūkijetyima. Mulopwe Solomone wālembele pa mwanda utala kwikala na buntu amba: “Ela mukate obe pa mema, mwanda mafuku mangi pa kupita’po ukeutana monka.” (Mus. 11:1) Monka mulombwela’kyo bino binenwa, bamo babwanya kufwija’ko pa buntu bwetu pa kupita kwa kitatyi kilampe nansha pa kupwa kwa “mafuku mangi.” Tubandaulei’ko kimfwa kibingija uno mwanda.

²⁰ Myaka mivule kunyuma, mukaji umo wa mutadi wa kipindi walembele mukanda wa kukankamika kaka umo wadi ukitamba mu kubatyijibwa. Mu mukanda wandi walombwele’mo kamweno kadi mu kushala wa kikōkeji kudi Yehova. Kintu kya myaka mwānda pa kupita’po, kaka’wa wamulondolola na kumulembela mukanda’mba: “Nkimba kukusapwila’mba  wi munkwashe bininge mu bula bwa ino myaka yonso’i, nansha abe mwine byokwibiyukilepo.” Wendeleja’mba: “Waunembēle binenwa bya kanye, kadi enka ne pano mvulukanga kisonekwa kyowatelele’mo kyauntengele ku mutyima.” a Pa kupwa kushintulula makambakano aekondele nao, uno kaka unena’mba: “Kyaba kimo nasakile kuleka bintu byonso, enka ne kwingidila Yehova kwine. Inoko kisonekwa kyowanembēle kyauntengele ku mutyima ne kumpa bukomo bwa kwendelela kwingidila Yehova.” Kadi ubweja’ko amba: “Mu bula bwa ino myaka yonso mwānda, kekudipo kintu kikwabo kyankweshe bininge pamo bwa mukanda owantumīne ne kisonekwa kyowanembēle’mo.” Fwatakanya’po mwasangedile mukaja mutadi wa kipindi paatambwile uno mukanda “mafuku mangi pa kupita’po”! Netu tubwanya kufwijibwa’ko ke papite kitatyi kilampe na potwalongēle muntu kintu kiyampe.

21. Mwanda waka ubasumininwa kwiula nyeke buntu bwa Yehova?

²¹ Monka motwekimwena, Yehova wētupangile na bukomo bwa pa bula. Nansha byotusangelanga kupebwa, tutananga nsangaji mivule mu kupāna. Twivwananga biyampe kitatyi kyotukwasha batutu ne bakaka. Kadi tusangalanga bininge kitatyi kyobetufwija’ko. Inoko betufwije’ko nansha kebetufwijije’kopo, tubwanya kwikala na nsangaji ya kuyuka’mba tubalonga kintu kiyampe. Vuluka nyeke amba nansha upāne bika, ‘Yehova ubwanya kukupa bivule kupita ne byabyo bine.’ (2 Bi. 25:9) Nanshi ketubwanyapo kupāna bivule kutabuka byobya bitupa Yehova! Kadi kekudipo nsangaji mikatampe itabukile ya kulubwilwa na Yehova. Nanshi tusumininwei kwiula nyeke Tata wetu wa mūlu wa buntu.