Kishima kulemununa kibwanya kufunkila pa kuludika nansha kufundija. Kyaba kimo, mubadilwa ne kolola mwana ku mwiendelejo mubi. Inoko divule, kifunkilanga pa kufundija mwana mwa kwikadila mwanda wa kuyuka mwa kukwatyila butyibi buyampe tamba’tu ukidi mwanuke.

Mu ino myaka, bambutwile bavule kebakilemununangapo babo bana, mwanda batyinanga’mba kwibalemununa kukebalengeja bemone bu kebadipo na mvubu. Inoko, bambutwile ba tunangu batūdilanga’ko babo bana bijila byendele’mo ne kwibafundija bebilame.

“Bana basakilwa bijila bya kwibakwasha batame biyampe. Pampikwa kwibalemununa, bana bakekala pamo bwa botyi wampikwa umbindo wa kumolola​—mwine ukafula ku kuluba nansha kulobela.”​—Pamela.

Kokakōka. Shi obe mwana wapele kulonda bijila byomutūdīle, yuka’mba ukatanwa na bikoleja aye mwine. Inoko fwija’ko obe mwana kyaba kyonso kyalonga bukomo bwa kwibilonda.

“Mfwijanga’ko bami bana kyaba ne kyaba mwanda wa kikōkeji kyabo mu ino ntanda musakene kikōkeji. Kwibafwija’ko kwibalengejanga betabije bulemununi ponso pobasakilwa’bo.”​—Christine.

MUSOÑANYA WA MU BIBLE: “Kyokya kikuna muntu shi kika shi kika, e kyonka kyakangula.”​—Ngalatea 6:7.

Ikala na bujalale. Ta mutyima ku myaka ya mwana, lūku lwandi ne bukata bwa kilubo kyalongele. Divule mfuto ikwashanga shi i mikwatañane na kilubo​—kimfwa, shi mwana waingidija telefone bibi, ubwanya kumuyata’yo bidi mu bula bwa kitatyi kampanda. Inoko, leka kuloba mu tumyanda tutyetye mwanda’po’tu tukulobejanga.

“Noñanga bukomo bwa kujingulula shi wami mwana wapelenga kukōkela ku kusaka nansha’mba ke ku kusakapo. Kudi kwishila pa kilubo kikatampe kilomba kulemununa ne kakilubo katyetye kalomba kuvuluja.”​—Wendell.

MUSOÑANYA WA MU BIBLE: “Kemwakikolomonai benu bana, kutyina’mba bakanyoñama pa mityima.”​—Kolose 3:21.

Ikala na buswe. Bana bapēlelwanga kwitabija bulemununi ne kwibulonda shi bayukile amba buswe bo butonona bambutwile bebalemunune.

“Shi wetu mwana walonga kilubo, tumukulupijanga’mba twadi tumwitemba pa butyibi bonso buyampe bwaadi ukwata mafuku kunyuma. Tumushintulwilanga’mba kilubo kyandi kekibwanyapo kona bumuntu bwandi shi alonge bukomo bwa kwilemununa ne amba tudi’ko mwanda wa kumukwasha elemunune.”​—Daniel.

MUSOÑANYA WA MU BIBLE: “Buswe budi na kitūkijetyima ne kanye.”​—1 Kodinda 13:4.