“LUKULUPILO . . . LUDI NA MVUBU MPATA PA KIPWANO KYETU NA LEZA,” mo munenena dibuku Hope in the Age of Anxiety. “Kadi bo bwanga buyampe bukwasha pa kunekenya milangwe ya kwityepelwa, kwitolwela pa bunka, ne moyo.”

Kisakibwa kyetu kya lukulupilo i kilombolwe mu Bible, mwine witukinga ne ku nkulupilo ya bubela. Ñimbo ya Mitōto 146:3 inena’mba, “Kemukakulupilapo bāna ba balopwe, nansha mwana muntu wampikwa bukwashi.” Pa kyaba kya kukulupila mu bukomo bwa bantu betupandije, tukalonga bya tunangu na kukulupila mudi Umpangi, mwine udi na bukomo bwa kufikidija milao yandi. Lelo i milao’ka yaetulaile? Tubandaulei’ko bidi imo.

BABI BAKATALULWA’KO; KUPWA BOLOKE BAKEKALA NYEKE MU NDOE: Ñimbo ya Mitōto 37:10, 11 inena’mba, “Ke-kuntu kukidi bidi kitatyi kityetye, ne mubi ukēkala kutupu’ye . . . Nanshi bakikōkeji bakapyananga ntanda; kadi bakēsangaja mu bungi bwa ndoe.” Vese 29 ubweja’ko amba ‘boloke . . . bakekala’ko nyeke’ pano pa ntanda.

MAVITA AKAPWA: “Yehova . . . watukija mavita ne ku mfulo ya ntanda; utyumunanga buta, ne mukobe nao watempula’o bipindi bibidi; wasōka makalo pa mudilo.”​—Ñimbo ya Mitōto 46:8, 9.

KEKUKEKALAPO MISONGO, MASUSU, NANSHA LUFU: “Pema wa Leza udi na bantu . . . Ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.”​—Kusokwelwa 21:3, 4.

KUKEKALANGA BIDIBWA BIVULE: “Kukēkalanga bungibungi bwa mebele panopantanda peulu pa ngulu.”​—Ñimbo ya Mitōto 72:16.

NTANDA YONSO IKALUDIKWA’NKA NA UMBIKALO UMO KETE​—KE BULOPWE BWA KIDISHITU KADI: “[Yesu Kidishitu wāpebwa] bufumu, ne ntumbo, ne bulopwe, amba bantu bonsololo, ne mizo, ne ndimi, bakamwingidile; bufumu bwandi i bufumu bwa kulādilamo nyeke, kebukapitepo, ne bulopwe bwandi i bwampikwa kukōnakanibwa.”​—Danyele 7:14.

Le tubwanya kukulupila namani amba ino milao ikafikidila? Yesu paādi pano pa ntanda wēlombwele patōkelela’mba aye ye Mulopwe Mutongwe kadi mufwaninwe. Wābelwile babela, wādisha balanda, ne kusangula bafwe. Kadi kintu kya mvubu kutabuka i bufundiji bwandi, mwanda wāfundije misoñanya mine ikakwasha bantu bakekale’ko nyeke pamo mu ndoe ne mu bumo. Kadi Yesu wālaile binkumenkume bikwabo, kubadila’mo ne byobya byadi bya kuyukanya mafuku a mfulo ya ino ntanda.

Yesu wālaile amba mafuku a mfulo keakayukenapo ku ndoe ne mutyima-ntenke, ino i ku bintu bishile na bino! Mu kiyukeno kya “mvuyo ya ngikadilo ya bintu” mubadilwa mavita ntanda yonso, bimpengele bya nzala, bipupo bya misongo, ne kutenkana kukatampe kwa ntanda. (Mateo 24:3, 7; Luka 21:10, 11; Kusokwelwa 6:3-8) Kadi Yesu wānenene amba: “Pa mwanda wa kuvula kwa kujilula bijila, buswe bwa bangi bene bukatalala.”​—Mateo 24:12.

Kuno kutalala kwa buswe i kumweke mu miswelo mivule, mine yālailwe ne na mulembi mukwabo wa Bible. Mu 2 Temote 3:1-5, tutanga’mo amba mu “mafuku a mfulo,” bantu bavule bakekala ba kwisanswa abo bene, ba kusanswa lupeto, ne kwisangaja. Badi ba kwikala ba mitatulo ne ba bukalabale bwa malwa. Bisaka byadi bya kubulwa kisanso kya bu muntu, ne bana nabo bampikwa kukōkela bambutwile. Buzazangi bwa bendeji ba bipwilo nabo bwadi bwa kuvula mpata.

Ino ngikadilo mibi ilombola’mba ino ntanda keidi mu mafuku ayo a mfulo. Kadi ilombola’mba ndoe ikaletwa na buludiki bwa Bulopwe bwa Leza ibafwena pabwipi. Na bubine, Yesu wēsambile ne pa mwanda ukankamika mu bupolofeto bwandi butala mafuku a mfulo, amba: “Ino myanda miyampe ya Bulopwe ikasapulwa pa ntanda yonso ikelwe na bantu mwanda wa bukamoni ku mizo yonso, ebiya mfulo keiya shayo.”​—Mateo 24:14.

Ino myanda miyampe i kidyumu ku banonga-bibi kadi i lukulupilo ku bantu boloke, ibakulupijanga’mba panopano ponka madyese onso alailwe asa kufikidila binebine. Lelo usaka kuyukila’ko bivule pa ano madyese? Shi i amo, nabya tala paje wa mfulo wa dino dipepala.