BANSONGWAKAJI babidi badi benda mu kifuko kya busunga mu kibundi kya Baguio mu Filipine. Bamona kaditempa, inoko baleka kufwena’ko. Helen kaka wadi wimene ku kaditempa webamungijamungija. Bano bana-bakaji bapita baenda, inoko kumungamunga kwa Helen kwebasangeje. Kupwa pobadi mu motoka bajokela kwinjibo, bamona kayukeno ka jw.org kalamike ku Njibo ya Bulopwe.

Bavuluka’mba i kayukeno kamo konka na kobamwene ku kaditempa. Batūka mu motoka baenda kukatala mpangiko ya kupwila kwa bipwilo bishileshile yadi ilembelwe ku kibelo kya Njibo ya Bulopwe.

Bano bana-bakaji babidi bakatanwa ku kupwila kulonda’ko. Ino lelo uyukile obamwene pobatwelele mu Njibo ya Bulopwe? I Helen! Bamujiula’mba i aye webamungijemungije. Helen unena’mba, “pobaumfwenene naivwene moyo kenanga’mba padi nalongele kintu kibi.” Ino bano bana-bakaji bashintulwila Helen amba bamumwene pa kaditempa.

Bano bansongwakaji basangedile kupwila ne kipwano kyadi’ko; bemona’nka na abo badi kwabo. Pobamwene bantu bakwabo bakundula mu Njibo ya Bulopwe pa kupwa kupwila, baipangula shi babwanya kukwasha’ko. Nsongwakaji umo pa bano kakishikatangapo mu kibundi, inoko mukwabo washilwile kutanwa ku kupwila ne kwifunda Bible—pa mwanda’tu wa kumungamunga!