Le Bya Busendwe Bidi na Lupusa’ka pa Bobe Bana?
“Bantu batame babwanya kukomenwa kuyuka mwa kwingidijija bya busendwe bipya ne mampangiko adi’mo, inoko bana i bebidile bya busendwe, o mwanda kobadi i mwanda upēla.”
Ne kadi bantu bamo bamwene amba bankasampe bapityija kitatyi kilampe pa Entelenete bafikilanga ku . . .
-
kumunwa bininge na bya busendwe.
-
kunena bakwabo bintu bibi pa Entelenete.
-
kutala porno ku kusaka nansha pampikwa kusaka.
BYOFWANINWE KUYUKA
KUMUNWA NA BYA BUSENDWE
Myanda imo ya pa Entelenete, kimfwa kukaya’po makayo, imwekanga bu isangaja. I bikomo muntu kuleka kwiakaya. Dibuku dimo (Reclaiming Conversation) dinena’mba, “mampangiko a mu matelefone etu i matūlwe’mo mwanda’tu wa twikale kitatyi kyonso ku matelefone.” Bansunga bamwenanga’mo bininge shi tutala kyaba kilampe mampangiko a bya busunga mu matelefone etu.
LANGULUKA’PO: Lelo bobe bana bamweka bu balamete bininge ku bingidilwa byabo bya busendwe? Le ubwanya kwibakwasha namani bengidije biyampe kitatyi kyabo?—BENE EFISESA 5:15, 16.
KUNENA BIBI PA ENTELENETE
Bantu bamo pobadi pa Entelenete, beendejanga mu muswelo mubi ne kuleka kuta mutyima ku mwiivwanino wa bakwabo—bintu bibwanya kususula bakwabo.
Bantu bamo baloñanga bintu mu muswelo wampikwa kufwaninwa pa Entelenete, mwanda wa kuswibwa nansha kulondwa na bantu. Kadi muntu ubwanya kufītwa nansha kulanga’mba bantu kebadipo nandi biyampe shi kebamwityilepo ku fetyi.
LANGULUKA’PO: Le bobe bana bengidijanga Entelenete mu muswelo muyampe? (Bene Efisesa 4:31) Lelo bafītwanga shi bakwabo kebebetyilepo pobalonga kintu kampanda?
PORNO
I bipēla bininge kutala bintu bya disubi pa Entelenete. Bambutwile bafwaninwe kuyuka’mba nansha shi abalonga bukomo bwa kuyuka bitala bana, ino bana bamo bendelelanga kutala bintu bibi.
Kwitumina misapu ya busekese—kutuma nansha kutambula bifwatulo bya bukena, nakampata ku telefone, kubwanya kutyumuna bijila bya Leta. Kyaba kimo, kukwatañana na bijila bya kwenu ne myaka ya bene betumina’byo, bantu betumina bifwatulo bya busekese babwanya kulambikwa mambo amba i batadije mwana porno.
LANGULUKA’PO: Le i muswelo’ka obwanya kukwasha bobe bana bakomene ditompo dya kutala nansha kutuma bifwatulo bya busekese pa Entelenete?—BENE EFISESA 5:3, 4.
BYOBWANYA KULONGA
FUNDIJA BOBE BANA
Nansha bana byobapēlelwanga kwingidija bya busendwe, ino bakisakilwa kukwashibwa. Dibuku dimo (Indistractable) dinena’mba, kupa bana telefone ya katutu nansha kingidilwa kikwabo abo kebaikele na bwino bwa kwikingidija, “kudi pamo bwa kwibaleka bakidile mu mema abo papo kuyuka kusumba mpika.”
MUSOÑANYA WA MU BIBLE: “Fundija mwana dishinda dyafwaninwe kwenda’mo; nansha shi wanunupa kakasāsuka’mopo.”—NKINDI 22:6, KUNSHI KWA DYANI.
Tonga’po madingi okasaka kwingidija, nansha kulemba milangwe yobe.
-
Kwisamba na wami mwana pa mwa kwikadila na bulēme pa Entelenete
-
Kukwasha wami mwana aleke kwimona’mba kebamuswelepo
-
Kulonga bukomo bwa kukinga wami mwana ku bintu bibi bya pa Entelenete
-
Kubandaula telefone ya wami mwana kyaba kimokimo
-
Kumutūdila bula bwa kitatyi kya kwingidija telefone difuku ne difuku
-
Kupeleja wami mwana kwingidija bya busendwe pa butanda bufuku
-
Kumupeleja kwingidija bya busendwe potudya byakudya
Tala'po Bidi ne Bino:
BUSONGI NE KISAKA
Le Wami Mwana Ufwaninwe Kwikala na Telefone Itwela pa Entelenete?
Wiipangule bino bipangujo pa kuyuka shi abe ne obe mwana mwi beteakanye kwiingidija.
BUSONGI NE KISAKA
Mwa Kufundijija Bana Bengidije Telefone na Tunangu
Enka ne bana bayukile bintu bivule mu bya busendwe, basakilwa bambutwile ba kwibafundija mwa kwingidijija telefone itwela pa Entelenete mu muswelo muyampe.
