Inoko bantu bavule kebakulupilepo amba bakekala na būmi bobasaka mu mafuku a kumeso. I bamone bintu bya mu kitulumukila, kimfwa kipupo kya COVID-19 kilengeja būmi bwa bantu bukome, bakomenwe misokwe, kadi kipaya bantu bavule. O mwanda balañanga’mba kebabwanyapo kwikala na būmi bulumbuluke mu mafuku a kumeso.

Pa mwanda wa kuno kutatana, bantu bakimbanga bintu bikebakwasha bakekale na būmi buyampe mu mafuku a kumeso. Bamo bakulupile mu bukomo kebumweka, kimfwa amba bintu i bilaibwe nansha kwikala wa dyese. Bavule bafundanga masomo ne kukimba bupeta, na kulanga’mba byo bikebakwasha bekale na būmi bobasaka. Bakwabo nabo balanga’mba, pa kwikala na būmi buyampe bilomba kwikala muntu muyampe.

Le bino bintu bikakuletela būmi bwa kumeso boabila? Pa kuyuka shi bikakuletela’bo, ufwaninwe bidi kulangulukila pa bino bipangujo:

• Le i bika bine bilombola mukekadila būmi bobe bwa kumeso?

• Le kufunda masomo ne lupeto bikakuletela būmi buyampe?

• Le kwikala muntu muyampe kukakuletela būmi bulumbuluke?

• Le i kwepi kokatana madingi mayampe a mwa kwikadila na būmi bulumbuluke bwa kumeso?

Kino Kiteba kya Mulami kisa kukukwasha utane malondololo.