1-2. Le i bika bilengejanga bengidi ba Yehova bekale ba nsangaji? (Yakoba 1:​22-25)

 YEHOVA ne wandi Mwana muswedibwe basakanga twikale na nsangaji. Mulembi wa Ñimbo ya Mitōto 119:2 unena’mba: “Ba nsangaji i boba balamine bivulujo byandi, bamukimba na mutyima wabo onso.” Yesu nandi wānenene amba: “Ba nsangaji i boba bevwana mwanda wa Leza ne kwiulama!”—Luka 11:28.

² Batwe bengidi ba Yehova twi bantu ba nsangaji. Mwanda waka? Tudi na bubinga buvule bwa kwikadila na nsangaji, inoko bubinga bukatampe i amba tutañanga kitatyi ne kitatyi Kinenwa kya Leza kadi tuloñanga bukomo bwa kwingidija byotwifunda’mo.—Tanga Yakoba 1:​22-25.

3. Le tumwenanga namani mu kwingidija byotutanga mu Kinenwa kya Leza?

³ Kwikala “ba kulonga kinenwa” kwitulengejanga tumwene’mo mu miswelo mivule. Kimfwa, kitatyi kyotwingidija myanda yotutanga mu Kinenwa kya Leza, tumusangajanga, kadi kulonga namino kwituletelanga nsangaji. (Mus. 12:13) Kadi tulumbululanga kipwano kyetu na ba mu kisaka ne na banabetu mu lwitabijo. Padi nobe wi mwimwene kino mu bobe būmi. Ne kadi, twepukanga makambakano mavule atananga boba kebakōkelapo bijila bya Yehova. Na bubine, twitabije byānenene Mulopwe Davida. Pa kupwa kutela mu lwimbo bijila, misoñanya, ne butyibi bwa Yehova, wāfudije amba: “Mu kulama’bo, mudi mpalo mikatampe.”—Ñim. 19:​7-11.

4. Mwanda waka kebipēlangapo nyeke kwikala ba kulonga Kinenwa kya Leza?

⁴ Na bubine, kebitupēlelangapo nyeke kwikala ba kulonga Kinenwa kya Leza. Nansha byotuvudilwe bya kulonga mu  būmi, tufwaninwe kwitūdila’ko kitatyi kya kutanga ne kwifunda Bible pa kwivwanija byobya bitusakila Yehova kulonga. Nanshi tubandaulei’ko manwa amoamo abwanya kwitukwasha tutange Bible kitatyi ne kitatyi. Kadi tusa kubandaula bibwanya kwitukwasha tulangulukile pa byotutanga ne kumona muswelo otubwanya kwibingidija mu bwetu būmi.

WITŪDILE’KO KITATYI KYA KUTANGA KINENWA KYA LEZA

5. Le i biselwa’ka bitudilanga kitatyi kivule?

⁵ Batwe bantu ba Yehova twi bavudilwe bya kulonga. Tupityijanga kitatyi kivule mu kuvuija biselwa palapala bitulombola Bisonekwa bu bya mvubu mpata. Kimfwa, bavule motudi bengilanga twaji mwanda wa kuvuija bisakibwa byabo ne bya byabo bisaka. (1 Tm. 5:8) Bakwabo balelanga babutule babo babela nansha banunu. Kadi batwe bonso tunenwe kukwatakanya bukomo bwetu bwa ngitu, bine biselanga kitatyi. Kutentekela pa bino biselwa, tudi kadi ne na bintu bikwabo bya kulonga mu kipwilo. Kiselwa kikatampe kyotudi nakyo i kya kusapula myanda miyampe na bupyasakane. Na bino biselwa byonso byodi nabyo, le i muswelo’ka obwanya kusokola kyaba kya kutanga Bible kitatyi ne kitatyi, kulangulukila pa byotanga ne kwibingidija?

6. Le i muswelo’ka obwanya kutūla kutanga Bible pa kifuko kibajinji? (Tala ne kifwatulo.)

⁶ Kutanga Bible kubadilwa mu “bintu bya mvubu mikatampe” ku batwe bene Kidishitu. O mwanda tufwaninwe kwikutūla pa kifuko kibajinji. (Fid. 1:10) Lwimbo lwa mitōto lubajinji lunena pangala pa muntu wa nsangaji amba: “Aye uloelelwe bijila bya Yehova, kadi utañanga bijila bya Leza na diwi ditūke dyuba ne bufuku.” (Ñim. 1:​1, 2) Na bubine, kino kishintulula’mba tufwaninwe kwitūdila’ko kitatyi kya kutanga Bible. Le i kitatyi’ka kiyampe kya kumutanga? Kilondololwa kya kino kipangujo kibwanya kwishila mungya muntu ne muntu. Ino kya mvubu i amba, tufwaninwe kutonga kitatyi kiketukwasha tumutange kyaba ne kyaba. Tutu Victor unena’mba: “Nsangelanga kutanga Bible lubanga. Nansha byonkolelwanga  kubūka lubanga, inoko kino kyo kitatyi kikalanga’ko bilabi bityetye. Ñeni yami ikalanga pamo, kadi mpēlelwanga kuta mutyima ku byontanga.” Le ye mobikadile ne kodi? Wiipangule amba, ‘Le i kitatyi’ka kiyampe kondi kya kutanga Bible?’

LANGULUKILA PA BYOTANGA

7-8. Le i bika bibwanya kwitulengeja tukomenwe kumwena ne pa mfulo mu byotutanga? Leta kimfwa.

⁷ Inoko bubine i amba, tubwanya kutanga kitatyi kyonso bintu bivule pampikwa kulangulukila’po. Lelo kashā ke bikufikile watanga myanda kampanda ino kitatyi kityetye pa kupita’po watunya kuvuluka byowatanga? Kino ke kitufikile batwe bonso. Kya bulanda, kino kibwanya kwitufikila ne kitatyi kyotutanga Bible. Padi twetungīle kitungo kya kutanga mashapita kampanda difuku ne difuku. Kino i kitungo kiyampe. Tufwaninwe kwitungila bitungo ne kulonga bukomo bwa kufikila’po. (1 Ko. 9:26) Inoko shi tusaka kumwena ne pa mfulo mu byotutanga mu Bible, ketufwaninwepo kwimanina’nka pa kutanga kete.

⁸ Tulete kimfwa: Divule mema a mvula ekalanga a kamweno ku bikunanwa. Inoko shi mvula wanoke muvule mu kitatyi kityetye, nshi ibwanya kwandabilwa na mema. Shi kino kibalongeka, mema mavule a mvula keakekalapo a kamweno. Nshi isakilwa kitatyi kya kukoka mema ne kulengeja bikunanwa bitame. Ne batwe netu, ketufwaninwepo kutanga Bible na kwiyumbila, ko kunena’mba bya bukidibukidi ketukomenwa ne kulangulukila pa byotutanga, kwibivuluka, ne kwibingidija.—Yak. 1:24.

9. Le i bika byotufwaninwe kulonga shi ketudi na kibidiji kya kutanga Bible bya bukidibukidi?

⁹ Le ubamone amba kitatyi kimo utañanga Bible bya bukidibukidi? Le i bika byofwaninwe kulonga? Tanga bityebitye. Longa bukomo bwa kulangulukila pa byotanga nansha pa byowatangile. Kulonga namino ke kukomopo. Ubwanya padi kukwata butyibi bwa kulepeja’ko kitatyi kya kwifunda mwanda wa kumona kitatyi kya kulangulukila’po. Nansha kadi ubwanya kutonga kutanga mavese matyetye ne kwingidija kitatyi kishala’ko mwanda wa  kulangulukila pa byowatanga. Victor otwesambilanga’po unena’mba, “Ntañanga myanda mityetye mu Bible padi shapita’tu umo. Byontañanga lubanga bininge, mbwanyanga kulangulukila pa byontangile mu bula bwa difuku dyonso.” Nansha shi wingidijanga manwa’ka, i kya mvubu utange mu muswelo ukulengeja umwene bininge mu byotanga.—Ñim. 119:97; tala kapango “ Bipangujo bya Kulangulukila’po.”

10. Leta kimfwa kilombola muswelo obwanya kwingidija byowifunda. (1 Bene Tesalonika 5:​17, 18)

¹⁰ Nansha shi utañanga Bible kitatyi’ka ne mu bula bwa bitatyi binga, longa bukomo bwa kukimba’ko miswelo ya kwingidija byotanga. Shi ubatange kipindi kampanda mu Kinenwa kya Leza, wiipangule amba, ‘Le i muswelo’ka ombwanya kwingidija ino myanda pano nansha mu mafuku āya kumeso?’ Fwatakanya’po ubatange 1 Bene Tesalonika 5:​17, 18. (Tanga.) Pa kupwa kutanga ano mavese abidi, ubwanya kwishinkija ne kulangulukila pa misunsa yolombelanga ne muswelo olombelanga. Kadi ubwanya kulangulukila pa bintu byobwanya kufwijija’ko. Padi ubwanya kukwata butyibi amba usa kufwija’ko Yehova pa bintu bisatu bipotoloke. Nansha shi upityije kitatyi kityetye mu kulangulukila pa ñeni yowifunda mu Bible, kino kikakukwasha wivwanije Kinenwa kya Leza ne kwingidija byowifunda’mo. Langa’po muswelo obwanya kumwena’mo shi ulonga’nka namino difuku ne difuku ne pa bipindi bikwabo bya mu Bible byotanga! Bine, ukekala muntu ulonga Kinenwa kya Leza. Ino le i bika byofwaninwe kulonga shi ubamone amba kudi bintu bivule byofwaninwe kwilumbulula’mo?

WITUNGILE BITUNGO NA BUJALALE

11. Mwanda waka kitatyi kimo ubwanya kwimona bu mulēmenenwe? Leta kimfwa.

¹¹ Shi utanga Bible ne kukimba miswelo ya kwingidija bulombodi budi’mo, kyaba kimo ubwanya kwimona bu mulēmenenwe. Fwatakanya’po uno mwanda: Dyalelo mu butangi bobe bwa Bible ubatana’mo madingi akankaja ntondo. (Yak. 2:​1-8) Ubamone amba unenwe kwilumbulula mu muswelo oikele na bantu bakwabo, ebiya ubakwata butyibi bwa kushinta. I kintu kiyampe! Kupwa kesha ubatange kisonekwa kilombola mvubu ya kutadija na byonena. (Yak. 3:​1-12) Ubajingulula’mba kyaba kimo kunenangapo binenwa biyampe. Ebiya ubasumininwa’mba ukanza kunena binenwa biyampe kadi byūbaka. Mu butangi bobe bwa Bible bwa difuku dilonda’ko ubatana’mo kidyumu kya kuleka kupwana na ino ntanda. (Yak. 4:​4-12) Ubamone amba unenwe kutonga biyampe bintu byowipwija nabyo mukose. Kufika mu difuku dya buná, ubwanya kwimona bu mulēmenenwe na bino bintu byonso byofwaninwe kwilumbulula’mo.

12. Mwanda waka kufwaninwepo kutyumukwa mutyima shi mu butangi bobe bwa Bible ubamone amba kudi mu bintu mofwaninwe kwilumbulula? (Tala ne kunshi kwa dyani.)

 ¹² Shi ubamone amba kudi mu bintu bivule mofwaninwe kushinta nansha kwilumbulula, kokatyumukwa mutyima. Kino kilombola’mba wi mwityepeje kadi udi na kukanina kuyampe kwa mutyima. Muntu mwityepeje kadi wampikwa budimbidimbi na aye mwine, utañanga Bisonekwa na kitungo kya kumona popa pāfwaninwe kwilumbulula. a Kadi vuluka’mba kuvwala “bumuntu bupya” i mwingilo wa endaenda. (Kol. 3:10) Le i bika bikakukwasha wikale nyeke wa kulonga Kinenwa kya Leza?

13. Le i muswelo’ka obwanya kwitungila bitungo kampanda na bujalale? (Tala ne kifwatulo.)

¹³ Pa kyaba kya kukimba kwingidija mu kitatyi kimo bintu byonso byotanga, witūdile’ko bitungo kampanda na bujalale. (Nki. 11:2) Tompa kulonga namino: Lemba mulongo wa bintu byonenwe kwilumbulula’mo, kupwa tonga’mo kimo nansha bibidi bya kwingidila’po dibajinji, ebiya bishele kokalonga bukomo bwa kwilumbulula’mo kitatyi kikwabo. Le i bika byokashilula nabyo?

14. Le i bitungo’ka byobwanya kushilula nabyo?

¹⁴ Ubwanya kukwata butyibi bwa kushilula na kitungo kyopēlelwa kufikila’po. Nansha kadi ubwanya kutonga kulonga bukomo bwa kwilumbulula mu mwanda omona bu wa mvubu mpata kutabuka mikwabo. Shi ubajingulula kitungo kyobe, longela’po bukimbi mu mabuku etu, padi na kwingidija Index nansha Dibuku dya Bukimbi dya Batumoni ba Yehova. Lombela pangala pa kitungo kyobe na kulomba Yehova akupe ‘mutyima ne bukomo bwa kulonga’po kintu.’ (Fid. 2:13) Kupwa longa  bukomo bwa kwingidija byowifunda. Shi ubelumbulula mu mwanda mubajinji owitungīle, ubwanya kusakila’ko kulonga bukomo bwa kwilumbulula ne mu mwanda mukwabo. Na bubine shi ubelumbulula mu mwanda kampanda nansha mu ngikadila ya bwine Kidishitu kamukaya, bibwanya kukupēlela kulonga namino ne mu myanda mikwabo.

LEKA KINENWA KYA LEZA ‘KINGILE MODI’

15. Le bantu ba Yehova i beshile namani na bantu bavule batanga Bible? (1 Bene Tesalonika 2:13)

¹⁵ Bantu bamo ke batange Bible misunsa mivule. Ino le na bubine bamukulupile? Le bengidijanga byobefunda mu Bible nansha kwibileka bishinte būmi bwabo? Kya bulanda, divule dine kebidipo uno muswelo. Kuno i kwishila kukatampe na bantu ba Yehova! Pamo’nka bwa bene Kidishitu ba mu myaka katwa kabajinji, twitabijanga Bible monka mwaikadile “binebine, bu kinenwa kya Leza.” Ne kadi tuloñanga bukomo bwa kwingidija madingi andi mu būmi bwetu.—Tanga 1 Bene Tesalonika 2:13.

16. Le i bika biketukwasha twikale ba kulonga Kinenwa?

¹⁶ Kebipēlangapo nyeke kutanga Kinenwa kya Leza ne kwingidija myanda yotutanga’mo. Tubwanya kukolelwa kusokola kitatyi kya kwikitanga. Kadi tubwanya kwikitanga bya bukidibukidi ne kuleka kulangulukila pa byotutanga. Nansha kadi tubwanya kwimona bwa balēmenenwe na myanda mivule yotunenwe kwilumbulula’mo. Ekale wikondanga na kikoleja’ka, yuka’mba ubwanya kwikikomena na bukwashi bwa Yehova. Nanshi tusumininwei kwitabija bukwashi bwandi ne kuleka kwikala bantu bateja’tu kupwa bailwa’ko, ino twikalei ba kulonga Kinenwa. Na bubine shi tutanga Kinenwa kya Leza ne kwingidija byotutanga’mo, po pene tukekala ba nsangaji.—Yak. 1:25.