Shi kudi bubinga bwa kukulupidila’mba masusu akapwanga, nabya luno kulupilo lubwanya kulumbulula muswelo otumona būmi ne Leza.

Bantu bavule basakanga kupwa masusu, ino kebadipo na bukomo bwa kupwa’o. Tala myanda ilonda’ko:

Nansha byaendelela kiñanga kumeso . . .

• Misongo ya dityima ipayanga bantu bavule bininge.

• Misongo ya dyaya ipayanga midiyo ne midiyo ya bantu mwaka ne mwaka.

• Dokitele David Bloom walembele mu julunale umo (Frontiers in Immunology) amba: “Ntanda ikyendelela kwikonda na mwa kupwijija misongo isambuka ileta byaka.”

Nansha matanda amo byoapeta bininge . . .

• Mwaka ne mwaka, bana midiyo ne midiyo bafwanga kadi boba bashikete mu bifuko bilanda bo bene bafwa bininge.

• Bantu midiyala ne midiyala kebadipo na bifuko biyampe bya bukundwe.

• Bantu midiyo tutwa na tutwa kebatomengapo mema mayampe.

Nansha bantu byobayuka bininge byepelo bya bantu . . .

• Lapolo ya Kitango kya Bumo bwa Mizo inena’mba, matanda mavule akyendelela kusunga bantu, kadi matanda keakutengapo boba basunga bantu mwanda wa “ba lupusa kebayukilepo bya kulonga.”

  YUKILA’KO BIVULE

  Tala video inena’mba, Le Bulopwe bwa Leza I Bika? idi pa jw.org.

Leza witutele mutyima.

Kedilwepo misanshi ne masusu etu.

“[Leza] kafutulwilepo nansha kukwatwa mukenye masusu a yewa umweshibwa malwa; kamufilepo mpala yandi. Pawaabije bukwashi kwadi, wamwivwene.”​—ÑIMBO YA MITŌTO 22:24.

“[Elai] kuzumbazumba kwenu konso kwadi, mwanda aye wimutele mutyima.”​—1 PETELO 5:7.

Masusu keakendelelapo nyeke.

Bible ulaile amba byobya bilanga kwitulongela Leza bikafikidila.

“Leza . . . ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.”​—KUSOKWELWA 21:3, 4.

Leza ukatalula’ko bintu bisusula bantu.

Ukebitalula’ko kupityila ku Bulopwe bwandi.

“Leza wa mūlu ukemika bulopwe kebukonakanibwapo nansha dimo. Kadi buno bulopwe kebukapebwapo bantu bakwabo, mhm. . . . Abo kete bukemananga nyeke.”​—DANYELE 2:44.