Lelo utañanga manimelo a Kiteba kya Mulami a panopano? Eyo, tala bidi shi ubwanya kulondolola bino bipangujo:

Le i bintu’ka biná byotubwanya kulonga pa kulumbulula mwimbilo wetu?

Tubwanya kwimana tolokele ne kuzunzula kitabo kyetu kya ñimbo. Tufwaninwe kukoka luvula luvule. Shi tupūtule bininge kyakanwa ne kwimba tubandwile mutwe, nabya tukemba na diwi ditunduke.—w17.11, p. 5.

Lelo i bintu’ka bitutulumuja pa muswelo wātūdilwe bibundi bya kunyemena’mo bya Isalela ne mashinda ādi enda’ko?

Kwādi bibundi bisamba bya kunyemena’mo byabanibwe mu ntanda’ya, ne mashinda enda’ko ādi malongololwe senene. Muntu wādi ubwanya kufika bukidibukidi mu kibundi ne kukingwa.—w17.11, p. 14.

Mwanda waka kyabuntu kya Leza kya kinkūlwa kya Yesu kyo kyabuntu kipityile byonso?

Mwanda i kivuije bisakibwa byetu mwa kukekadila na būmi bwa nyeke, kadi i kitunyongolole ku bubi ne lufu. Leza pa kwivwanina lutundu lwa Adama lusa, wetupele Yesu potwadi tukidi babipya-mambo.—wp17.6, p. 6-7.

Lelo Ñimbo ya Mitōto 118:22 isambilanga namani pa lusangukilo lwa Yesu?

Yesu wāpelelwe bu Meshiasa ne kwipaibwa. Pa kusaka’mba ekale bu “mutwe wa difinko,” wādi ufwaninwe kusangulwa.—w17.12, p. 9-10.

Le musuku wādi wa kutwala kudi Meshiasa wādi wilonda mungya lupusa lwa bu mwana umbedi?

Kyaba kimo uno musuku wāpityile ne ku bana babedi, ino ke ponsopo. Davida mwanā Yese kādipo umbedi; ino na bubine Meshiasa wātambile ku musuku wa Davida.—w17.12, p. 14-15.

Le i misoñanya’ka imoimo ya kiñanga itanwa mu Bible?

Bijila byāsoñenye kutūla muntu wa misongo isambuka kufula. Bantu bādi bafwaninwe koya shi abatenga umbidi mufwe. Bijila byāsoñenye bantu bajīke tuvwi. Mwana mwana-mulume wādi ufwaninwe kutwejibwa kwisao shi wabwanya mafuku mwānda, mwanda miseke ya mashi ishilulanga kukoma pa kupwa kwa yenga.—wp18.1, p. 7.

Mwanda waka kwisanswa batwe bene mu ludingo kampanda ke kubipo ku bene Kidishitu?

Tufwaninwe kusanswa mukwetu motwisanshilwe batwe bene. (Mako 12:31) Balume bafwaninwe “kusanswa bakaji babo pamo bwa imbidi yabo abo bene.” (Efisesa 5:28) Inoko shi ketutadijepo, tubwanya kwisanswa batwe bene mu muswelo mubi.—w18.01, p. 23.

Le i matabula’ka amoamo otubwanya kutabula pa kutama ku mushipiditu?

Tufwaninwe kwifunda Kinenwa kya Leza, kulangulukila’po, ne kwingidija byotwifunda. Kadi tufwaninwe kuleka mushipiditu ujila uludike ñeni ne mutyima wetu ne kwitabija bukwashi bwa bantu bakwabo.—w18.02, p. 26.

Mwanda waka kubuka na ñenyenye ne bulumbu ke kibelopo kya kuyuka bya kumeso?

Kudi bubinga buvule, inoko bubinga bukatampe i mwanda Bible upeleja bino bilongwa byonso bibidi.—wp18.2, p. 4-5.

Le tufwaninwe kulonga namani shi tubaitabija lwito lwa kukadya bidibwa?

Shi tubaitabija lwito, tufwaninwe kulonga bukomo bwa kufikidija binenwa byetu. (Ñimbo ya Mitōto 15:4) Ketufwaninwepo kuleka kuketaba pampikwa bubinga bwendele’mo. Padi mufikilwa ke mutēke kala bidibwa.—w18.03, p. 18.

Le bana-balume batongwe babwanya kuboila ñeni’ka kudi Temote?

Temote wādi utele bantu mutyima bya binebine ne kutūla mwingilo wa busapudi pa kifuko kibajinji. Wādi wingila bikomo mwingilo ukola ne kwingidija byobādi bamufundija. Wādi nyeke wifunda pa kasuku ne kukulupila mushipiditu wa Yehova. Bakulumpe ne bantu bakwabo, bonso babwanya kwiula kimfwa kyandi.—w18.04, p. 13-14.