Myanda miyampe ya Bulopwe bwa Leza isapulwanga mu ntanda yonso, enka na mwālaile’kyo Yesu. (Mateo 24:14) Mukanda wa mu Bible wa Danyele witusapwila’mba buno Bulopwe i umbikalo ushimikilwe na Leza. Mu shapita 2 wa uno mukanda mudi bupolofeto butala kwipingakana kwa imbikalo imo mikatampe ya bantu, nansha malopwe, kutamba ku Babiloni wa kala kutūla ne ku dyalelo. Vese 44 ulaya bintu bisa kulongeka mu mafuku āya kumeso’ku amba:

“Leza wa mūlu ukemika bulopwe kebukōnakanibwapo nansha patyetye, nansha bulopwe bwine bwabo kupityila ku bantu bangi, ehe; ino bukatyumuna bipindibipindi ne kukubija malopwe ano’a onsololo, kadi bukemananga nyeke.”

Buno bupolofeto ne bukwabo bwa mu Bible bulaile amba Bulopwe bwa Leza bukapingakena maludiki onso a bantu ne kuleta ndudi ne mutyima-ntenke ku bantu pano pa ntanda. Le būmi bukekala namani mu buludiki bwa buno Bulopwe? Tala milao imoimo ya kutendelwa isa kufikidila panopano ponka.

• MAVITA KEAKEKALA’KOPO MONKA

  Ñimbo ya Mitōto 46:9: “[Leza] watukija mavita ne ku mfulo ya ntanda; utyumunanga buta, ne mukobe nao watempula’o bipindi bibidi; wasōka makalo pa mudilo.”

  Fwatakanya’po mwadi mwa kwikadila ntanda shi kwadi amba lupeto ne bwino bisupakanibwa dyalelo mwanda wa kupunga bya bulwi byadi bingidijibwa mu muswelo umwena’mo bantu pa kyaba kya kwibepaya! Uno mulao usa kufikidila mu buludiki bwa Bulopwe bwa Leza.

• MISONGO KEIKEKALA’KOPO MONKA

  Isaya 33:24: “Mwikadi kakanenapo’mba: Nabela.”

  Langa’po bidi mu ntanda kemukabelapo muntu nansha umo misongo ya dityima, dyaya, malaria, nansha ke misongo yo-yonso. Ketukasakilwapo mpitalo nansha malawa. Bukomo bwa ngitu kyo kintu kitengēle bekadi bonso ba pano pa ntanda​—mu mafuku āya kumeso.

• BIMPENGELE BYA NZALA KEBIKEKALA’KOPO MONKA

  Ñimbo ya Mitōto 72:16: “Kukēkalanga bungibungi bwa mebele panopantanda peulu pa ngulu.”

  Ntanda ikaleta bidibwa bivule bibwana muntu ne muntu, kadi bantu bonso bakamwena’mo. Nzala ne misongo yoileta kebikekala’kopo monka.

• MISANSHI, BUSHIYENA, NE LUFU KEBIKEKALA’KOPO MONKA

  Kusokwelwa 21:4: “[Leza] ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.”

   Ko kunena’mba kukekala būmi bwa kubulwa mfulo kadi bubwaninine mu paladisa pano pa ntanda! Bino byo bilaile Yehova Leza, Umpangi wetu wa buswe.

Le bino bintu byonso biyampe’bi bisa kufikidila? Nansha bantu bavule byobabwanya kwitabija’mba buno būmi bulailwe ne bwisambilwe’po mu Bible i bulumbuluke mpata, inoko pa mwanda wa bubinga palapala bavule bamonanga’mba mulangwe wa kwikala’ko nyeke i mukomo kwivwana. Kino ke kya kutulumukapo mwanda i kutupu muntu nansha umo ke mwimwene būmi bwa uno muswelo ukokeja kwitushintulwila’bo.

Bantu bonso i bamunwe na bubi ne lufu ne kwikonda na misanshi, masusu, ne ngikadilo mikomo bine byalengeja bantu bavule bamone uno mwikadilo wa mu būmi bu mwendele’mo nansha bu wa kipangila. Inoko kino i kishile na mpango ya Yehova Leza, Umpangi wetu, itala bantu.

Pa kwitukwasha tukulupile bubinebine bwa byobya byonso byalaile, Leza unena ukoma pa mwanda utala kinenwa kyandi amba: “Kekiketolelapo bitupu ko ndi; ehe, nanshi kikalonga kyoki kyo nswele, kabidi kikafikijija biyampe’tu kintu kyo nekitumine.”​—Isaya 55:11.

Yehova i mulombolwe mu Bible bu Leza “kabwanyapo kubepa.” (Tetusa 1:2) Byaetulaile bino bintu byonso bya kutendelwa mu mafuku āya kumeso, i kyendele’mo tubandaule bino bipangujo: Le bine bibwanika bantu bakekale’ko nyeke mu Paladisa ilailwe pano pa ntanda? Le i bika byotufwaninwe kulonga shi tusaka kukamwena mu milao ya Leza? Mu mapaje alonda’ko a dino dipepala, usa kutana’mo myanda isa kukukwasha usokole malondololo ku bino bipangujo.