1-2. (a) Le i kitatyi’ka kyotuvulukanga muntu otusenswe ufwile? (b) Le i bika byāshilwile Yesu bufuku bukya ke lufu lwandi?

 NANSHA shi twafwidilwe bantu botusenswe pano ke padi kitatyi kilampe namani, tukibavulukanga. Nakampata twibavulukanga shi tubafika mu difuku dyobāfwile.

² Mwaka ne mwaka, twibuñanga pamo na bantu midiyo ne midiyo kujokoloka ntanda yonso, mwanda wa kuvuluka lufu lwa muntu otusenswe bininge​—ke Yesu Kidishitu kadi. (1 Pe. 1:8) Twibuñanga pamo mwanda wa kuvuluka muntu wāpēne būmi bwandi bu kinkūlwa, mwanda wa kwitukūla ku bubi ne ku lufu. (Mat. 20:28) Yesu wādi usaka balondi bandi bavuluke lufu lwandi. Mu bufuku bukya ke lufu lwandi, wāshilwile bidibwa bya kyolwa bya pa bula, kupwa wēbasoñanya’mba: “Longai nyeke namino ke pa kumvulukila.” *​—Luka 22:19.

3. Le i bika byotusa kwisambila’po mu kino kishinte?

³ I bantu batyetye kete batanwanga ku kino Kivulukilo kya lufu lwa Kidishitu badi na lukulupilo lwa kwenda mūlu. Ino bantu midiyo ne midiyo badi na lukulupilo lwa kukekala pano pa ntanda nabo batanwanga’ko. Mu kino kishinte, tusa kwisambila pa bubinga busakilanga bino bibumbo bibidi kutanwa ku Kivulukilo mwaka ne mwaka. Kadi tusa kwisambila pa byotumwenanga’mo shi tubatanwa’ko. Tushilulei na kulangukukila pa bubinga bumobumo butaninwanga’ko bashingwe māni.

4. Mwanda waka bashingwe māni badyanga ku mukate ne kutoma ku vinyu pa Kivulukilo?

⁴ Mwaka ne mwaka bashingwe māni batanwanga ku Kivulukilo,  badyanga ku mukate ne kutoma ku vinyu. Le i kika kinenenwa’mba i bafwaninwe kudya ku mukate ne kutoma ku vinyu? Dibajinji dya kulondolola, tutalei byālongekele mu bufuku bwa mfulo bwa būmi bwa Yesu pano pa ntanda. Pa kupwa kudya bidibwa bya Pashika, Yesu wāshilwile kinkumenkume kiyukene bu Bidibwa bya Kyolwa bya Mfumwetu. Wāpityije mukate ne vinyu ku batumibwa bandi ba kikōkeji 11, wēbanena badye ne kutoma. Yesu wēsambīle nabo pa bipwano bibidi, kipwano kipya ne kipwano kya Bulopwe. * (Luka 22:19, 20, 28-30) Bino bipwano byāpele bano batumibwa ne bantu bakwabo batyetye, mukenga wa kukekala bu balopwe ne babitobo momwa mūlu. (Kus. 5:10; 14:1) I enka bashingwe māni bashele’ko * badi mu bino bipwano bibidi, babwanya kudya ku mukate ne kutoma ku vinyu pa Kivulukilo.

5. Le i bika biyukile bashingwe māni pa lukulupilo lobebapele?

⁵ Bubinga bukwabo butaninwanga bashingwe māni ku kivulukilo i buno: Kutanwa’ko kwibapanga mukenga wa kulangulukila pa lukulupilo lwabo. Yehova i mwibape lukulupilo lwa kutendelwa, lwa kukekala na būmi bwa kubulwa kufwa ne kubulwa kubola momwa mūlu, lwa kukengila pamo na Yesu Kidishitu mutumbijibwe ne ba 144 000 bakwabo, ne lwa kukemona na Yehova Leza mpala na mpala! (1 Ko. 15:51-53; 1 Yo. 3:2) Bashingwe māni bayukile amba i bebape dyese dya kwenda mūlu. Inoko pa kwitabijibwa kwenda mūlu, bafwaninwe kwikala nyeke na kikōkeji kufika’nka ne ku lufu. (2 Tm. 4:7, 8) Bano bashingwe māni pobalangulukila pa lukulupilo lwabo lwa kwenda mūlu, basangalanga bininge. (Tet. 2:13) Le “mikōko mikwabo” nayo? (Yoa. 10:16) Le i bubinga’ka boitaninwanga ku Kivulukilo?

6. Mwanda waka mikōko mikwabo itanwanga ku Kivulukilo mwaka ne mwaka?

⁶ Patanwanga mikōko mikwabo ku Kivulukilo, keidingapo ne kutoma ku byelekejo, ino ibandilanga bitupu. Boba badi na lukulupilo lwa kukekala pano pa ntanda baityilwe kutanwa ku Kivulukilo musunsa mubajinji mu 1938. Kiteba kya Mulami kya Angele kya 1 Kweji 3, 1938 kyadi kinena’mba: “I byendele’mo kadi i bifwaninwe [mikōko mikwabo] itanwe ku kuno kupwila ne kubandila bilongeka. . . . Kino i kitatyi kya nsangaji ne kobadi.” Enka musangelanga bantu betyilwe ku butundaile pobabandila bilongeka, mikōko mikwabo nayo isangalanga poibandila bipita ku Kivulukilo.

7. Mwanda waka mikōko mikwabo ikalanga na buya bwa kwivwana mwisambo wa Kivulukilo?

⁷ Mikōko mikwabo nayo ilangulukilanga pa lukulupilo lwayo. Ikalanga na buya bwa kwivwana mwisambo wa Kivulukilo, mwanda wisambilanga pa bikalonga Kidishitu ne bantu 144 000, bakabikala nabo pa mwanda wa bantu ba kikōkeji mu Umbikalo wa Myaka Kanunu. Bano baludiki ba mūlu bakendejibwa na Mulopwe wabo Yesu Kidishitu mwanda wa kwalamuna ntanda ke Paladisa, ne kufikija bantu ba kikōkeji ku bubwaninine. Bine, bantu bakwabo midiyo ne midiyo batanwanga ku Kivulukilo basangalanga bininge pa kulangulukila pa muswelo  ukafikidila bupolofeto bwa Bible, kimfwa bobwa butanwa mu Isaya 35:5, 6; 65:21-23; ne Kusokwelwa 21:3, 4. Pobemona mu ñeni mu ntanda mipya abo ne bantu bobasenswe, bakomejanga lukulupilo lwabo lwa mu mafuku a kumeso, kadi basumininwanga kwingidila Yehova nyeke.​—Mat. 24:13; Ngt. 6:9.

8. Le i bubinga’ka bukwabo butaninwanga mikōko mikwabo ku Kivulukilo?

⁸ Tulangulukilei pa bubinga bukwabo butaninwanga mikōko mikwabo ku Kivulukilo. Isakanga kulombola’mba isenswe bashingwe māni kadi ibakwatakenye. Kinenwa kya Leza kyālaile amba, bashingwe māni ne boba badi na lukulupilo lwa kukekala pano pa ntanda bakengidila pamo. Namani? Twisambilei’ko bidi pa bimfwa bityetye.

9. Le bupolofeto budi mu Zekadia 8:23, bulombola bika pa mobamwenanga bashingwe māni kudi mikōko mikwabo?

⁹ Tanga Zekadia 8:23. Buno bupolofeto buyampe bulombola mumwenanga mikōko mikwabo batutu ne bakaka bashingwe māni. Bishima “Muyuda umo” ne “nenu” bifunkila pa kisumpi kimo kyonka kya bashingwe māni bashele’ko. (Loma 2:28, 29) “Bantu dikumi ba ndimi yonso ya mizo” belekeja mikōko mikwabo. ‘Bakwete bininge ku,’ ko kunena’mba balamete bashingwe māni, na kutōta nabo pamo butōtyi butōka. O mwanda, kyolwa kya Kivulukilo, mikōko mikwabo itanwanga’ko mwanda wa kulombola’mba ilamete bashingwe māni.

10. Le Yehova i mulonge bika pa kufikidija bupolofeto budi mu Ezekyele 37:15-19, 24, 25?

¹⁰ Tanga Ezekyele 37:15-19, 24, 25. Yehova pa kufikidija buno bupolofeto, i mukwashe bashingwe māni ne mikōko mikwabo bengidile pamo mu bumo. Buno bupolofeto butela bipindi bibidi bya mutyi. Boba badi na lukulupilo lwa kwenda mūlu badi pamo bwa kipindi “kya Yuda” (ku kisaka kwādi kutongwa balopwe ba Isalela), boba badi na lukulupilo lwa kukekala pano pa ntanda nabo pamo bwa kipindi “kya Efelaimi.” * Yehova wādi wa kwikadija bino bisumpi bibidi mu bumo mwanda wa bikale ke “kipindi kimo kya mutyi.” Ko kunena’mba bingila mu bumo koku biludikwa na Mulopwe umo, Kidishitu Yesu. Mwaka ne mwaka, bashingwe māni ne mikōko mikwabo kebatanwangapo ku Kivulukilo bu bisumpi bibidi bishile, ino i bu “luombe lumo,” ludi na “mukumbi . . . umo.”​—Yoa. 10:16.

11. Le i muswelo’ka umo bidi ulombolanga “mikōko” itelelwe mu Mateo 25:31-36, 40, amba ikwatakenye banababo na Kidishitu?

¹¹ Tanga Mateo 25:31-36, 40. “Mikōko” ya mu kino kyelekejo i bantu boloke ba mu kitatyi kya ku mfulo, badi na lukulupilo lwa kukekala pano pa ntanda, ko kunena’mba mikōko mikwabo. Bakwatakenye nyeke banababo na Kidishitu bashingwe māni bashele’ko, na kwibakwasha dibajinji bavuije mwingilo mukatampe obadi nao, wa kusapula ne kulonga bana ba bwanga ntanda yonso.​—Mat. 24:14; 28:19, 20.

12-13. Le mikōko mikwabo ilombolanga’mba ikwatakenye banababo na Kidishitu mu miswelo’ka mikwabo?

¹² Mwaka ne mwaka, mayenga kampanda kumeso kwa Kivulukilo, mikōko mikwabo ilombolanga’mba ikwatakenye banababo na Kidishitu na kulonga kampanye ka ntanda yonso ka kwita bantu basangela bāye batanwe ku Kivulukilo. (Tala kapango kanena’mba “ Le Witeakanyanga Kala Mwanda  wa Kivulukilo?”) Kadi batūlanga’ko mpangiko mwanda wa Kivulukilo kilongwe mu bipwilo bya ntanda yonso, nansha shi mu bipwilo bivule kemudipo ba kudya ne kutoma ku byelekejo. Mikōko mikwabo isangelanga kukwatakanya banababo na Kidishitu mu ino miswelo. Ino mikōko iyukile amba Yesu umonanga’mba byobya byobalongela banababo bashingwe māni i aye obalongela’byo.​—Mat. 25:37-40.

¹³ Le i bubinga’ka bukwabo botutaninwanga batwe bonso ku Kivulukilo nansha shi tudi na lukulupilo’ka?

14. Le ba Yehova ne Yesu balombwele namani amba betusenswe bininge?

¹⁴ Tufwijanga’ko pa buswe bwitulombwele ba Yehova ne Yesu. Yehova i mulombole amba witusenswe mu miswelo mivule, ino kudi umo utabukile yonso. Muswelo umo mukatampe ulombwele Leza amba witusenswe, i wa kutuma wandi Mwana mulēme etususukile ne kwitufwila. (Yoa. 3:16) Tuyukile amba Yesu nandi witusenswe bininge pa kwitabija kupāna būmi bwandi pa mwanda wetu. (Yoa. 15:13) I kutupu kintu kyotubwanya kufuta ba Yehova ne Yesu pa buno buswe bobetulombwele. Ino tubwanya kwibafwija’ko kupityila ku muswelo otwiendeja difuku ne difuku. (Kol. 3:15) Kadi tutanwanga ku Kivulukilo mwanda wa kuvuluka buswe bobetusenswe ne kulombola’mba twibasenswe.

15. Mwanda waka bashingwe māni ne mikōko mikwabo bamwene kinkūlwa na bulēme bininge?

¹⁵ Tumwene kyabuntu kya kinkūlwa na bulēme bininge. (Mat. 20:28) Bashingwe māni basenswe bininge kinkūlwa, mwanda i akyo kibapele lukulupilo lobadi nalo. Byobakulupile mu kitapwa kya Kidishitu, Yehova i mwibatele bu boloke ne kwibalamuna ke bandi bana. (Loma 5:1; 8:15-17, 23) Mikōko mikwabo nayo ifwijanga’ko pa kinkūlwa. Byobetabije mu kitapwa kya Kidishitu, badi na mwimanino utōka ku meso a Leza, babwanya kumwingidila mingilo ikola, kadi badi na lukulupilo lwa kukalupuka “mu kyamalwa kikatampe.” (Kus. 7:13-15) Muswelo umo ulombolanga bashingwe māni ne mikōko mikwabo kufwija’ko pa kinkūlwa, i wa kutanwa ku Kivulukilo mwaka ne mwaka.

16. Le i bubinga’ka bukwabo botutaninwanga ku Kivulukilo?

¹⁶ Bubinga bukwabo botutaninwanga ku Kivulukilo i mwanda tusakanga kukōkela Yesu. Nansha shi tudi na lukulupilo’ka lwa mu mafuku a kumeso, batwe bonso tusakanga kukōkela musoñanya wāletele Yesu mu bufuku bwaāshilwile Kivulukilo amba: “Longai nyeke namino ke pa kumvulukila.”​—1 Ko. 11:23, 24.

17. Le Kivulukilo kitukwashanga namani tufwene kudi Yehova?

¹⁷ Tufwenanga kudi Yehova. (Yak. 4:8) Monka motwefundila, Kivulukilo kitupanga mukenga wa kulangulukila pa lukulupilo lwitupele Yehova, ne pa buswe bukatampe bwaetulombwele. (Yel. 29:11; 1 Yo. 4:8-10) Shi tulangulukila pa lukulupilo lwetu lwa mu mafuku a kumeso, ne pa buswe bukatampe bwitusenswe Leza, netu tumusanswanga bininge ne kuningija kipwano kyotupwene nandi.​—Loma 8:38, 39.

18. Le kulangulukila pa kimfwa kya Yesu kwitulengejanga tulonge bika?

¹⁸ Tukimbanga kwiula kimfwa kya Yesu. (1 Pe. 2:21) Mafuku kampanda kumeso kwa  Kivulukilo, tutañanga myanda yālongekele mu yenga wa mfulo wa būmi bwa Yesu pano pa ntanda, ya lufu lwandi, ne ya kusangulwa kwandi. Ino kyolwa potulonga Kivulukilo, tulondanga mwisambo wituvuluja buswe bwitusenswe Yesu. (Ef. 5:2; 1 Yo. 3:16) Kutanga myanda itala kimfwa kya Yesu kya kwipāna ne kulangulukila’po, kwitulengejanga tunange “nyeke monka mwaanangile aye.”​—1 Yo. 2:6.

19. Le i muswelo’ka otubwanya kwikala nyeke mu buswe bwa Leza?

¹⁹ Tusumininwanga kwikala nyeke mu buswe bwa Leza. (Yude 20, 21) Twikalanga nyeke mu buswe bwa Leza shi tulonga bukomo bwa kumukōkela, kupandula dijina dyandi ne kusangaja mutyima wandi. (Nki. 27:11; Mat. 6:9; 1 Yo. 5:3) Kutanwa ku Kivulukilo kwitulengejanga tusumininwe bininge kwiendeja difuku ne difuku mu muswelo wa kulombola Yehova amba, ‘tusakanga kwikala nyeke mu buswe bwandi!’

20. Le tudi na bubinga’ka bwendele’mo bwa kutaninwa ku Kivulukilo?

²⁰ Ekale shi tudi na lukulupilo lwa kwenda mūlu nansha lwa kukekala nyeke pano pa ntanda, tudi na bubinga bwendele’mo bwa kutaninwa ku Kivulukilo. Potwibungilanga pamo mwaka ne mwaka mu dine difuku’dya, tuvulukanga lufu lwa muntu otusenswe, Yesu Kidishitu. Ne kadi, tuvulukanga kilongwa kikatampe kya buswe, ko kunena’mba buswe bwitulombwele Yehova na kwitupa wandi Mwana bu kinkūlwa. Uno mwaka, Kivulukilo kisa kulongwa Dya Butano, mafuku 15 Kweji 4, 2022. Tusenswe Yehova ne wandi Mwana, o mwanda mu difuku dya kuvuluka lufu lwa Yesu, i kutupu kintu kyotubwanya kumona na mvubu kutabuka kutanwa ku Kivulukilo.