1. Le i bubinga’ka bwa pa bula botufwaninwe kusangela?

TUSANGALANGA pa kwivwana’mba bengidi ba Leza balekanga kitōkeji kyabo kimunike! Mu mwaka upityile’u, bengidi ba Yehova baendeje bifundwa bya Bible 10 000 000 ne musubu. Kadi bantu midiyo ne midiyo basangedile musapu baile kutanwa ku Kivulukilo ne kwifunda myanda itala kyabuntu kya kinkūlwa kitupele Yehova na buswe.​—1 Yoano 4:9.

2, 3. (a) Lelo i bika kebibwanyapo kwitukankaja tumunike “bwa bimuni”? (b) Le i bika byotusa kwisambila’po mu kino kishinte?

² Kujokoloka ntanda yonso, Batumoni ba Yehova besambanga ndimi mivule. Inoko kino kekitukankajangapo kutendela Yehova bu kisaka kidi mu bumo. (Kusokwelwa 7:9) Nansha shi twisambanga ludimi’ka, nansha shi tushikete kwepi, tubwanya kumunika “bwa bimuni mu ino ntanda.”​—Fidipai 2:15.

³ Mwingilo wetu, bumo bwetu bwa bwine Kidishitu, ne mutyima wetu wa kampeja-bukidi, bino byonso bitumbijanga Yehova. Le i muswelo’ka otubwanya kuleka kitōkeji kyetu kimunike mu ino myanda isatu?​—Tanga Mateo 5:14-16.

4, 5. (a) Kutentekela pa mwingilo wa busapudi, le i muswelo’ka mukwabo otubwanya kuleka kitōkeji kyetu kimunike? (b) Le i byabuyabuya’ka bilupuka mu kwikala na kanye? (Tala kifwatulo ku ngalwilo.)

⁴ Kusapula ne kulonga bana ba bwanga i muswelo wa mvubu wa kuleka kitōkeji kyetu kimunike. (Mateo 28:19, 20) Mu 1925, kishinte “Kitōkeji mu Fukutu” kyanenene amba mu mafuku a mfulo, i kutupu ubwanya kukōkela Mfumwetu shi kakwatakenyepo “mukenga wa kuleka kitōkeji kyandi kimunike.” Kibweja’ko amba: “Ufwaninwe kulonga kino na kusapwila bantu ba pano pa ntanda myanda miyampe, ne kwiendeja aye mwine mungya kitōkeji.” (Kiteba kya Mulami, 1 Kweji 6, 1925, Angele) Kutentekela pa mwingilo wetu wa busapudi, mwiendelejo wetu utumbijanga Yehova. Bantu bavule betumonanga potusapulanga. Shi twibamungijamungija ne kwibemuna na nsangaji, bikebakwasha bekale na mumweno muyampe potudi ne padi Leza otutōta.

⁵ Yesu wālombwele bandi bana ba bwanga’mba: “Kitatyi kyomutwela mu njibo, imunai ba mu njibo.” (Mateo 10:12) Mu bifuko mwādi musapula Yesu, bantu bādi na kibidiji kya kutundaila beni ku abo mobo. Dyalelo kebidipo uno muswelo mu bifuko bivule. Divule bantu bazumbijanga mutyima ne kuloba shi abamone mweni pa kibelo. Inoko shi twisamba nabo bya bulunda ne na kanye, babwanya kutūkijibwa mutyima bininge. Shi usapulanga mu bantu bavule na kaditempa, le kwajingulwile amba shi umungija bantu ne kwibemuna bya bulunda, beivwananga biyampe ne kwiya kusela mabuku? Padi basakanga’nka ne kushilula mīsambo!

6. Lelo i bika bikweshe ba mulume ne mukaji banunu basapule kitatyi ne kitatyi?

⁶ Ba mulume ne mukaji bamo banunu ba mu Angeletele kebakibwanyangapo kusapula ku njibo ne njibo na mobadi basapwila pa mwanda wa misongo. O mwanda batūlanga meza a mabuku ku dishinda panja pa lwabo lubanza. Byobashikatanga kubwipi na masomo, o mwanda batūlanga mabuku abwanya kusangaja bambutwile bāya kusela babo bana. Bambutwile bamo baselele ano mabuku, kubadila’mo ne Les jeunes s’interrogent — Réponses pratiques, Volime 1 ne 2. Kaka umo pania usapulanga nabo divule. Bambutwile bamwene amba uno kaka udi biyampe na bantu ne amba bano ba mulume ne mukaji basakanga na bubine kukwasha bakwabo. Mbutwile umo washilwile’nka ne kwifunda Bible.

7. Le i muswelo’ka obwanya kukwasha balefije badi mu obe mwaba?

⁷ Mu ino myaka, bavule i banyeme mu matanda abo ne pano bakishikete mu matanda makwabo bu balefije. Le i bika byobwanya kulonga pa kukwasha balefije ba mu obe mwaba befunde myanda ya Yehova? Dibajinji, ubwanya kwifunda mwa kwibemwina mu lwabo ludimi. Kadi, na kwingidija mpangiko ya JW Language, ubwanya kwifunda misemwa mityetye ibwanya kwibalengeja bemane ne kwisamba nobe. Kupwa, ubwanya kwibatadija mavideo ne kwibalombola mabuku a mu lwabo ludimi adi pa jw.org.​—Kupituluka 10:19.

8, 9. (a) Le kupwila kwetu kwa mu bukata bwa yenga kwitukwashanga namani? (b) Le bambutwile babwanya kukwasha namani babo bana balumbulule malondololo abo ku kupwila?

⁸ Yehova witupanga enka bintu byotusakilwa pa kusaka’mba tusapule biyampe. Kimfwa, byobya byotwifunda ku  Kupwila kwa Būmi ne Mwingilo bitukwashanga twikale na kikulupiji pa kulonga kujokela’mo ne kushilula bifundwa bya Bible.

⁹ Shi bantu abaiya ku kupwila kwetu, bavudile kutulumuka pa malondololo aleta bana. Ubwanya kufundija bobe bana balondolole mu byabo bishima. Bantu bamo bakokelwe na bubine pobaivwene bana baleta malondololo apēla kadi mevwanikwe.​—1 Kodinda 14:25.

10. Le butōtyi bwa kisaka bubwanya kukwasha namani bisaka bikale bininge mu bumo?

¹⁰ Shi tulonga bukomo bwa kufundija kisaka kyetu kingidile pamo mu bumo ne mu ndoe, nabya tutumbijanga Yehova. Kimfwa, shi wi mbutwile, tūla’ko mpangiko ya Butōtyi bwa Kisaka bwa kitatyi ne kitatyi. Bisaka bivule bilondelanga pamo mpangiko ya ku Televijo ya JW, kupwa besambila pa muswelo obabwanya kwingidija byobefunda’mo. Vuluka’mba buludiki busakilwa mwana mutyetye i bwishile na bwa mwana ke mutame’ko. Longa bukomo bwa kukwasha muntu ense wa mu kyobe kisaka amwene bya binebine mu butōtyi bwa kisaka.​—Ñimbo ya Mitōto 148:12, 13.

11-13. Le i muswelo’ka otubwanya kukwasha kipwilo kikale bininge mu bumo?

¹¹ Nansha shi wi nkasampe, ubwanya kulengeja muntu ense mu kipwilo emone bu udi na mvubu. Muswelo umo bidi i wa kupwana na batutu ne bakaka banunu. Wibepangule i bika byebakweshe bendelele na kwingidila Yehova mu bula bwa myaka mivule. Babwanya kukufundija bufundiji bwa mvubu mpata. Kino kikebakankamika abo ne abe mwine kumo! Kadi batwe bonso, twikale bankasampe nansha banunu, tubwanya kulengeja bantu bāya ku Njibo ya Bulopwe bemone bu batambulwe biyampe. Ubwanya kwibemuna, kwibamungijamungija, kwibakwasha basokole pa kushikata, ne kwibayukanya ku banabetu bakwabo. Wibalengeje bemone bu badi kwabo.

¹² Popebwa mwingilo wa kwendeja kupwila kwa kwenda mu busapudi, ubwanya kukwasha banunu bendelele na kumunika kitōkeji kyabo patōkelela. Wibate mutyima na kwibapa mwaba muyampe. Teakanya’ko bankasampe ba kusapula nabo. Batutu ne bakaka banunu ne boba babela divule batyumukwanga mutyima mwanda kebakibwanyangapo kusapula bininge na mobadi basapwila.  Ino bakeivwana biyampe mpata pa kumona’mba wibatele mutyima kadi wivwanije ngikadilo yobadi’mo. Nansha shi ke banunupe namani, ke beje namani mu bubine, muswelo owibalongela bintu na kanye ubwanya kwibakankamika bendelele kusapula na bupyasakane.​—Levi 19:32.

¹³ Bene Isalela bādi basangela kutōtela Yehova pamo. Mulembi wa ñimbo ya mitōto wāsonekele amba: “Ē! talaipo bidi, mo kyanengelela ne kulumbuluka’kyo, bāna na bāna kwikala pamo mutyima umo onka, senene, shē!” (Tanga Ñimbo ya Mitōto 133:1, 2.) Wādingakenye buno bumo na māni a kwishinga, mene afufumijanga ngitu ne kununka biyampe. Muswelo umo onka, tubwanya kutūja batutu ne bakaka na kwikala nabo biyampe. Kino kikalengeja kipwilo kikale bininge mu bumo. Le wabulwa’po kwiyuka biyampe na banabetu mu kyenu kipwilo?​—2 Kodinda 6:11-13.

14. Le i muswelo’ka obwanya kuleka kitōkeji kyobe kimunike mu kifuko kyoshikete’mo?

¹⁴ Kitōkeji kyobe kikokeja kumunika nansha shi ushikatanga kwepi. Binenwa ne bilongwa byobe bya kanye bibwanya kulengeja balondakani nobe basake kwifunda myanda mivule itala padi Yehova. Wiipangule amba: ‘Le balondakani nami bamonanga namani? Le njibo yami i mikundulwe kadi mupange bintu senene? Le imwekanga biyampe ku balondakani nami? Lelo nkwashanga balondakani nami?’ Ipangula Batumoni bakwabo bakulombole muswelo waikele bilongwa byabo bya kanye ne bimfwa byabo biyampe na lupusa ku babutule, balondakani, bengidi nabo, nansha bakwabo ba ku masomo.​—Efisesa 5:9.

15. Mwanda waka tufwaninwe kukesha’nka kukesha?

¹⁵ Shi tusaka kulama kitōkeji kyetu kyendelele kumunika patōkelela, tufwaninwe bidi kujingulula kitatyi kyotudi’mo. Yesu wāsapwidile bana bandi ba bwanga misunsa mivule amba: “Keshai’nka kukesha.” (Mateo 24:42; 25:13; 26:41) Shi tulanga’mba “kyamalwa kikatampe” kikidi kulampe, nabya ketukatepo mutyima ku mikenga yonso ya kukwasha bantu bakwabo befunde myanda itala padi Yehova. (Mateo 24:21) Pa kyaba kya kumunika patōkelela, kitōkeji kyetu kikenda kibumbwila bityebitye kadi kibwanya’nka ne kubudidila.

16, 17. Le i bika byobwanya kulonga pa kulama mutyima obe wa kampeja-bukidi?

¹⁶ Pano po pene potusakilwa kukesha’nka kukesha kupita’ko mafuku kunyuma. Myanda mu ino ntanda yendanga ibipila’ko bininge. Inoko tuyukile amba mfulo ikafika enka pa kitatyi kitungile Yehova. (Mateo 24:42-44) Pano’ko bidi tufwaninwe kwikala na kitūkijetyima ne kuta mutyima ku būmi bwetu bwa kumeso. Tanga Bible difuku ne difuku, kadi kokileka kulombela kudi Yehova. (1 Petelo 4:7) Boila ñeni ku batutu ne bakaka ke bengidile Yehova mu bula bwa myaka mivule. Kimfwa, ubwanya kutanga nsekununi yabo ya mu būmi, pamo bwa kishinte “Kukwata ku Mukukumba wa Muyuda Umo mu Myaka Makumi Asamba-Abidi,” kidi mu Kiteba kya Mulami kya 15 Kweji 4, 2012, paje 18-21, Falanse.

¹⁷ Vudilwa bya kulonga mu mwingilo wa Yehova. Longela bantu bakwabo bintu biyampe, kadi pityija kitatyi na batutu ne bakaka. Shi ulonge uno muswelo ukekala na nsangaji, kadi ukamona’mba kitatyi kyendanga lubilo. (Efisesa 5:16) Bengidi ba Yehova i balonge bintu bivule mu myaka katwa ipityile’i. Kadi dyalelo, twi bavudilwe mpata bya kulonga. Mwingilo wa Yehova wendanga utanta mu muswelo kewamwekele kashā. Bine kitōkeji kyetu kimunikanga patōkelela!

18, 19. Le bakulumpe babwanya kwitukwasha namani twingidile Yehova na bupyasakane? Leta kimfwa.

 ¹⁸ Nansha byotubwanya kulonga bilubo bivule, Yehova i mwitupe mukenga wa kumwingidila. Pa kwitukwasha, i mwitupe “bantu bu byabuntu,” ke bakulumpe mu kipwilo kadi. (Tanga Efisesa 4:8, 11, 12.) O mwanda shi bakulumpe abaiya kukupempula, kwata na mvubu kitatyi kyomudi nabo mwanda wa kuboila ñeni ku tunangu ne madingi abo.

¹⁹ Kimfwa, ba mulume ne mukaji bamo ba mu Angeletele badi na makambakano mu busongi bwabo, kupwa bakalomba bukwashi ku bakulumpe babidi. Mukaji wadi umona’mba mulume kamutangidilepo mu mingilo ya Yehova. Mulume nandi wadi wimona’mba ke mufundiji muyampepo kadi waitabije amba kebadipo na mpangiko ya butōtyi bwa kisaka bwa kitatyi ne kitatyi. Bakulumpe bakweshe bano ba mulume ne mukaji balangulukile pa kimfwa kya Yesu. Bakankamikile mulume eule muswelo wādi utele Yesu mutyima ku bandi bana ba bwanga. Bakankamikile mukaji nandi atūkijije wandi mulume mutyima. Bapele bano ba mulume ne mukaji madingi amoamo a mwa kulongela butōtyi bwa kisaka na babo bana babidi. (Efisesa 5:21-29) Mulume weelele’ko bininge mwanda wa kwikala mutwe wa kisaka mulumbuluke. Bakulumpe bamukankamikile amba kakikōka, ino endelele na kukulupila mu mushipiditu wa Yehova. Buswe ne kanye byalombwele bano bakulumpe byakweshe bininge kino kisaka!

20. Le bikekala namani shi uleke kitōkeji kyobe kimunike?

²⁰ “Kebo ba katōkwe kabo, shabo! bonso bakaminwe Yehova, banañanga mu mashinda andi.” (Ñimbo ya Mitōto 128:1) Ukekala na nsangaji shi uleke kitōkeji kyobe kimunike. Nanshi fundija bakwabo myanda itala padi Leza, longa bukomo bwa kukwasha kisaka kyobe ne kipwilo bikale mu bumo, kadi kesha’nka kukesha. Bakwabo kamona kimfwa kyobe kiyampe kadi kikebalengeja batumbije Yehova, Tata wetu.​—Mateo 5:16.