1. Mwanda waka Yesu wālombele Yehova alame bandi bana ba bwanga?

MU BUFUKU bwandi bwa mfulo pano pa ntanda, Yesu wālangulukīle pa makambakano ādi a kutana bandi bana ba bwanga. Yesu byaādi usenswe balunda nandi, wālombele kudi Shandi amba, “wibalame mwanda wa yewa mubi.” (Yoa. 17:14, 15) Yesu wādi uyukile amba aye pa kujokela mūlu, Satana Dyabola ukendelela kutamba yewa ense usaka kwingidila Yehova bulwi. O mwanda bantu ba Yehova basakilwa kukingwa.

2. Le i bika bibwanya kwitukulupija’mba Yehova ukalondolola milombelo yetu?

² Yehova wālondolwele milombelo ya Yesu mwanda wādi usenswe Wandi Mwana. Shi netu twielele’ko kusangaja Yehova, uketusanswa kadi ukalondolola milombelo yotumulomba etukwashe ne kwitukinga. Yehova byadi mutwe wa kisaka utele kisaka mutyima, ukendelela kuvuija na buswe bisakibwa bya bandi bana. Ukalonga kino pa mwanda wa dijina dyandi nansha ntumbo yandi!

3. Mwanda waka tusakilwa kukingwa na Yehova dyalelo?

³ Pano, po pene potusakilwa kukingwa na Yehova. Satana byapangilwe mūlu, “udi na bulobo bukatampe.” (Kus. 12:12) Uloñanga bukomo bwa kukulupija bantu bamo betupangapanga’mba, bengidilanga “Leza mingilo ikola.” (Yoa. 16:2) Bantu bakwabo kebakulupilepo mudi Leza nabo, betupangapañanga mwanda twi beshile na ino ntanda. Nansha shi betupangepange pa bubinga’ka, ino batwe ketutyinangapo. Mwanda waka? Mwanda Kinenwa kya Leza kinena’mba: “Mfumwetu aye i wa binebine, kadi ukemukomeja ne kwimukinga kudi yewa mubi.” (2 Ts. 3:3) Le Yehova witukiñanga muswelo’ka? Twisambilei’ko bidi pa miswelo ibidi.

4. Mungya Bene Efisesa 6:13-17, le Yehova i mwitupe bika mwanda wa kwitukinga?

⁴ Yehova i mwitupe bivwalwa byabulwi, bya kwitukinga petutamba’dyo Satana. (Tanga Bene Efisesa 6:13-17.) Bino byabulwi bya ku mushipiditu i bikomo kadi bikwashanga! Ino biketukinga enka shi tubavwala kyabulwi ne kyabulwi​—ne kwikivūla mpika. Le kyabulwi ne kyabulwi kine kyelekeja bika? Twisambilei pa kimo ne kimo.

5. Le mukaba wa bubine i bika, na mwanda waka tufwaninwe kwiuvwala?

⁵ Mukaba wa bubine welekeja bubine budi mu Bible Kinenwa kya Leza. Mwanda waka tufwaninwe kuvwala uno mukaba? Mwanda Satana i “shandya bubela.” (Yoa. 8:44) Kemubepe mu myaka tununu ne tununu ne kongola “ntanda yonso ikelwe na bantu!” (Kus. 12:9) Ino bubine budi mu Bible bwitukiñanga tuleke kongolwa. Le tuvwalanga namani uno mukaba wa kyelekejo? Twiuvwalanga potwifunda bubine butala padi Yehova, potumutōta na “mushipiditu ne bubine,” ne potwiendeja pampikwa budimbidimbi mu bintu byonso.​—Yoa. 4:24; Ef. 4:25; Bah. 13:18.

6. Le kilama-kyadi kya boloke i bika ne mwanda waka tufwaninwe kwikivwala?

⁶ Kilama-kyadi kya boloke kyelekeja misoñanya myoloke ya Yehova. Mwanda waka tufwaninwe kuvwala kilama-kyadi? Kilama-kyadi enka mokikingilanga mutyima wa sola ku miketo, ne kilama-kyadi kya boloke nakyo kikiñanga mutyima wetu wa kyelekejo nansha muntu wetu wa munda ku bintu bya ino ntanda bibwanya kwiona. (Nki. 4:23) Yehova usakanga tumusanswe ne kumwingidila na mutyima wetu onso. (Mat. 22:36, 37) O mwanda Satana usakanga twingidile Leza na mityima ibidi, na kwitulengeja tusanswe bintu bya ino ntanda​—bintu bine bishikilwe Yehova. (Yak. 4:4; 1 Yo. 2:15, 16) Shi wakomenwa kulonga namino, uloñanga bukomo bwa kwitulengeja tutyumune misoñanya ya Yehova.

7. Le tuvwalanga namani kilama-kyadi kya boloke?

⁷ Tuvwalanga kilama-kyadi kya boloke na kukōkela misoñanya ya Yehova itala biyampe ne bibi ne na kwiilonda mu bwetu būmi. (Ñim. 97:10) Bantu bamo babwanya kulanga’mba misoñanya ya Yehova ibabudijanga bwanapabo. Ino shi tubaleka kwingidija misoñanya ya mu Bible mu būmi bwetu, bikekala pamo bwa sola wavūla kilama-kyadi mu divita na kulanga’mba kibalēma bininge. Bine buno i bulembakane! Ku boba basenswe Yehova, mbila yandi “keilēmangapo,” ino ipandijanga būmi.​—1 Yo. 5:3.

8. Le kuvwala ku maulu bilato bya mutyima wa kusapula myanda miyampe kushintulula bika?

⁸ Kadi Polo witusoñanya tuvwale ku maulu bilato bya mutyima wa kusapula myanda miyampe ya ndoe. Ko kunena’mba tufwaninwe kwikala nyeke beteakanye kusapula myanda miyampe ya Bulopwe. Potusapwila bakwetu musapu wa mu Bible, lwitabijo lwetu luniñanga. Bine, bikankamika’po kashā kumona bantu ba Yehova ba ntanda yonso bakimba mikenga ya kusapula myanda miyampe​—kitatyi kyobadi ku kaji, ku masomo, mu busunga, kitatyi kyobasapula ku njibo ne njibo, pobakapotele bintu, pobakapempwile babutule bampikwa kwitabija, pobesamba na bantu bobeyukile nabo, enka ne kitatyi kyokebatambepo ku mobo abo. Ino shi moyo ubetukwata tubaleka kusapula, bikekala pamo bwa sola wavūla bilato byandi mu divita; kakejepo kwitapa bilonda  ku maulu. Mu uno muswelo bikapēla kumukwata mu divita, kadi kakabwanyapo kulonda misoñanya ya komanda wandi.

9. Mwanda waka tufwaninwe kutekuna ngabo mikatampe ya lwitabijo?

⁹ Ngabo mikatampe ya lwitabijo yelekeja lwitabijo lotwitabije mudi Yehova. Tukulupile amba ukafikidija milao yandi yonso. Luno lwitabijo lwitukwashanga “tubule miketo yonso ya mudilo ya yewa mubi.” Mwanda waka tufwaninwe kutekuna ino ngabo mikatampe? Mwanda itukwashanga tuleke kusunkanibwa na mfudijo ya batupondo, nansha kuzakajibwa na bantu bafutulula nkulupilo yetu. Shi tubabulwe lwitabijo, ketukamonepo bukomo bwa kukomena boba basaka kwitunekenya tupumpunye misoñanya myoloke ya Yehova. Pakwabo kadi, tutekunanga ngabo yetu kitatyi kyonso kyotubingija nkulupilo yetu ku kaji nansha ku masomo. (1 Pe. 3:15) Kadi tutekunanga ngabo yetu kitatyi kyonso kyotupela kaji ka mfutwa miyampe, ino kabwanya kwitudīla kitatyi kya kutōta. (Bah. 13:5, 6) Ne kadi, tukiñwanga na ngabo yetu kitatyi kyonso kyotwingidila Yehova nansha shi betulwa.​—1 Ts. 2:2.

10. Le kilama-mutwe kya lupandilo i kika, ne mwanda waka tufwaninwe kwikivwala?

 ¹⁰ Kilama-mutwe kya lupandilo i lukulupilo lwitupele Yehova​—lukulupilo lwa amba uketunyongolola ku lufu, ne kupala mpalo boba bonso balonga kiswa-mutyima kyandi. (1 Ts. 5:8; 1 Tm. 4:10; Tet. 1:1, 2) Kilama-mutwe enka mokikingilanga mutwe wa sola, ne lukulupilo lwetu nalo lukiñanga bukomo bwetu bwa kulanga. Mu buluji’ka? Mu buluji bwa amba, lukulupilo lwitulengejanga tute mutyima ku milao ya Leza ne kwitukwasha tuleke kulēmenenwa na makambakano etu. Le tuvwalanga kino kilama-mutwe namani? Twikivwalanga na kumona nyeke bintu mu muswelo wibimona Leza. Kimfwa, tukulupilanga mudi Leza pa kyaba kya kukulupila mu bupeta bwa bitupu.​—Ñim. 26:2; 104:34; 1 Tm. 6:17.

11. Le kipete kya mushipiditu i bika ne mwanda waka tufwaninwe kwikingidija?

¹¹ Kipete kya mushipiditu i Bible Kinenwa kya Leza. Kino kipete kisokwelanga patōka bubela bwa miswelo yonso ne kunyongolola bantu ku bupika bwa bufundiji bwa bubela ne bibidiji bibi. (2 Ko. 10:4, 5; 2 Tm. 3:16, 17; Bah. 4:12) Twifundanga kwingidija kino kipete biyampe kupityila ku kifundwa kya pa kasuku ne ku bufundiji bobetufundija mu bulongolodi bwa Leza. (2 Tm. 2:15) Kutentekela pa bivwalwa byabulwi, Yehova i mwitupe kintu kikwabo kya bukomo mwanda wa kwitukinga. Le i kintu’ka?

12. Le i kintu’ka kikwabo kyotusakilwa, ne mwanda waka?

¹² Sola wa bwino uyukile amba kabwanyapo kunekenya kibumbo kya basola bunka bwandi, ino usakilwa bukwashi bwa basola bakwabo. Muswelo umo onka, netu ketubwanyapo kukomena Satana ne balondi bandi bunka bwetu, tusakilwa kukwashibwa na batutu ne bakaka. Yehova i mwitupe “kisaka kya banabetu” kya ntanda yonso ba kwitukwasha.​—1 Pe. 2:17.

13. Mungya Bahebelu 10:24, 25, le kutanwa ku kupwila kubwanya kwitukwasha namani?

¹³ Muswelo umo otukwashibwanga i kutanwa ku kupwila. (Tanga Bahebelu 10:24, 25.) Shi tubatyumukwa mutyima​—bine bitufikilanga batwe bonso kyaba kimokimo​—kupwila kubwanya kwitukankamika. Tukankamikwanga na malondololo aleta batutu ne bakaka na mutyima umo. Mīsambo ya mu Bible ne byakumwena’ko biloñwanga’ko, bitukankamikanga tusumininwe kwingidila Yehova. Kadi mīsambo miyampe yotwisambanga kumeso kwa kupwila ne pa kupwa kupwila itukankamikanga. (1 Ts. 5:14) Ne kadi, kupwila kwitupanga mukenga wa kwikala na nsangaji itambanga mu kukwasha bakwetu. (Bil. 20:35; Loma 1:11, 12) Kupwila kwetu kwitukwashanga ne mu miswelo mikwabo. Balumbululanga’ko bwino bwetu bwa mwa kulwila, na kwitukwasha twikale basapudi ne bafundiji bayampe. Kimfwa, betufundijanga’ko muswelo wa kwingidija biyampe bingidilwa bya mu Bingidilwa Byetu bya Kufundija Nabyo. O mwanda, teakanya biyampe kupwila. Kadi teja senene podi ku kupwila. Shi ubatambe ku kupwila, ingidija byobakufundija. Shi ulonge namino, ukekala “sola mulumbuluke wa Kidishitu Yesu.”​—2 Tm. 2:3.

14. Le i bāni bakwabo botudi nabo ba kwitukwasha?

¹⁴ Kadi bamwikeulu ba bukomo midiyala ne midiyala betukwashanga. Fwatakanya’po bidi bintu bibwanya kulonga mwikeulu’tu  umo! (Isa. 37:36) Kupwa langulukila pa bibwanya kulonga kibumbo kya bamwikeulu. I kutupu muntu nansha ndemona udi na bukomo bwa kulwa na kibumbo kya bulwi kya Yehova. Banenanga’mba Kamoni umo mukōkele kubweja’po ne Yehova, i pamo bwa kibumbo kya bulwi. (Bat. 6:16) Bine, uno mulangwe i wa bine! Vuluka nyeke ino milangwe shi ubatyumukwa mutyima pa mwanda wa bintu binena nansha bilonga omwingilanga nandi, mukwenu wa ku masomo nansha mubutule wampikwa kwitabija. Vuluka’mba kudipo bunka mu buno bulwi. Ulondanga bwendeji bwa Yehova.

15. Mungya Isaya 54:15, 17, mwanda waka bantu ba Leza kebakaleka’byopo kusapula?

¹⁵ Ino ntanda iludikwa na Satana idi na bubinga buvule bwa kwitushikilwa. Tupelanga pelē kwikuja mu myanda ya politike ne kulwa mavita. Tusapulanga dijina dya Leza, tusapulanga’mba Bulopwe bwandi kete bo bubwanya kuleta ndoe, kadi tulondanga misoñanya yandi myoloke. Tulombolanga patōka’mba mulopwe wa ino ntanda i ntapani kadi i mbepai. (Yoa. 8:44) Kadi tusapulanga’mba ntanda ya Satana isa konakanibwa panopano ponka. Kadi Satana ne bantu bamulonda kebakabwanyapo kwitukankaja kusapula. Inoko, tukendelela kutumbija Yehova mu miswelo yo-yonso! Nansha Satana byadi na bukomo, i mutunye kukankaja musapu wa Bulopwe uleke kusapwilwa bantu kujokoloka ntanda yonso. I mutunye kwiukankaja mwanda i Yehova witukingile.​—Tanga Isaya 54:15, 17.

16. Le Yehova ukapandija bantu bandi namani pa kyamalwa kikatampe?

¹⁶ Lelo i bika bitutengēle kumeso’ku? Pa kyamalwa kikatampe, Yehova uketupandija mu miswelo ibidi ya kutendelwa. Mubajinji, ukapandija bantu bandi ba lulamato kitatyi kyakalengeja balopwe ba ino ntanda bonakanye Babiloni Mukatampe, umbikalo wa mutōtelo wa bubela. (Kus. 17:16-18; 18:2, 4) Kupwa ukapandija bantu bandi kitatyi kyakonakanya bantu bakashala’ko ku ntanda ya Satana pa Amakedona.​—Kus. 7:9, 10; 16:14, 16.

17. Le kwikala nyeke pabwipi na Yehova kwitukwashanga namani?

¹⁷ Shi tushale nyeke pabwipi na Yehova, Satana kakabwanyapo kwitulonga kibi nansha kimo kiketusanshija nyeke. Inoko, aye ye ukonakanibwa lonso. (Loma 16:20) Shi ke pano, vwala bivwalwa byonso byabulwi​—kadi kokavūla’byo! Kokatompa kulwa bulwi bunka bobe. Kwatakanya batutu ne bakaka. Kadi londa bwendeji bwa Yehova. Shi ulonge namino, nabya yuka’mba shobe wa mūlu wa buswe, Yehova, ukakukomeja ne kukukinga.​—Isa. 41:10.