Ketudipo na bubinga bwa kulangila’mba bana ba bwanga 70 byokebātenwepo pāshilwile Yesu Bidibwa bya Kyolwa bya Mfumwetu, kebāitabijibwepo nansha amba bāmushile. Yesu wāsakile’tu kwikala na batumibwa bandi pa uno mukenga.

Wādi witabije ba 12 ne ba 70. Yesu wātongele dibajinji mu bandi bana ba bwanga bavule bana-balume 12, bene bawāityile bu batumibwa. (Luka 6:​12-16) Wādi mu Ngadilea ‘pawāityile Ba Dikumi ne Babidi’ ne kwibatuma “kukasapula Bulopwe bwa Leza ne kukomeja bantu.” (Luka 9:​1-6) Mwenda mafuku mu Yudea, “watongele bakwabo 70, webatuma babidi babidi.” (Luka 9:51; 10:1) Nanshi, Yesu wādi na balondi mu bifuko bishileshile mwādi musapulwa musapu wandi.

Bayuda bāikele ke bana ba bwanga ba Yesu, bāendelele kusoba Pashika mwaka ne mwaka, mobimwekela pamo na byabo bisaka. (Div. 12:​6-11, 17-20) Ebiya pāfwenene lufu lwandi, Yesu wāendele pamo na batumibwa bandi ku Yelusalema. Inoko, kānenenepo bandi bana ba bwanga bonso ba mu Yudea, mu Ngadilea, ne mu Pelea bāye basobe masobo a Pashika. Na bubine, Yesu wāsakile kwikala na batumibwa bandi pa uno mukenga. Wēbalombwele amba: “Nadi nsaka ne mutyima onso kudya nenu ino Pashika ponkyasusukile’pa.”—Luka 22:15.

Kwādi bubinga buyampe bwaālongēle namino. Yesu wādi kasa kufwa bu “Kana ka Mukōko ka Leza katalula bubi bwa ino ntanda.” (Yoa. 1:29) Kino kyādi kya kulongekela mu Yelusalema mwine mwādi mulambwilwa Leza bitapwa tamba kala. Lufu lwa Yesu lwādi lwa kuleta lupandilo lukatampe kutabuka lolwa lwāletelwe kupityila ku kana ka mukōko kādīle bisaka bya bene Isalela bufuku bwa Divilu dya mu Edipito. (1 Ko. 5:​7, 8) Byālongele Yesu byādi bya kulengeja ‘ba 12 babadilwe mu kyalwilo’ kya kipwilo kya bene Kidishitu. (Ef. 2:​20-22) Kintu kisangaja i amba, Yelusalema kibundi kijila kidi “na mabwe a kyalwilo 12” palembelwe “majina 12 a batumibwa 12 ba Kana ka Mukōko.” (Kus. 21:​10-14) Bine, batumibwa ba kikōkeji bādi ba kwikala na mwingilo mukatampe mu kufikidija mpango ya Leza. Nanshi tubwanya kwivwanija mwanda waka Yesu wāsakile kwikala pamo nabo pa ino Pashika ya mfulo ne ku byobya byālondele’po—ke Bidibwa bya Kyolwa bya Mfumwetu kadi.

Ba 70 ne bana ba bwanga bakwabo, kebātenwepo ku bino bidibwa na Yesu. Inoko, bana ba bwanga bonso ba kikōkeji bādi ba kumwena mu byobya byāshilwile Yesu—ko kunena’mba Bidibwa bya Kyolwa bya Mfumwetu. Bonso bāikele bene Kidishitu bashingwe māni mwenda mafuku, bātwelele mu kipwano kya bulopwe kyālombwele Yesu batumibwa mu bwine bufuku’bwa.—Luka 22:​29, 30