Tulondololei ku milao ya Leza na kulombola lwitabijo

“Ko kwetupele [Yehova Leza] myanda yandi ya milao mileme ītabukilemo bukatampe.”​—⁠2 PETELO 1:⁠4.

YEHOVA witusakilanga tulombole lwitabijo mu milao yandi. Inoko, “bonso kebadipo ne kwitabija, mhm.” (2 Tesalonika 3:⁠2) Ino ngikadilo i kipá kya mushipiditu sandu wa Leza, nansha kya bukomo bwandi bwingila. (Ngalatea 5:​22, 23) Shi ke pano, enka boba bendejibwa na mushipiditu wa Yehova ye abo kete bakokeja kulombola lwitabijo.

² Ino lelo lwitabijo i kika? Mutumibwa Polo wilutelanga’mba i “bulombodi bwa patokelela bwa bintu bidiko bine, inoko byakubulwa kumweka.” Buluji bwa bino byabinebine byakubulwa ­kumweka bukulupijanga bininge, omwanda banenanga’mba lwitabijo lwimanine pa bukamoni bwabinebine. Kadi Polo imutele lwitabijo’mba i “kutengela pa kubulwa malangalanga kwa bintu ­bikulupilwe,” mwanda boba badi na ino ngikadilo ­bamwene bintu byonso bilaile Yehova Leza bu byabinebine ne pamo ka na bwa kebipwe kala kufikidila.​—⁠Bahebelu 11:⁠1, MN.

Lwitabijo ne milao ya Yehova

³ Pa kwikala balumbuluke kumeso a Yehova, tufwaninwe kulombola lwitabijo mu milao yandi. Ye akyo kyalombwele mutumibwa Petelo mu mukanda wandi wabubidi wa kubukomo bwa mu­shipiditu, wasonekele mu mwaka wa 64 K.K. Wasapwile’mba shi balunda nandi bakristu ­bashingwe-māni a kumushipiditu balombole lwitabijo, amba nankyo bakamonanga kufikidila kwa “myanda ya milao mileme itabukilemo bukatampe” ilailwe na Leza. Ebiya, bādi “bakwiabila [ku] bu-Leza” bu bampyana-pamo na Yesu Kristu mu Bulopwe bwa mūlu. Kupityila ku lwitabijo lwabo ne ku bukwashi bwa Yehova Leza, baikele “kupanda” ku bupika bwa bibidiji ne bisela byamunyanji bya bwine ntanda. (2 Petelo 1:​2-4) Langulukaipo bidi! Dyalelo nadyo boba balombola lwitabijo lwabinebine nabo basepelelanga mu buno bwanapabo bwabinebine.

⁴ Lwitabijo mu milao ya Yehova ne kufwijako kwetu kwa pamwanda wa bwanapabo bwitupele Leza, bifwaninwe kwitutonona tulonge bukomo bwetu bonso twikale bakristu ba kimfwa kilumbuluke. Petelo wanene’mba: “Na kulonga bukomo bwenu bonso ku wenu mutamba, bwejai ku lwitabijo lwenu bulumbuluke, ku bulumbuluke bwenu buyuki, ku buyuki bwenu kwīfula, ku kwīfula kwenu kūminina, ku kūminina kwenu bwineleza, ku bwineleza bwenu buswe bwa bubana-nabana, ku buswe bwenu bwa bubana-nabana kisanso.” (2 Petelo 1:​5-7, MN) Petelo imwitupe mulongo wa ngikadilo yotufwaninwe kulama ku mutwe. Pano tubandaulei ino ngikadilo kamo ne kamo.

Bipindi bya lwitabijo bya kamweno kakatampe

⁵ Petelo unena’mba: bulumbuluke, buyuki, kwīfula, kūminina, bwineleza, buswe bwa bubana-nabana ne kisanso, ino ngikadilo yonso ifwaninwe kubwejibwa ku lwitabijo, kamo ne kamo, moīlondela senene. Tufwaninwe kulonga bukomo bukatampe mwanda wa bikale bu bipindi bya kamweno kakatampe bya lwitabijo lwetu. Shi ke pano, bulumbuluke ke ngikadilopo yotukokeja kulombola pa kubulwa lwitabijo. Mushintuludi umo wa bishima, W. E. Vine, ushintulula’mba mu 2 Petelo 1:​5, “bulumbuluke i butentekelweko bu ngikadilo ya kamweno kakatampe mu kulombola lwitabijo.” Ino ngikadilo yonso, kamo ne kamo, itelelwe na Petelo, nayo ifwaninwe kwikala bu kipindi kya lwitabijo lwetu.

⁶ Dibajinji i bulumbuluke botufwaninwe kubweja ku lwitabijo lwetu. Kwikala mulumbuluke i kulonga biyampe kumeso a Leza. Kino kishima kya mu Kigreke kyalamwinwe bu “bulumbuluke,” bwalamuni bukwabo ibwikyalamune bu “mwikadilo muyampe.” (MB) Bulumbuluke bwitukankajanga kulonga bibi nansha kulubila balunda netu. (Mitoto 97:10) Bwitupanga bukankamane bwa kulongela bakwabo biyampe kumushipiditu, ku ngitu nansha mu myanda itala buswe.

⁷ Mwanda’ka Petelo witusoñanyanga kubweja buyuki ku lwitabijo ne ku bulumbuluke bwetu? Mwanda, bitulwanga lwitabijo lwetu mu matompo kitatyi kyonso, tufwaninwe kwikala na buyuki mwanda wa kumona muswelo wa kusansanya biyampe ne bibi. (Bahebelu 5:14) Bwifundi bwa Bible ne kumonamona kwa bintu bivule mu kwingidija Kinenwa kya Leza ne mu kwingidija tunangu kitatyi kyonso umbūmi, bitupanga muswelo wa kuvudija buyuki bwetu. Ne buno buyuki bwitukwashanga tulame lwitabijo lwetu ne twendelele na kwiendeja mungya bulumbuluke kitatyi kyotudi mu matompo.​—⁠Nkindi 2:​6-8; Yakoba 1:​5-8.

⁸ Pa kumona muswelo wa kulama lwitabijo mu matompo, tufwaninwe kubweja ku buyuki bwetu kwīfula. Kishima kya mu Kigreke kyalamwinwe bu “kwīfula” kidi na mulangwe wa kwibikala abewamwine. Kino kipá kya mushipiditu wa Leza kitukwashanga twikale kwibeja mu milangwe, mu binenwa ne mu bilongwa. Shi tutakamane nyeke na kwīfula, nankyo tukabwejako ne kūminina. Kishima kya mu Kigreke kyalamwinwe bu “kūminina” kishintulula kūma pototo kutentekelapo ne kininga, pakubulwa kulekabyo nansha kufitwa mutyima mu matompo okukokejapo kwepa. Yesu waūminine mutyi wa masusu pamwanda wa nsangaji yādi imulailwe. (Bahebelu 12:⁠2) Bukomo bupana Leza, kutentekelapo ne kūminina, bikomejanga lwitabijo lwetu ne kwitukwasha tusepelele mu tusuwa, tukomene byongo ne kushala na kikokeji kitatyi kyotutanwa na kupangwapangwa.​—⁠Fidipai 4:13.

⁹ Ku kūminina kwetu tufwaninwe kubwejako bwineleza​—⁠bwimanine pa kwakamwa, kutota ne kwingidila Yehova. Tukokeja kutama mu lwitabijo na kwingidija bwineleza ne na kumona muswelo ukwatakanya Yehova bantu bandi. Inoko pa kulombola bwineleza, tufwaninwe kwikala na buswe bwa bubana-nabana. Ke-pantu, “yewa wakubulwa kuswa mwanabo o bemwene nandi, kayukapo kuswa Leza o kebemwene nandi.” (1 Yoano 4:20) Mutyima wetu ufwaninwe kwitutakika twikale na buswe bwabinebine ku balunda netu mu mwingilo wa Yehova ne tufwaninwe kitatyi kyonso kwibasakila enka biyampe. (Yakoba 2:​14-17) Ino mwanda’ka witunena’mba ku buswe bwenu bwa bubana-nabana bwejaiko ne kisanso? Ikimweke patoka, Petelo witusoñanyanga’mba tufwaninwe kusanswa bantu bonso, ketufwaninwepo kusanswa enka banabetu kete. Kino kisanso kilombolwanga nakampata kupityila ku busapudi bwa myanda miyampe ne na kukwasha bantu kumushipiditu.​—⁠Mateo 24:14; 28:​19, 20.

Bipá bya muswelo mukwabo

¹⁰ Shi tubweje ku lwitabijo lwetu bulumbuluke, buyuki, kwīfula, kūminina, bwineleza, buswe bwa bubana-nabana ne kisanso, nankyo tukashilula kulanga ne kulonga mungya masakila a Leza. Ku mutamba mukwabo nao, shi muntu witela bu mukristu inoko pakubulwa kulombola ino ngikadilo, ukekala pamo bwa mpofu kumushipiditu. ‘Uputanga meso ku mwinya’ wa Leza ne imuvulaminwe’mba waikele kutōkejibwa ku bubi ­bwandi bwakala. (2 Petelo 1:​8-10; 2:​20-22) Ketufwaninwepo kuponena mu dino dishinda dibi ne kujimija lwitabijo lwetu mu milao ya Leza.

¹¹ Bakristu bakikokeji bashingwe-māni badi na lwitabijo mu ino milao ya Yehova ne baloñanga bukomo bwabo bonso mwanda wa bekale bafwaninwe lwito lwabo ne kutongwa kwaebatongele. Nansha byobakokeja kutana mabwe mavule a kwibakukaja, tukokeja kukulupila’mba bakalombolanga ngikadilo ya Leza umbūmi bwabo. Bashingwe-māni bakikokeji, ‘bakapebwanga ­bungibungi, kitwelelo kya monka mu bulopwe bwa nyeke bwa Yesu Kristu,’ kupityila ku lusangukilo lwa būmi bwa kumushipiditu momwa mūlu.​—⁠2 Petelo 1:⁠11.

¹² Petelo wādi uyukile biyampe’mba wādi wakufwa, ne wādi ukulupile, difuku kampanda, kutambula lusangukilo lwa kusangwilwa mōmwa mūlu. Ino byādi ukidi “mu dino dipema”​—⁠umbidi wandi wa bu-ngitu​—⁠wādi ulonga bukomo bwa kūbaka lwitabijo lwa balunda nandi ne kwibalangula na kwibavuluja bintu byādi bibasakila mwanda wa kumona buntu bwa Leza. Kupwa kwa kujimina kwandi mu lufu, ba tutu ne ba kaka bakumushipiditu ba Petelo, bādi bakokeja kukomeja lwitabijo lwabo na kuvuluka binenwa byandi.​—⁠2 Petelo 1:​12-15.

Lwitabijo mu kinenwa kya bupolofeto

¹³ Leza aye mwine walombwele bukamoni bukomeja lwitabijo lwetu pamwanda utala kwiya kwa Yesu na “bulobo ne ntumbo mikatampe mine.” (Mateo 24:30; 2 Petelo 1:​16-18) Babitobo babujentaila bādi bafumika bintu byakubulwa mvubu bitala pa baleza babo, ino ba Petelo, Yakoba ne Yoano bemwenine abo bene ntumbo ya Yesu kitatyi kyaālamukile mpala yandi. (Mateo 17:​1-5) Bamumwene mu ntumbo kadi baivwene diwi dya Leza aye mwine, witabija’mba Yesu i wandi Mwana wasenswe. Kuno kutendelwa kwatendelwe Yesu ne kino kike kya mwinya kyamusāmine, byamupele ñanyi mikatampe ne ntumbo mikatampe. Pamwanda wa kuno kusokwelwa kwa Leza, Petelo waityile kino kifuko, lusongo lwa lūlu lwa Hermoni, bu “lūlu lujila.”​—⁠Ezankanya Divilu 3:​4, 5.

¹⁴ Kwalamuka kwa mpala ya Yesu kufwaninwe kwikala na lupusa’ka mu lwitabijo lwetu? Petelo wanene’mba: “Tudi kadi ne Binenwa bya binebine byafumikilwe. Shi muta’ko mutyima nankyo mulonga biyampe, mwanda bidi bwa kimunyi kimunyikila mu mfindi kufika’nka ne po bukakya, ne mutumbwe wa lubanga nao umunyike mu mityima yenu.” (2 Petelo 1:​19, MB) ‘Binenwa bya bupolofeto’ bisambilwepo bino, bimweka bu ke enkapo bupolofeto bwa mu Bisonekwa bya Kihebelu kete butala pa kwiya kwa Meshiasa, ino bifukilanga ne pa binenwa byanene Yesu’mba ukayanga na “bukomo ne ntumbo mikatampe.” I muswelo’ka waikele bino binenwa bu “bya binebine” kupityila ku kwalamuka kwa mpala yandi? Mwanda kino kingelengele kyalombwele patokelela bubinebine bwa kinenwa kya bupolofeto kitala pa kwiya kwa Kristu mu ntumbo mupebwe lupusa lwa bulopwe.

¹⁵ Mwanda wa kukomeja lwitabijo lwetu, tufwaninwe kutá mutyima ku kinenwa kya bupolofeto. Kino kilomba kwifunda kino kinenwa, kwikibandaula ku kupwila kwa bwine kristu ne kwingidija madingi malumbuluke adimo. (Yakoba 1:​22-27) Kifwaninwe kwitwikadila bu “kimunyi kimunyika mu mfindi” ne kwituletela kitokeji mu mityima yetu. (Efisesa 1:18) I mu uno muswelo umo kete okikokeja kwitukunkuja kufika’nka ne “po bukakya,” nansha pa kumunyika “mutumbwe wa lubanga,” Yesu Kristu, pakelombola mu ntumbo yandi. (Kusokwelwa 22:16) Kuno kusokoka kwandi kukaletanga konakanyibwa kwa bakubulwa lwitabijo, ne kukaletelanga byabuyabuya ku boba balombola lwitabijo.​—⁠2 Tesalonika 1:​6-10.

¹⁶ Bapolofeto ba Leza kebādipo bantu balūku bitupu bādi bafumika bintu byatunangu bikaya kumeso, pa kino Petelo wanene’mba: “Binenwa [bya bupolofeto] byonso bidi mu Bisonekwa, kekudipo kyafumikilwe na muntu ku milangwe yandi aye mwine. Mwanda kekudipo kifumikwa [bupolofeto] nansha kimo kyaile ku kiswamutyima kya muntu, enhe. I [mushipiditu sandu wandi] wādi utangidila bantu, nabo ke banena bya kwa Leza.” (2 Petelo 1:​20, 21, MB) kimfwa, Davida wanene’mba: “Mushipiditu wa Yehova wesambile padi ami.” (2 Samwele 23:​1, 2) Kadi Polo nandi wasonekele’mba: “Bisonekwa byonso i bisonekejibwe na Leza ku [mushipiditu sandu].” (2 Temote 3:​16, MB) Leza byapungulwidile bapolofeto bandi bukomo bwa mushipiditu wandi, tukokeja kwikala na lwitabijo’mba ukafikidijanga milao yandi yonso idi mu Kinenwa kyandi.

Balombwele lwitabijo mu milao ya Leza

¹⁷ Lwitabijo lwa “kibumbo kikatampe” kya batumoni bādiko mu kitatyi kya kumeso kwa Kristu, lwādi lwimanine pa milao ya Yehova. (Bahebelu 11:1–12:⁠1) Kimfwa, Abele walombwele lwitabijo mu mulao wa Leza utala pa “lukunwa” lwādi lwa kukapondakanya mutwe wa “nyoka.” Bambutwile ba Abele, kupebwa kwabo kwa mfuto, kyādi kilombola patokelela kufikidijibwa kwa butyibi bwa Leza. Pa kupangwa mu budimi bwa Edena, Adama ne kyandi kisaka bādile mukate ku byanga bya kumpala yabo, mwanda nshi mifingwe mafingo, yādi ilupula’nka miba ne pimbye kete. Abele wādi umona’mba kusaka kwa Eva, wādi unyemena enka kudi wandi mulume, ne Adama wādi umutādile. Bine Eva wādi wibalombola bisanso byādi wivwana pa dimi dyandi. Kadi kitwelelo kya mu budimi bwa Edena kyādi kilaminwe na bakelubi ne na lupete lwa bui. (Ngalwilo 3:​14-19, 24) Bino bintu byonso byādi pamo bwa “bulombodi bwa patokelela” bwādi bupa Abele kikulupiji’mba bunyongolodi bukatambanga ku lukunwa lulailwe. Abele, pamwanda wa lwitabijo, walambwile kudi Leza kitapwa kyelombwele bu kyabuleme bukatampe kutabuka kya Kena.​—⁠Bahebelu 11:​1, 4, MN.

¹⁸ Bakulutuba, Abalahama, Isake ne Yakoba, nabo bādi na lwitabijo mu milao ya Yehova. Abalahama walombwele lwitabijo mu mulao wa Leza wamulaile’mba mizo yonso ya panshi ikeeselanga madyese ayo mine kupityila mudi aye, ne amba lukunwa lwandi lukapebwanga ntanda. (Ngalwilo 12:​1-9; 15:​18-21) Wandi mwana Isake ne wandi munkana Yakoba baikele “bampyana pamo bwa aye ba pa mulao umo onka.” Pamwanda wa lwitabijo Abalahama ‘washikete bu mwenyi mu ntanda ya mulao,’ ke-muntu wadi utengele “kibundi kya byalwilo,” Bulopwe bwa Leza bwa momwa mūlu bwādi bwakukamusangula mwanda wa kwikala pano pantanda. (Bahebelu 11:​8-10) Lelo nibe udi na lwitabijo lwa uno muswelo?

¹⁹ Sala mukaja Abalahama wādi kadi na kubwipi kwa myaka 90 ne wādi kemupite kala kitatyi kya kubutwila bana. Ino walombwele lwitabijo mu mulao wa Leza ne wapelwe bukomo bwa “kwimita lukunwa” ne kubutula Isake. Mu uno muswelo, Abalahama wādi na myaka katwa ne wādi “pamo’nka na mufwe,” mu myanda itala kubutula, kudi aye kwabutulwa “bavule bene ba ntanda ne ntanda, pamo bwa ñenyenye ya mūlu kuvula, ne bwa musenga wa kunkula kwa mema a kalunga wakubulwa kubalwa.”​—⁠Bahebelu 11:​11, 12; Ngalwilo 17:​15-17; 18:11; 21:​1-7.

²⁰ Bakulutuba bakikokeji bafwile kumeso kwa kumona kufikidila kutuntulu kwa ino milao yalaile Leza. Inoko, “beimwene tu kulampe [bintu byādi bilailwe] ne kwiisepelela tu’nka kulampe, banena’mba: batwe [mu ntanda] twi benyi balupito.” Papityile nkongo mivule kumeso kwa bakumusuku wa Abalahama batwele mu Ntanda ya mulao. Inoko, umbula bwa būmi bwabo bonso butuntulu, bakulutuba beneleza balombwele lwitabijo mu milao ya Yehova. Byokebājimijepo lwitabijo, bakasangulwanga panopano ponka, bakekale mu kipindi kya pano pantanda kya “kibundi” kibateakaninye Leza: Bulopwe bwa Meshiasa. (Bahebelu 11:​13-16) Muswelo umo onka, lwitabijo lukokeja kwitukwasha tushale nyeke na kikokeji kudi Yehova nansha shi ketumwenepo bukidibukidi kufikidila kwa bintu byonso bitulumukwa byaetulaile. Kadi lwitabijo luketukunka ku mutyima tukokele kudi Leza, ka na mokyaikadile kudi Abalahama. Mukulutuba wasambulwidile kipyanwa kya kumushipiditu ku bakumusuku wandi, muswelo umo onka netu tukokeja kukwasha betu bana balombole lwitabijo mu milao ya Yehova ya buleme.​—⁠Bahebelu 11:​17-21.

Lwitabijo ludi na mvubu mikatampe ku bakristu

²¹ Eyo, lwitabijo kelwimaninepo enka pa kukulupila bitupu mu kufikidila kwa milao ya Yehova. Umbula bwa mānga yonso ya muzo wa muntu, kyādi kifwaninwe nyeke kulombola lwitabijo mudi Leza mu miswelo mishileshile mwanda wa kumona muswelo wa kwitabijibwa nandi. Polo walombwele’mba “kwakubulwa kwitabija kekyendelemopo kumutōkeja [Yehova Leza] ku mutyima; ke-muntu yewa wakwiya kudi Leza i kimwendele’mba etabije’mba: Eyo, udi ponka, upala mpalo boba bamukimba ne mikeketo.” (Bahebelu 11:⁠6) Dyalelo pakwikala mulumbuluke kumeso a Yehova, kifwaninwe kulombola lwitabijo mudi Yesu Kristu ne mu kitapwa kya bukudi kyaletele Leza kupityila mudi aye. (Loma 5:8; Ngalatea 2:​15, 16) Ka na mwekilombwedile kala Yesu, “Mwanda aye Leza byāsenswe bapano pantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kuladila monka nyeke ne nyeke. Ino wakwitabija mudi Mwana nabya udi ne būmi bwa kulādila monka nyeke ne nyeke, nanshi yewa wakubulwa kwitabija nankyo kakamonepo būmi, mhm, ino kukalabala kwa Leza kudi nandi pādi, kumutengele.”​—⁠Yoano 3:​16, 36.

²² Yesu udi na mwingilo mukatampe mu kufikidila kwa milao ya Leza itala pa Bulopwe bulomba bakristu. (Isaya 9:​6, 7; Danyele 7:​13, 14; Mateo 6:​9, 10) Ka na mwekilombwedile kala ­Petelo, ­kwalamuka kwa mpala ya Yesu kwalombwele bubinebine bwa kinenwa kya bupolofeto kitala pa kwiya kwa Yesu mupebwe lupusa lwa bulopwe ne muvwikwe ntumbo. Bulopwe bwa Meshiasa bukafikidijanga mulao wa Leza mukwabo, Petelo wasonekele’mba: “Monka mwendele mwanda-wamulao wandi, tutengele madiulu mapya, ne ntanda ingi mipya mo mwikalanga boloke.” (2 Petelo 3:13) Bupolofeto bwa muswelo umo bwafikidile mu kitatyi kyajokēle Bayuda mu yabo ntanda mu 537 K.K.K., mu Babiloni mobādi bamuninwe bupika, munshi mwa bwendeji bwa Zolobabele, muludiki, ne Yoshua, kitobo mukatampe. (Isaya 65:17) Ino Petelo wesambīle pa kitatyi kya kumeso kya “madiulu mpaya”​—⁠Bulopwe bwa mūlu bwa Meshiasa⁠—​bukaludika “ntanda impya,” muzo wa bantu boloke bakekala pano pantanda.​—⁠Ezankanya Mitoto 96:⁠1.

²³ Batwe byotudi bengidi bakikokeji ba Yehova ne balondi ba wandi Mwana muswe Yesu Kristu, tutengele na buya bonso ntanda impya ilailwe na Leza. Tuyukidile’mba pano keidi pabwipi ne tudi na lwitabijo’mba milao ya Yehova yonso ya buleme ikafikidilanga. Pa kunanga mu muswelo mulumbuluke kumeso a Leza, tufwaninwe kukomeja lwitabijo lwetu na kutentekelapo bulumbuluke, buyuki, kwīfula, kūminina, bwineleza, buswe bwa bubana na bana ne kisanso. * Pano potwafika pa dino ditabula mu bwifundi bwetu, twiipangulei bino bipangujo: I muswelo’ka otukokeja ­kulombola bulumbuluke? Ne bulumbuluke bwetu ­buketuletelanga byabuyabuya’ka kudi batwe ne ku bantu bakwabo, nakampata ku balunda netu bakristu balombola lwitabijo mu milao ya Leza?

[Kunshi kwa dyani]

[Bipangujo]

1. I kika kitupa muswelo wa kulombola lwitabijo?

2. I muswelo’ka ushintulwile mutumibwa Polo “lwitabijo”?

3. I kika kikafikila bakristu bashingwe-māni shi bendelele na kulombola lwitabijo?

4. I ngikadilo’ka yotufwaninwe kutentekela pa lwitabijo lwetu?

5, 6. Bulumbuluke i kika, ne i muswelo’ka otukokeja kwibubweja ku lwitabijo lwetu?

7. Mwanda’ka tufwaninwe kubweja buyuki ku lwitabijo lwetu ne ku bulumbuluke bwetu?

8. Kwīfula i kika, ne i muswelo’ka okukwatañene na kūminina?

9. (a) Bwineleza i kika? (b) Mwanda’ka tufwaninwe kutentekela buswe bwa bubana-nabana ku bwineleza bwetu? (c) I muswelo’ka otukokeja kubweja kisanso ku buswe bwetu bwa bubana-nabana?

10. (a) I kika kyotukalonga shi tubweje bulumbuluke, buyuki, kwīfula, kūminina, bwineleza, buswe bwa bubana na bana ne kisanso ku lwitabijo lwetu? (b) Kikekala namani shi muntu witela bu mukristu kadipo na ino ngikadilo?

11. Mungya buluji, bakristu bashingwe-māni bafwaninwe kwikala na mwikadilo wa muswelo’ka?

12. I muswelo’ka otufwaninwe kwivwana binenwa bidi mu 2 Petelo 1:​12-15?

13. I bukamoni’ka bwa kukomeja lwitabijo lwetu bwalombwele Leza pamwanda utala kwiya kwa ­Kristu?

14. Kwalamuka kwa mpala ya Yesu kufwaninwe kwikala na lupusa’ka mu lwitabijo lwetu?

15. I kika kifwaninwe kulonga mwanda wa kutá mutyima ku kinenwa kya bupolofeto?

16. Mwanda’ka tufwaninwe kukulupila’mba Leza ukafikidijanga milao yonso isonekelwe mu Kinenwa kyandi?

17. Lwitabijo lwa Abele lwādi lwimanine pa mulao’ka?

18, 19. Abalahama ne Sara balombwele lwitabijo mu bika?

20. Nansha byokebamwenepo kufikidila kubwaninine kwa milao yebalaile Leza, i kika kyalongele bakulutuba?

21. Dyalelo pa kusaka kwikala mulumbuluke kumpala ya Leza, tufwaninwe kulombola lwitabijo mudi ani?

22. Bulopwe bwa Meshiasa bukafikidijanga mu­lao’ka?

23. I bipangujo’ka bitala pa bulumbuluke byotukabandaula pano?

 [Bilembwa bya pa Bifwatulo]

Lelo uyukile kwalamuka kwa mpala ya Yesu mokukokeja kwikadila na lupusa mu lwitabijo lwa muntu kampanda?

Mukalondolola namani?

◻ I muswelo’ka ukokeja kushintululwa “lwitabijo”?

◻ Kukwatañana na 2 Petelo 1:​5-7, i ngikadilo’ka yotufwaninwe kubweja ku lwitabijo lwetu?

◻ Kwalamuka kwa mpala ya Yesu kufwaninwe kwikala na lupusa’ka mu lwitabijo lwetu?

◻ I kimfwa’ka kya lwitabijo kyaletele Abele, Abalahama, Sala ne bengidi ba Leza bakwabo ba mu kitatyi kyakala?