Kinenenwa’mba Malondololo Adi na Kamweno
I kika kinenenwa’mba kuyuka shi Umpangi udi’ko kudi na kamweno? Shi kudi bukamoni bukukulupija’mba Leza mwinē bukomo bonso udi’ko, nabya ukasaka kubandaula bukamoni bulombola’mba i aye wālembeje Bible. Kadi shi ukulupile binena Bible, nabya ubwanya kumwena’mo bintu bilonda’ko’bi.
Ukasangela būmi bininge
BIBLE UNENA’MBA: “[Leza wālongele biyampe], na kwimupa mvula wa mūlu ne bitatyi bya kupa bipa, wimwikutyija byakudya ne kuyuja nsangaji mu mityima yenu.”—Bilongwa 14:17.
MOBISHINTULWILA: Bintu byonso byosangela mu bupangi bwa ntanda i kyabuntu kitambile kudi Umpangi. Ukafwija’ko bininge pa bino byabuntu kitatyi kyojingulula’mba Leza ukutele mutyima bininge.
Ukatana madingi mayampe abwanya kukukwasha tamba’nka pano
BINENA BIBLE: “Ukevwanija kyokya kyoloke ne kilulame ne kyendele’mo, dishinda dyonso dya kyokya kiyampe.”—Nkindi 2:9.
MOBISHINTULWILA: Byadi Umpangi obe, Leza uyukile byosakilwa pa kusaka wikale na nsangaji. Ubwanya kwifunda bintu bivule byobwanya kumwena’mo tamba’nka pano shi utanga Bible.
Ukatana malondololo ku bipangujo byobe
BINENA BIBLE: “Ukatana buyuki bwa Leza.”—Nkindi 2:5.
MOBISHINTULWILA: Kuyuka’mba Umpangi udi’ko, kubwanya kukukwasha utane malondololo ku bipangujo bya mvubu mpata, kimfwa amba: I kika kyotwikadile’ko? Mwanda waka kudi masusu mavule nenki? Le twikalanga namani shi tubafu? Ukatana malondololo mayampe mu Bible.
Ukekala na lukulupilo lwa mu mafuku a kumeso
BINENA BIBLE: “‘Ndyukile biyampe milangwe yonemulangila,’ i Yehova unena, ‘milangwe ya ndoe, ke ya kyamalwapo, mwanda wa kwimupa būmi bwa kumeso ne lukulupilo.’”—Yelemia 29:11.
MOBISHINTULWILA: Leza i mulaye amba mu mafuku a kumeso usa kutalula’ko bibi, masusu, ne lufu lwine. Shi ukulupile mu milao ya Leza, kikulupiji kyobe kya mu mafuku a kumeso kikakukwasha ūminine na kininga masusu akutana difuku ne difuku.
Tala'po Bidi ne Bino:
LANGUKAI!
Dishinda dya Būmi bwa Nsangaji—Kitungo mu Būmi
Kutana malondololo ku bipangujo bya mvubu mu būmi kuletanga nsangaji.
