Paladisa! Bifuko bilumbuluke byotumonanga ku televijo bitupanga kyumwa kya kwenda kulampe mu “kifuko kilumbuluke” mwanda wa kukenangija ne kwitalula’ko milangwe. Ino enka motuyukile’kyo senene, shi tubajokela ku njibo, būmi bwaikala enka mobwikadilanga nyeke.

Nansha nankyo, bantu basangelanga bininge mulangwe wa paladisa. Tubwanya kwiipangula’mba: ‘Le “paladisa” i mfwatakani’tu isangaja? Shi i amo, mwanda waka i mulangwe usangaja bavule? Le ibwanya kukekala’ko bine?’

Mu bula bwa myaka tutwa na tutwa, bantu basangelanga mulangwe wa paladisa. Myanda ilembelwe mu Bible itala “budimi bwa Edena bwādi kutunduka” yo ilengeje bavule basangele uno mwanda. Mwanda waka buno budimi bwādi bunengele mpata? Nsekununi itulombola’mba: “Yehova Leza wameneja panshi mityi yonso miyampe kutalako, ne miyampe kudyako.” Buno budimi bwādi bu kifuko kisangaja kadi kya buya bwa dyangi. Kyēbuneñenye kutabuka, i ‘mutyi wa būmi wādi umbukata mwa budimi’bwa.’​—Ngalwilo 2:8, 9.

Kutentekela pa bino, mu Ngalwilo i mutelwe minonga iná yādi ikuka mu budimi bwa Edena. Kadi ibidi pa ino minonga ikiyukene ne dyalelo i​—Tigele (nansha Hidekela) ne Ufalete. (Ngalwilo 2:10-14) Ino minonga ibidi ipitanga mu Kitonto kya Peleshia, mu ntanda itwa dyalelo bu Irake, kipindi kya ntanda kya Peleshia wa kala.

Ne kutatana kwine mpika, paladisa ya pano pa ntanda ibadilwa nakampata mu bipyanwa bya bene Peleshia. Kalata ka mu Peleshia ka mu myaka katwa 16, katenwe mu Musée d’art ya mu Filadefia, mu Pennsylvania, mu États-Unis, kadi’po budimi bujokolokwe na lupango mudi mityi ne maluba bivwambile senene. Bishima bya bene Peleshia “budimi bujokolokwe na lupango” bishintululanga ne bu “paladisa,” kadi bifwatulo bidi pa kalata bilombola myanda ya mu Bible itala buyampe ne bumeni bwa mwādi mwikadile budimi bwa Edena.

Na bubine, myanda itala paladisa isambilwanga’po bininge mu ndimi ne mu bibidiji bivule pano pa ntanda ponso. Bantu pobadi bavilukila mu bifuko bikwabo bya pano pa ntanda, badi basela ne bintu bilembelwe’po bibidiji byabo, kebilāle myaka tutwa na tutwa, byadi bisobakane’mo nkulupilo ne mfumo ya bintu byadi bilongeka mu kibundi kyabo. Enka ne dyalelo, bantu bavule betanga na kufwatakanya bifuko bya kipangila bya buya bwa dyangi bu paladisa.

Basokodi bamo ba bintu bafwatakanyanga’mba i basokole kifuko kyādipo paladisa yājimine. Kimfwa, Charles Gordon, mudyavita umo mwine Beletanye, paaendele kukapempula Seishele mu 1881, watulumukile pa buyampe bwa Vallée de Mai​—dyalelo ke Kipyanwa Kilamibwe kya ntanda yonso​—wanena’mba bo budimi bwa Edena. Mu myaka katwa 15, Christophe Colomb, ñenda umo wa lwa mema mwine Itadi wafwatakenye amba wasokola budimi bwa Edena paafikile pa kisanga kya Hispaniola, dyalelo kipindi kimo kya kino kisanga kidi ku Repiblike Dominikene kikwabo nakyo ku Haiti.

Mapping Paradise, dibuku dimo dya mānga dya panopano, didi na tulata twa kala 190 ne kupita, tuvule i tudi’po bifwatulo bya ba Adama ne Eva mu Edena. Mu tuno tulata mudi ne kalata kamo kekavudilepo kumweka ka mu myaka katwa 13 ka mu bilembwa bya Beatus bya mu Liébana. Kūlu kwa kano kalata kudi kifwatulo kya mafinko aná kidi’po paladisa pa bukata. Pafwatule ne minonga iná ikuka, “Tigele,” “Ufalete,” “Pishoni,” ne “Ngiona,” ku mafinko onso aná kudi munonga umo umo, kine kilengeje bantu bafwatakanye amba kino kyelekeja kusambakana kwa bwine Kidishitu ku mafinko aná a ntanda. Ino myanda ilombola’mba nansha kifuko kyādi’po Paladisa mibajinji byokekiyukenepo, bantu ba nkongo ne nkongo basangelanga myanda itala Paladisa.

 John Milton, musāsudi umo wisamba Angele wa mu myaka katwa 17, i muyukane kupityila ku binenwa byandi bya kusāsula, Le Paradis perdu (Paladisa Mijimine), bimanine pa myanda ya mu Ngalwilo itala bubi bwa Adama ne kupangwa kwa mu Edena. Kadi wesambīle’mo ne pa mulao wa kujokejeja bantu būmi bwa nyeke pano pa ntanda, na kunena’mba: “Ntanda yonso ikekalanga ke paladisa.” Mwenda mafuku Milton walemba volime mikwabo, Le Paradis reconquis (Paladisa Mijokejibwe).

Na bubine, myanda itala paladisa ya pano pa ntanda yājimine i mwanda usenswe kwisambila’po bantu mu bula bwa mānga. Penepa mwanda waka pano abeuvulaminwa? Nakampata i mwanda, enka na munenena’kyo dibuku Mapping Paradise, “befundi ba teoloji . . . i batyimpile panshi na bukankamane mwanda utala kifuko kyādi’po paladisa.”

Bana ba bipwilo bavule bafundijibwanga amba kifuko kyabo kinekine kyobakekala’mo i mūlu, ke mu paladisapo ya pano pa ntanda. Inoko Bible unena mu Ñimbo ya Mitōto 37:29 amba: “Boloke bakapyananga ntanda, ne kwikala monka nyeke.” Ntanda byokeidipo dyalelo bu paladisa, penepa i bika bitukulupija amba uno mulao ukafikidila binebine? *

Yehova Leza, mwine wāpangile Paladisa mibajinji i mulaye kwiijokeja monka. Namani? Vuluka byobya byētufundije Yesu kulomba, amba: “Bulopwe bobe bwiye. Kiswa-mutyima kyobe kilongeke, pamo na momwa mūlu, ne pano pa ntanda pene.” (Mateo 6:10) Buno Bulopwe i umbikalo upelwe Yesu Kidishitu bukaludika ntanda yonso ne kupingakena pa maludiki onso a bantu. (Danyele 2:44) Mu buludiki bwa buno Bulopwe, kiswa-mutyima kya Leza kitala paladisa pano pa ntanda ‘kikalongeka.’

Tamba kala, mupolofeto Isaya wāpelwe mushipiditu mwanda wa kulombola mukekadila būmi mu Paladisa ilailwe, mwine mukatalulwa ñuma ne tuvutakanya tonso bisusula bantu dyalelo. (Isaya 11:6-9; 35:5-7; 65:21-23) Tukulomba witūdile’ko maminite matyetye mwanda wa witangile bino bisonekwa mu Bible obe. Kutanga bino bisonekwa kukakukwasha ukulupile mpango ya Leza itala pa bantu ba kikōkeji. Boba bakekala’ko, bakekala mu paladisa ne kwitabijibwa na Leza, bintu byājimije Adama.​—Kusokwelwa 21:3.

Mwanda waka tubwanya kukulupila amba lukulupilo lwa Paladisa pano pa ntanda i mwanda wa bine, ke mfwatakanipo? I mwanda Bible witusapwila amba: “Madiulu i madiulu a Yehova; ino panopanshi wapene kudi bāna ba bantu.” Lukulupilo lwa Paladisa pano pa ntanda i mulao wālaile “Leza tamba kala, aye kabwanyapo kubepa.” (Ñimbo ya Mitōto 115:16; Tetusa 1:2) Bine, Bible witupa lukulupilo lwa kutendelwa​—ke lwa Paladisa ya nyeke kadi!