Mwanda Waka Bantu Bavule Kebakidipo na Bulēme?
MWANDA WAKA KULĒMEKA BANTU I KWA MVUBU?
Kulēmeka bantu kwitukwashanga twiteleke nabo biyampe kadi kekubipijijanga’kopo myanda.
-
Lukindi lumo lwa mu Bible lunena’mba: “Kulondolola na kitūkijetyima kusonsololanga bukalabale, ino binenwa bisansa bikolomonanga bulobo.” (Nkindi 15:1) Shi wisamba na muntu kwampikwa bulēme bidi pamo bwa abe utūta māni mu mudilo, kadi mīsambo ya uno muswelo ivudile kufula’nka kubi.
-
Yesu wānenene amba: “Kyakanwa kinenanga byobya biyudile ku mutyima.” (Mateo 12:34) Shi muntu wisamba kwa kubulwa bulēme na bantu ba lukoba lungi, kabila kangi, ba mu matanda angi, nansha na badi na būmi bwishile na bwandi kino kilombola’mba udi na ngikadila mibi, bimulomba kushinta evwanije amba bantu ne bantu baloñanga bintu mungya kya kwabo.
Mu bantu 32 000 ne kupita baipangwilwe mu matanda 28, bantu 65 pa katwa banenene amba bantu kebakidipo na bumuntu kadi bulēme bubatyepela’ko bininge mu muswelo okebyamwekele kashā.
BYA KULONGA PA KULOMBOLA’MBA ULĒMEKELE BANTU
Lēmeka bantu bonso bowisamba nabo podi ku masomo nansha ku kaji—nansha shi kudi bintu byobamona mu muswelo mwishile na obe. Tá mutyima ku myanda yomubwanya kwikala nabo milangwe imo. Kulonga namino kubwanya kukukwasha uleke kwibanenenakenya myanda nansha kwibalongela bintu na mboloji.
Longela bantu bintu mosakila nobe bakulongele’byo. Shi ulongela bantu bintu biyampe kadi kwa kubulwa mboloji, nabo bakakulongela bintu biyampe kadi kwakubulwa mboloji.
Ikala muntu ufwilañana lusa. Shi muntu bakunena nansha kukulonga kintu kikusansa, kokalanga’mba wadi kala mukukanine kukusanshija.
BATUMONI BA YEHOVA MOBAKWASHISHANGA BANTU BEKALE NA BULĒME
Batumoni ba Yehova balēmekanga bantu mu kibundi ne ku kaji, kadi bakwashanga bantu nabo bekale na bulēme.
Tufundijanga bantu bonso Bible ku bitupu mu busapudi, ku kupwila, ne kupityila ku mabuku esambila pa Bible, ino i kutupu muntu nansha umo otuningilanga etabije nkulupilo yetu. Ino batwe tuloñanga bukomo bwa kusapwila bantu musapu wetu “na butūkanye ne bulēme bukatampe” enka na mwitudingidila’kyo Bible.—1 Petelo 3:15; 2 Temote 2:24.
Tupelanga pelē mboloji mu muswelo o-onso kadi twitabijanga ku kupwila kwetu bantu ba bibidiji ne bitamina bishileshile ne ba mu matanda angi beya kutanwa’ko mwanda wa kufunda Bible. Tuloñanga bukomo bwa kulēmeka “bantu ba miswelo yonso” nansha shi ketusangedilepo butyibi bobakwata mu būmi.—1 Petelo 2:17.
Tulēmekanga ba lupusa bendeja matanda motushikete. (Bene Loma 13:1) Tulēmekanga bijila bya Leta ne kufuta bitanshi. Nansha byoketwikujangapo mu myanda ya politike, ino tulēmekele bwanapabo budi na muntu ne muntu bwa kwikwatyila butyibi mu uno mwanda.
