Leza wāpangile imbidi yetu na bukomo butulumukwa bwa kwiundapa ayo mine. Shi ubetape kilonda, kwipulunya, nansha kwitunga kya kwitunga, “umbidi ushilulanga kulonga bintu bikutakane mwanda wa kubelula kilonda kikata nansha kityetye.” (Johns Hopkins Medicine) Umbidi uloñanga’po kintu ponka na ponka mwanda wa kukala mashi, kwiavudija, kūmija kilonda, ne kukomeja tuseke twa mashi.

LANGULUKA’PO BIDI: Shi Mupangi wāpangile imbidi yetu na bukomo bwa kundapa bilonda bya ku ngitu, le tubulwe’po kukulupila mulao wandi wa kundapa bilonda byetu bya ku mutyima? Mulembi wa mitōto wālembele amba, “Undapanga ba mityima mityumuke; ukuta bilonda byabo.” (Ñimbo ya Mitōto 147:3) Ino shi wikondanga na kilonda kya ku mutyima kya myanda yakutene pa kala nansha ya dyalelo, le ukakulupila namani amba Yehova ukakuta bilonda byobe​—dyalelo ne mu mafuku a kumeso?

Leza ulaile amba: “Kokakwatwa moyo, mwanda ngidi nobe. Kokazumbija mutyima, mwanda ami ne Leza obe. Nkakukomeja, bine, nkakukwasha.” (Isaya 41:10) Muntu uyukile amba Yehova umutele mutyima udi na ndoe ya mutyima ne bukomo bwa kūminina matompo palapala. Mutumibwa Polo wātelele uno mwiivwanino muyampe wa mu mutyima bu “ndoe ya Leza itabukile ñeni yonso.” Polo wābwejeje’ko amba: “Mu byonsololo ngidi na bukomo kupityila kudi yewa unkomeja”​—Fidipai 4:4-7, 9, 13.

Bisonekwa bitukwashanga tukomeje lwitabijo mu milao ya Yehova ya kumeso itala muzo wa muntu. Kimfwa, Kusokwelwa 21:4, 5 (utelelwe mu paje ulonda’ko) witulombola byobya byakalonga ne kine kyotubwanya kumukulupidila’mba ukebilonga:

• “Ukapampulanga impolo yonso” mu meso a bantu. Yehova usa kupwija masusu ne makambakano etu onso, nansha ke oa mene amweka bu matyetye ku meso a bantu.

• “Yewa wadi ushikete pa lupona” mu ntumbo ya momwa mūlu, ko kunena’mba Mwinē Bukomo Bonso, Mulopwe wa bipangwa byonso usa kwingidija bukomo ne lupusa lwandi mwanda wa kupwija masusu ne kwitupa bukwashi botusakilwa.

• Yehova witukulupija’mba milao yandi “i ya binebine kadi ya bine.” Ko kunena’mba, ulamine bumuntu bwandi bwa bu Leza wa bine ufikidijanga milao yandi.

“‘Ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.’ Kadi Yewa wadi ushikete pa lupona wanena’mba: ‘Talai! Nalonga bintu byonso ke bipya.’ Wanena kadi amba: ‘Lemba, mwanda ino myanda i ya binebine kadi ya bine.’”​—Kusokwelwa 21:4, 5.

Umbuo wa diulu ne ntanda ne Bible bilombolanga bumuntu ne ngikadila ya Tata wetu wa mūlu. Bupangi byobwitwita pampikwa kwisamba tuyuke Leza bu Mulunda netu wa pa mutyima, aye Bible witwita patōkelela na bino binenwa bya amba: “Fwenai kudi Leza, nandi ukemufwena.” (Yakoba 4:8) Bilongwa 17:27 unena’mba: Kadipo “bine kulampe na batwe bonso.”

Kitatyi kyoenda uyuka Leza, po pene ukekala na kikulupiji kikatampe amba ukutele “mutyima.” (1 Petelo 5:7) Le i byabuyabuya’ka byokamwena mu kukulupila Yehova uno muswelo?

Tala kimfwa kya Toru, wa mu Jampani. Watamijibwe na inandi mwine Kidishitu, inoko watwelele mu Mafia, kisumpi kya bankuma-bibi kya mu Jampani. Unena’mba, “Nadi nkulupile amba Leza unshikilwe, kadi nadi mona’mba lufu lwa bantu ba pabwipi nami, nakampata boba bonadi nsenswe bininge, i mfuto yadi impebwa.” Toru unena’mba kino kisumpi kibi kadi kya babilobo, kyamulengeje ekale “na mutyima mūmu kadi wampikwa lusa.” Kukwatañana na byaadi wabila, uvuluka’mba, “Nadi nsaka kufwa mwanuke pa kupwa kwipaya muntu mutumbe ne kushala mvulukwa mu mānga.”

Inoko, Toru ne wandi mukaji Hannah pobefundile Bible, Toru washintyile bya binebine būmi bwandi ne muswelo waadi umona būmi. Hannah unena’mba, “Nemwenine na meso muswelo wadi ushinta wami mulume.” Pano, Toru unena na kikulupiji  amba: “Na bubine kudi Leza witutele mutyima umo ne umo. Kasakangapo muntu nansha umo afwe, kadi ulekelanga na mutyima umo boba besāsa bya binebine bubi bwabo. Utejanga myanda mifyame yoketubwanyapo kusapwila muntu mukwabo poso’nka aye kete ne yoya keifwaninwepo kwivwana muntu mukwabo. Panopano ponka, Yehova usa kupwija makambakano onso, masusu, ne njia. Nansha ke dyalelo, witukwashanga mu muswelo utulumukwa. Witusenswe kadi witukwashanga potudi bapēlulwe.”—Ñimbo ya Mitōto 136:23.

Enka na mwekilombwela kimfwa kya Toru, kuyuka’mba Leza ubwanya​—ne amba panopano ponka​—usa kupwija byamalwa byonso ne kupampula impolo yonso, kekwitupengapo’tu’nka lukulupilo lwa kumeso kete, ino kwitukwashanga twikale ne na būmi bulumbuluke tamba’nka pano. Bine, nansha ke mu ino ntanda muyudile masusu, ubwanya kumwena mu kwituta kwitutele Leza mutyima na buswe.