“A Mwine wivwananga milombelo, bantu ba miswelo yonso bakāya kodi.”​—Ñimbo ya Mitōto 65:2.

Bantu bamo balombelanga mwanda banenanga’mba milombelo ibakwashanga beivwane biyampe, nansha shi kebakulupilepo amba kudi muntu wibevwana. Inoko milombelo keifwaninwepo kulombelwa mwanda’tu wa kwiivwana biyampe mwa kulwila na makambakano etu. Bible witukulupija’mba, “Yehova * udi pabwipi na boba bonso bamwita, bonso bamwita mu bubine. . . . Wivwananga kulomba kobalomba bukwashi.”​—Ñimbo ya Mitōto 145:18, 19.

Nanshi tubwanya kukulupila’mba Yehova Leza wivwananga milombelo ya batōtyi bandi. Aye unena na buswe amba: “Mukangitanga kadi mukāya ne kulombela kondi, nami nkemwivwana.”​—Yelemia 29:12.

“Takamanai mu milombelo.”​—Bene Loma 12:12.

I betukankamike mu Bible “kulombela kyaba kyonso” ne “kuzenza kyaba kyonso.” Bine, Yehova Leza usakanga tumulombe.​—Mateo 26:41; Bene Efisesa 6:18.

Mwanda waka Leza usakanga tumulombe? Langa’po bidi: Le i mbutwile’ka kakasakepo wandi mwana amunene amba, “a Tata ubulwepo kunkwasha’ko”? Na bubine, padi Shabana uyukile kala bisakibwa bya wandi mwana nansha mwawiivwanina, inoko shi waivwana binenwa bya uno muswelo, bikamulombola’mba wandi mwana umukulupile ne amba udi pabwipi nandi. Mu muswelo umo onka, shi tulombela kudi Yehova Leza, tulombolanga’mba tumukulupile ne amba tusakanga kwikala nandi pabwipi.​—Nkindi 15:8; Yakoba 4:8.

“[Elai] kuzumbazumba kwenu konso kwadi, mwanda aye wimutele mutyima.”​—1 Petelo 5:7.

Leza usakanga tulombele kwadi mwanda witusenswe kadi witutele mutyima. Uyukile biyampe makambakano etu ne bintu bituzumbija mutyima, kadi usakanga kwitukwasha.

Mu būmi bwandi bonso, Mulopwe Davida wādi ulomba Yehova Leza amukwashe, kadi wādi umusapwila milangwe yandi ne mwawiivwanina. (Ñimbo ya Mitōto 23:1-6) Lelo Leza wādi umwene Davida namani? Leza wādi usenswe Davida kadi wāivwene milombelo yandi mivule. (Bilongwa 13:22) Muswelo umo onka, Leza wivwananga milombelo yetu mwanda witutele mutyima.

Bino i binenwa byālembelwe na mulembi wa lwimbo lumo lwa mitōto ludi mu Bible. Wādi ukulupile amba Leza wivwananga milombelo yandi, kadi kino kyāmukweshe bininge. Wēmwene bu udi pabwipi na Leza, kadi wāmona bukomo bwa kūminina tusua ne njia ya mu būmi.​—Ñimbo ya Mitōto 116:1-9.

Shi tukulupile amba Leza wivwananga milombelo yetu, tukendelela kumulomba. Tulangulukilei bidi pa bintu byatene Pedro, ushikatanga kungala kwa Eshipanye. Wandi mwana wa myaka 19 wafwile mu akishida ya motoka. Na bulanda, Pedro wapungulwila mutyima wandi kudi Leza, kadi wamulomba kitatyi ne kitatyi amusenge ne kumukwasha. Le byaikala namani? Pedro unena’mba, “Yehova walondolwele milombelo yami, betusenga ne kwitukwasha ami ne wami mukaji kudi banabetu bene Kidishitu.”

Nansha milombelo byokeyabwenyepo kusangula wandi mwana, ino yakweshe Pedro ne kisaka kyandi bininge. Wandi mukaji María Carmen uvuluka’mba: “Milombelo yaunkweshe ñuminine njia. Nadi ndyukile amba Yehova Leza ungivwananga mwanda kitatyi kyonadi mulomba nadi ngikala biyampe ne kutūja.”

Bible ne myanda mimweke ya bantu, bilombola patōkelela’mba Leza wivwananga milombelo. Inoko, bilombola kadi amba Leza kalondololangapo milombelo yonso. Mwanda waka Leza ulondololanga milombelo imo, ino waleka’ko mikwabo?