Binena Bantu pa Mwanda Utala Kulombela
“Kitatyi kyonombela, monanga’mba Leza udi kubwipi nami, unkwete ku kuboko ne kundudika kitatyi kyonemona bu mujimine.”—MARÍA.
“Wami mukaji wafwile pa kupwa kubela misongo ya dyaya mu bula bwa myaka 13. Mvulukanga ponadi nombela difuku ne difuku kudi Leza kadi mona’mba wadi ungivwana ponadi na misanshi. Nemwene bu ngidi mu ndoe.”—RAÚL
“Milombelo i kyabuntu kiyampe kyobapele bantu kudi Leza.”—ARNE.
Kudi ba María, Raúl, Arne, ne bantu bavule, milombelo i kyabuntu kya pa bula. Bamwene amba, babwanya kwisamba na Leza, kumufwija’ko, ne kumulomba bukwashi kupityila ku milombelo. Bakulupile na mutyima umo byobya binena Bible pa mwanda utala kulombela kudi Leza amba: “Kino kyo kikulupiji kyotumukulupile amba shi tumulombe kintu kyonso, shi kika shi kika, mwendele kiswa-mutyima kyandi, witwivwananga.”—1 Yoano 5:14.
Ku mutamba mukwabo nako, bantu bavule bakomenwanga kwitabija byobya binena Bible pa mwanda utala milombelo. Steve ulombola mwaadi umwena milombelo. Unena’mba: “Ponadi na myaka 17, balunda nami basatu bafwile mu maakishida abidi. Umo wafwa mu akishida ya motoka, babidi bakwabo nabo bafwa mema.” Le Steve walongele’po namani? “Nalombele kudi Leza anombole kine kyalongekēle bino bintu, ino kunondolola mpika. Ebiya keneipangula’mba: ‘Mwanda waka mfwaninwe kulombela?’” Milombelo imweka bu keilondolwelwepo, ilengejanga bantu bavule beipangule kine kyobendelela na kulombela.
Kudi bubinga bukwabo bulengejanga bantu batatane kamweno kadi na milombelo. Bantu bamo banenanga’mba Leza byayukile bintu byonso, uyukile kala bintu byotusakilwa nansha makambakano etu, nanshi ketusakilwapo kumulombola’byo.
Bantu bakwabo bakulupile amba Leza upelanga kwivwana milombelo yabo pa mwanda wa bilubo byobalongele pa kala. Jenny unena’mba, “makambakano makatampe ondi nao i a kwimona bu muntu wa bitupu. Nalongele bintu byonealakanya, o mwanda nenanga munda mwami amba nkifwaninwepo kwivwanwa na Leza.”
Le abe umonanga milombelo namani? Shi udi na ano makambakano nansha shi utatana pa mwanda utala milombelo, ubwanya kusengibwa pa kuyuka’mba ukokeja kutana malondololo mayampe mu Bible. Ubwanya kukulupila byobya binena Bible pa mwanda utala milombelo; * aye ubwanya kukukwasha utane malondololo ku bino bipangujo:
-
Le bine Leza wivwananga milombelo yetu?
-
Mwanda waka milombelo imo keilondololwangapo?
-
Le i muswelo’ka obwanya kulombela amba Leza akwivwane?
-
Le milombelo ibwanya kukukwasha namani?
^ mus. 9 Mu Bible mudi milombelo ya bengidi ba Leza bavule, kubadila’mo ne ya Yesu Kidishitu. Mu Bisonekwa bya Kihebelu, bivudile kwitwa bu Kipwanino Kikulu, mudi milombelo 150 ne kupita.
Tala'po Bidi ne Bino:
BIPANGUJO BYA MU BIBLE BILONDOLWELWE
Kyonombela I Kika? Le Leza Usa Kunondolola?
Nakampata i abe mwine wa kulengeja Leza akulondolole nansha kuleka kukulondolola.
BIPANGUJO BYA BANKASAMPE
Mwanda Waka Mfwaninwe Kulombela?
Le milombelo i kintu kinkwasha’tu mu ñeni’ni nansha’ko idi ne na kamweno kakwabo?
KITEBA KYA MULAMI
Le Ufwaninwe Kulombela?
Leza ubwanya kulondolola ku milombelo pakubulwa kulonga kingelengele.
