Shi tunyema bantu kampanda botumona bibi, mboloji yetu ibwanya kuvudila’ko. Kadi shi tupwana’nka na bantu badi bwa batwe, tubwanya padi kulanga’mba muswelo umo kete witabijibwe i muswelo otulanga, otwiivwana ne otulonga bintu.

“Shitulai mityima yenu bikatampe.”​—2 BENE KODINDA 6:13.

Le ushintulula bika? “Mutyima” wetu ubanya kufunkila pa malangatyima ne kisanso kyetu. Shi tusenswe enka bantu badi bwa batwe, nabya mutyima wetu ukekala mushite. Pa kuleka kwikala na ano makambakano, tufwaninwe kupwana ne na bantu kebadipo bwa batwe.

Kitatyi kyotuyuka bakwetu, tushilulanga kwivwanija kine kyobalongela bintu mu muswelo mwishile. Kadi kitatyi kyotwibafwena bininge, tushilulanga kwibamona bu bantu ba kwetu. Twibamonanga na bulēme bininge, ne kwivwana nsangaji nansha bulanda bobadi nabo.

Tulangulukilei pa kimfwa kya Nazaré. Kyaba kimo wadi na mboloji pa beni. Ushintulula bintu byamukweshe amba: “Nadi mpityija nabo kitatyi pamo kadi ñingila nabo. Netene na bantu badi beshile na byobadi bebanenena. Shi ubapwana na bantu ba kibidiji kingi, kubwanyapo kwikala na mboloji pobadi, kadi ukebasanswa bininge ne kwibamona na bulēme.”

Kimba miswelo ya kwisamba na bantu ba ku ntanda ingi, kabila, nansha ndimi ingi. Ubwanya

• Kwibanena bakulombole myanda mityetye ibatala.

• Kwibeta mudye nabo byakudya.

• Kwibateja pobesamba myanda yabo, ne kukimba kuyuka biyampe bidi mobadi.

Shi ulonge bukomo bwa kwivwanija bintu bibafikila, bilengeje bekale mobekadile, nabya ukamona bantu ba kwabo biyampe.