Bible—Nsulo ya Bubine Ikulupilwa
Mu bula bwa mānga, bantu bavule beshileshile bamwene Bible bu nsulo ya bubine ikulupilwa. Midiyo ne midiyo ya bantu dyalelo, balondanga bufundiji budi’mo. Inoko bakwabo nabo bafwatakanyanga’mba Bible kadipo na mvubu ne amba mudi myanda ya kufwatakanya. Le nobe ulanga’po namani? Le ubwanya kutana bubine mu Bible?
KINE KYOBWANYA KUKULUPIDILA BIBLE
Le i bika bibwanya kukulengeja ukulupile Bible? Tulete kimfwa: Shi mulunda nobe ukusapwilanga nyeke bya bine mu bula bwa myaka mivule, ukamumona padi bu muntu ukulupilwa. Pamo bwa uno mulunda nobe ukulupilwa, le Bible nandi wisambanga nyeke bya bine? Tala’tu bidi bino bimfwa bimobimo.
Balembi ba bubinebine
Balembi ba Bible bādi bantu bampikwa budimbidimbi, bāsokwele divule dine bilubo byabo ne kutupatupa kwabo. Kimfwa, mupolofeto Yona wālembele myanda ya kubulwa kikōkeji kwandi. (Yona 1:1-3) Na bubine, wāvuile mukanda wandi wa mu Bible na kulombola mwa mutopekēle Leza, nansha byakalombwelepo muswelo waālemunwine ngikadila yandi. (Yona 4:1, 4, 10, 11) Kubulwa budimbidimbi kwa balembi bonso ba Bible kulombola’mba bādi batele mutyima bininge ku bubine.
Bubine bwa Kamweno
Lelo Bible uletanga nyeke madingi mayampe mu myanda kampanda? En-en. Kimfwa, tala binena Bible pa mwa kupwanina nyeke kipwano kiyampe amba: “Nanshi bintu byonso byomusaka bantu bemulongele, banwe nenu mufwaninwe kwibalongela’byo.” (Mateo 7:12) “Kulondolola na kitūkijetyima kusonsololanga bukalabale, ino binenwa bisansa bikolomonanga bulobo.” (Nkindi 15:1) Bine, bubine bwa mu Bible bukidi na mvubu ne dyalelo, enka na mobwādi bwikadile nayo kitatyi kyobwālembelwe.
Wa Bine mu Mānga
Bintu bivule bya kishiyekulu bisokwelwe mu bula bwa myaka bilombola’mba, bantu, bifuko ne bubine bwa binkumenkume palapala bidi mu Bible byāikele’ko. Kimfwa, tala bubine bwa uno mwanda mutyetye’tu. Bible unena’mba mu mafuku a Nehemia, bene Tyila (bene Fenisea batambile ku Tyila) bādi bashikete mu Yelusalema “badi batwela na mwita wa lui ne bya busunga bya miswelo yonso.”—Nehemia 13:16.
Le kudi bukamoni bubingija uno vese wa mu Bible? En-en, budi’ko. Befundi ba bintu bya kishiyekulu bāsokwele bintu bya bene Fenisea mu Isalela, byāmwenwe bu bya busunga byādi bisunga ino mizo ibidi ya pa kala. Ne kadi, mu Yelusalema mwādi mwita mukwabo wa ku Meditelanea. Befundi ba bintu bya kishiyekulu bādi bakulupile amba uno mwita wādi ukaselwa kulampe na basunga. Pa kupwa kubandaula buno bukamoni, mwifundi umo wāfudile ku kunena’mba: “Myanda inenenwe mu Nehemia 13:16 ya amba bene Tyila bādi bapoteja mwita mu Yelusalema i ya bine.”
Wa Bine mu Myanda ya Sianse
Dibajinji Bible i dibuku dya myanda ya Leza, kadi dibuku dya mānga. Ino shi wisambila pa myanda ya sianse, unenanga’nka bya bine. Tala’tu bidi kimfwa kimo.
Pano kepadi myaka 3 500, Bible wānenene amba ntanda iyelanga “patuputupu.” (Yoba 26:7) Bino binenwa i bishile bininge na mfumo ya amba ntanda ilelanga pa mema nansha’mba iselelwe na bankuvu bakatampe. Kintu kya myaka 1 100 pa kupwa kwa mukanda wa Yoba kulembwa, bantu bādi bakikulupile amba ntanda keibwanyapo’tu kuyela mu lwelēle; ino ishikete pa kintu kampanda. Myaka tutwa tusatu pa kupita’po, mu 1687, Isaac Newton wālupula dibuku dīsambila pa bukomo bukokela bintu panshi ne kushintulula’mba ntanda idi pa kifuko poidi’pa kupityila ku bukomo bwampikwa kumweka. Ino mānga ya sianse yābingije byobya byānenene Bible pano kepadi myaka 3 000!
Bupolofeto bwa Bine
I kika kinenenwa’mba bupolofeto buvule bwa mu Bible i bwa bine? Tala bidi kino kimfwa kimo: Bupolofeto bwa Isaya bwa kupona kwa Babiloni.
Bupolofeto: Mu myaka katwa ka mwānda Yesu Kaile, Isaya mulembi wa Bible wānenene amba Babiloni—mwine wādi wa kwikala bu kibikelo kya umbikalo wa bukomo—wādi wa kufulamikwa ne kuleka kwikalwa’mo mwenda mafuku. (Isaya 13:17-20) Isaya wātelele’nka ne dijina dya muntu wādi wa kufikidija buno bupolofeto—ke Kilusa kadi. Kadi wālombwele ne manwa ādi a kwingidija Kilusa, wānena’mba minonga ‘ikōma.’ Wālaya ne amba bibelo bya kibundi bikashibwa pululu.—Isaya 44:27–45:1.
Kufikidila: Kintu kya myaka 200 na panenene Isaya bupolofeto, mulopwe wa Peleshia wātamba Babiloni divita. Le dyandi i ani? I Kilusa. Byobyādi bikomo kutwela mu Babiloni, Kilusa wāingidija munonga wa Ufalete, wādi ukuka mu kibundi. Bantu bandi bākola mukola kungala, bākupwila munonga kufula. Kino kyālengeja mema a munonga ekoke, kupwa basola ba Kilusa baabuka mu kyalo kya munonga, mwine wādi ulamete ku mumbu ya kibundi. Kya kutulumukwa i kino, bene Babiloni bāshile bibelo bitadidile ku munonga pululu! Basola ba Kilusa bātwela mu Babiloni pa bino bibelo byāshilwe pululu ne konakanya kibundi.
Inoko, kukidi mwanda mukwabo: Le bantu bālekele kushikata mu Babiloni? Mu kintu kya myaka tutwa na tutwa, bantu bāendelele kushikata’mo. Ino dyalelo, masala a Babiloni—adi kubwipi na Bagdad, mu Irake—abingija kufikidila kwa bupolofeto bonso. Bine, Bible i wa binebine kitatyi kyaesambila pa bintu bya kumeso.
