I muswelo’ka otukokeja kubweja bulumbuluke ku lwitabijo lwetu
I muswelo’ka otukokeja kubweja bulumbuluke ku lwitabijo lwetu
“Bwejai ku lwitabijo lwenu bulumbuluke.”—2 PETELO 1:5, MN.
YEHOVA wingilanga nyeke na bulumbuluke. Uloñanga biyampe ne byoloke. Omwanda mutumibwa Petelo wesambile padi Leza’mba waityīle bakristu bashingwe-māni “ku ntumbo ya aye mwine ne bulumbuluke bwandi.” Kuyukidija kwabo kwabinebine kwa Shabo wamūlu mulumbuluke, kwebalombwele byobādi bafwaninwe kulonga mwanda wa kwikala na būmi bulombola bwineleza bwabinebine.—2 Petelo 1:2, 3.
2 Mutumibwa Polo usoñanyanga bakristu ‘beule Leza bu-bana bakuswedibwa.’ (Efisesa 5:1) Na kulonda kimfwa kya Shabo wamūlu, batotyi ba Yehova bafwaninwe kwikala balumbuluke mu byaba byonso. Ino lelo bulumbuluke i kika?
Bulumbuluke i kika
3 Mabuku mavule a panopano ashintululanga “bulumbuluke” bu “mwikadila muyampe bininge; buyampe.” I “bululame bwa mu bilongwa ne mu milangwe; ngikadila miyampe.” Muntu mulumbuluke i moloke. Kadi ibashintulule bulumbuluke bu “bukomo bwa mu mwikadila busaka nyeke kulongela mungya ndudi.” Eyo, ku bakristu, “ndudi” nansha mbila imitulweko kala na Leza ne imilombolwe senene mu Kinenwa kyandi Kikola, Bible.
4 Bakristu babine bakokelanga ku misoñanya ya boloke ya Yehova Leza ne balombolanga lwitabijo mu milao yandi ya buleme. Kadi balondanga ano madingi a Petelo: “Na kulonga bukomo bwenu bonso ku wenu mutamba, bwejai ku lwitabijo lwenu bulumbuluke, ku bulumbuluke bwenu buyuki, ku buyuki bwenu kwīfula, ku kwīfula kwenu kūminina, ku kūminina kwenu bwineleza, ku bwineleza bwenu buswe bwa bubana-nabana, ku buswe bwenu bwa bubana-nabana kisanso.” (2 Petelo 1:5-7, MN) Mukristu ufwaninwe kulonga bukomo bwandi bonso mwanda wa kutamija ino ngikadilo yonso. Kakokejapo kwikibwanya mu mafuku matyetye kete nansha mu myaka mityetye kete, kino kilombanga kutakamana nyeke na kulonga bukomo. Kifwaninwe kuyuka’mba kubweja ku lwitabijo lwetu bulumbuluke bine ke mwandapo upela.
5 Mwifundi umo wa shintulwilo ya bishima, M. R. Vincent, wanene’mba buluji bwakala bwa kino kishima kya mu Kigreke kyalamwinwe bu “bulumbuluke” bufukilanga pa “kunengela kwa mu miswelo yonso.” Petelo i mwikingidije mu buvule pānene bakristu’mba bafwaninwe kusapula “byobya byabuya” nansha bilumbuluke, bya Leza. (1 Petelo 2:9) Mungya buluji bwa mu Bisonekwa, bulumbuluke kebulombwelwepo bu kintu kya kubulwa bukomo ino i “bukomo bwa mu mwikadilo, kyanga kya mu mwikadilo, nansha bupyasakane bwa muñeni.” Pa kutela bulumbuluke, Petelo wādi usaka kwisambila pa bukankamane bwa mu mwikadilo munengele ufwaninwe kulombola bengidi ba Leza ne kwiulama nyeke. Byotudi bakubulwa kubwaninina, lelo tukokeja kulonga byobya bilumbuluke binebine kumeso a Leza?
Bakubulwa kubwaninina inoko balumbuluke
6 Twibapyane kubulwa kubwaninina ne bubi, omwanda tukokeja kwiipangula muswelo otukokeja kubwanya kulonga byobya bilumbuluke binebine kumeso a Leza. (Loma 5:12) Bine tufwaninwe bukwashi bwa Yehova shi tusaka kwikala na mityima itōka ya kulupula milangwe milumbuluke, binenwa bilumbuluke, ne bilongwa bilumbuluke. (Ezankanya Luka 6:45.) Pakupwa kulonga bubi mu mwanda wa Bafesheba, Davida kaimba wa mitoto wa kwisāsa wādi kaabija’mba: “Umpangululemo mutyima utōka, abe Leza; kadi ungalamune mushipiditu umpya wabukankamane mudi ami.” (Mitoto 51:10) Davida watambwile kulekelwa mambo na Leza ne bukwashi bufwaninwe mwanda wa kwendelela na kulondalonda bulumbuluke. Pa kino, shi tubalonga bubi bukatampe, ino tubesāsa ne kwitabija kutambula bukwashi bwa Leza ne bwa bakulumpe ba pa kipwilo, tukokeja kujokela mu ngikadilo ya bulumbuluke ne kushala nyeke monka.—Mitoto 103:1-3, 10-14; Yakoba 5:13-15.
7 Pamwanda wa bubi botwapyene, tufwaninwe kwendelela nyeke na kulwa divita mwanda wa tumone muswelo wa kulonga bitusakila bulumbuluke. Shi tusaka kushala nyeke balumbuluke, ketufwaninwepo nansha dimo kwikala bu bapika ba bubi. Ino tufwaninwe kwikala “bapika ba boloke,” na kulanga nyeke, kwisamba ne kulonga bilumbuluke. (Loma 6:16-23) Bine, bilokoloko byetu bya bungitu ne milangwe yetu itukokela nyeke ku bubi, bidi na lupusa lukatampe. Ku mutamba mukwabo nao, tudi na bintu bilumbuluke bitusakila Leza, bilwá divita na buno bukōkekōke. Shi ke pano, i kika kifwaninwe kulonga?
8 Kintu kibajinji, tufwaninwe kulonda bwendeji bwa mushipiditu sandu wa Yehova, nansha bukomo bwandi bwingila. Pa kino, tufwaninwe kulonda ano madingi a Polo: “Nangilai mu mushipiditu, nabya kemukwatwapo ne kilokoloko kya ngitu. Ke-mintu ngitu ikwatwanga na kilokoloko kudi [ao] mushipiditu; mushipiditu [nao] ku ngitu mo monka; ke-bantu bēshintakanyanga abo bene, shinta na shinta; ino kemuloñangapo byobya bintu byo muswele kulonga.” (Ngalatea 5:16, 17) Eyo, mushipiditu wa Leza ye ao witupa bukomo bwa kulonda boloke, kadi Kinenwa kyandi ye akyo kitulombola muswelo wa kwikala na mwiendelejo moloke. Kadi tutambulanga bukwashi bwa kisanso butamba ku bulongolodi bwa Yehova ne madingi a “umpika wabinebine ne wamanwa.” (Mateo 24:45-47) Mu uno muswelo, tukokeja kunekenya bulwi botulwa na ngikadilo yetu itukokela nyeke ku bubi. (Loma 7:15-25) Eyo, shi mulangwe wamunyanji ubatwela mu muñeni yetu, tufwaninwe kwiufundula’mo bukidibukidi ne kulombela Leza etukwashe tukomene byongo byonso bitukokela ku kubulwa bulumbuluke.—Mateo 6:13.
Bulumbuluke ne milangwe yetu
9 Bulumbuluke bushilulanga mu malango a muntu. Pa kutambula buntu bwa Leza, tufwaninwe kulanguluka ku bintu byoloke, biyampe, ne bilumbuluke. Polo wanene’mba: “Banwe bana betu, byonsololo, shi bika, shi bika, bya binebine; byonso bilemekwa buleme, shi bika, shi bika; byonso bya boloke, shi bika, shi bika; byonso bitōka tō, shi bika shi bika; byonso bya buyabuya, shi bika, shi bika; kadi byobya byonsololo bilumbuluke ku meso a bantu bonso, shi kadi namo mudi buleme, ne kutendelwa kwabyo, mufwatakanyei bino bintu bino’bi.” (Fidipai 4:8) Tufwaninwe kwimika malango etu pa byoloke, pa bintu byakubulwa kakoba; pakwabo kadi ketufwaninwepo kukokwa nansha dimo na bintu byakubulwa bulumbuluke. Kadi Polo wanene’mba: “Byobya bintu byo mwafundijibwa ne kutambulabyo, kadi byo mwaivwene ne kumona’byo mudi ami, longai’byo.” Shi pamo bwa Polo—twikale balumbuluke mu milangwe, mu muneneno ne mu bilongwa—nankyo tukekala balunda balumbuluke ne bimfwa bilumbuluke mu dishinda dya bwine kristu, ne ‘Leza wa ndoe ukekala netu.’—Fidipai 4:9.
10 Shi tusakanga kwikala nyeke balumbuluke mu milangwe ne kwikala bayampe kumeso a Tata wetu wamūlu, nankyo tufwaninwe kwingidija ano madingi a Polo, wanene’mba: “Kemukikala twana mu ñeni, ehe, poso mu kiji kya ku mutyima mwikale bwa twana-twa-lukeke, ino mu ñeni namo mwikale bakulumpe.” (1 Kodinda 14:20) Kino kishintulula’mba, byotudi bakristu, ketufwaninwepo kusaka kuyukidija bubi nansha kusaka kutompa’ko bidi. Kyaba kya kuboleja mushipiditu wetu uno muswelo, twikalei na tunangu, twikalei nyeke bu bakubulwa kuyuka kintu ne bu bakubulwa kakoba, pamo bwa twana-tutyetye mu bino bintu. Pakwabo kadi, tuyukile biyampe’mba byabulongelonge ne bilongwa bibi i bubi bukatampe kumeso a Yehova. Shi tudi na kilokoloko kikatampe ne kyabinebine kya kusaka kusangaja mutyima wa Leza na kwikala balumbuluke, tukokeja kukatambula byabuyabuya, mwanda tukankukwa kumutyima tuleke mashinda a munyanji a kusaka kwipwija mukose ne bintu bikwabo bya ino ntanda ilele mu dikasa dya Satana, bikokeja kuboleja ñeni yetu.—1 Yoano 5:19.
Bulumbuluke ne binenwa byetu
11 Shi milangwe yetu i milumbuluke, binenwa byetu ye abyo bikekilombola patoka. Pa kwikala balumbuluke, binenwa byetu bifwaninwe kwikala bitōka, byakubulwa dikeme, byabinebine ne byubaka. (2 Kodinda 6:3, 4, 7) Yehova i “Leza wa binebine.” (Mitoto 31:5) Udi na kikokeji nyeke mu mashinda andi onso, ne milao yandi ifikidilanga nabubinebine, mwanda kakokejapo kubepa. (Umbadilo 23:19; 1 Samwele 15:29; Tetusa 1:2) Yesu Kristu Mwana Leza i “muyūle buntu ne bubinebine ponka.” Pādi pano pantanda, wādi unena nyeke byabine, bubinebine bwatambwile kudi Shandi. (Yoano 1:14; 8:40) Pakwabo kadi, Yesu “kapīlepo mambo nansha kamo, mhm; nansha kyongo mu kyakanwa kyandi mpika.” (1 Petelo 2:22) Shi twibengidi ba Leza babinebine ne ba Kristu, tukesamba nyeke byabine ne kwikala nyeke na mwiendelejo moloke, pamo bwa batwe bavwele “mu munda binebine.”—Efisesa 5:9; 6:14.
12 Shi twibalumbuluke, kudi mineneno imo imo yotufwaninwe kuleka. Tukaludikwa na ano madingi a Polo: “Kadi mufundulei ko mudi bululu bonso, ne bukalabale, ne kufuna bulobo, ne lupotopoto, ne lubabo, ne kiji kyonsololo kumo.” “Ino busekese, ne kujilula konso kwa bijila, ne kwabila kwine, kebikatelwa nansha dimo dine umbukata mwenu, mhm, e mufwaninwe bapandulwemo. Nansha bibibibi bya bumvu, nansha misambo ya kubotakanya, nansha mazua mabi byampikwa kufwaninwa; poso kufwija byakufwija.” (Efisesa 4:31; 5:3, 4) Bantu bakamona kisense kyetu bu kiyampe mwanda mutyima wetu moloke witutononanga tuleke kwingidija muneneno wa kubulwa kufwaninwa ku bakristu.
13 Kilokoloko kyetu kya kusaka kusangaja mutyima wa Leza ne kwikala na binenwa bilumbuluke, kiketukwasha tunekenye ludimi lwetu. Pamwanda wa bubi botudi nabo, batwe bonso tukukalanga mu binenwa, mu byaba bimobimo. Ino Yakoba mwana-bwanga wanene’mba “wivwane tutūle lukano mu byakanwa bya tubalwe,” baketukōkela ne bakēnda konso kotukebaludika. Pa kino, tufwaninwe kulonga bukomo bukatampe mwanda wa kutula lukano ku byakanwa byetu ne kupima kwingidija ludimi lwetu mu muswelo mulumbuluke. Ludimi lulekelwe bitupu pa kubulwa kwikākā, “i ntanda ya bubi.” (Yakoba 3:1-7) Mu ino ntanda ya bumpikwaleza yotudimo, ludimi lulekelwe bitupu pakubulwa kikāka, i lukwatañane na bintu byamunyanji bya muswelo ne muswelo. Luletanga musala mukatampe, kimfwa bukamoni bwa mabela, mutonko ne lumvuba. (Isaya 5:20; Mateo 15:18-20) Ne shi ludimi lutomboke lushilule madingi a mifutululo, atapa ku mutyima nansha akusaka kuvubakanya myanda, nankyo i luyūle bulembe buleta lufu.—Mitoto 140:3; Loma 3:13; Yakoba 3:8.
14 Ka na mwikilombwela Yakoba, kikekala kyakubulwa kwendelamo ‘kwesela Yehova’ na kumunenena biyampe koku twingidija ludimi lwetu mu muswelo mubi na kufinga “bantu mafingo,” kushintulula kokunena’mba na kwibanena bibi. Kikekala bubi bukatampe shi twikale kwimba mitendelo ya Leza ku kupwila, kupwa, panja, twashilula kunenena balunda netu mu lwitabijo bibibibi! Kutalala ne bululu, kebikokejapo abyo byonso bibidi kulupuka mu kyakanwa kimo. Shi twingidilanga Yehova, bantu bakwabo betutalanga enka ku kanwa, basakanga twisambe enka bintu bilumbuluke, kulekako kwikala na ludimi lwa nsala-ndulwe. Omwanda tufwaninwe kunyema muneneno onso mubi ne tulongei nyeke bukomo bwa kwisamba bintu bikokeja kwikala na kamweno ne bikokeja kubaka bakwetu kumushipiditu.—Yakoba 3:9-12.
Bulumbuluke ne bilongwa byetu
15 Milangwe ne binenwa bya mukristu byobifwaninwe kwikala nyeke bilumbuluke, ino lelo bilongwa byandi nabyo? Pa kutambula kwitabijibwa na Leza, bine kifwaninwe kwiendeja mu muswelo mulumbuluke. I kutupu mwingidi wa Yehova nansha umo ukokeja kusasuka mu dishinda dya bulumbuluke, ashilule kulonga bikondame ne kwingidija budimbidimbi, ne kufwatakanya’mba Leza witabije mwiendelejo wandi. Nkindi 3:32 unena’mba: “Mupupakane i wa munyanji kudi Yehova; ino [kipwano] kyandi kidi ne balulame.” Shi tusepelelanga kipwano kyetu na Yehova Leza, bino binenwa byamushike biketukankaja kusaka kulonga bibi nansha kulonga shi kika, shi kika kyakubulwa kwendelamo. Mu bintu bisamba-bibidi byamunyanji kumeso a Yehova, mudi ne “mutyima ulangalanga bilongwa bipupakane”! (Nkindi 6:16-19) Shi ke pano, ketufwaninwepo kulonga bilubo bya uno muswelo ne tulongei enka byobya bilumbuluke; balunda netu bakamwenamo byabuyabuya bivule ne Tata wetu wamūlu ukatumbijibwa.
16 Pa kwikala balumbuluke, ketufwaninwepo kwikala na budimbidimbi. (Bahebelu 13:18) Zazangi ulonga bintu byakubulwa kukwatañana na binenwa byandi, ke mulumbulukepo. Kishima kya mu Kigreke kyalamwinwe bu “zazangi” (hy·po·kri·tesʹ) kishintulula “yewa ulondolola” ne ulonga kilongwa kampanda na mu makayo. Bakayi ba makayo mu Bagreke ne mu bene Loma, bādi bavwala bifwebe mwanda wa kwiinanya; penepo bashilula kwingidija kino kishima mu muneneno wa kyelekejo mwanda wa kwisambila pa muntu ulonga kintu koku wiinanya. Banzazangi i boba “bampikwa bubinebine.” (Ezankanya Luka 12:46 na Mateo 24:50, 51, MN.) Buzazangi (hy·poʹkri·sis) bukokeja kadi kufunkila pa bubi ne budimbidimbi. (Mateo 22:18; Mako 12:15; Luka 20:23) Kisansanga bininge, shi muntu wabinebine wajingulula motudi tusepo twa bubela, kwiswija, nansha bintu bikwabo bimweka bu bya budimbañanyi! Ino, kikankamikanga bininge pa kuyuka’mba tudi kumeso kwa bakristu babinebine bakokeja kutudilwa kikulupiji. Kadi Leza ukeselanga boba balumbuluke ne bakubulwa buzazangi. Boba badi na buswe bwa “kuswa banabenu betabije kwampikwa buzazangi” ne badi na “lwitabijo lwa kubulwa buzazangi” ye abo betabijibwe kudi aye.—1 Petelo 1:22, MB; 1 Temote 1:5.
Bulumbuluke bushinsakanyanga buyampe
17 Shi tubweje bulumbuluke ku lwitabijo lwetu, tukeelelako tuleke kwikala na milangwe, binenwa nansha bilongwa byakubulwa kufwaninwa kumeso a Leza. Inoko, pa kulombola bulumbuluke bwa bwine kristu, tufwaninwe ne kulombola buyampe. Nabubine bulumbuluke ne buyampe byendelanga pamo. Pakwabo kadi, buyampe i kipá kya mushipiditu sandu wa Yehova, kebutambengapo ku bukomo bwa bantu abo bene. (Ngalatea 5:22, 23) Kino kipá kya mushipiditu, buyampe, kiketutonona twikale kulangila bakwabo biyampe, nansha byobadi bakubulwa kubwaninina, tukatendela ngikadilo yabo milumbuluke. Lelo kebalale myaka mivule mu mwingilo wa Yehova? Nankyo tufwaninwe kwibapa buleme, ne kwisambila biyampe pobadi ne pa mwingilo wabo wa kudi Leza. Tata wetu wamūlu utenekwanga ku mutyima bininge na kisanso kyobalombola pamwanda wa dijina dyandi ne pamwanda wa mingilo yabo milumbuluke ya lwitabijo, batwe netu tufwaninwe kutenekwa ku mutyima mu muswelo umo onka.—Nehemia 13:31b; Bahebelu 6:10.
18 Bulumbuluke bwitupanga kitukije-tyima, mutyima wa kwivwana masusu a bakwabo, ne mutyima wa lusalusa. Shi mutōtyi wa Yehova kampanda udi mu masusu nansha shi udi na njia, tufwaninwe kwikala na muneneno utalaja mukwetu mutyima, ne tukapima kumusenga pa mutyima, na mwitusengela Tata wetu wamūlu. (2 Kodinda 1:3, 4; 1 Tesalonika 5:14) Tukekala na mushipiditu wa kutá mutyima ku masusu a boba badi mu tusuwa, padi i pamwanda wa lufu lwa mukena wabo. Shi tukokeja kulonga kintu kampanda mwanda wa kutalaja masusu abo, nankyo tukekilonga, mwanda mushipiditu mulumbuluke uketutakika tulonge bilongwa bilumbuluke, bilongwa bilombola kisanso.
19 Shi twikale kwesela Yehova na kumunenena biyampe, nankyo netu bantu baketwesela shi twikale balumbuluke mu milangwe, mu binenwa ne mu bilongwa. (Mitoto 145:10) Lukindi lumo lwa tunangu lunena’mba: “Bya madyese bidi pa mutwe wa mōloke: ino bingojila bipūta kyakanwa kya bapupakane.” (Nkindi 10:6) Yewa wa bingojila ne mukalabale kadipo na bulumbuluke bukokeja kumuswija ku bakwabo. Wangulanga byobya byakuna, mwanda mungya buluji, bantu kebakokejapo kumwesela na kumunenena biyampe. (Ngalatea 6:7) I biyampe kulanga, kunena ne kulonga mu muswelo mulumbuluke na kwingidila Yehova! Mu uno muswelo, ukokeja kupebwa kisanso, buleme ne kukulupilwa na bakwabo, bikebakunka ku mutyima bakashilule kwitwesela ne kwitunenena biyampe. Pakwabo kadi, buno bulumbuluke bwa bwineleza buketuletela byabuyabuya byakutendelwa bininge bitamba kudi Yehova.—Nkindi 10:22.
20 Bine, milangwe, binenwa, ne bilongwa bilumbuluke i madyese makatampe ku kipwilo kya bantu ba Yehova. Shi balunda netu mu lwitabijo badi na kipwano ne buleme, nankyo buswe bwa bubana-nabana bukekala umbukata mwabo. (Yoano 13:34, 35) Muneneno mulumbuluke, wimanine pa kufwijako bakwabo, ne kwibakankamika, ukokeja kulupula milangwe isenga ku mutyima, kwingidila pamo ne kwikuta umbumo. (Mitoto 133:1-3) Pakwabo kadi, bilongwa bya kyanga ne bilumbuluke bikatakika bakwabo nabo balongele monka. Nakampata, kwingidija bulumbuluke bwa bwine kristu, kuketupa muswelo wa kwitabijibwa na Tata wetu wamūlu mulumbuluke, Yehova. Tufwaninwe nanshi kwitungila kitungo kya kulombola lwitabijo mu milao ya buleme itulaile Leza! Ne ketufwaninwepo kwikākā kulonga bukomo bukatampe mpata mwanda wa kubweja ku lwitabijo lwetu bulumbuluke.
[Bipangujo]
1, 2. Mwanda’ka bengidi ba Yehova bafwaninwe kwikala balumbuluke?
3. I muswelo’ka ushintulwilwe “bulumbuluke”?
4. I ngikadilo’ka ilombwelwe mu 2 Petelo 1:5-7 ifwaninwe bakristu kuputumina mwanda wa kwiitamija?
5. Bulumbuluke mungya buluji bwa Bisonekwa, lelo i kika?
6. Nansha byotudi bakubulwa kubwaninina mwanda’ka tukokeja kunena’mba tubwanya kulonga bilumbuluke kumeso a Leza?
7, 8. (a) I kika kyotufwaninwe kulonga mwanda wa kwikala nyeke balumbuluke? (b) I bukwashi’ka butambula bakristu mu dishinda dya bulumbuluke?
9. Mwiendelejo mulumbuluke wimanine pa milangwe ya muswelo’ka?
10. Kwingidija 1 Kodinda 14:20 kukokeja kwitukwasha muswelo’ka twikale nyeke balumbuluke?
11. Pa kwikala balumbuluke, tufwaninwe kwisamba muswelo’ka, ne i bimfwa’ka bilumbuluke bitupele Yehova Leza ne Yesu Kristu mu kino kipindi?
12. Shi tusaka kwikala balumbuluke, i muneneno wa muswelo’ka otufwaninwe kuleka?
13. Mwanda’ka bakristu bafwaninwe kunekenya ludimi lwabo?
14. I ndimi’ka ibidi keifwaninwe bakristu kwingidija?
15. Mwanda’ka ketufwaninwepo kunyemena ku mashinda a bukondame?
16. Mwanda’ka bakristu kebafwaninwepo kwikala na buzazangi?
17, 18. Shi tulombolanga kipá kya mushipiditu, buyampe, tukamona bakwabo muswelo’ka?
19. I muswelo’ka ukokeja kuketumona bantu bakwabo shi twikale balumbuluke mu milangwe, mu binenwa ne mu bilongwa?
20. Milangwe, binenwa, ne bilongwa bilumbuluke bikokeja kwikala na lupusa’ka mu kipwilo kya bantu ba Yehova?
[Bilembwa bya pa Bifwatulo]
Mwanda mema atalala ne mema alula keakokejapo kutamba ku nsulo imo yonka, kino kishintulula’mba bengidi ba Yehova bafwaninwe kunena enka bintu bilumbuluke
Mukalondolola namani?
◻ I muswelo’ka ushintululwa “bulumbuluke” ne mwanda’ka bantu bakubulwa kubwaninina bakokeja kwikala balumbuluke?
◻ Bulumbuluke bwitusakilanga twikale na milangwe ya muswelo’ka?
◻ Bulumbuluke bufwaninwe kwikala na lupusa lwa muswelo’ka mu muneneno wetu?
◻ Bulumbuluke bufwaninwe kwikala na lupusa’ka mu bilongwa byetu?
◻ I byabuyabuya’ka bitana bantu balumbuluke?