Monka motwesambilanga mu bishinte bibadikile, bantu ke balonge bukomo amba bakekale na būmi bulumbuluke bwa kumeso, na kukulupila mu bintu pamo bwa kulaibwa kwa bintu, kufunda masomo, kukimba bupeta, ne kwikala bantu bayampe. Inoko shi wingidija bino bintu mwanda wa kukekala na būmi bulumbuluke, bidi pamo bwa kwingidija kalata ka bubela pa kwenda ku kifuko kyokuyukilepo. Le ko kunena’mba kekudipo bulombodi bukulupilwa bwa mwa kukekadila na būmi bwa kumeso? Aa, budi’ko!

Pa kukwata butyibi, divule dine twipangulanga muntu mutame kadi wa tunangu kwitupita. Muswelo umo onka, tubwanya kupebwa bulombodi bukulupilwa bwa mwa kukekadila na būmi bwa kumeso na muntu mutame bininge kadi wa tunangu kwitupita. Tubwanya kutanga madingi andi mu bilembwa bikola byashilwile kulembwa pano ke padi myaka 3 500. Bino bilembwa bijila bidi mu dibuku ditwa bu Bible.

Mwanda waka ubwanya kukulupila Bible? Mwanda mwine’ye, i Muntu mutame bininge kadi wa tunangu kutabuka bantu bonso mūlu ne pano panshi. I mutelwe bu “Mukulu wa Mafuku” udi’ko “nyeke ne nyekeke.” (Danyele 7:9; Ñimbo ya Mitōto 90:2) Aye i “Umpangi wa madiulu, Leza wa bine, Mwine wapungile ntanda.” (Isaya 45:18) Witusapwila’mba dijina dyandi i Yehova.​—Ñimbo ya Mitōto 83:18.

Bible byatambile kudi Umpangi wa bantu bonso, kanenangapo amba kibidiji nansha lukoba kampanda i lutabuke lukwabo. Madingi adi’mo i a kamweno nyeke kadi akwashanga bantu ba matanda onso. Udi mu ndimi mivule kadi i dibuku dyabanibwa bininge ntanda yonso kutabuka mabuku makwabo. * Ko kunena’mba bantu ba pi na pi babwanya kumwivwanija ne kuludikwa nandi. Buno bubine bukwatañene na bine binena Bible amba:

“Leza kadipo na mboloji, ino mu mizo yonso yewa muntu umutyina ne ulonga byoloke ye witabijibwa nandi.”​—BILONGWA 10:34, 35.

Monka musanshilwe mbutwile bandi bana kadi wibakwasha, Yehova Leza nandi i Shabana wa buswe witukwasha kupityila ku Bible Kinenwa kyandi. (2 Temote 3:16) Ubwanya kukulupila Kinenwa kyandi, mwanda i aye witulongele kadi uyukile bintu biketusangaja mu būmi.

Le i bika byofwaninwe kulonga pa kukekala na būmi bwa kumeso bwa uno muswelo? Tala kishinte kilonda’ko.