“Endelelai . . . kwilekela na mutyima umo nansha shi kudi udi na mwanda na mukwabo.”​—BENE KOLOSE 3:13.

Batwe bonso tuloñanga bilubo. Tukokeja kusanshija bakwetu, kadi nabo bakokeja kwitusanshija. Shi bidi uno muswelo, nanshi batwe bonso tufwaninwe kulekela ne kulekelwa. Shi tubalekela, tufwaninwe ne kuleka kulamina muntu witusanshije kīji. Ketwalujangapo “kibi ku kibi,” kadi ketuvulujangapo monka muntu’wa kilubo kyandi. (Bene Loma 12:17) Ino le bikekala namani shi muntu wetusanshija bininge, kadi tubakomenwa kuleka kulangulukila pa byaetulongele? Nabya, tufwaninwe kukesamba na muntu’wa na bulēme kadi pa bunka bwetu. Kitungo kyetu kifwaninwe kwikala kya kulonga ndoe, ke kya kwibingijapo.​—Bene Loma 12:18.

“Na kwityepeja, monai bakwenu amba i bemupite bukatampe.”​—BENE FIDIPAI 2:3.

Shi twi betyepeje kadi ba bulēme, bantu bakasangela kwikala netu. Mwanda bayukile amba tukekala na kanye kadi tukebata mutyima, ne amba ketukebasanshijapo ku kusaka. Inoko shi twimona bu batabuke bakwetu, nansha shi  twibaningila kulonga bintu enka motusakila tukavudija’tu enka myanda. Bantu baketunyema, kadi ketukekalapo na balunda bavule, enka ne kubulwa nansha umo.

“Leza kadipo na mboloji, ino mu mizo yonso yewa muntu umutyina ne ulonga byoloke ye witabijibwa nandi.”​—BILONGWA 10:34, 35.

Umpangi wetu kamonengapo amba bantu bamo i batabuke bakwabo pa mwanda wa muzo wabo, ludimi lwabo, ngikadilo yobadi’mo nansha lukoba lwabo. “Wālupwile ku muntu umo mizo yonso ya bantu.” (Bilongwa 17:26) Tubwanya nanshi kunena’mba bantu bonso i bana na bana. Shi tulongela bantu bonso bintu na bulēme ne na kanye, tukebasangaja, tukesangaja batwe bene kadi tukasangaja Umpangi wetu.

“Vwalai . . . kutalala.”​—BENE KOLOSE 3:12.

Shi tudi na ngikadila italala, tukalengeja bakwetu beivwane biyampe. Bakapēlelwa kwisamba netu nansha kwitulemununa, mwanda bayukile amba ketusapo kuloba. Kadi nansha shi muntu wetulobela, kulondolola kwetu kwa na kitūkijetyima kukamutalaja. Kisonekwa kya Nkindi 15:1 kinena’mba: “Kulondolola na kitūkijetyima kusonsololanga bukalabale, ino binenwa bisansa bikolomonanga bulobo.”

“Nsangaji ya kupāna itabukile ya kupebwa.”​—BILONGWA 20:35.

Bantu bavule dyalelo badi na makomwa-meso kadi belangilanga’nka abo bene. Inoko bantu ba buntu bekalanga na nsangaji ya bine. (Luka 6:38) Bantu ba buntu bekalanga na nsangaji mwanda basenswe bantu kupita’ko bintu. Buno buswe bwibalengejanga bafwije’ko pa bintu bibalongela bakwabo ne kwibisangela. (Bene Kolose 3:15) Wiipangule amba: ‘Le nkasangela kwikala na muntu wa namani​—wa mwino kaso kufwija’ko’ni nansha wa buntu ufwija’ko?’ Le i ñeni’ka yotuboila’ko? Ikala bidi mosakila bakwenu bekale.​—Mateo 7:12.